ဝၢႆးလင် သိုၵ်းၵဝ်ႈၵၢင်ႉ MNDAA တေႃႉၶူဝ်းၶွင် ၶိူင်ႈၸႂ်ႉတိုဝ်း ၼႂ်းႁူင်းယႃလူင်ဢွၵ်ႇဝဵင်းလႃႈသဵဝ်ႈယဝ်ႉ တဵၵ်းၶၢၼ်းႁႂ်ႈၵူၼ်းမိူင်းသႅၼ်ဝီ ၼိုင်ႈဝၢၼ်ႈလႂ် ဢေႇသုတ်း 5 ၵေႃႉ ၵႂႃႇတီႇၽဵဝ်ႈ တီႈႁူင်းႁဵၼ်းၸၼ်ႉသုင် မၢႆ 2 ႁိမ်းတပ်ႉၵဝ်ႇ သိုၵ်းမၢၼ်ႈ ၶလယ 69 ဢွင်ႈတီႈပဵၼ်ပၢင်တိုၵ်း 1027 ဝဵင်းသႅၼ်ဝီ ၸိုင်ႈတႆးပွတ်းႁွင်ႇ။

ဢွင်ႈတီႈႁူင်းႁဵၼ်းၼၼ်ႉ ယင်းပႆႇလႆႈၽဵဝ်ႈပႅတ်ႈမၢၵ်ႇမႅင်း ၸိူဝ်းၵိုတ်းၶမ်ဝႆႉ မိူဝ်ႈၽႅၼ်ယၼ်ႇသိုၵ်း 1027 ၼၼ်ႉလႄႈ ယႃႇဝႃႈတေၵႂႃႇတီႇၽဵဝ်ႈ ႁဵတ်းလွင်ႈမူတ်းသႂ်လႃႈ လတ်းၵႂႃႇသဵၼ်ႈတၢင်းၼၼ်ႉၵူၺ်းၵေႃႈ ၵူၼ်းမိူင်းယင်းဢမ်ႇႁတ်းၼႆ – ၼၢင်းၶွၼ်ႇ ၵူၼ်းဝဵင်းသႅၼ်ဝီ လၢတ်ႈၼင်ႇၼႆ။

“ငိၼ်းဝႃႈ ၶဝ်တေပိုတ်ႇ ဝၼ်းတီႈ 21/04/2025 ၼႆႉၼႆဝႃႇ။ ၶဝ်ဢွၵ်ႇလိၵ်ႈ တဵၵ်းၶၢၼ်းႁႂ်ႈၵူၼ်းဝၢၼ်ႈၵႂႃႇ ၼိုင်ႈဝၢၼ်ႈ ဢေႇသုတ်း 5 ၵေႃႉ ၸိူဝ်းၼႆႉဢိူဝ်ႈ။ မၢင်ဝၢၼ်ႈ ဢမ်ႇမီးၽႂ်ႁတ်းၵႂႃႇ သမ်ႉပေႃးလႆႈ ၸူၵ်းမႄးၵၼ်သေ ၵႂႃႇၼၼ်ႉၼႃႇ။ ၵူဝ်ၵႂႃႇယဵပ်ႇၺႃးမၢၵ်ႇသေတၢႆၼင်ႇၵဝ်ႇဢိူဝ်ႈ။ ၸဵမ်မိူဝ်ႈပၢင်တိုၵ်းယဝ်ႉ ၶဝ်တမ်ႉဢမ်ႇၽဵဝ်ႈ ပၼ်မၢၵ်ႇသေပွၵ်ႈလူး။ ႁိမ်းတၢင်းၶိုၼ်ႈ ၵႂႃႇၵျွင်းၼၼ်ႉၵေႃႈ ဝၼ်းၼၼ်ႉ ၵူၼ်းဝၢၼ်ႈ ပေႃးၵႂႃႇယဵပ်ႇၺႃးမၢၵ်ႇႁႄ ၶႃပုတ်းမိုဝ်းပုတ်းယဝ်ႉ”။

သိုၵ်းၵဝ်ႈၵၢင်ႉ MNDAA  ဢၢၼ်းဢဝ်ႁူင်းႁဵၼ်း ၸၼ်ႉသုင် မၢႆ 2 ဝဵင်းသႅၼ်ဝီ ႁဵတ်းပဵၼ်ၶိုၼ်း ႁူင်းယႃၼႆ လႄႈ ႁဵတ်းႁႂ်ႈၵူၼ်းမိူင်းသႅၼ်ဝီ ၵမ်ႈၽွင်ႈ ဢမ်ႇႁၼ်လီၸွမ်းသေ ဢွၼ် ၵၼ်ထတ်းသၢင်ဝႃႈ မေႃၸႂ်ႉဢႃႇ ၼႃႇသေ တဵၵ်းႁႂ်ႈၵူၼ်းမိူင်း ႁဵတ်းပၼ်ဢၼ်ၾၢႆႇသိုၵ်းၵဝ်ႈၵၢင်ႉ ၶႂ်ႈလႆႈၶႂ်ႈပဵၼ်ၵူၺ်း  ဢမ်ႇဝူၼ်ႉသွၼ်ႇတႃႇ ၵူၼ်းမိူင်းတႄႉတႄႉၼႆ – လုင်းၸၢႆး ၵူၼ်းသႅၼ်ဝီ လၢတ်ႈၼႄၽူႈတွႆႇႁွၵ်ႈၼင်ႇၼႆ။

“မိူဝ်ႈလဵဝ် တေမႃးဢဝ်ႁူင်းႁဵၼ်း ႁဵတ်းႁူင်းယႃဝႃႇ။ ၶဝ်ၶဝ်ႈမႃးၵုမ်းၵမ်ဝဵင်းၼႆႉ ဢမ်ႇပၼ်ႁႅင်း ၾၢႆႇပၢႆးပၺ်ႇ ၺႃႇတႄႉတႄႉ။ ၵုမ်ႇဢဝ်ဢႃႇၼႃႇသေ တဵၵ်းႁႂ်ႈၵူၼ်းမိူင်းႁဵတ်းပၼ် ဢၼ်ၶဝ်ၶႂ်ႈလႆႈၶႂ်ႈပဵၼ်သေ မိုင်ႉၵဵပ်းၶွၼ်ႇ ဢၼ်ပုၼ်ႉဢၼ်ၼႆႉ ႁဵတ်းၼႆယူႇတိၵ်းတိၵ်း။ တေသၢၼ်ၶတ်းၼႆၵေႃႈ မိူဝ်ႈလဵဝ်ၼႆႉသမ်ႉ ၶဝ်မီးၵွင်ႈ ႁဝ်းၵူၼ်းမိူင်းဢမ်ႇမီးသင်လူး။ ပေႃးၶဝ် ယိုဝ်းၵေႃႈ တၢႆလၢႆလၢႆၵူၺ်းဢိူဝ်ႈ။ မိူဝ်ႈလဵဝ် ၸင်ႇပဵၼ်ပၢၼ်ၸဝ်ႈ ဢႃႇၼႃႇၸႅတ်ႈၸႅတ်ႈယဝ်ႉဝႃႈ။ တေႃႈၼင်ႇၶဝ်ဢွၵ်ႇလိၵ်ႈ တႃႇၶၢၼ်းၵူၼ်းမိူင်း တႃႇႁွင်ႉပၢင်ၵုမ်ၵူၼ်းမိူင်း ၵူၺ်းၵေႃႈ ယင်းသႂ်ႇပႃးဝႃႈ ၸဝ်ႈဢႃႇၼႃႇ (အာဏာပိုင်) ၼႆဢိူဝ်ႈ”။

ၶိူင်ႈၶူဝ်းၸႂ်ႉတိုဝ်း ၼႂ်းႁူင်းယႃလူင် ဝဵင်းလႃႈသဵဝ်ႈ ဢၼ်သိုၵ်းၵဝ်ႈၵၢင်ႉ တေႃႉဢွၵ်ႇဝဵင်းမႃးၼၼ်ႉ ယၢမ်းလဵဝ် မီးဝႆႉတီႈႁူင်းယႃလူင် ဝဵင်းသႅၼ်ဝီသေ ၵူၼ်းပဵၼ် ၸိူဝ်းယူတ်းယႃတီႈဝဵင်းလႃႈသဵဝ်ႈၼၼ်ႉၵေႃႈ ၶၢႆႉမႃး ယူတ်းယႃတူဝ် တီႈႁူင်းယႃ လူင်ဝဵင်းသႅၼ်ဝီၶိုၼ်းၼႆ – ၸၢႆးၼုမ်ႇ ၵူၼ်းမိူင်းဝဵင်းသႅၼ်ဝီ လၢတ်ႈၼႄၼင်ႇၼႆ။

“မိူဝ်ႈလဵဝ် တီႈႁူင်းယႃဝဵင်းႁဝ်းၼႆႉ ၵူၼ်းပဵၼ်မီးၼမ်ထူၼ်ႈယဝ်ႉဝႃႈ။ လိူတ်ႈၼႆႉ ၼိုင်ႈဝၼ်းဢေႇသုတ်းမၼ်း လူဝ်ႇယူႇ 10 ထူင်ၸိူဝ်းၼႆႉ။ သိုၵ်းၾၢႆႇဢဝ်ႁူမ်ႇလူမ်ႈၸိူဝ်းၼႆႉၵေႃႈ ၼမ်ၼႃႇမိူဝ်ႈလဵဝ်။ ၸဵမ်တင်ႇ ၸဵမ်ၽိူၼ် ၵူႇၼွၼ်းၸိူဝ်းၼႆႉၵေႃႈ ၶဝ်တေႃႉမႃးမူတ်း။ ၶိူင်ႈမၢင်မဵဝ်း ၶဝ်တမ်ႉပႆႇလႆႈတၢပ်ႈၶိုၼ်း ၸိူဝ်းၼႆႉၵေႃႈ မီးၼႂ်းဝၢင်းႁူင်းယႃလူင် မိူဝ်ႈလဵဝ်ၼႆႉ ပေႃးၵိုၼ်းဢိုၵ်ႉဢိုၵ်ႉ။ မေႃယႃ ၸိူဝ်းယူႇတီႈ ႁူင်းယႃလူင် ဝဵင်းလႃႈသဵဝ်ႈၼၼ်ႉၵေႃႈ ၶၢႆႉမႃးယူႇဝႆႉတီႈသႅၼ်ဝီမူတ်းယဝ်ႉ”။

လႆႈႁူႉဝႃႈ ၵူၼ်းပဵၼ်ၸိူဝ်းမႃးယူတ်းယႃတူဝ် တီႈႁူင်းယႃလူင်ၵူၼ်းမိူင်း ဝဵင်းသႅၼ်ဝီၼၼ်ႉ ပဵၼ်ၵူၼ်းပႃးတွင်ႉ၊ ၵိူတ်ႇလုၵ်ႈ ၵမ်ႈၼမ်သေ မၢင်ၸိူဝ်းသမ်ႉ မႃးယူတ်းယႃ တၢင်းပဵၼ်ႁူင်း ၶဝ်ႈၸဵပ်း ၸဵမ်ၸိူဝ်းၼႆႉ။

ဝဵင်းသႅၼ်ဝီၼႆႉ မိူဝ်ႈပႆႇပဵၼ်ၽႅၼ်ယၼ်ႇသိုၵ်း 1027 ၽွင်းယူႇတႂ်ႈဢႃႇၼႃႇသိုၵ်းမၢၼ်ႈ ၵုမ်းၵမ် ၽွတ်ႈပဵၼ်ဝႆႉ တႃႇ 4 ပွၵ်ႉ ၸိူဝ်းယူႇၼႂ်းၵၢင်ဝဵင်းၼၼ်ႉၵူၺ်း။ ဝၢႆးလင် ပၢင်တိုၵ်းယဝ်ႉသေ သိုၵ်းၵဝ်ႈၵၢင်ႉ MNDAA ၵုမ်းၵမ် ၶိုၼ်းဢဝ်ဢိူင်ႇ တင်ႈပဵၼ်ပွၵ်ႉထႅင်ႈလႄႈ ယၢမ်းလဵဝ် တင်းမူတ်းမီးၵႂႃႇ 7 ပွၵ်ႉ။ တႃႇသၢမ်ပွၵ်ႉ ဢၼ်သိုၵ်းၵဝ်ႈၵၢင်ႉ မႃးၽိူမ်ႉသႂ်ႇၼၼ်ႉတႄႉ ဢိူင်ႇႁူဝ်ၼႃး၊ ၶမ်းတိူၼ်း ပဵၼ်ပွၵ်ႉ 5 ၊ ဢိူင်ႇပၢင်ႇလေႃႉ ပဵၼ် ပွၵ်ႉ 6 လႄႈ ဢိူင်ႇၵွင်းႁေႃသမ်ႉ ပဵၼ်ပွၵ်ႉ 7 ဝႃႈၼႆ။

ၼႂ်းၶၢဝ်းတၢင်း သိုၵ်းၵဝ်ႈၵၢင်ႉ ၵုမ်းၵမ်မႃး ပီပၢႆ ၵူၼ်းမိူင်းဢမ်ႇမီးၵၢၼ် တႃႇႁဵတ်းႁႃၵိၼ်လဵင်ႉတွင်ႉငၢႆႈလူမ်၊ ပၢႆးမၢၵ်ႈမီး ဢမ်ႇၶႅမ်ႉ၊ ၶၢႆၶူဝ်းၵုၼ်ႇၵေႃႈ လႆႈသႂၢင်းပၼ်ၶွၼ်ႇတီႈသိုၵ်းၼမ်၊ ဢမ်ႇလိူဝ်သေ ၵူၼ်းၶၢႆၵိၼ် ၽၵ်းၶဵဝ် ယင်းလႆႈပၼ်ၶွၼ်ႇ တီႈသိုၵ်းၵဝ်ႈၵၢင်ႉ ၵူႈဝၼ်း။ တေႁဵတ်းႁႂ်ႈႁဵတ်းသူၼ်ၼႆၵေႃႈ ၺႃးသိုၵ်းၵဝ်ႈၵၢင်ႉ တဵၵ်းႁႂ်ႈဢဝ်သူၼ်ႁႆႈၼႃးၶၢတ်ႈပၼ် တီႈ ၸဝ်ႈပၢႆးမၢၵ်ႈမီးၶႄႇၶဝ်ထႅင်ႈလႄႈ ႁဵတ်းႁႂ်ႈၵူၼ်းမိူင်းသႅၼ်ဝီ ယူႇယၢပ်ႇၵိၼ်းၸႂ်မႃး ၵူႈမိုဝ်ႉဝၼ်း။

မိူဝ်ႈဝၼ်းတီႈ 15/04/2025 ယၢမ်းၵၢင်ၼႂ် ၵူၼ်းၶၢႆၵုၼ်ႇလႄႈ ၽၵ်းယိူဝ်ႈၼၢင်းၶဵဝ် ၵႂႃႇပိုတ်ႇႁၢၼ်ႉၶၢႆၵုၼ်ႇ ၼႂ်းၵၢတ်ႇလူင် ဝဵင်းသႅၼ်ဝီ။ သိုၵ်းၵဝ်ႈၵၢင်ႉ ၵႂႃႇလိုပ်ႈၵူၼ်းၶၢႆၽၵ်းယိူဝ်ႈၼၢင်းၶဵဝ်တင်း ၵူၼ်းသိုဝ်ႉၵၢတ်ႇ တီႈၼႂ်းၵၢတ်ႇလူင်ၼၼ်ႉ ႁႂ်ႈၶၢႆႉၵႂႃႇၶၢႆတီႈၵၢတ်ႇမႂ်ႇ ဢၼ်ႁဵတ်းဝႆႉတီႈ ဢိူင်ႇပၢင်ႇလေႃႉ ႁိမ်းဢေႊသျႃႊဝေႃႊ ၼၼ်ႉလႄႈ ႁဵတ်းႁႂ်ႈၵူၼ်းမိူင်းတင်း သိုၵ်းၵဝ်ႈၵၢင်ႉ မီးပၼ်ႁႃတေႃႇၵၼ်ၼႆ – ၸၢႆးၼွင်ႉ ၵူၼ်းမိူင်းသႅၼ်ဝီ လၢတ်ႈၼႄတီႈၽူႈတွႆႇႁွၵ်ႈၼင်ႇၼႆ။

“မၢၵ်ႇလိင်ႇပျႅၼ်ႇ (ၶိူင်ႈမိၼ်တိုၵ်း) မႃးတူၵ်းသႂ်ႇတီႈၸဵင်ႇၵၢတ်ႇၼၼ်ႉသေ တႄႇၼၼ်ႉမႃး ၵူၼ်းမိူင်းၵေႃႈ လႆႈတမ်းၶၢႆတၢင်းၶၢႆ ႁိမ်းသွင်ၽၢၵ်ႇၶၢင်ႈတၢင်းမႃးၵူၺ်း။ ဢၼ်ၶိုၼ်းၶၢႆႉ ၵႂႃႇၶၢႆ ၼႂ်းၵၢတ်ႇလူင်ၶိုၼ်းၼႆႉ တိုၵ်ႉမီးမွၵ်ႈသၢမ်သီႇဝၼ်းၵူၺ်း။ မိူဝ်ႈဝႃးၼႆႉသမ်ႉ သိုၵ်းၵဝ်ႈၵၢင်ႉၶဝ် မႃးလိုပ်ႈၵူၼ်းၶၢႆၵၢတ်ႇ ႁႂ်ႈဢွၵ်ႇၵႂႃႇၶၢႆ တၢင်းၵၢတ်ႇမႂ်ႇ ဢၼ်မီးတၢင်းပၢင်ႇလေႃႉ ၼၼ်ႉ။ ၵူၼ်းၶၢႆၵၢတ်ႇၵေႃႈ ဢမ်ႇၽွမ်ႉ။ ပေႃးဝႃႈၼၼ်ၵေႃႈ သိုၵ်းၵဝ်ႈၵၢင်ႉၼႆႉ ဢမ်ႇပၼ်ၵူၼ်းၸိူဝ်းမႃးသိုဝ်ႉၵၢတ်ႇၼၼ်ႉ ၶဝ်ႈၼႂ်းၵၢတ်ႇယဝ်ႉ။ ၵူၼ်းမိူင်း ဢမ်ႇပေႃးၸႂ် ဢွၼ်ၵၼ် ၵႂႃႇတိူင်ႇလၢတ်ႈတီႈ ၵူၼ်းလူင်ၶဝ်ဝႆႉ”။

တီႈၵၢတ်ႇမႂ်ႇ ဢၼ်သိုၵ်းၵဝ်ႈၵၢင်ႉ ႁဵတ်းဝႆႉ ႁိမ်းဢေႊသျႃႊဝေႃႊ (တူဝ်းၵဵတ်ႉ) ပၢင်ႇလေႃႉၼၼ်ႉ သိုၵ်းၵဝ်ႈၵၢင်ႉ ႁႂ်ႈၵူၼ်းမိူင်းၶၢတ်ႈဢဝ်သေ ပေႃးပဵၼ်ႁွင်ႈၶၢႆယႃႈယႃ ၼိုင်ႈလိူၼ် တေလႆႈပၼ် 5 သႅၼ်ပျႃး၊ ႁွင်ႈၶၢႆ မၢၵ်ႇမႆႉမၢၵ်ႇတွၵ်ႇလႄႈ ၽၵ်းယိူဝ်ႈၼၢင်းၶဵဝ်ၵေႃႈ ၼိုင်ႈႁွင်ႈလႂ် တူၵ်းမႅၼ်ႈယူႇ ၼပ်ႉႁူဝ်သႅၼ်ပျႃး။ လိူဝ် ၼၼ်ႉ ၵႃႈၵဵပ်းယုၵ်းယၢၵ်းသမ်ႉ ၼိုင်ႈလိူၼ် 15,000 ပျႃး။

ၵၢတ်ႇမႂ်ႇၼၼ်ႉ သိုၵ်းၵဝ်ႈၵၢင်ႉ သၢင်ႈၶိုၼ်ႈမႃးသေ ၶၢႆပၼ်ၶိုၼ်း ၸဝ်ႈပၢႆးမၢၵ်ႈမီးၶႄႇ။ ယၢမ်းလဵဝ်သမ်ႉ သိုၵ်းၵဝ်ႈၵၢင်ႉ တဵၵ်းတဵင် ႁႂ်ႈၵူၼ်းမိူင်း ၵႂႃႇၶၢတ်ႈႁွင်ႈသေ ၶၢႆႉၵႂႃႇႁဵတ်းၵၢတ်ႇတီႈၼၼ်ႉၶိုၼ်းၼႆ – ၸၢႆးၼွင်ႉ သိုပ်ႇလၢတ်ႈၼႄၼင်ႇၼႆ။

“သိုၵ်းၵဝ်ႈၵၢင်ႉၶဝ် ႁႂ်ႈၶၢႆႉၵႂႃႇၶၢႆၼႂ်းၵၢတ်ႇပၢင်ႇလေႃႉ။ တီႈၵၢတ်ႇမႂ်ႇၼၼ်ႉ တေႁဵတ်းပွႆးပိုတ်ႇၽုၺ်ႇ (ထီႇဢွင်ႇပႃႇလေႇ) လႄႈ ၸူးမႃးလိုပ်ႈၶဝ်ႁႂ်ႈဢွၼ်ၵၼ်ၵႂႃႇၵၢတ်ႇမႂ်ႇ။ ၵူၼ်းၶၢႆၵၢတ်ႇဝႃႈ ၵႃႈၶၼ်မၼ်းယႂ်ႇၼႃႇ ႁႂ်ႈယွမ်းပၼ်ၼႆသေ ႁူမ်ႈၵၼ်ၵႂႃႇ ၸူးၵူၼ်းလူင်ၶႄႇ (ၵဝ်ႈၵၢင်ႉ)။ ယၢမ်းလဵဝ်ၵူၼ်းလူင်သမ်ႉ ဢမ်ႇမီးဢွၵ်ႇတၢင်းဝႆႉ။ ၵၢတ်ႇမႂ်ႇၼၼ်ႉ ငိၼ်းဝႃႈပဵၼ်ၶွင်လၢဝ်းပၢၼ်း ၵေႃႉၼိုင်ႈ။ လၢဝ်းပၢၼ်းၼၼ်ႉ ပၼ်ၶွၼ်ႇတီႈသိုၵ်းၵဝ်ႈၵၢင်ႉဝႆႉ”။

မိူဝ်ႈသိုၵ်းၵဝ်ႈၵၢင်ႉတင်း ၸုမ်းဢူၺ်းလီၶဝ်ႁူမ်ႈၵၼ် ပိုတ်ႇၽႅၼ်ယၼ်ႇသိုၵ်း 1027 လွပ်ႈၼိုင်ႈၼၼ်ႉ ပိုၼ်ၽၢဝ်ႇ ႁႂ်ႈလုမ်ႈၾႃႉႁူႉဝႃႈ ပိူဝ်ႈတႃႇတေႃႇသူႈတိုၵ်းတေႃးပႅတ်ႈၸဝ်ႈဢႃႇ ၼႃႇသေ ႁႂ်ႈၵူၼ်းမိူင်းၵႂႃႇမႃးပႆ ႁဵတ်းႁႃၵိၼ်လႆႈထၢင်ႇႁၢင်ႈ လွတ်ႈလႅဝ်း မီးလွင်ႈႁူမ်ႇလူမ်ႈလိူဝ်ၵဝ်ႇၼႆသေတႃႉ ဝၢႆးလင် ၵုမ်းၵမ်လႆႈဝဵင်းမႃးယဝ်ႉ တၢင်းႁဵတ်းသၢင်ႈ သိုၵ်းၵဝ်ႈၵၢင်ႉၼႆႉ ဢမ်ႇမိူၼ်ၸွမ်းၼင်ႇ ပိုၼ်ၽၢဝ်ႇဝႆႉ။

တီႈဝဵင်းသႅၼ်ဝီၼႆႉ သိုၵ်းၵဝ်ႈၵၢင်ႉ MNDAA မိပ်ႇငႅၼ်း တဵၵ်းႁႂ်ႈၵူၼ်းမိူင်း ၶၢတ်ႈပၼ်ဢွင်ႈတီႈလိၼ် တႃႇၽုၵ်ႇဢွႆႈလႄႈ ႁဵတ်းသူၼ်ၵူၺ်ႈၸိူဝ်းၼႆႉၵူၺ်းဢမ်ႇၵႃး တဵၵ်းႁႂ်ႈၵူၼ်းဝၢၼ်ႈ ၶဝ်ႈႁၢပ်ႇထၢမ်းၵၢၼ်သိုၵ်း ၼိုင်ႈဝၢၼ်ႈလႂ် ဢေႇသုတ်း 2 ၵေႃႉ။ သင်ဢမ်ႇႁႃပၼ်လႆႈၸိုင် သိုၵ်းၵဝ်ႈၵၢင်ႉ ၶဝ်ႈၺွပ်းဢဝ်ၵူၼ်းၼုမ်ႇ ထိုင်ၼႂ်းဝၢၼ်ႈၼႂ်းသူၼ်ႁင်းၵူၺ်းၼႆ – ၼၢင်းမွၼ်း ၵေႃႉယူႇဝဵင်းသႅၼ်ဝီ လၢတ်ႈၼႄၼင်ႇၼႆ။

“သူၼ်ၸိူဝ်းဢၼ်ၶဝ်မႃးတဵၵ်းၶၢတ်ႈၼၼ်ႉ မိူဝ်ႈလဵဝ် ၶဝ်ႁႂ်ႈၸဝ်ႈသူၼ်ယႃႉပႅတ်ႈထဵင်မူတ်းမူတ်း။ ၸဝ်ႈ သူၼ်မၢင်ၸိူဝ်း ဢမ်ႇၶႂ်ႈယႃႉ ၵွပ်ႈပိူဝ်ႈလႆႈႁဵတ်းဝႆႉမၼ်ႈၵိုမ်းယဝ်ႉလႄႈ ၶႂ်ႈႁႂ်ႈဝႆႉပၼ်မိူၼ်ၵဝ်ႇ ၸိူင်ႉၼၼ် ၵူၺ်းၼႆသေ ၵႂႃႇတွင်းပၢၼ်ႇၵေႃႈ ဢမ်ႇၽွမ်ႉ။ သိုၵ်းၶႄႇ (ၵဝ်ႈၵၢင်ႉ) ၸိူဝ်းၼႆႉ ပႃးၵွင်ႈသေ ၸွမ်းၵူၼ်ႈ လၢဝ်းပၢၼ်းၶႄႇ (ၵဝ်ႈၵၢင်ႉ) ၸွမ်းဢဝ်ႁူမ်ႇလူမ်ႈပၼ်။ ၵူၼ်းမိူင်းၽွမ်ႉ ဢမ်ႇၽွမ်ႉၵေႃႈယဝ်ႉ ၵႂႃႇတဵၵ်းတႅၵ်ႈ ဢဝ်တီႈလိၼ်ပၼ်လၢဝ်းပၢၼ်းၶႄႇၼၼ်ႉ။ ပေႃးတႅၵ်ႈယဝ်ႉၵေႃႈ ႁႂ်ႈၸဝ်ႈသူၼ်ၵႂႃႇထုၵ်ႈဢဝ်ငိုၼ်း တီႈလုမ်းၶဝ်ၵမ်းလဵဝ်။”

ဢွင်ႈတီႈလိၼ်ၼၼ်ႉ သိုၵ်းၵဝ်ႈၵၢင်ႉ မီးၽႅၼ်ၵၢၼ်တႃႇၶၢတ်ႈၵႂႃႇ ၶၢဝ်းတၢင်းႁိုင် 6 ပီ။ ပၼ်ၵႃႈၶၢတ်ႈသူၼ် ၼိုင်ႈဢေႊၶိူဝ်ႊ ၼိုင်ႈပီလႂ် 5 သႅၼ်ပျႃး။ သင်ဢမ်ႇၶၢတ်ႈပၼ်ၸိုင် တေယိုတ်းဢဝ်လၢႆၼႆလႄႈ ႁဵတ်းႁႂ်ႈ ၵူၼ်းမိူင်းဢမ်ႇမီးၶေႃႈထဵင်ၶိုၼ်း။ ယၢမ်းလဵဝ်တႄႉ ၾၢႆႇသိုၵ်းၵဝ်ႈၵၢင်ႉ ပၼ်ၵႃႈၶၢတ်ႈသူၼ်ဝႆႉ တႃႇၼိုင်ႈပီၵူၺ်း ဝႃႈၼႆ။

လိူဝ်ၼၼ်ႉ သိုၵ်းၵဝ်ႈၵၢင်ႉ ပၼ်ၶႂၢင်ႉၸဝ်ႈပၢႆးမၢၵ်ႈမီးၶဝ် ပိုတ်ႇပၢင်တေႃႇလွင်း တိၵ်းတိၵ်းလႄႈ ႁဵတ်းႁႂ်ႈၵူၼ်းမိူင်း ၾိင်ႈယၢမ်ႈလူႉၵႂႃႇတင်းၼမ်သေ ႁဵတ်းႁႂ်ႈၵူၼ်းၼႂ်းမုင်ႉႁေႃႁိူၼ်း မီးပၼ်ႁႃတေႃႇၵၼ်မႃး။

ၼႂ်းၶၢဝ်းယၢမ်း ငဝ်းလၢႆးဝၢၼ်ႈမိူင်းဢမ်ႇတၢႆတူဝ်ၼၼ်ႉ သိုၵ်းၵဝ်ႈၵၢင်ႉ ဢဝ်ၾိင်ႈထုင်းၸၢဝ်းၶိူဝ်း ႁဵတ်းပဵၼ်ၶေႃႈဢၢင်ႈ/ ႁဵတ်းၼႃႈတိူဝ်ႈသေ ပၼ်ငိုၼ်းၵွင်ၵၢင် တီႈၽူႈယႂ်ႇၵူၼ်းလူင် ၼႂ်းဝဵင်း၊ ၼႂ်းပွၵ်ႉ၊ ၼႂ်းဢိူင်ႇ ၸိူဝ်းၼႆႉယဝ်ႉ တဵၵ်းၸႂ်ႉႁဵတ်းပွႆးလၢမ်း ၵိုၼ်းၶွၼ်ႈၼႂ်းပိုၼ်ႉတီႈ။ ပိူဝ်ႈတႃႇ ပိုတ်ႇလႆႈပၢင်တေႃႇလွင်းၵႂႃႇ ဢမ်ႇထၢတ်ႇဢမ်ႇဝၢႆး ဝႃႈၼႆ။

လႆႈႁူႉဝႃႈ ၼႂ်းၶၢဝ်းတၢင်းသိုၵ်းၵဝ်ႈၵၢင်ႉ MNDAA ၵုမ်းၵမ်မႃး ၶၢဝ်းတၢင်းႁိုင်ပီပၢႆ တီႈဝဵင်းသႅၼ်ဝီၼႆႉ မီး ပၢင်တေႃႇလွင်း၊ ႁူင်းမိပ်ႇၼူတ်ႈ၊ ႁူင်းပျေႃႇမူၼ်ႈ ၼမ်မႃးသေ ႁဵတ်းႁႂ်ႈၾိင်ႈယၢမ်ႈၵူၼ်းမိူင်းလူႉ ၵူၺ်း ဢမ်ႇၵႃး ဢမ်ႇမီးမၢႆမီႈသုမ်းငမ်းလႄႈ ၽူႈလၵ်ႉၸၵ်ႉၶုတ်ႈ၊ ၵူၼ်းၸူၼ်ၵေႃႈၼမ်မႃး ထိုင်တီႈ ဢဝ်ၵွင်ႈယိုဝ်းၵၼ်တၢႆ ဢဝ်ၶွၼ်ႉပေႃႉထုပ်ႉၵၼ်တၢႆ ၸဵမ်ၸိူဝ်းၼႆႉၵေႃႈ မီးမႃး ၼႆယဝ်ႉ။

တႅမ်ႈ – မူၺ်ၶမ်း