မိူဝ်ႈၼႆႉ ဝၼ်းတီႈ 26/8/2021 ယၢမ်းၵၢင်ဝၼ်း 11:50 မူင်း ၸဝ်ႈၶူးဝႃးဝုၼ်းမီး (ၽတ်ႉတၼ်ႇတ ဝိမလ) ဝတ်ႉၾႃႉထၢတ်ႈႁူဝ်ၼမ်ႉ မိူင်းလဵၼ်း လႆႈ ၶဝ်ႈသူၼ်မၢၵ်ႇႁၢၵ်ႈၶမ်းၵႂႃႇ တီႈႁူင်းယႃသိုၵ်း ၸႄႈဝဵင်းၵဵင်းတုင် ၸိုင်ႈတႆးပွတ်းဢွၵ်ႇၶူင်း ၽွင်းဢႃယု 63 ပီ ဝႃႇတေႃႇ 33 ဝႃႇ ၼႆယဝ်ႉ။
လုၵ်ႈၼွင်ႉတပႄးတမ်းၸႂ် ၸဝ်ႈၶူးဝႃး ဝုၼ်းမီး ၵေႃႉၼိုင်ႈ လၢတ်ႈၼႄၽူႈတွႆႇႁွၵ်ႈဝႃႈ – “ၸႂ်ႈၶႃႈဢေႃႈ ၸဝ်ႈသိလ်ထမ်းပေႃႈ ဝုၼ်းမီးႁဝ်းၶႃႈ လႆႈလွၼ်ႇၵႂႃႇယဝ်ႉၶႃႈ မိူဝ်ႈၼႆႉ ယၢမ်းၵၢင်ဝၼ်း တီႈႁူင်းယႃ သိုၵ်းၵဵင်းတုင်ၶႃႈ။ ယူႇတီႈမေႃယႃတပ်ႉ ဢဝ်ၵႂႃႇၵူတ်ႇထတ်းတူၺ်းသေ ဝႃႈတႄႉပဵၼ်ၶူဝ်ႊဝိတ်ႉၼႆၶႃႈဢေႃႈ။ မိူဝ်ႈၼၼ်ႉ ၶဝ်ဢမ်ႇပၼ်ၽႂ်ၶဝ်ႈထူပ်းယဝ်ႉၶႃႈ။ ပေႃး ဢမ်ႇပၼ်ၽႂ်ထူပ်းၵေႃႈ ပွင်ႇဝႃႈပဵၼ်ၶူဝ်ႊဝိတ်ႉယဝ်ႉၶႃႈ”- ဝႃႈၼႆ။
ၸဝ်ႈၶူးဝႃး ဝုၼ်းမီးၼႆႉ ၶဝ်ႈၵျၢင်ႉၵမ်သိလ်ထမ်း တီႈထမ်ႈ ထမ်မ ၵမ်ႇၽီႇရ သႃသၼႃ ၸွမ်ႁိူင်း ၼႂ်းၸႄႈဝဵင်းမိူင်းယွင်း ဢၼ်ယၢၼ်ၵႆဝဵင်းမွၵ်ႈ 17 လၵ်း မီး ၶၢဝ်းတၢင်း ပီပၢႆယဝ်ႉ ဢမ်ႇဢွၵ်ႇထမ်ႈ။
မၼ်းၸဝ်ႈဢမ်ႇယူႇလီ မႃးၶၢဝ်းတၢင်း 3-4 ဝၼ်း။ ထိုင်မႃးဝၼ်းတီႈ 24/8/2021 ထူၺ်ႈၸႂ်ယၢပ်ႇလႄႈ တၵ်ႉၵႃႇသတ်ႉထႃး ပၢင်းၸဝ်ႈမႃးၶဝ်ႈႁူင်းယႃသိုၵ်း ၵဵင်းတုင်။ လႆႈႁူႉဝႃႈ ဢွၵ်ႊသီႊၵျိၼ်ႊတူၵ်းႁႅင်း ငဝ်းလၢႆးဢမ်ႇပေႃးၶႆႈလီ ။ ထိုင်မႃးမိူဝ်ႈၼႆႉ ၵၢင်ၼႂ် ၸဝ်ႈၶူးဝႃး လူႉလွၼ်ႇၶဝ်ႈသူၼ်မၢၵ်ႇႁၢၵ်ႈၶမ်းၵႂႃႇပႅတ်ႈ။
“ၸဝ်ႈဝုၼ်းမီးႁဝ်းၶႃႈသမ်ႉ ဢမ်ႇမိူၼ်ၶူးဝႃးပေႃႈဝုၼ်းၸုမ်ႉ။ ၶူးဝႃးပေႃႈဝုၼ်းၸုမ်ႉတႄႉ ပေႃးဝႃႈ ၵၢပ်ႈသွမ်းၼႆ မီးလုၵ်ႈၼွင်ႉတပႄးၵေႃႉလဵဝ် ဢဝ် ပုၼ်ႈၽွၼ်းသေၵၢပ်ႈသွမ်း။ မိူၼ်ၼင်ႇ သိလ်ထမ်းပေႃႈဝုၼ်းမီးသမ်ႉ တၵ်ႉၵႃႇသတ်ႉထႃးၵေႃႉလႂ် ၶႂ်ႈၵၢပ်ႈသွမ်းၵေႃႈ ၶဝ်ႈမိူဝ်းၵၢပ်ႈသွမ်းလႆႈ။ မၢင်ပွၵ်ႈတၢင်းပဵၼ်ၼႆႉ မၼ်းတေမႃးၸွမ်းတၵ်ႉၵႃႇသတ်ႉထႃးႁႃႉ ဢမ်ႇၼၼ် မႃးၸွမ်းလုၵ်ႈ ၼွင်ႉတပႄးႁႃႉ ဢမ်ႇၼၼ်ၵေႃႈ မူႇပီႈၸုမ်းၼွင်ႉၵႂႃႇယူႇၸမ်ႁႃႉ ႁဝ်းဢမ်ႇႁူႉၸွမ်းလႆႈၶႃႈလူးၼေႃ”- လုၵ်ႈၼွင်ႉတပႄးသိုပ်ႇလၢတ်ႈၼႄၼင်ႇၼႆ။
ရုၵ်ႈၵလၢပ်ႈ ၶၢပ်ႈတူဝ် ၸဝ်ႈၶူးဝႃး ဝုၼ်းမီးၼႆႉ တေပူၼ်ႉမိူဝ်ႈလႂ် ပႆႇႁူႉ ၵူၺ်းၵႃႈ ပႂ်ႉၸုမ်းပရႁိတ မႃးႁပ်ႉဢဝ်သေ တေပူၼ်ႉၶၢပ်ႈတူဝ် မၼ်းၸဝ်ႈပၼ်တီႈထမ်ႈၸွမ်ႁိူင်းၼၼ်ႉ ဝႃႈၼႆ။
ၸဝ်ႈၶူးဝႃး ဝုၼ်းမီးၼႆႉ ၸႃႇတိတီႈၵိူတ်ႇပဵၼ် ဝၢၼ်ႈပႃႇလႅင် ၸႄႈဝဵင်းၵဵင်းတုင် ၸိုင်ႈတႆး ပွတ်းဢွၵ်ႇၶူင်း ။ ၸဝ်ႈၶူးဝႃးပဵၼ်ၸဝ်ႈၼင်ႈၵျွင်း ထၢတ်ႈႁူဝ်ၼမ်ႉ တီႈ မိူင်းလဵၼ်း ဝဵင်းတႃႈလိူဝ်ႇ ၸႄႈဝဵင်းတႃႈၶီႈလဵၵ်း ၸိုင်ႈတႆးပွတ်းဢွၵ်ႇၶူင်း ၼႆယဝ်ႉ။
