ၼႂ်းႁၢင်လိူၼ်ဢေႊပရိူဝ်ႊၼႆႉ သိုၵ်းၵဝ်ႈၵၢင်ႉ MNDAA ၵႂႃႇလိုပ်ႈၵူၼ်းၶၢႆၵုၼ်ႇလႄႈ ၽၵ်းယိူဝ်ႈၼၢင်းၶဵဝ် ဢွၵ်ႇၵၢတ်ႇ ႁဵတ်းႁႂ်ႈၵူၼ်းၶၢႆၵၢတ်ႇၵေႃႉၼိုင်ႈ တူၵ်းၸႂ်ၵူဝ်သေ လိုမ်းတူဝ်ၵႂႃႇ တီႈၼႂ်းၵၢတ်ႇလူင်ဝဵင်းသႅၼ်ဝီ ၸိုင်ႈတႆးပွတ်းႁွင်ႇ။

ဝၢႆးလင် သိုၵ်းမၢၼ်ႈ ဢဝ်ၶိူင်ႈမိၼ် ပွႆႇမၢၵ်ႇသႂ်ႇ တီႈၵၢတ်ႇလူင်ဝဵင်းသႅၼ်ဝီ ဢၼ်မီးၼႂ်းၵၢင်ဝဵင်းၼၼ်ႉ သိုၵ်းၵဝ်ႈၵၢင်ႉ ဢမ်ႇမူၼ်ႉမႄးပၼ်ၶိုၼ်းၵၢတ်ႇလူင် ႁႂ်ႈၵူၼ်းမိူင်းလႆႈၵႃႉငၢႆႈၶၢႆလီလႄႈ ၵူၼ်းမိူင်းလႆႈပၢႆးၶၢႆ ၶူဝ်းၵုၼ်ႇလႄႈ ၽၵ်းၶဵဝ် ႁိမ်းသွင်ၾၢၵ်ႇၶၢင်ႈတၢင်းလူင် သႅၼ်ဝီ – မူႇၸေႊ ၼႂ်းၵၢင်ဝဵင်းလူင်သႅၼ်ဝီ။

သိုၵ်းၵဝ်ႈၵၢင်ႉ မီးၽႅၼ်ၵၢၼ်လႄႈ ယိူင်းဢၢၼ်းၸိူင်ႉႁိုဝ် တႃႇၸတ်းၵၢၼ်ပိုၼ်ႉတီႈၵၢတ်ႇလူင် ၼႂ်းၵၢင် ဝဵင်းလူင်သႅၼ်ဝီၼႆႉ ဢမ်ႇပိုၼ်ၽၢဝ်ႇပၼ်ၾၢင်ႉ ႁႂ်ႈၵူၼ်းမိူင်းလႆႈႁူႉႁၼ်ၸွမ်းသင်ၼႆ သမ်ႉတဵၵ်းလိုပ်ႈ ၵူၼ်းၵႃႉၶၢႆၵုၼ်ႇလႄႈ ၵူၼ်းၶၢႆၽၵ်းၶဵဝ် ၵႂႃႇၶၢႆဢွင်ႈတီႈၵၢတ်ႇမႂ်ႇ ဢၼ်မီးႁိမ်းဢေးသျႃးဝေႃး ဢိူင်ႇပၢင်ႇလေႃႉၼၼ်ႉၼႆ ၵူၼ်းမိူင်းသႅၼ်ဝီ ၵေႃႉၼိုင်ႈ လၢတ်ႈ ၼႄတီႈၽူႈတွႆႇႁွၵ်ႈၼင်ႇၼႆ။

“ၵၢတ်ႇမႂ်ႇတီႈဢၼ်ၶဝ်ၸႂ်ႉၵႂႃႇၶၢႆၼၼ်ႉ မၼ်းၵႆၼႃႇ။ ယဝ်ႉၵေႃႈ ဢမ်ႇၶၢႆလီ။ ၶဝ်သမ်ႉပၢႆပိုတ်ႇ ပၢင်တေႃႇ လွင်းဝႆႉၸွမ်းၼႂ်းၵၢတ်ႇၼၼ်ႉၵွၼ်ႇ။ ၵႃႈႁွင်ႈၶၢႆတၢင်းၶၢႆၵေႃႈ ၶဝ်ယွၼ်းၼမ်ႁႅင်းၼႃႇ။ ႁဝ်းဢမ်ႇမီးငိုၼ်း တႃႇၸၢႆႇပၼ်ၶဝ်လူး။ တီႈၵၢတ်ႇၵဝ်ႇလူင်ၼႆႉသမ်ႉ ႁဝ်းပေႃးမီးတီႈယူႇႁဝ်းဝႆႉယူႇၸဵမ်ပိုင်းယဝ်ႉလူး။ ၼႂ်ၼႆႉ ၶဝ်မႃးလိုပ်ႈၵူၼ်း ၸိူဝ်းဢၼ်ဢမ်ႇယွမ်းၵႂႃႇၶၢႆတီႈၵၢတ်ႇမႂ်ႇၼၼ်ႉၶိုၼ်းၼၼ်ႉၼႃႇ။ သမ်ႉပႃးၵွင်ႈပႃးၵၢင်ႇ ႁႄ သႂ်ႇၶူဝ်းသိုၵ်းတဵမ်ႁႄ ႁိုတ်းသႂ်ႇ ႁၢတ်းသႂ်ႇပိူၼ်ႈလႄႇ။ ၼၢႆးဢၼ်ၶၢႆၵုၼ်ႇၵေႃႉၼိုင်ႈ တူၵ်းၸႂ်ၵူဝ်ႁႄ သမ်ႉပေႃးပဵၼ်လူမ်းၵႂႃႇလႄႈ ပေႃးလႆႈဢဝ်ၵႂႃႇၶိုၼ်ႈႁူင်းယႃဝႆႉ။ ယွၼ်ႉသင်ၶဝ်ဢမ်ႇၶႂ်ႈပၼ်ၶၢႆတီႈ ၵၢတ်ႇ ၵဝ်ႇၼႆႉ ၶဝ်ဢမ်ႇသပ်းလႅင်းၼႄႁဝ်းလီလီလူး”။  

လွင်ႈဢၼ်သိုၵ်းၵဝ်ႈၵၢင်ႉ MNDAA တဵၵ်းႁႂ်ႈၵူၼ်းမိူင်းၼႂ်းပိုၼ်ႉတီႈ ၶၢႆႉၵႂႃႇၶၢႆၽၵ်းၶဵဝ်တင်း ၵုၼ်ႇၵူႈၸိူဝ်း ၸိူဝ်းၼႆႉ တႄႇႁူဝ်လိူၼ်ဢေႊပရိူဝ်ႊၼႆႉမႃးသေ ၵူၼ်းမိူင်းၵမ်ႈၽွင်ႈဢမ်ႇၽွမ်ႉၸွမ်းလႄႈ ႁဵတ်းႁႂ်ႈၵူၼ်း မိူင်းတင်း သိုၵ်းၵဝ်ႈၵၢင်ႉ မီးပၼ်ႁႃၵၼ်မႃး လၢႆလၢႆလွင်ႈ။

တင်ႈတႄႇပဵၼ်ၽႅၼ်ယၼ်ႇသိုၵ်း 1027 ၼၼ်ႉသေ သိုၵ်းၵဝ်ႈၵၢင်ႉ MNDAA ၵုမ်းၵမ်ဝဵင်းမႃးၼႆႉ ႁၢၼ်ႉတေႃႇယၢမ်းလဵဝ် ၵူၼ်းမိူင်းသႅၼ်ဝီ ယင်းပႆႇၸႂ်ႉတိုဝ်းလႆႈၾႆးၾႃႉ။ လႆႈသႂ်ႇ ၶွၼ်ႇၵူႈလွင်ႈလွင်ႈ ပၼ်တီႈသိုၵ်း ၵဝ်ႈၵၢင်ႉ ၼမ်လိူဝ် ၼင်ႇၵူၼ်းမိူင်းပွင်ပဵၼ်လႆႈလႄႈ ႁဵတ်းႁႂ်ႈၵူၼ်းမိူင်းႁူပ်ႉလွင်ႈယၢပ်ႇၵိၼ်းႁႅင်း။ လႅင်းၾူၼ်း၊ လႅင်းဢိၼ်ႊထိူဝ်ႊၼႅတ်ႉၵေႃႈ ယင်းပႆႇၸႂ်ႉတိုဝ်းလႆႈ ႁႂ်ႈပေႃးၶႅမ်ႉလႅပ်ႈၶိုၼ်းမိူၼ်ၵဝ်ႇ ၼႆယဝ်ႉ။

တႅမ်ႈ – ၽူၺ်းၼုမ်ႇ