ဝၼ်းတီႈ 27/04/2025 ယၢမ်းၵၢင်ၶမ်ႈ 7 မူင်းပၢႆ ၾူၼ်လူင်လူမ်းလႅင်ႉ ၽတ်ႉပဝ်ႇ တီႈဝတ်ႉဝိႁၢရ်ဝၢၼ်ႈႁႃႉ ဢိူင်ႇမိူင်းလဵၼ်း ၵိင်ႇၽႄၸႄႈဝဵင်းတႃႈလိူဝ်ႇ ၸႄႈဝဵင်းတႃႈၶီႈလဵၵ်း ၸိုင်ႈတႆးပွတ်းဢွၵ်ႇၶူင်း ႁဵတ်းႁႂ်ႈတုမ်ႉတိူဝ်ႉထီး လင်ၶႃးမုင်းဝိႁၢရ် ၸိူဝ်းၼႆႉ ယၢတ်ႇတူၵ်းလူႉၵွႆၼမ်။

ၶူးဝႃးၼွႆႉ ၽူႈၵွၼ်းဝတ်ႉဝိႁၢရ်ဝၢၼ်ႈႁႃႉ လၢတ်ႈတီႈၽူႈတွႆႇႁွၵ်ႈဝႃႈ – “မိူဝ်ႈၽွင်းၼၼ်ႉ ၸဝ်ႈၶဝ် တိုၵ်ႉၼင်ႈဝႆႈၽြႃးဝႆႉယူႇ လူမ်းပၼ်ႇတႃၵႆႇ မႃးပတ်ႉဢဝ်ထီးဝိႁၢရ်လႄႈ လင်ၶႃးမုင်း ၸိူဝ်းၼႆႉ ယၢတ်ႇတူၵ်းလူႉၵွႆ တင်းၼမ်။ ယဝ်ႉၵေႃႈ ၽၵ်းတူ ၸိူဝ်းၼႆႉထႅင်ႈ။ လိူဝ်ၼၼ်ႉ ၽႃဢုတ်ႇ ၸိူဝ်းၼႆႉၵေႃႈ တႅၵ်ႇၸတ်ႉလူႉၵွႆ ၸွမ်းထႅင်ႈတင်းၼမ်”- ဝႃႈၼႆ။

ထိုင်မႃး မိူဝ်ႈၼႆႉ ဝၼ်းတီႈ 28 ယၢမ်းၵၢင်ၼႂ် ၶူးဝႃးၼွႆႉ လႆႈႁွင်ႉၾၢႆႇၵေႃႇသၢင်ႈၶဝ် မႃးထတ်းတူၺ်းသေ တေၵေႃႇၵုမ်းလုမ်းလႃးၶိုၼ်းၼႆ တင်းမူတ်း တေတူၵ်ႈမႅၼ်ႈငိုၼ်းထႆးယူႇ မွၵ်ႈ 6 သႅၼ်ဝၢတ်ႇ ဝႃႈၼႆ။

“ၼႂ်းဝၼ်းသွင်ဝၼ်းၼႆႉ ၸဝ်ႈႁဝ်း တေႁႅၼ်းတၢၼ်း ၶဝ်ႈ 4 ၽိုၼ်ႇသေ ယႃႉလူင်းၶိုၼ်း ဢၼ်လူႉၵွႆဝႆႉ ၸိူဝ်းၼၼ်ႉတင်းမူတ်း တေမႄးၵုမ်းလုမ်းလႃးမႂ်ႇၶိုၼ်း။ တီႈလင်ၶႃးမၼ်းၸိူဝ်းၼၼ်ႉတႄႉ ဢမ်ႇၸၢင်ႈ ဢဝ်ၶိုၼ်းယဝ်ႉ ၼၼ်ႉၵေႃႈ တေယႃႉလူင်း။ တီႈၽႃဢုတ်ႇမၼ်း ဢၼ်ၸတ်ႉဢၼ်တႅၵ်ႇမၼ်း ၸိူဝ်းၼၼ်ႉၵေႃႈ တေပေႃႉလူင်းၶိုၼ်းသေ ၵေႃႇၵုမ်းၶိုၼ်းၸိူင်ႉၼၼ်”- ၶူးဝႃးၼွႆႉ သိုပ်ႇလၢတ်ႈၼႄၼင်ႇၼႆ။

ဝတ်ႉဝိႁၢရ် ဝၢၼ်ႈႁႃႉၼႆႉ ပဵၼ်ဝတ်ႉဝိႁၢရ်မႂ်ႇ တိုၵ်ႉၵေႃႇသၢင်ႈမႃးမီးၶၢဝ်းတၢင်းမွၵ်ႈ 4 ပီၼႆႉၵူၺ်း ပူၼ်ႉမႃး ၶၢဝ်းတၢင်း ပႆႇႁိုင်ၼႆႉ ၸဝ်ႈသိလ်ထမ်း ၶူးဝႃးဝုၼ်းၸုမ်ႉ တိုၵ်ႉမႃးယၢတ်ႇၼမ်ႉၵႂႃႇၵူၺ်း။ ဝတ်ႉဝိႁၢရ်ၼႆႉ လႆႈၵေႃႇသၢင်ႈမႃး ႁၢၼ်ႉတေႃႇယဝ်ႉတူဝ်ႈလီငၢမ်းၵႂႃႇၼႆႉ တင်းမူတ်းသဵင်ႈငိုၼ်းထႆးယူႇ 2 လၢၼ်ႉပၢႆ ဝႃႈၼႆ။

ယဝ်ႉၵေႃႈ တီႈဝၢၼ်ႈႁႃႉၼႆႉ တင်းမူတ်းမီးလင်ႁိူၼ်း 22 လင်ၵူၺ်းလႄႈ သင်ဝႃႈ ၽူႈမီးၼမ်ႉၸႂ်ၸေႇတႃႇၼ တီႈၸမ်ၵႆ ၶႂ်ႈလူႇတၢၼ်း ႁူမ်ႈပဵၼ်ၸဝ်ႈတႃႇၼ တႃႇတေမႄးၵုမ်းလုမ်းလႃးၶိုၼ်း တီႈဝတ်ႉဝိႁၢရ် ဝၢၼ်ႈႁႃႉၼႆႉၸိုင် ၵပ်းသိုပ်ႇတွင်ႈထၢမ်ႁူဝ်ယွႆႈ လႆႈတီႈၸဝ်ႈၶူးဝႃးၼွႆႉ မၢႆၾူၼ်းမၢၼ်ႈ 09449965965 ၼႆႉသေၵမ်း။

ဢိင်ၼိူဝ် လွင်ႈၾူၼ်လူင်လူမ်းလႅင်ႉ ၼႂ်းဝၼ်းတီႈ 27 ယၢမ်းၵၢင်ၶမ်ႈၼႆႉသေ တုမ်ႉတိူဝ်ႉပႃး ႁိူၼ်းယေးၵူၼ်းမိူင်း တၢင်းဝၢၼ်ႈလွႆသၢႆး ၸႄႈဝဵင်းၼမ်ႉၸၢင် ၸိုင်ႈတႆးပွတ်းၸၢၼ်းလႄႈ တၢင်းထုင်ႉမိူင်းယေႃ ၸႄႈဝဵင်းလႃႈသဵဝ်ႈ ၸိုင်ႈတႆးပွတ်းႁွင်ႇ ၸိူဝ်းၼၼ်ႉၵေႃႈ ႁဵတ်းႁႂ်ႈလင်ၶႃး ၽႃႁိူၼ်း ၵွၵ်းပိဝ်လူႉၵွႆၸွမ်းထႅင်ႈတင်းၼမ်။