တႄႇႁူဝ်လိူၼ်ဢေႊပရိူဝ်ႊမႃး သိုၵ်းၵဝ်ႈၵၢင်ႉ MNDAA သင်ႇႁၢမ်ႈၸႂ်ႉလိၵ်ႈတႆးတင်း လိၵ်ႈဢိင်းၵလဵတ်ႈ ၸွမ်းပၢႆႉႁၢၼ်ႉၶၢႆၵုၼ်ႇလႄႈ ပၢႆႉၵၢတ်ႇ ၼႂ်းဝဵင်းသႅၼ်ဝီ ၸိုင်ႈတႆးပွတ်းႁွင်ႇ။

ၼႂ်းႁူဝ်ပီ 2025 မႃးၼႆႉ သိုၵ်းၵဝ်ႈၵၢင်ႉ ၵမ်ၵိၼ်းၼိူဝ်ၵူၼ်းမိူင်းသႅၼ်ဝီ ၵူႈၾၢႆႇသေ ပူၼ်ႉပႅၼ်သုၼ်ႇလႆႈၵူၼ်း တဵၵ်းႁႂ်ႈၶၢတ်ႈပၼ်ဢွင်ႈတီႈလိၼ်၊ တဵၵ်းၶၢၼ်းၸႂ်ႉၵူၼ်းမိူင်း၊ တဵၵ်းၵဵပ်းၵူၼ်းသိုၵ်းမႂ်ႇလႄႈ ႁႂ်ႈၵူၼ်းမိူင်းသႂ်ႇၶွၼ်ႇ ၵႃႈယႂ်ႇၶၼ်လူင် ၸဵမ်ၸိူဝ်းၼႆႉၵူၺ်းဢမ်ႇၵႃး ယၢမ်းလဵဝ်သမ်ႉ ႁၢမ်ႈယႃႇႁႂ်ႈၵူၼ်းမိူင်း ၸႂ်ႉတိုဝ်းလိၵ်ႈတႆးထႅင်ႈၼႆ – ၵူၼ်းမိူင်းသႅၼ်ဝီ ၵေႃႉ ၼိုင်ႈ လၢတ်ႈၼႄတီႈၽူႈတွႆႇႁွၵ်ႈၼင်ႇၼႆ။

“ၶွၼ်ႇၼႆႉ ႁဝ်းလႆႈသႂ်ႇၵူႈမဵဝ်းယဝ်ႉ။ တႃႇလၢႆႊသိၼ်ႊရူတ်ႉၶိူင်ႈ၊ ၵႃး၊ လၢႆႊသိၼ်ႊႁၢၼ်ႉၶၢႆၵုၼ်ႇၸဵမ်ၸိူဝ်းၼႆႉ လႆႈၵႂႃႇႁဵတ်းတီႈလုမ်းၶဝ်သဵင်ႈသဵင်ႈ။ မိူဝ်ႈလဵဝ်ႁဝ်းလႆႈၵႂႃႇႁဵတ်း V9 ဢၼ်မႂ်ႇသေၵွၼ်ႇဢိူဝ်ႈ။ ပၢႆႉဢၼ်ၵဝ်ႇ မီးလိၵ်ႈဢင်းၵိတ်ႉတင်း လိၵ်ႈတႆးတႄႉ ဢမ်ႇပၼ်ၸႂ်ႉ။ ဢမ်ႇသုင်းလႆႈယဝ်ႉ။ တေလႆႈႁဵတ်းဢၼ်မႂ်ႇဝႃႇ။ တေလႆႈႁဵတ်းပၢႆႉလိၵ်ႈၶႄႇ။ သင်ၶႂ်ႈသႂ်ႇပၢႆႉလိၵ်ႈမၢၼ်ႈ လူဝ်ႇသႂ်ႇပႃးလိၵ်ႈၶႄႇ။ ပၢႆႉလိၵ်ႈဢင်းၵိတ်ႉ ဢၼ်လေႃးလိၵ်ႈတႆးတႄႉ ဢမ်ႇလႆႈဝႃႇ။ ဢၢႆႈၶႄႇ ဢၼ်မႃးလၢတ်ႈၼၼ်ႉႁႄ ပေႃးၶႆႈမေႃးၵၼ်ယဝ်ႉ။ ၵူၺ်းၶဝ် သမ်ႉ ပႃးၵွင်ႈသေလႄႇ ႁဝ်းဝၢႆႇတူၺ်းတၢင်းလင် ဢမ်ႇမီးၽႂ်ၼႃႇ ၵႃႈလႆႈဢေႃႈၶႃႈၼႆၵူၺ်းဢိူဝ်ႈ”။

မိူဝ်ႈဝၼ်းတီႈ 15 ၼၼ်ႉၵေႃႈ သိုၵ်းၵဝ်ႈၵၢင်ႉ လိုပ်ႈၵူၼ်းၶၢႆၽၵ်းၶဵဝ်တင်း ၵူၼ်းၶၢႆၵုၼ်ႇၵူႈၸိူဝ်းၸိူဝ်း ၼႂ်းၵၢတ်ႇလူင် (ၵၢတ်ႇၵဝ်ႇ) ၶၢႆႉၵႂႃႇၶၢႆတီႈၵၢတ်ႇမႂ်ႇ ဢၼ်လၢဝ်းပၢၼ်းၶႄႇ မႃးပၼ်ၶွၼ်ႇတီႈသိုၵ်းၵဝ်ႈၵၢင်ႉသေ ႁဵတ်းဝႆႉတီႈဝၢၼ်ႈပၢင်ႇလေႃႉၼၼ်ႉ ႁဵတ်းႁႂ်ႈၵူၼ်းမိူင်းႁူပ်ႉတၢင်းယၢပ်ႇၵိၼ်းလၢႆလၢႆလွင်ႈ။

ဝဵင်းသႅၼ်ဝီၼႆႉ သိုၵ်းၵဝ်ႈၵၢင်ႉ MNDAA တႄႇၵုမ်းၵမ်လႆႈ မိူဝ်ႈၽႅၼ်ယၼ်ႇသိုၵ်း 1027 ပွၵ်ႈၵမ်းၼိုင်ႈ။ ဢဝ်ၶေႃႈသဵင်ဝႃႈ “တႄႇၼႆႉၵႂႃႇ ၵူၼ်းမိူင်းလႆႈလွင်ႈလွတ်ႈလႅဝ်းယဝ်ႉ” ၼႆသေ ပိုၼ်ၽၢဝ်ႇႁူၺ်းႁွင်ႉဢဝ် ၵူၼ်းမိူင်းၶဝ်ႈမိူဝ်းယူႇသဝ်းၶိုၼ်း ၼႂ်းဝၢၼ်ႈ၊ ၼႂ်းပွၵ်ႉၼႂ်းဝဵင်းၶိုၼ်း ၼိုင်ႈမုင်ႉႁေႃႁိူၼ်းလႂ် ဢေႇသုတ်းၼိုင်ႈၵေႃႉ ဝႃႈၼႆ။

ယၢမ်းလဵဝ် ၼႂ်းဝဵင်းသႅၼ်ဝီၼႆႉ သိုၵ်းၵဝ်ႈၵၢင်ႉ MNDAA ယင်းတိုၵ်ႉသိုပ်ႇပိုတ်ႇပၢင်တေႃႇလွင်းဝႆႉသေဢမ်ႇၵႃး ၸွမ်းသဵၼ်ႈတၢင်း ၼႂ်းၵၢင်ဝဵင်းသႅၼ်ဝီၵေႃႈ တၢပ်ႈသႂ်ႇဝႆႉပႃး ၶိူင်ႈ CCTV ပေႃးၸွတ်ႇၵႂႃႇသဵင်ႈ ၼႆယဝ်ႉ။

တႅမ်ႈ – ၽူၺ်းၼုမ်ႇ