မိူဝ်ႈဝႃး ဝၼ်းတီႈ 23/04/2025 ၼႆႉ သိုဝ်ႇၵဝ်ႈၵၢင်ႉ The Kokang တႅမ်ႈတၢင်ႇဝႆႉဝႃႈ ၵူၼ်းၸိူဝ်းတၢင်ႇတီႈသီႇလႅၼ် ဢၼ်မႃးယူႇသဝ်းဝႆႉ ၼႂ်းၼႃႈတီႈၵုမ်းၵမ် တပ်ႉသိုၵ်းၵဝ်ႈၵၢင်ႉ MNDAA တီႈဝဵင်းလၢဝ်ႇၵၢႆးၼႆႉ တၵ်းလႆႈႁဵတ်းဝႂ်ၶႂၢင်ႉယူႇသဝ်း။

ၵူၼ်းပိုၼ်ႉတီႈ ဝဵင်းလၢဝ်ႇၵၢႆး လၢတ်ႈတီႈၽူႈတွႆႇႁွၵ်ႈဝႃႈ – “တႃႇတေႁဵတ်းဝႂ်ၶႂၢင်ႉယူႇသဝ်း ၼႂ်းပိုၼ်ႉတီႈၼႆႉ ၾၢႆႇပလိၵ်ႈၶဝ် ၸုမ်းသိုၵ်းၵဝ်ႈၵၢင်ႉၶဝ် တေႁဵတ်းပၼ်တီႈလုမ်းပလိၵ်ႈ ၸႄႈဝဵင်းတူင်ႇၶျဵင်ႇ (တုံချိန်) ၼၼ်ႉ။ တွၼ်ႈတႃႇၵူၼ်းဢၼ်မႃးႁဵတ်းၶႅပ်းဝႂ်ၸိူဝ်းၼၼ်ႉ တေလႆႈမီးၵူၼ်းပိုၼ်ႉတီႈ မႃးႁပ်ႉႁွင်းပၼ် ၸင်ႇတေလႆႈ။ လိူဝ်ၼၼ်ႉ ယင်းတေလႆႈမီးပႃး မၢႆၾၢင် (မှတ်ပုံတင်)၊ ဝႂ်မုင်ႉႁေႃႁိူၼ်း (အိမ်ထောင်စု) ၸိူဝ်းၼႆႉ။ ယွၼ်ႉၼၼ် ၵမ်ႈၽွင်ႈ ၸိူဝ်းမႃးႁဵတ်းၵၢၼ်တီႈဝဵင်းလၢဝ်ႇၵၢႆး မီးလွင်ႈယၢပ်ႇ တႃႇႁဵတ်းဝႂ်ယူႇသဝ်းၸိူဝ်းၼႆႉ။ ဝႂ်ၶႂၢင်ႉယူႇသဝ်းၼႆႉ ၵူႈပွၵ်ႈ တေမီးဢႃယု 6 လိူၼ် ယဝ်ႉၵေႃႈ လႆႈတေႃႇၶိုၼ်း”- ဝႃႈၼႆ။

ၸွမ်းၼင်ႇ ၶေႃႈပိုၼ်ၽၢဝ်ႇၼၼ်ႉသေ တႅမ်ႈဝႆႉဝႃႈ – ဝဵင်းလၢဝ်ႇၵၢႆးၼႆႉ ပဵၼ်ဝဵင်းဢၼ်မီး ၵူၼ်းၵႃႉၶၢႆႉမႃး ယူႇသဝ်း၊ မီးၵူၼ်းမႃးႁဵတ်းၵၢၼ်ႁႃၵိၼ်လဵင်ႉတွင်ႉ၊ ႁဵတ်းၵၢၼ်ပၢႆးမၢၵ်ႇမီးဝဵင်းၼိုင်ႈ။ ၽွင်းပၢင်တိုၵ်းမိူဝ်ႈပီ 2024 ၼၼ်ႉ ဝဵင်းလၢဝ်ႇၵၢႆးမီးလွင်ႈလူႉသုမ်းတင်းၼမ်သေတႃႉ ယၢမ်းလဵဝ် တိုၵ်ႉသၢင်ႈလွင်ႈပူၵ်းပွင်ဝဵင်း ၶိုၼ်းဝႆႉယူႇ။ တႃႇၵၢၼ်ၽွင်းငမ်း ပေႃးတေၼိမ်တဵင်ႈ ၽူႈလၵ်ႉၵူၼ်းၸူၼ်လႄႈ ၵူၼ်းႁၢႆႉပေႃးတေဢမ်ႇမီးၼၼ်ႉ ၸင်ႇလႆႈႁၢင်ႈႁႅၼ်းႁဵတ်းပၼ် ဝႂ်ၶႂၢင်ႉယူႇသဝ်း ၼႂ်းၼႃႈတီႈၵုမ်းၵမ်ၼႆႉ – ဝႃႈၼႆ။

ၵူၼ်းမိူင်းဢၼ်ၵႂႃႇႁဵတ်းၵၢၼ် တီႈဝဵင်းလၢဝ်ႇၵၢႆးၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ -“တႃႇတေႁဵတ်းပႂ်ႉဝႂ်ၶႂၢင်ႉယူႇသဝ်းၼႆႉ တေမီးသၢမ်သႅၼ်း တႃႇ 3 လိူၼ် တႃႇ 6 လိူၼ်လႄႈ တႃႇ 1 ပီ။ လိူဝ်ၼၼ်ႉ ယင်းတေလႆႈပၼ်ပႃးငိုၼ်းၶႄႇ တႃႇ180 ယႂၼ်ႊ၊ 270 ယႂၼ်ႊလႄႈ 390 ယႂၼ်ႊ ၸိူဝ်းၼႆႉ။ ၵူၺ်းၵႃႈ ၵူၼ်းဢၼ်ဢမ်ႇႁဵတ်းဝႂ်ၶႂၢင်ႉယူႇသဝ်းၼၼ်ႉ ၸုမ်းပလိၵ်ႈ ၾၢႆႇၵဝ်ႈၵၢင်ႉၶဝ် တေတီႉၺွပ်းသူင်ႇၶိုၼ်းတင်းဝဵင်းလႃႈသဵဝ်ႈ”- ဝႃႈၼႆ။

ၼွၵ်ႈလိူဝ် တီႈဝဵင်းလၢဝ်ႇၵၢႆးယဝ်ႉ မိူၼ်ၼင်ႇ – ဝဵင်းၵုၼ်လူင်၊ ဝဵင်းၼမ်ႉၽႃႈ (ၶျိၼ်းသူၺ်ႇႁေႃႇ) ၸိူဝ်းၼႆႉၵေႃႈ ၵူၼ်းတၢင်ႇတီႈသီႇလႅၼ် ဢၼ်မႃးယူႇသဝ်းဝႆႉ ၸိူဝ်းၼၼ်ႉ သင်ဢမ်ႇမီးဝႂ်ၶႂၢင်ႉယူႇသဝ်း ဢမ်ႇၼၼ် ၵူၼ်းဢၼ်ပႆႇလႆႈတေႃႇဝႂ်ၶႂၢင်ႉယူႇသဝ်းၼၼ်ႉ သင်ပလိၵ်ႈ သိုၵ်းၵဝ်ႈၵၢင်ႉၶဝ် ၵူတ်ႇထတ်းတီႉၺွပ်းလႆႈၸိုင် တေလႆႈဢွၵ်ႇၼွၵ်ႈပိုၼ်ႉတီႈ ၸွမ်းၼင်ႇ ၼႂ်းၼႃႈတီႈၶဝ် ၵုမ်းၵမ်ဝႆႉ ၸိူဝ်းၼၼ်ႉ ဝႃႈၼႆ။