ႁွင်ႈၵၢၼ်ၾၢႆႇပႂ်ႉတူၺ်း ၾိင်ႈၾႃႉရႃႇသီႇမိူင်းထႆးပိုၼ်ၽၢဝ်ႇဝႃႈ ၼႂ်းဝၼ်းတီႈ 11 ထိုင် 13 လိူၼ်မၢတ်ႉၶျ်ၼႆႉ လူမ်းလႅင်ႉၶၢဝ်းမႆႈတေၽတ်ႉပဝ်ႇၼႂ်းမိူင်းထႆးတွၼ်ႈၼိူဝ်ႁၢဝ်ႈႁႅင်းလႄႈ ႁႂ်ႈၵူၼ်းမိူင်း ၸဝ်ႈသူၼ်ၾၢင်ႉၵၼ်ယႂ်ႇၼမ်ဝႃႈၼႆ။
ၼႂ်းလိၵ်ႈပိုၼ်ၽၢဝ်ႇၼၼ်ႉပႃးဝႆႉဝႃႈ – ၼႂ်းၶၢဝ်းတၢင်း 3 ဝၼ်းၼႆႉ လူမ်းလႅင်ႉၼႆႉလုၵ်ႉဝၼ်းတူၵ်းမိူင်းမၢၼ်ႈ လူင်းမႃးတၢင်းဝၼ်းဢွၵ်ႇ။ ၼႂ်းဝၼ်းတီႈ 11/3/2026 တေထိုင်မႃး ၼႂ်းမိူင်းထႆးပွတ်းႁွင်ႇ မိူၼ်ၼင်ႇၵဵင်းႁၢႆး ၊ ၵဵင်းမႂ်ႇ၊ တၢၵ်ႇ၊ ၵမ်ၽႅင်းၽဵတ်း၊ သုၶူဝ်ထႆး ၊ လမ်းပုၼ်း၊ လမ်းပၢင်း၊ ၽယဝ်း၊ ၼၢၼ်ႉ၊ ၽရႄႉ၊ ဢုတ်ႇတရၻိတ်ႇ လႄႈ ၽိသၼူးလူၵ်ႉ ၸိူဝ်းၼႆႉ လူမ်းလႅင်ႉတေၽတ်ႉပဝ်ႇ ၾူၼ်လူင်မၢၵ်ႇႁဵပ်းတေတူၵ်းလႆႈတေႃႇထိုင်ဝၼ်းတီႈ 15/03/2026 ၼႆႉ။ ၵွပ်ႈၼႆ ၸဝ်ႈသူၼ်ၸဝ်ႈႁႆႈ ႁႂ်ႈဢွၼ်ၵၼ်ထွမ်ႇၶၢဝ်ႇငၢဝ်း ထုၵ်ႇလီၵဵပ်းလီဢဝ်မၢၵ်ႇမႆႉမၢၵ်ႇတွၵ်ႇ ဢမ်ႇၼၼ်ၸၢင်ႈၼပ်ႉသွၼ်ႇလွင်ႈႁူတ်းၼမ်ႉသႂ်ႇၼမ်ႉတူၼ်ႈမၢၵ်ႇတူၼ်ႈၽၵ်းၸိူဝ်းၼႆႉ- တႅမ်ႈဝႆႉၼင်ႇၼႆ။
ၼွၵ်ႈလိူဝ်ၽၢၵ်ႈၼိူဝ်ယဝ်ႉ မိူၼ်ၼင်ႇၽၢၵ်ႈၵၢင်၊ ၽၢၵ်ႈၸဵင်ႇႁွင်ႇဝၼ်းဢွၵ်ႇ၊ ၽၢၵ်ႈဝၼ်းဢွၵ်ႇၵေႃႈ တေထူပ်းၽေးလူမ်းလႅင်ႉၶၢဝ်းမႆႈမိူၼ်ၵၼ် တင်းမူတ်းတေပဵၼ် 82 ၸႄႈတွၼ်ႈ ဝႃႈၼႆဝႆႉ။
ၵွပ်ႈၼႆလႄႈ ၵူၼ်းၸိူဝ်းယူႇႁိမ်းတူၼ်ႈမႆႉယႂ်ႇ ႁိမ်းသဝ်လၵ်းၾႆး ႁိမ်းပၢႆႉၶူဝ်းသၼႃး(ၵျေႃႇၺႃႇ) ၸိူဝ်းၼႆႉၵေႃႈ ႁႂ်ႈလႆႈတူၺ်းၼႃႈၾႃႉတႃၾူၼ်၊ ႁႂ်ႈလႆႈထွမ်ႇၶၢဝ်ႇၾိင်ႈၾႃႉသေ ၸၢင်ႈငိူင်ႉၸၢင်ႈဝႄႈလႆႈ တႃႇႁႂ်ႈလွတ်ႈၽေးဝႃႈၼႆ။
ဝၼ်းတီႈ 11/03/2026 ဝၼ်းမိူဝ်ႈၼႆႉၵေႃႈ ယၢမ်းဝၢႆးဝၼ်းမွၵ်ႈ 3 မူင်း လူမ်းလႅင်ႉၶၢဝ်းမႆႈၽတ်ႉပဝ်ႇၼႂ်းၸႄႈတွၼ်ႈၵဵင်းမႂ်ႇလႄႈ မိူၼ်ၼင်ႇၸႄႈဝဵင်းမႄႈတႅင် မႄႈရိမ်း မႄႈၵျႅမ်ႇ ၸိူဝ်းၼႆႉလူမ်းၽတ်ႉပဝ်ႇႁႅင်း တူၼ်ႈမႆႉႁၢၵ်း ၊ ၾူၼ်တူၵ်းႁႃႇယႂ်ႇ မၢၵ်ႇႁဵပ်းၵေႃႈတူၵ်း။ တၢင်ႇဝဵင်းၼႂ်းၵဵင်းမႂ်ႇတႄႉမၢင်ဝဵင်းၵေႃႈၺႃးလူမ်းၽတ်ႉပဝ်ႇႁႅင်း မၢင်ဝဵင်းၵေႃႈၺႃးၾူၼ်တူၵ်း ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ