မိူဝ်ႈၼႆႉ ဝၼ်းတီႈ 18/04/2025 ယၢမ်းၵၢင်ၼႂ် သိုၵ်းၵဝ်ႈၵၢင်ႉ MNDAA ဢဝ်ၵႃး 10 လမ်းပၢႆ လုၵ်ႉလႃႈသဵဝ်ႈ ၵႂႃႇႁပ်ႉၵူၼ်းၼင်ႈလုမ်း ၶွင်လူင်ပွင်ၸိုင်ႈမၢၼ်ႈ တီႈမိူင်းယႆ တႃႇမႃးၼင်ႈလုမ်းၶိုၼ်း တီႈဝဵင်းလႃႈသဵဝ်ႈ ၸိုင်ႈတႆးပွတ်းႁွင်ႇ။

ၵူၼ်းပိုၼ်ႉတီႈ ဝဵင်းမိူင်းယႆ ဢၼ်ႁၼ်တႂ်ႈၼႃႈတႂ်ႈတႃ ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “မိူဝ်ႈၼႆႉ ၵၢင်ၼႂ်မွၵ်ႈ 6:30 မူင်း ၶဝ်ႁွတ်ႈၽႅဝ်မႃး တီႈမိူင်းယႆၼႆႉသေ ၶိုၼ်းပွၵ်ႈၵႂႃႇယၢမ်းၵၢင်ၼႂ် 7:40 မူင်းၼႆႉ။ ၵႃးၶဝ် ဢၼ်မႃးႁပ်ႉၵူၼ်းၼင်ႈလုမ်းၵႂႃႇၼႆႉ ဢမ်ႇယွမ်း 10 လမ်း။ ၵူၼ်းၼႂ်းၵႃးၼၼ်ႉ သႂ်ႇၶူဝ်းသီသွမ်ႇလမ် ပဵၼ်ပလိၵ်ႈ (တမ်ႇၼူတ်ႇ) ၵဝ်ႈၵၢင်ႉမူတ်းၶႃႈ။ ၼႂ်းထႅဝ်ၵႃးၼၼ်ႉ တၢင်းၼႃႈလႄႈ တၢင်းလင်ၼၼ်ႉ တေပဵၼ်တမ်ႇၼူတ်ႇၵဝ်ႈၵၢင်ႇၶဝ် ၼႂ်းၵၢင်သမ်ႉ ပဵၼ်ၵႃးၽူႈမီးၸၼ်ႉၶဝ်ဢေႃႈ”- ဝႃႈၼႆ။

ၵဵဝ်ႇလူၺ်ႈလွင်ႈသိုၵ်းၵဝ်ႈၵၢင်ႉ ဢဝ်ၵႃးမႃးႁပ်ႉ ၵူၼ်းၼင်ႈလုမ်း တီႈဝဵင်းမိူင်းယႆၼႆႉ ယူႇတီႈ သိုၵ်းမၢၼ်ႈတင်း သိုၵ်းၵဝ်ႈၵၢင်ႉၼႆႉ သင်ႇပိၵ်ႉဢိုတ်းသဵၼ်ႈတၢင်းဝႆႉ ၵမ်းၼိုင်ႈ ႁဵတ်းႁႂ်ႈၵူၼ်းမိူင်းထူပ်းတၢင်းယၢပ်ႇၽိုတ်ႇ လွင်ႈၵႂႃႇမႃး။

“သိုၵ်းမၢၼ်ႈတင်း သိုၵ်းၵဝ်ႈၵၢင်ႉဢေႃႈ ဢမ်ႇပၼ်ၵူၼ်းၵႂႃႇမႃး။ မိူဝ်ႈၼႆႉ ပဵၼ်ဝၼ်းၵၼ်ႇတေႃးၵျွင်းလႄႈ ၵူၼ်းဝၢၼ်ႈ မွၵ်ႈ 5 ဝၢၼ်ႈၼႆႉ ဢမ်ႇလႆႈမႃးၵၼ်ႇတေႃးၵျွင်းၶႃႈ။ ယွၼ်ႉၶဝ်ပိၵ်ႉသဵၼ်ႈတၢင်း တင်ႈတႄႇၵၢင်ၼႂ်ၸဝ်ႉ တေႃႇထိုင်ၵၢင်ဝၼ်း 11 မူင်းၼႆႉ ၶဝ်ၸင်ႇတေပိုတ်ႇၶိုၼ်းဢေႃႈ။ မိူဝ်ႈၶမ်ႈဝႃးၼၼ်ႉ လႆႈႁူႉဝႃႈ သိုၵ်းၵဝ်ႈၵၢင်ႉၶဝ် ႁိပ်ႈၼႅတ်ႈသေ ထွႆဢွၵ်ႇၵမ်ႈၽွင်ႈယဝ်ႉၼႆဢေႃႈ”-  ၵူၼ်းပိုၼ်ႉတီႈ ဝဵင်းမိူင်းယႆ သိုပ်ႇလၢတ်ႈၼင်ႇၼႆ။

သၢႆသဵၼ်ႈတၢင်း ဢၼ်သိုၵ်းၵဝ်ႈၵၢင်ႉၶဝ် မႃးႁပ်ႉၵူၼ်းၼင်ႇလုမ်း တီႈမိူင်းယႆၵႂႃႇၼႆႉ တေပဵၼ်သဵၼ်ႈတၢင်းလူင်မိူင်းယႆ – လႃႈသဵဝ်ႈ။ ယဝ်ႉၵေႃႈ မိူင်းယႆ – လႃႈသဵဝ်ႈၼႆႉ တေယၢၼ် ၵၼ် 56 လၵ်း (80 ၵီႊလူဝ်ႊ) ၼႆယဝ်ႉ။

ယၢမ်းလဵဝ် ဢၼ်သိုၵ်းၵဝ်ႈၵၢင်ႉၶဝ် ထွႆဢွၵ်ႇ ၼႂ်းၸႄႈဝဵင်းမိူင်းယႆၼႆႉ မီးၵမ်ႈၽွင်ႈၵူၺ်း တေပဵၼ်တၢင်း ဝၢၼ်ႈၼွင်မူဝ်၊ ဝၢၼ်ႈပၢင်ႇၵူဝ်းလႄႈ ဝၢၼ်ႈလူင် ၸိူဝ်းၼၼ်ႉ။ လိူဝ်ၼၼ်ႉ ဢၼ်ပႆႇထွႆၵေႃႈ ယင်းတိုၵ်ႉမီး။ မိူဝ်ႈလဵဝ် ၼႂ်းၸႄႈဝဵင်းမိူင်းယႆၼႆႉ တိုၵ်ႉမီးဝႆႉ သိုၵ်းတႆး SSPP ၊ သိုၵ်းၵဝ်ႈၵၢင်ႉ MNDAA ၊ သိုၵ်းဝႃႉ UWSA လႄႈ သိုၵ်းမၢၼ်ႈ ၸိူဝ်းၼႆႉ တူင်ႉၼိုင်ၵႂႃႇယူႇဝႆႉ။