ဝၼ်းတီႈ 13/07/2026 ပလိၵ်ႈထႆးမိူင်းၵဵင်းမႂ်ႇ ႁဵတ်းၵႅင်ႈပဵၼ်ၽူႈဢႅဝ်ႇယဵမ်ႈတွင်ႈတဵဝ်း ၵူၼ်းမိူင်းမႅၵ်ႊသီႊၵူဝ်ႊသေ ငွႆးတီႉၺွပ်း ၸၢႆးၵူၼ်းမိူင်းမၢၼ်ႈ(ယိပ်းဝႂ်ႁႅင်းၵၢၼ်ယၢၼ်မိူင်း) ၵေႃႉၼိုင်ႈ ဢၼ်တိုၵ်ႉဢွၼ်ဢဝ် ၵူၼ်းၼွၵ်ႈမိူင်းဢႅဝ်ႇယဵမ်ႈၼႂ်းဝတ်ႉၸေးတီးလူင် မိူင်းၵဵင်းမႂ်ႇ။

ပလိၵ်ႈထႆး လႆႈၶၢဝ်ႇဝႃႈ “ၸၢႆးၵူၼ်းမိူင်းမၢၼ်ႈၵေႃႉၼိုင်ႈ ဢႃယု 39 ပီ ယိပ်းဝတ်းဝႂ် ၽၢတ်ႉသပွတ်ႇလႄႈ ဝီႊသႃႊဢိၵ်ႇဝႂ်ႁဵတ်းၵၢၼ် သႅၼ်းႁႅင်းၵၢၼ်ယၢၼ်မိူင်းသေ ဢွၼ်ၼမ်းၶႅၵ်ႇတွင်ႈတဵဝ်း ဢႅဝ်ႇယဵမ်ႈၼႂ်းမိူင်းၵဵင်းမႂ်ႇ” ၼႆလႄႈ ပွမ်တူဝ်ပဵၼ်ၶႅၵ်ႇတွင်ႈတဵဝ်း တိတ်းတေႃႇၸၢႆးႁႅင်းၵၢၼ်ၼၼ်ႉႁႂ်ႈဢွၼ်ဢႅဝ်ႇယဵမ်ႈ ။

ၽွင်းၼတ်ႉမၢႆၵၼ်ၼႂ်းဝၢင်းၸေးတီးလူင် ၵၢင်ဝဵင်းၵဵင်းမႂ်ႇၼၼ်ႉ ပလိၵ်ႈထႆးၶဝ်ႈတီႉၺွပ်းမၼ်းၸၢႆး သေသူင်ႇႁူင်းပလိၵ်ႈ ဢဝ်လိူင်ႈဝႆႉတၢင်းၽိတ်း 5 ၶေႃႈ။

ပိူင်လူင်ပဵၼ်တၢင်းၽိတ်း – ႁဵတ်းၵၢၼ်ႁႃၵိၼ်လဵင်ႉတွင်ႉဢွၼ်ၼမ်းၵူၼ်းၼွၵ်ႈမိူင်းဢႅဝ်ႇယဵမ်ႈ လူၺ်ႈဢမ်ႇမီးဝႂ်ၶႂၢင်ႉပဵၼ်တၢင်းၵၢၼ်။ – ပဵၼ်ၽူႈၼမ်းဢႅဝ်ႇယဵမ်ႈ(Tourist Guide) လူၺ်ႈဢမ်ႇမီးဝႂ်လၢႆႊသိၼ်ႊမၢႆၾၢင်ဢၼ်လူင်ပွင်ၸိုင်ႈၸိုင်ႈမိူင်းဢွၵ်ႇပၼ်ပဵၼ်တၢင်းၵၢၼ်။ -ၸႂ်ႉရူတ်ႉၵႃးၽိတ်းတီႈၽိတ်းတၢင်း ဢမ်ႇမႅၼ်ႈၵၼ်တင်းဢၼ်လူင်းမၢႆၾၢင်ဝႆႉ။ – ပဵၼ်ႁႅင်းၵၢၼ်ယၢၼ်မိူင်း ဢၼ်ဢမ်ႇမီးဝႂ်ႁဵတ်းၵၢၼ်။ – သမ်ႉလၵ်ႉႁဵတ်းၵၢၼ်ဢၼ်လူင်ပွင်ၸိုင်ႈထႆးႁၢမ်ႈ ႁႅင်းၵၢၼ်ႁဵတ်း – ၸဵမ်ၸိူဝ်းၼႆႉ။

ဢိင်ၼိူဝ်မၼ်းၸၢႆးလၢတ်ႈတီႈပလိၵ်ႈထႆးသေလႆႈႁူႉဝႃႈ မၼ်းၸၢႆးႁဵတ်းၵၢၼ်ၼမ်းၵူၼ်းဢႅဝ်ႇယဵမ်ႈၼႂ်းၵဵင်းမႂ်ႇလႄႈၸွမ်းႁိမ်းႁွမ်းၵဵင်းမႂ်ႇၼႆႉမႃးလႆႈ 3 ပီယဝ်ႉဝႃႈၼႆ။

ဝၢႆးလင်သိုၵ်းမၢၼ်ႈယိုတ်းဢႃႇၼႃႇၸိုင်ႈမိူင်းမႃးၼႆႉ ၵူၼ်းၼုမ်ႇမိူင်းမၢၼ်ႈ ၸိူဝ်းၶဝ်ႈပႃးၼႂ်းပၢင်ၼႄၵၢင်ၸႂ်သၢၼ်ၶတ်းသိုၵ်းမၢၼ်ႈၼၼ်ႉၵေႃႈလီ ၸိူဝ်းဢမ်ႇၶဝ်ႈပႃးၵေႃႈယဝ်ႉလႆႈပၢႆႈဢွၵ်ႇၼွၵ်ႈမိူင်းတင်းၼမ် ယွၼ်ႉပိူဝ်ႈသိုၵ်းမၢၼ်ႈလိုပ်ႈလမ်းတီႉၺွပ်း/ ယွၼ်ႉမၢႆမီႈၵူၼ်းမိူင်းတေလႆႈႁၢပ်ႇၵၢၼ်သိုၵ်း ၸိူဝ်းၼႆႉ ။ ၵူၼ်းၼုမ်ႇၸၢဝ်းမၢၼ်ႈၵမ်ႈၼမ် ဢွၼ်ၵၼ်ပၢႆႈၶဝ်ႈမိူင်းထႆး ယူႇသဝ်းၸွမ်းဝဵင်းလူင်ၵုင်းထဵပ်ႈ -ၶျူၼ်ႊပူႊရီႊ- ရယွင်း- ၵၢၼ်ႊၶျၼပူႊရီႊ မႄႈသွတ်ႇ တၢၵ်ႇ မႄႈႁွင်ႈသွၼ် ၵဵင်းမႂ်ႇ ၵဵင်းႁၢႆး ၸိူဝ်းၼႆႉ။ ၵမ်ႈၽွင်ႈလၵ်ႉၶဝ်ႈမိူင်းၶႄႇ မိူင်းၵြႃး။ ၵမ်ႈၽွင်ႈၶဝ်ႈၼႂ်းၸုမ်းၵျႃႊၽျႅၼ်ႉၸိူဝ်းၼႆႉ။ ၵူၼ်းၼုမ်ႇၸိူဝ်းႁွတ်ႈမိူင်းထႆး ၸိူဝ်းလႅတ်းၾၢႆႇဢၢႆႊထီႊ လႄႈတၢင်းႁူႉတၢင်းမေႃပၢၼ်မႂ်ႇ ႁႃလၢႆးတၢင်းႁဵတ်းၵၢၼ်ႁႃၵိၼ်လဵင်ႉတွင်ႉၼင်ႇၸဝ်ႈၵဝ်ႇလူင်ႉလႅၼ်ႇမႃး။

ႁွင်ႈၵၢၼ်ၾၢႆႇႁႅင်းၵၢၼ် လူင်ပွင်ၸိုင်ႈထႆးသမ်ႉဢွၵ်ႇပၵ်းပိူင်မၢႆမီႈဝႆႉဝႃႈ – ႁႅင်းၵၢၼ်ယၢၼ်မိူင်းၼႆႉ တေလႆႈႁဵတ်းၵၢၼ်ၵေႃႇသၢင်ႈ ၊ ၵၢၼ်ႁႃပူပႃ ၊ ၵၢၼ်ပတ်းၽဵဝ်ႈလၢင်ႉထူ ၊ ၼႂ်းသွင်ႇၾႆးလႄႈလင်ႁိူၼ်း ဢိၵ်ႇ တီႈဢၼ်ဝူၺ်ႇႁင်ႈ တီႈဢၼ်ၵူၼ်းပိုၼ်ႉမိူင်းမိူင်းထႆးဢမ်ႇႁဵတ်းလႆႈၼၼ်ႉၵူၺ်း။ ပေႃးပဵၼ်ၵၢၼ်ၼႃႈႁိူၼ်းၼႃႈႁၢၼ်ႉ ၊ ၵၢၼ်ၼႂ်းႁွင်ႈလုမ်းႁွင်ႈၸႆး ဢိၵ်ႇၵၢၼ်ဢၼ်မဝ်တႄႉ တေဢမ်ႇလႆႈႁဵတ်း။ တေႃႈၼင်ႇၵၢၼ်ႁပ်ႉငိုၼ်း ၼႂ်းႁၢၼ်ႉတၢင်းၵိၼ် ႁၢၼ်ႉၶၢႆၶူဝ်းၸိူဝ်းၼႆႉ ယင်းဢမ်ႇပၼ်ႁႅင်းၵၢၼ်ႁဵတ်း။

ၼႂ်းလိူၼ် မေႊ-ၵျုၼ်ႊ-ၵျူႊလၢႆႊ 3 လိူၼ်ၼႆႉၵေႃႈ လူင်ပွင်ၸိုင်ႈထႆး တမ်းဝၢင်းၽႅၼ်ၵၢၼ် 100 ဝၼ်းသေ ၵူတ်ႇထတ်း ၼႂ်းၵၢၼ်ၵေႃႇသၢင်ႈ ၼႂ်းႁၢၼ်ႉတၢင်းၵိၼ် ႁၢၼ်ႉၶၢႆၶူဝ်း ၼႂ်းၵၢတ်ႇၼႂ်းသႃးလႄႈၼႂ်းဝၢၼ်ႈၼႂ်းဝဵင်းသေ တီႉၺွပ်းႁႅင်းၵၢၼ်ၸိူဝ်းဢမ်ႇမီးဝႂ်ႁဵတ်းၵၢၼ်၊ ၸိူဝ်းႁဵတ်းၵၢၼ်ၽိတ်းတီႈ၊ ၸိူဝ်းပူၼ်ႉပႅၼ်ႁဵတ်းၵၢၼ်ဢၼ်လူင်ပွင်ၸိုင်ႈထႆးႁၢမ်ႈဝႆႉၸိူဝ်းၼၼ်ႉယူႇၵူႈဝၼ်း။ တီႉလႆႈႁႅင်းၵၢၼ်ယၢၼ်မိူင်းဢၼ်ၽိတ်းပၵ်းပိူင်ၾၢႆႇႁႅင်းၵၢၼ် တင်းၼမ်တင်းလၢႆ။

ယင်းပၢႆပိုၼ်ၽၢဝ်ႇဝႆႉပႃးဝႃႈ သင်ဝႃႈ ၵူၼ်းမိူင်းထႆးႁၼ်မႅၼ်ႈ ႁႅင်းၵၢၼ်ယၢၼ်မိူင်းႁဵတ်းၵၢၼ်ၽိတ်းတီႈ ၼင်ႇပိုၼ်ၽၢဝ်ႇဝႆႉၸိုင် ႁႂ်ႈၸႅင်ႈၶၢဝ်ႇပၼ်တီႈၸဝ်ႈၼႃႈတီႈၾၢႆႇၵဵဝ်ႇၶွင်ႈ – တေမႃးၵူတ်ႇထတ်းတီႉၺွပ်း – ၼႆလႄႈ ႁႅင်းၵၢၼ်ယၢၼ်မိူင်းဢၼ်ႁႃၸဝ်ႉၵိၼ်ၶမ်ႈ ဢၼ်လႆႈတူၺ်းလူၵူၼ်းတၢင်းႁိူၼ်းၸိူဝ်းၵိုတ်းယူႇတၢင်းမိူင်းတႆး – လႆႈၾၢင်ႉယူႇၾၢင်ႉၵိၼ် ၾၢင်ႉလွင်ႈၼႃႈၵၢၼ်တႃငၢၼ်း ပဵၼ်ဢၼ်ယၢပ်ႇၽိုတ်ႇ။သင်ဝႃႈထုၵ်ႇၵူတ်ႇထတ်းတီႉၺွပ်းၸိုင် တင်းႁႅင်းၵၢၼ်လႄႈတင်းပေႃႈလဵင်ႉမႄႈလဵင်ႉ တၵ်းၺႃးတူတ်ႈတၢမ်ႇၶွၵ်ႈလႄႈတူတ်ႈတၢမ်ႇငိုၼ်းၸွမ်းၵၼ် ။