တႄႇႁူဝ်ပီ 2025 ၼႆႉမႃး လူင်ပွင်ၸိုင်ႈမိူင်းၶႄႇ ပိုၼ်ၽၢဝ်ႇပၼ်ၶႂၢင်ႉပိုတ်ႇၵၢၼ်ၵႃႉၶၢႆ ၼႂ်းၼႃႈလိၼ်ဝႃႉလႄႈ ၵဝ်ႈၵၢင်ႉ ၵုမ်းၵမ်ၸိူဝ်းၼၼ်ႉသေ လုမ်းတၢင်မိူင်းမၢၼ်ႈ ဢၼ်ပၵ်းဝႆႉၼႂ်းမိူင်းၶႄႇၵေႃႈ ၸင်ႇတႄႇ ပိုတ်ႇသဵၼ်ႈတၢင်းလတ်းၽၢၼ်ႇ သဵၼ်ႈတၢင်း ႁူဝ်ပၢင်ႇလႄႈ ၵုၼ်လူင်ၶိုၼ်း လွတ်ႈလွတ်ႈလႅဝ်းလႅဝ်း။

တီႈၽၵ်းတူလႅၼ်လိၼ် မိူင်းတႆး – မိူင်းၶႄႇ ဝဵင်းၼမ်ႉၽႃႈ (ၶျိၼ်ႊသူၺ်ႇႁေႃႇ) ၼႆႉ သိုၵ်းၵဝ်ႈၵၢင်ႉ ၵုမ်းၵမ်လႆႈ မိူဝ်ႈၽႅၼ်ယၼ်ႇသိုၵ်း 1027 ဝၢႆးလင်မႃး ၵူၼ်းၵႃႉၶၢႆၾင်ႇမိူင်းၶႄႇ တႄႇၵႃႉၶၢႆတေႃႇၵၼ်မႃး ၼမ်လိူဝ်ၵဝ်ႇၼႆ ၸဝ်ႈပၢႆးမၢၵ်ႈမီး ၼႂ်းဝဵင်းသႅၼ်ဝီၵေႃႉၼိုင်ႈ လၢတ်ႈၼႄၼင်ႇၼႆ။

“မိူဝ်ႈတႄႇမၼ်းတႄႉ ၵူၼ်းၵႃႉၾင်ႇတၢင်းမိူင်းၶႄႇၶဝ် သိုဝ်ႉဢဝ်ထၢၼ်ႇတင်း ဢွႆႈၸိူဝ်းၼႆႉၵူၺ်း။ ဝၢႆးလင် မႃးၶဝ်ၸင်ႇႁပ်ႉသိုဝ်ႉၶဝ်ႈသၢၼ်၊ ဝူဝ်းၵႂၢႆး၊ ဢွႆႈ၊ ထူဝ်ႇ၊ မူ၊ မၢၵ်ႇမႆႉ ၸိူဝ်းၼႆႉထႅင်ႈ။ ၵႃးလူင်ၼႆႉ လႆႈၸႅၼ်ႇ ထႅဝ်ၵၼ်ၼမ်မႃးသေ မိူဝ်ႈဢွၼ်တၢင်းပုၼ်ႉၼေႈ”။

သဵၼ်ႈတၢင်းၵၢၼ်ၵႃႉၶၢႆ သႅၼ်ဝီ၊ ၵုၼ်လူင်၊ ႁူဝ်ပၢင်ႇၵေႃႈ ၵႃးလူင် ၵႃးဢွၼ်ႇ လတ်းၽၢၼ်ႇၵႂႃႇမႃး ၼမ်လိူဝ်ၵဝ်ႇသေ ဢၼ်ႁဵတ်းႁႂ်ႈသဵၼ်ႈတၢင်းၵႆႉၶမ်ၵၼ်ၼႆႉ ပဵၼ်ၵႃးလူင် ၸိူဝ်းတေႃႉတၢင်ႇထၢၼ်ႇ၊ ဢွႆႈ၊ ဝူဝ်းၵႂၢႆး၊ မၢၵ်ႇမႆႉ ၸဵမ်ၸိူဝ်းၼႆႉ။

ၵူၼ်းမိူင်း ၼႂ်းဝဵင်းၵုၼ်လူင် ၵေႃႉၼိုင်ႈၵေႃႈ လၢတ်ႈတီႈၽူႈတွႆႇႁွၵ်ႈဝႃႈ – “ၸူဝ်ႈၵဵတ်ႉလူင် တီႈၽၵ်းတူၶၢမ်ႈ လႅၼ်လိၼ်ပိုတ်ႇၼႆႉ ႁဵတ်းႁႂ်ႈသဵၼ်ႈတၢင်းဢိုတ်းၶမ်ၵၼ်မႃး။ ၶဝ်ႈမုၼ်းတင်း ၵုၼ်ႇ ဢၼ်မႃးတၢင်း ၶျိၼ်ႊသူၺ်ႇႁေႃႇ ၼၼ်ႉၵေႃႈ ဢွၼ်ၵၼ် ဢဝ်မႃးၶၢႆၸွမ်းၼႂ်းဝဵင်းၼႆႉယဝ်ႉ”- ဝႃႈၼႆ။

လႆႈႁူႉဝႃႈ တႄႇလိူၼ်ၾႅပ်ႊပိဝ်ႊရီႊမႃး ဝဵင်းၵုၼ်လူင်၊ ဝဵင်းၼမ်ႉၽႃႈ (ၶျိၼ်ႊသူၺ်ႇႁေႃႇ) တင်း ဝဵင်းလၢဝ်ႇၵၢႆး ၼႃႈတီႈၵုမ်းၵမ် သိုၵ်းၵဝ်ႈၵၢင်ႉၼႆႉ ၵူၼ်းမိူင်းမီးသုၼ်ႇၸႂ်ႉတိုဝ်းလႆႈၾႆးၾႃႉၶိုၼ်း။ မိူဝ်ႈၽႅၼ်ယၼ်ႇ သိုၵ်း 1027 ၼၼ်ႉ သိုၵ်းမၢၼ်ႈ တူၵ်းသုမ်းထွႆထွၼ်ပွႆႇပႅတ်ႈ ဝဵင်းၵျိၼ်ႊသၢၼ်ႊၵျေႃႉ (သၢမ်ၸဵင်ႇၶမ်း)၊ ၶျိၼ်ႊသူၺ်ႇႁေႃႇ(ဝဵင်းၼမ်ႉၽႃႈ) ယၼ်ႊလူင်ၵျႅင်း မိူင်းၵူဝ်း လႄႈၼမ်ႉၶမ်း ၸိူဝ်းၼႆႉသေ ယၢမ်းလဵဝ် သိုၵ်းၵဝ်ႈၵၢင်ႉ MNDAA ၵုမ်းၵမ်ဝႆႉ။

တႅမ်ႈ – ၽူၺ်းၼုမ်ႇ