မိူဝ်ႈဝႃး ဝၼ်းတီႈ 29/04/2025 သိုၵ်းၵဝ်ႈၵၢင်ႉ MNDAA တင်း ပႃႇတီႇမႂ်ႇသုင်ၸိုင်ႈတႆး/ တပ်ႉသိုၵ်းၸိုင်ႈတႆး SSPP/ SSA ပဵၼ်ပၢင်တိုၵ်းၵၼ် ၼႂ်းထုင်ႉၼမ်ႉမလႄႈ ထုင်ႉသႅင်ၵႅဝ်ႉ ၸႄႈဝဵင်းသီႇပေႃႉ ၸႄႈတွၼ်ႈၵျွၵ်ႉမႄး ၸိုင်ႈတႆးပွတ်းႁွင်ႇ။

ႁဵတ်းႁႂ်ႈၵူၼ်းမိူင်းတူၵ်းၸႂ် တိုၼ်ႇသၢၼ်ႈၵႂႃႇသေ မၢင်ၸိူဝ်းၵေႃႈ ထတ်းသၢင်ဝႃႈ သိုၵ်းတႆးတင်း သိုၵ်းၵဝ်ႈၵၢင်ႉၼႆႉ ပဵၼ်ဢူၺ်းလီၵၼ်ယူႇ။ ယွၼ်ႉသင်လႄႈ ထိုင်တီႈပေႃးလႆႈႁႂ်ႈသဵင်ၵွင်ႈၵၢင်ႇဢွၵ်ႇ တိုၵ်းယိုဝ်းၵၼ် လိုပ်ႈလမ်းၵၼ် ထွႆဢွၵ်ႇၼႂ်းပိုၼ်ႉတီႈ ၸဵမ်ၸိူဝ်းၼႆႉယူႇ။

လွင်ႈတၢင်း ဢၼ်သိုၵ်းတင်းသွင်ၸုမ်း လႆႈၶဵင်ႈၶႅင်ၵၢၼ်သိုၵ်းတေႃႇၵၼ်မႃး ၼႂ်းထုင်ႉၼမ်ႉမတင်း သႅင်ၵႅဝ်ႉၼႆႉ ယွၼ်ႉသိုၵ်းၵဝ်ႈၵၢင်ႉ ဢဝ်ႁႅင်းသိုၵ်း တၢင်းဝဵင်းလႃႈသဵဝ်ႈမႃးတၢင်းသၢႆၼမ်ႉပွင်ႈ လတ်းၶဝ်ႈၵႂႃႇၸူး ၼႂ်းထုင်ႉၼမ်ႉမ ဢွင်ႈတီႈ ပႃႇတီႇမႂ်ႇသုင်ၸိုင်ႈတႆး SSPP ၵုမ်းၵမ်ဝႆႉလႄႈ တင်းသွင်ၾၢႆႇဢုပ်ႇဢူဝ်းၵၼ် ဢမ်ႇလႆႈသေ ၸင်ႇလႆႈပဵၼ်ပၢင်တိုၵ်းၵၼ် ၵႂႃႇၼႆ ၵူၼ်းမိူင်းၼႂ်းပိုၼ်ႉတီႈ ထုင်ႉၼမ်ႉမၵေႃႉၼိုင်ႈ သပ်း လႅင်းလၢတ်ႈၼႄတီႈၽူႈတွႆႇႁွၵ်ႈၼင်ႇၼႆ။

“သိုၵ်းၵဝ်ႈၵၢင်ႉၼႆႉ မိူဝ်ႈသိုၼ်း ဝၼ်းတီႈ 28/04/2025 ယၢမ်းႁူဝ်ၶမ်ႈ မွၵ်ႈ 5 မူင်းၼၼ်ႉ ၵိုင်ႉၵၢင်ႉဢဝ်ႁႅင်း သိုၵ်းၶဝ် မႃးႁႅတ်ႉဝႅတ်ႉလွမ်ႉ သိုၵ်းတႆး။ မိူဝ်ႈၼၼ်ႉ လႆႈငိၼ်းသဵင်ၵွင်ႈ ဢွၵ်ႇယူႇၵမ်းၼိုင်ႈ။ ဝၢႆးၼၼ်ႉ လႆႈႁၼ် ၵႃးသိုၵ်းၵဝ်ႈၵၢင်ႉ တၢင်ႇသိုၵ်းတႆးမႃးဝႆႉတၢင်း ဝၢၼ်ႈၼႃးၵုၼ်ၼၼ်ႉယူႇ။ သိုၵ်းၵဝ်ႈၵၢင်ႉၶဝ်ၼႆႉ ဢၼ်ပႆတိၼ်မႃးၵေႃႈ ႁၼ်ၼမ်ဝႆႉၼင်ႇၵဝ်ႇ ၶႃႈၼေႃႈ။ ၶီႇၵႃး၊ ၶီႇရူတ်ႉၶိူင်ႈမႃးၵေႃႈမီး ”။

လႆႈႁူႉဝႃႈ ဝၼ်းတီႈ 28/04/2025 ယၢမ်းတၢမ်းၶမ်ႈၼၼ်ႉ သိုၵ်းၵဝ်ႈၵၢင်ႉ တီႉၺွပ်းဢဝ် ၵူၼ်းသိုၵ်း SSPP ဝႆႉသေ မိပ်ႇငႅၼ်းတဵၵ်းၸႂ်ႉသိုၵ်းတႆး SSPP ထွႆဢွၵ်ႇ ၼႂ်းပိုၼ်ႉတီႈထုင်ႉၼမ်ႉမ ဝၢၼ်ႈၼႃးၼၼ်း၊ ဢိူင်ႇ ၼႃးၼိဝ်ႉ၊ လွႆၼႃးသၢႆး။ တေလႆႈထွႆဢွၵ်ႇပူၼ်ႉ ၾၢႆႇၸၢၼ်းတၢင်းၵႃးလူင် ဝၢၼ်ႈသွင်ၵေးၼႆယူႇ။ ယွၼ်ႉၵူဝ် သဵင်ၵွင်ႈတႅၵ်ႇ ၵူဝ်ၵူၼ်းမိူင်း တူၵ်းၸႂ်မီးလွင်ႈယၢပ်ႇလႄႈ SSPP ၸင်ႇလႆႈ ထွႆၵႂႃႇယူႇဝႆႉ တၢင်းဝၢၼ်ႈၼႃး တေႃႇ ဝႃႈၼႆ။

ဝၼ်းတီႈ 29/04/2025 ယၢမ်းၵၢင်ၼႂ် မွၵ်ႈ 10 မူင်းၶိုင်ႈ သိုၵ်းၵဝ်ႈၵၢင်ႉ MNDAA ဢဝ်ႁႅင်းသိုၵ်းသေ လုၵ်ႉတၢင်းဝၢၼ်ႈတိုင်းႁႆး မုင်ႈၼႃႈၵႂႃႇတၢင်း ဝၢၼ်ႈၵျွင်းမႂ်ႇတင်း ဝၢၼ်ႈပၢင်ငႃးလႄႈ တင်းသွင်ၾၢႆႇ ၸင်ႇလႆႈ တႄႇပဵၼ်ပၢင်တိုၵ်းၵၼ်မႃး။

သိုၵ်းၵဝ်ႈၵၢင်ႉ ႁႂ်ႈၵူၼ်းသိုၵ်း SSPP ဢၼ်ပၵ်းသဝ်းယူႇဝႆႉတီႈ ဝၢၼ်ႈၸေႈ၊ ၽႃသိူဝ်ႇ၊ လူင်ႁွမ်ႈ၊ ၵျေႃႇတီး၊ ႁူဝ်ပၢႆ၊ ပၢင်ႇလေႃႉ တေႃႇထိုင် ဝၢၼ်ႈၼႃးၼၼ်း ဢိူင်ႇပၢင်ႇလေႃႉၼၼ်ႉ ထွႆဢွၵ်ႇၵႂႃႇတင်းသဵင်ႈ။ ဝႆႉပၼ် ၶၢဝ်းယၢမ်းလိုၼ်းသုတ်း ဝၢႆးဝၼ်း 3 မူင်း ၼႆယူႇ။ ထိုင်မႃးယၢမ်းဝၢႆးဝၼ်း မွၵ်ႈ 4 မူင်းပၢႆ လႆႈႁူႉၶၢဝ်ႇထႅင်ႈဝႃႈ ၵူၼ်းသိုၵ်း SSPP ၸိူဝ်းပၵ်းတပ်ႉဝႆႉ ၼႂ်းငဝ်ႈငုၼ်း ပျီႇတူႉၸိတ်ႉသႅင်ၵႅဝ်ႉၼၼ်ႉ ထွႆဢွၵ်ႇတပ်ႉပၼ် သိုၵ်းၵဝ်ႈၵၢင်ႉမူတ်း ၼႆယူႇ။

ဢိင်ၼိူဝ်လွင်ႈၼႆႉသေ ၵူၼ်းမိူင်းၼႂ်းပိုၼ်ႉတီႈၶဝ် ဢွၼ်ၵၼ်ထတ်းသၢင်ဝႃႈ ယွၼ်ႉသိုၵ်းၵဝ်ႈၵၢင်ႉ ၶႂ်ႈၵုမ်းၵမ် ၶူင်းၵၢၼ် ထၢၼ်ႇႁိၼ်တီႈၼမ်ႉမၼၼ်ႉ ဝႃႈၼႆ။

တီႈပၢင်တိုၵ်း သိုၵ်းၵဝ်ႈၵၢင်ႉ MNDAA တင်း သိုၵ်းတႆး SSPP ၼႂ်းထုင်ႉၼမ်ႉမလႄႈ ထုင်ႉသႅင်ၵႅဝ်ႉၼႆႉ မီးၶၢဝ်ႇလိုဝ်း ဢွၵ်ႇမႃးဝႃႈ သိုၵ်းၵဝ်ႈၵၢင်ႉ တၢႆ 2 ၵေႃႉ ဢိၵ်ႇပႃး ၵူၼ်းမၢတ်ႇၸဵပ်းၼႆသေတႃႉ သိုၵ်းတင်း သွင်ၾၢႆႇတႄႉၵေႃႈ ဢမ်ႇပႆႇပိုၼ်ၽၢဝ်ႇဢွၵ်ႇဝႆႉပဵၼ်တၢင်းၵၢၼ်။

ယၢမ်းလဵဝ် သိုၵ်းတႆး ၶိုၼ်းဢဝ်တီႈယူႇပၵ်းတပ်ႉဝႆႉတၢင်း ဢိူင်ႇၼႃးၸွၵ်ႇ၊ ဝၢၼ်ႈႁူဝ်ပၢႆ၊ ဝၢၼ်ႈၸၢင်ႉ ၸိူဝ်းၼႆႉသေ သိုၵ်းၵဝ်ႈၵၢင်ႉတႄႉ ပၵ်းတပ်ႉဝႆႉတီႈဝၢၼ်ႈပၢင်ႇလေႃႉ ဢိူင်ႇမိူင်းပၢႆ၊ ဝၢၼ်ႈၽႃသိူဝ်ႇ၊ ဝၢၼ်ႈ ၵျေႃႇတီး၊ ဝၢၼ်ႈမၢၵ်ႇၶီႈၼူ ၸဵမ်ၸိူဝ်းၼႆႉ။

ၸွမ်းသဵၼ်ႈတၢင်းလူင် ဝၢၼ်ႈၸၢင်ႉ – မိူင်းယႆ တေႃႇထိုင် သႅင်ၵႅဝ်ႉ၊ ဢိူင်ႇၼမ်ႉမ ၸိူဝ်းၼႆႉ သိုၵ်းၵဝ်ႈၵၢင်ႉ ၶဝ်ႈပၵ်းတပ်ႉ ပၢင်သဝ်းဝႆႉ။ ပၢင်တိုၵ်း SSPP တင်း  MNDAA ၼႂ်းထုင်ႉသႅင်ၵႅဝ်ႉတင်း မိူင်းယႆတႄႉ ယဵၼ် ဝႆႉႁင်းၽႂ်မၼ်းသေ ၶဵင်ႈၶႅင်ၵၢၼ်သိုၵ်းၵၼ်ဝႆႉလႄႈ ႁဵတ်းႁႂ်ႈၵူၼ်းမိူင်းၼႂ်းပိုၼ်ႉတီႈမႆႈၸႂ် ၵူဝ်သဵင်ၵွင်ႈတႅၵ်ႇ ၶိုၼ်းၼႆယူႇ။

“မိူဝ်ႈၼႆႉ သိုၵ်း SSPP ၶဝ် သင်ႇႁႂ်ႈၵူၼ်ႈဝၢၼ်ႈ ငိူင်ႉပၢႆႈဢွၵ်ႇဝၢၼ်ႈဝႆႉၼႆလႄႈ မိူၼ်ၼင်ႇ ၵူၼ်းဝၢၼ်ႈႁၢင်ၼႃး၊ ဝၢၼ်ႈႁိူၼ်းလွၼ်ႉ ဢၼ်မီးၼႂ်းၵႄႈသီႇပေႃႉ – လႃႈသဵဝ်ႈ ၸိူဝ်းၼႆႉတႄႉ ဢွၼ်ၵၼ်ပၢႆႈဢွၵ်ႇဝၢၼ်ႈဝႆႉ ၵမ်ႈၽွင်ႈယဝ်ႉ”- ၵူၼ်းပိုၼ်ႉတီႈ ဝဵင်းသီႇပေႃႉလၢတ်ႈ။  

လိူဝ်ၼၼ်ႉ ၽွင်းသိုၵ်းၵဝ်ႈၵၢင်ႉတင်း သိုၵ်းတႆး ပဵၼ်ပၢင်တိုၵ်းၵၼ်တၢင်း ထုင်ႉၼမ်ႉမ ၸႄႈဝဵင်းသီႇပေႃႉ ယူႇၼၼ်ႉ သိုၵ်းၵဝ်ႈၵၢင်ႉ ဢၼ်ပၵ်းတပ်ႉပၢင်သဝ်းဝႆႉတၢင်းဝၢၼ်ႈၼမ်ႉပၢၼ်း ဝဵင်းပၢင်ႇသၢႆး ၸႄႈတွၼ်ႈ မူႇၸေႊၼၼ်ႉ ၵႂႃႇတီႉၺွပ်း ဢဝ်ၵူၼ်းသိုၵ်း SSPP ဢၼ်ပႂ်ႉၵဵၵ်ႉလၢၼ်ႇဝႆႉ တီႈဝၢၼ်ႈၼမ်ႉသွၼ်းၼၼ်ႉ ၵူၺ်းဢမ်ႇၵႃး ဢဝ်ၾႆးၽဝ်ၵဵတ်ႉ/ လၢၼ်ႇ ၵႂႃႇပႃးထႅင်ႈၼႆ – ၵူၼ်းမိူင်းၼႂ်းပိုၼ်ႉတီႈ ဝဵင်းပၢင်ႇသၢႆးၵေႃႉၼိုင်ႈ လၢတ်ႈၼႄၼင်ႇၼႆ။

“သိုၵ်းၵဝ်ႈၵၢင်ႉၶဝ်ဝႃႈတႄႉ ပဵၼ်ဢူၺ်းလီၵၼ်ၼႆႉ ဢမ်ႇလူဝ်ႇတင်ႈလၢၼ်ႇတေႃႇၵၼ်ၼႆႁႄ ၶဝ်ၺွပ်းဢဝ်ၵႂႃႇ ၵူၼ်းသိုၵ်းတႆး မွၵ်ႈၶိုင်ႈၸူဝ်ႈမူင်းၼိုင်ႈ။ ယဝ်ႉၵေႃႈ ၾႆးၽဝ်ပႅတ်ႈလၢၼ်ႇၼၼ်ႉယဝ်ႉ ၸင်ႇပွႆႇသိုၵ်း တႆးမႃးၶိုၼ်း။ ၶဝ်ႁဵတ်းၸိူင်ႉၼႆၼႆႉ မိူၼ်ၵၼ်တင်း တင်ႈၸႂ်ႁႃတၢင်းၽိတ်းၵၼ်ၵူၺ်း”။

ဝၢႆးလင် ပၢင်ယၼ်ႇသိုၵ်း 1027 မႃး တီႈဝဵင်းပၢင်ႇသၢႆးၼႆႉ ပႅၵ်ႉသမ်ႉဝႃႈ သိုၵ်းၵဝ်ႈၵၢင်ႉ ပိုၼ်ၽၢဝ်ႇ ယိုတ်း ၵုမ်းလႆႈၼႆသေတႃႉ ၸွမ်းသၢပ်ႇဝဵင်းပၢင်ႇသၢႆးၼႆႉ တိုၵ်ႉမီးၸုမ်းယိပ်းၵွင်ႈၵၢင်ႇၸၢဝ်းၶိူဝ်း လၢႆလၢႆၸုမ်း ယူႇသဝ်းဝႆႉ ဝႃႈၼႆ။

တႅမ်ႈ – မူၺ်ၶမ်း