တႄႇဢဝ် လိူၼ်ဢေႊပရိူဝ်ႊၼႆႉမႃး သိုၵ်းၵဝ်ႈၵၢင်ႉ MNDAA တဵၵ်းၸႂ်ႉၸဝ်ႈႁၢၼ်ႉတၢင်းၶၢႆ ၼႂ်းၵၢတ်ႇသႅၼ်ဝီ ၶၢႆႉၵႂႃႇၶၢႆတီႈၵၢတ်ႇမႂ်ႇ ဢၼ်မီးတီႈဝၢၼ်ႈပၢင်ႇလေႃႉ ၸႄႈဝဵင်းသႅၼ်ဝီ ၸိုင်ႈတႆးပွတ်းႁွင်ႇၼၼ်ႉ ႁဵတ်းႁႂ်ႈၵူၼ်းမႃးသိုဝ်ႉၸၢႆႇၵၢတ်ႇဢမ်ႇၵိုၼ်းၶွၼ်ႈ ၶူဝ်းၵုၼ်ႇဢမ်ႇၶၢႆလီ ဢမ်ႇမီးငိုၼ်းၶဝ်ႈလႄႈ တုမ်ႉတိူဝ်ႉၸဝ်ႈႁၢၼ်ႉၶဝ်ထူပ်းတၢင်းယၢပ်ႇၽိုတ်ႇ။

ၸဝ်ႈႁၢၼ်ႉတၢင်းၶၢႆ ၼႂ်းၵၢတ်ႇသႅၼ်ဝီ လၢတ်ႈတီႈၽူႈတွႆႇႁွၵ်ႈဝႃႈ – “ႁဝ်းၶဝ်ၼႆႉ ပဵၼ်ၵူၼ်းၶၢႆၵၢတ်ႇလွၼ်ႉလွၼ်ႉ ပေႃးဢမ်ႇၶၢႆႉၵႂႃႇၶၢႆ ၸွမ်းၵၢတ်ႇမႂ်ႇၵေႃႈ ဢမ်ႇၸၢင်ႈႁဵတ်းႁိုဝ် ၵႃႈလႆႈ ၶၢႆႉၵႂႃႇၸွမ်းယဝ်ႉ။ တႃႇႁဝ်းၶႃႈ ၵူၼ်းၶၢႆ တေလႆႈၼမ်ႉမဵတ်ႈၼမ်ႉတွၼ်း မိူၼ်ၵူႈပွၵ်ႈၼၼ်ႉတႄႉ မၼ်းႁိုဝ်တေမီးယဝ်ႉ။ ၽွၼ်းတုမ်ႉယွၼ်ႈမၼ်းတႄႉ ငိုၼ်းၶဝ်ႈမၼ်း ဢမ်ႇမီးမိူၼ်ၵဝ်ႇယဝ်ႉ။ မိူဝ်ႈလဵဝ် လႆႈၶၢႆႉၵႂႃႇၶၢႆၵၢတ်ႇတၢင်းပၢင်ႇလေႃႉၼၼ်ႉ တုမ်ႉယွၼ်ႈထိုင်ၵူၼ်းမိူင်း လႆႈသိုဝ်ႉၵိၼ်ၵႃႈယႂ်ႇၶၼ်သုင်ၼၼ်ႉယဝ်ႉ”- ဝႃႈၼႆ။

ၼွၵ်ႈလိူဝ် ၸဝ်ႈႁၢၼ်ႉတၢင်းၶၢႆၶဝ် ဢမ်ႇၵႃႉၶၢႆလီမိူၼ်ၵူႈပွၵ်ႈယဝ်ႉ သိုၵ်းၵဝ်ႈၵၢင်ႉ MNDAA သမ်ႉ ၵဵပ်းၶွၼ်ႇၼမ်မႃးထႅင်ႈ၊ ၵႃႈၶွၼ်ႇဢၼ်တေလႆႈသႂၢင်းၵေႃႈ ႁွင်ႈၼိုင်ႈတင်းႁွင်ႈၼိုင်ႈ ဢမ်ႇမိူၼ်ၵၼ်၊ ၵမ်ႈၽွင်ႈ လႆႈပၼ်ထိုင် သၢဝ်းသႅၼ်ပၢႆလူးၵွၼ်ႇ။

“ၶၢႆႉမႃးၶၢႆၵၢတ်ႇတီႈၼႆႈၼႆႉ ဢမ်ႇၶၢႆလီသေယဝ်ႉဢမ်ႇၵႃး သမ်ႉလႆႈပၼ်ၵႃႈၶွၼ်ႇမၼ်းၵႃႈထႅင်ႈ။ ၽိူၼ်တၢင်းၶၢႆ၊ ႁၢၼ်ႉတၢင်းၶၢႆ ၸိူဝ်းၼႆႉ ၶဝ်တေႁဵတ်းလိၵ်ႈၵိၼ်ၵႅၼ်ႇၼိုင်ႈပွၵ်ႈၼႆႉ လႆႈပၼ် 1,345,000 ပျႃး။ ဢၼ်ၼႆႉ ပဵၼ်တႃႇၸဝ်ႉႁၢၼ်ႉၶၢႆၽၵ်းၶဵဝ်ၸိူဝ်းၼႆႉၵူၺ်း။ ပေႃးႁၢၼ်ႉၶၢႆၼိူဝ်ႉပႃသမ်ႉ တေပဵၼ်ထႅင်ႈသႅၼ်းၼိုင်ႈ။ မိူၼ်ၼင်ႇ ႁၢၼ်ႉၶဝ်ႈသဵၼ်ႈၶဝ်ႈသွႆးၼႆတႄႉ တႃႇ 3 လိူၼ်ၼႆႉ လႆႈပၼ်ယူႇ 23 သႅၼ်ပျႃး။ ဢၼ်ၼႆႉၵေႃႈ 3 လိူၼ်ၼိုင်ႈပွၵ်ႈ တေလႆႈႁဵတ်းလိၵ်ႈၵိၼ်ၵႅၼ်ႇသေ ပၼ်ၶဝ်တိၵ်းတိၵ်ႈယဝ်ႉ”- ၸဝ်ႈႁၢၼ်ႉတၢင်းၶၢႆ ၼႂ်းၵၢတ်ႇသႅၼ်ဝီ သိုပ်ႇလၢတ်ႈၼႄၼင်ႇၼႆ။

ၵၢတ်ႇလူင်ဝဵင်းသႅၼ်ဝီဢၼ်ၵဝ်ႇၼၼ်ႉ သိုၵ်းမၢၼ်ႈဢဝ်ၶိူင်ႈမိၼ်တိုၵ်းမႃးပွႆႇမၢၵ်ႇသႂ်ႇ မိူဝ်ႈဝၼ်းတီႈ 18/07/2024 ၼၼ်ႉသေ ႁဵတ်းႁႂ်ႈၵၢတ်ႇလူႉၵွႆ ၵူၼ်းမိူင်းမၢတ်ႇၸဵပ်းလူႉတၢႆတင်းၼမ်လႄႈ ၵွပ်ႈၼႆ ၸဝ်ႈႁၢၼ်ႉၶၢႆၶူဝ်းၼႂ်းၵၢတ်ႇ ဢွၼ်ၵၼ်မႃးၽႄႇၶၢႆၶူဝ်းႁိမ်းၶၢင်ႈတၢင်း။

တႄႇဢဝ် ႁူဝ်လိူၼ်ဢေႊပရိူဝ်ႊ ပီ 2025 ၼႆႉမႃး သိုၵ်းၵဝ်ႈၵၢင်ႉ MNDAA သမ်ႉ ပိုၼ်ၽၢဝ်ႇ ႁႂ်ႈၵူၼ်းၵႃႉၶၢႆ ႁိမ်းၶၢင်ႈတၢင်း ၶၢႆႉၵႂႃႇၶၢႆတီႈၵၢတ်ႇမႂ်ႇ ဢၼ်သိုၵ်းၵဝ်ႈၵၢင်ႉႁဵတ်းဝႆႉၼၼ်ႉလႄႈ ၵၢၼ်ႁႃၵိၼ်လဵင်ႉတွင်ႉတႃႇ ၵူၼ်းၵႃႉၶၢႆၶဝ် ယၢပ်ႇၽိုတ်ႇလိူဝ်ႁႅင်းမႃးၵူၺ်းဢမ်ႇၵႃး သမ်ႉလႆႈသႂ်ႇၶွၼ်ႇၼမ်ထႅင်ႈလႄႈ ၵူၼ်းၶၢႆၵၢတ်ႇၶဝ် တုၵ်းယွၼ်းႁႂ်ႈလူတ်းယွမ်းပၼ် ၵၢၼ်ၵဵပ်းၶွၼ်ႇ ၸိူဝ်းၼႆႉၽွင်ႈ။

တႃႇၵႃႉၶၢႆလႆႈလီငၢမ်း ဢမ်ႇမီးပၼ်ႁႃသင်ၼၼ်ႉ ၵူၼ်းမိူင်းလႆႈသိုဝ်ႉဢွင်ႈတီႈ ႁွင်ႈၶၢႆၵုၼ်ႇဝႆႉ ႁင်းၽႂ်မၼ်း တီႈၼႂ်းၵၢတ်ႇလူင်ဝဵင်းသႅၼ်ဝီ (ၵၢတ်ႇၵဝ်ႇ) ၼၼ်ႉ ၸဵမ်မိူဝ်ႈပၢၼ်သိုၵ်းမၢၼ်ႈၵုမ်းၵမ်မႃး ပီယၢဝ်းၶၢဝ်းႁိုင်။ ယၢမ်းလဵဝ်သမ်ႉ ၾၢႆႇသိုၵ်းၵဝ်ႈၵၢင်ႉ ၸႂ်ႉၵူၼ်းမိူင်း ၵႂႃႇၶၢတ်ႈဢဝ်ႁွင်ႈၶၢႆၵုၼ်ႇ တီႈၵၢတ်ႇမႂ်ႇ တၢင်းဢိူင်ႇပၢင်ႇ လေႃႉၼၼ်ႉ။ ငိုၼ်းသၢႆႈတႅၼ်း ၵႃႈႁွင်ႈၶၢႆၵုၼ်ႇတီႈၵၢတ်ႇၵဝ်ႇၼၼ်ႉၵေႃႈ ဢမ်ႇပၼ်ၶိုၼ်းတီႈၵူၼ်းမိူင်းလႄႈ ႁဵတ်းႁႂ်ႈၵူၼ်းမိူင်း ႁူပ်ႉတၢင်းယၢပ်ႇၽိုတ်ႇႁႅင်း။

လႆႈႁူႉဝႃႈ ႁၢၼ်ႉၶၢႆၵုၼ်ႇ ၸိူဝ်းၶၢႆၸွမ်းတႅဝ်းၵၢတ်ႇ ႁိမ်းၶၢင်ႈတၢင်းလူင် သဵၼ်ႈတၢင်းသႅၼ်ဝီ – မူႇၸေႊ ၸိူဝ်းၼၼ်ႉၵေႃႈ သိုၵ်းၵဝ်ႈၵၢင်ႉ တဵၵ်းႁႂ်ႈၶၢႆႉၵႂႃႇၶၢတ်ႈႁွင်ႈၶၢႆၵုၼ်ႇ တီႈၵၢတ်ႇမႂ်ႇၼၼ်ႉသေ မၵ်းမၼ်ႈ ပၼ်ဝႆႉၶၢဝ်းယၢမ်း ႁႂ်ႈၶၢႆႉၵႂႃႇတီႈၵၢတ်ႇမႂ်ႇထိုင် ဝၼ်းတီႈ 28/04/2025 ပဵၼ်ဝၼ်းလိုၼ်းသုတ်းၼႆ –  ၼၢင်းၼၢင်း ၵူၼ်းပိုၼ်ႉတီႈ ဝဵင်းသႅၼ်ဝီ လၢတ်ႈၼႄတီႈ ၽူႈတွႆႇႁွၵ်ႈၼင်ႇၼႆ။

“ၶဝ်ဢမ်ႇပၼ်ၵႃႈသၢႆႈတႅၼ်းသင်ၶိုၼ်း ၶဝ်တေၸႂ်ႉၶၢတ်ႈဢဝ် လိူၼ်လႂ်လိူၼ်ၼၼ်ႉ တီႈၵၢတ်ႇမႂ်ႇၼၼ်ႉၵူၺ်း။ ၵၼ်ႉၶႂ်ႈလႆႈ သႅင်ႇၶၢၼ်းႁင်းၵူၺ်းၸဝ်ႈၵဝ်ႇသေ သိုဝ်ႉဝႆႉၵႃႈယႂ်ႇၶၼ်လူင်။ ၵမ်းၼႆႉသမ်ႉဝႃႈ ဢမ်ႇပၼ်ၶၢႆၶိုၼ်းၼႂ်းၵၢတ်ႇၼႆ သုမ်းယဝ်ႉသုမ်းထႅင်ႈယဝ်ႉဢိူဝ်ႈ ႁဝ်းၵူၼ်းမိူင်းတႄႉ”- ဝႃႈၼႆ။

ၼင်ႇႁိုဝ် တေလႆႈၶၢႆၵိၼ်ၽၵ်းၶဵဝ်လႄႈ ၶူဝ်းၵုၼ်ႇၵႂႃႇလႆႈၶၢဝ်းယၢဝ်းၼၼ်ႉ ၵူၼ်းမိူင်းၸိူဝ်းလႆႈလူႉသုမ်း ႁွင်ႈၶၢႆၵုၼ်ႇ ၼႂ်းၵၢတ်ႇၵဝ်ႇၶဝ် မီးၵၢင်ၸႂ်ၶႂ်ႈတုၵ်းယွၼ်း တီႈသိုၵ်းၵဝ်ႈၵၢင်ႉ တႃႇတေလႆႈၶိုၼ်း ႁွင်ႈၶၢႆၵုၼ်ႇ တီႈၵၢတ်ႇမႂ်ႇ။ ယႃႇႁႂ်ႈလႆႈၸၢႆႇၵႃႈၶၢတ်ႈႁွင်ႈ ဝႃႈၼႆ။