သိုၵ်းၵဝ်ႈၵၢင်ႉ MNDAA ႁွင်ႉဢဝ်ႁၢႆးသိုၵ်း (သိုၵ်းမၢၼ်ႈ ၸိူဝ်းၺႃးတီႉၺွပ်း မိူဝ်ႈၽႅၼ်ယၼ်ႇသိုၵ်း 1027) ၼၼ်ႉသေ ၺႃးတူၵ်းၶွၵ်ႈဝႆႉ တီႈဝဵင်းလႃႈသဵဝ်ႈ ထိုင်မႃးၶၢဝ်းသွၼ်းၼမ်ႉ ပီ 2025 ၼႆႉ လႆႈၶၢႆႉၵႂႃႇတၢင်း ဝဵင်းလၢဝ်ႇၵၢႆး ၸိုင်ႈတႆးပွတ်းႁွင်ႇ။
သိုၵ်းၵဝ်ႈၵၢင်ႉၼႆႉ တႄႇထွႆဢွၵ်ႇၶိုၼ်းဝဵင်းလႃႈသဵဝ်ႈ မိူဝ်ႈႁၢင်လိူၼ်မၢတ်ႊၶျ်ၼၼ်ႉသေ ယၢမ်းလဵဝ်သမ်ႉ တေႃႉဢဝ်ႁၢႆးသိုၵ်း ၸိူဝ်းၺႃးတီႉၺွပ်းဝႆႉၼႂ်းၶွၵ်ႈလူင် ဝဵင်းလႃႈသဵဝ်ႈၼၼ်ႉ လတ်းဝဵင်းသႅၼ်ဝီ ၵႂႃႇတၢင်းဝဵင်းလၢဝ်ႇၵၢႆးထႅင်ႈၼႆ ၸၢႆးၼုမ်ႇ ၵူၼ်းမိူင်းသႅၼ်ဝီ ၵေႃႉႁၼ် ၵႃးသိုၵ်းၵဝ်ႈၵၢင်ႉ လတ်းၵႂႃႇၼၼ်ႉ လၢတ်ႈၼႄတီႈၽူႈတွႆႇႁွၵ်ႈၼင်ႇၼႆ။
“ၸူဝ်ႈၶၢဝ်းသွၼ်းၼမ်ႉၼႆႉ သိုၵ်းၵဝ်ႈၵၢင်ႉၶဝ် တေႃႉဢဝ်ၵူၼ်းသိုၵ်းၶဝ်ႁႄ ၵူၼ်းတူၵ်းၶွၵ်ႈၶဝ်ၼၼ်ႉႁႄ ၼိုင်ႈဝၼ်းၵႃးသီႇႁႃႈလမ်း ၵႂႃႇတၢင်းလၢဝ်ႇၵၢႆႇၼၼ်ႉ ၼမ်ၼႃႇ။ ၶဝ်တေႃႉၶူဝ်း တေႃႉၵူၼ်းၶဝ်ၼႆႉ ၶႂ်ႈဝႃႈမီးၵူႈဝၼ်းယဝ်ႉ။ ငဝ်းလၢႆး တေပဵၼ်ႁိုဝ်မႃးထႅင်ႈတႄႉ ဢမ်ႇႁူႉယဝ်ႉဝႃႈ”။
ၽွင်းသိုၵ်းၵဝ်ႈၵၢင်ႉ တေႃႉၵူၼ်းသိုၵ်းဢိၵ်ႇ ၶိူင်ႈၵွင်ႈၵၢင်ႇလႄႈ ႁၢႆးသိုၵ်း ၵမ်ႈၽွင်ႈ ထွႆဢွၵ်ႇဝဵင်းလႃႈသဵဝ်ႈ ၶိုၼ်း မိူဝ်ႈဝၼ်းတီႈ 16/04/2025 ယၢမ်းဝၢႆးဝၼ်း 2 မူင်းၼၼ်ႉ သိုၵ်းမၢၼ်ႈ ၸႂ်ႉၶိူင်ႈမိၼ် MI-17 Military Transport Helicopter (3) လမ်း မိၼ်ပၼ်ႇၵႂႃႇတၢင်းဝဵင်းလႃႈသဵဝ်ႈ – သႅၼ်ဝီ – ၵူတ်ႉၶၢႆ – မူႇၸေႊ ဝႃႈၼႆ။
မိူဝ်ႈၽႅၼ်ယၼ်ႇသိုၵ်း 1027 ပွၵ်ႈၵမ်းသွင် ပၢင်တိုၵ်းတီႈဝဵင်းလႃႈသဵဝ်ႈၼၼ်ႉ ၾၢႆႇသိုၵ်းၵဝ်ႈၵၢင်ႉ တီႉၺွပ်းဝႆႉပႃး ၸွမ်သိုၵ်းၸူဝ်းတိၼ်ႉ ၽူႈၵွၼ်းတိူင်းသိုၵ်း ငဝ်ႈငုၼ်းၸဵင်ႇႁွင်ႇဝၼ်းဢွၵ်ႇ (ယမၶ) လႃႈသဵဝ်ႈ၊ ၸဝ်ႈသိုၵ်းလူင် မျဵဝ်းမိၼ်းထူၺ်း ငဝ်ႈငုၼ်းၵုမ်းၵမ် ၽႅၼ်ၵၢၼ်ယၼ်ႇသိုၵ်း မၢႆ (1) ၸဝ်ႈသိုၵ်းလူင် တၢၼ်ႉထိၼ်ႇသူဝ်း ၸွမ်ၸိၵ်းၽူႈၵွၼ်း တိူင်းသိုၵ်း ယမၶ လႃႈသဵဝ်ႈလႄႈ ႁၢႆးသိုၵ်းထႅင်ႈတင်းၼမ်။
လႆႈႁူႉဝႃႈ ၾၢႆႇသိုၵ်းၵဝ်ႈၵၢင်ႉ ပွႆႇပၼ်ၶိုၼ်း ႁၢႆးသိုၵ်းၵမ်ႈၼမ် ပဵၼ်ၵမ်းၸုပ်ႈၸုပ်ႈ လၢႆပွၵ်ႈယဝ်ႉၼႆသေတႃႉ ႁၢႆးသိုၵ်း ၸိူဝ်းပဵၼ်ၽူႈမီးၸၼ်ႉထိုင် ၽူႈၵွၼ်းတိူင်းသိုၵ်း ၸိူဝ်းၼၼ်ႉတႄႉ ယင်းပႆႇပွႆႇပၼ်ၶိုၼ်း။
ယွၼ်ႉလူင်ပွင်ၸိုင်ႈမိူင်းၶႄႇ မိပ်ႇငႅၼ်းပၼ်ႁႅင်းဢီး ၼိူဝ်သိုၵ်းၵဝ်ႈၵၢင်ႉ ႁႂ်ႈထွႆဢွၵ်ႇၼႂ်းဝဵင်းလႃႈသဵဝ်ႈ ဝၼ်းတီႈ 22/04/2025 ပဵၼ်ဝၼ်းလိုၼ်းသုတ်းၼႆသေ တႄႇႁူဝ်လိူၼ်ဢေႊပရိူဝ်ႊမႃး သိုၵ်းၵဝ်ႈၵၢင်ႉ ၵိုင်ႉ ၵၢင်ႉႁိပ်ႈၼႅတ်ႈ တေႃႉဢဝ်ၶိူင်ႈၸႂ်ႉတိုဝ်းၶူဝ်းၶွင် ၸိူဝ်းမီးၵႃႈၶၼ်လဵၵ်ႉယႂ်ႇ တင်းသဵင်ႈဢွၵ်ႇဝဵင်းၵႂႃႇ။
တႅမ်ႈ – ၽူၺ်းၼုမ်ႇ
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ