ဝၢႆးလင် မီးၶၢဝ်ႇႁူင်လိုဝ်းဢွၵ်ႇမႃးဝႃႈ သိုၵ်းၵဝ်ႈၵၢင်ႉ MNDAA တေလႆႈထွႆဢွၵ်ႇဝဵင်းလႃႈသဵဝ်ႈသေ ပၼ်သိုၵ်းမၢၼ်ႈ မႃးၵုမ်းၵမ်ၶိုၼ်း ၼႂ်းဝဵင်းလႃႈသဵဝ်ႈ တႃႇ 12 ပွၵ်ႉၼႆယဝ်ႉ တႄႇမိူဝ်ႈၼၼ်ႉမႃး သိုၵ်းၵဝ်ႈၵၢင်ႉ တေႃႉဢဝ်ၶူဝ်းလဵင်း ၼႂ်းႁူင်းယႃလူင်ၵူၼ်းမိူင်းဝဵင်းလႃႈသဵဝ်ႈ ဢွၵ်ႇဝဵင်းၵူႈမိုဝ်ႉဝၼ်းသေ မိူဝ်ႈဝၼ်းတီႈ 17/04/2025 ယၢမ်းၵၢင်ၼႂ် သိုၵ်းၵဝ်ႈၵၢင်ႉ ဢိုတ်းႁူင်းယႃလူင်ၵႂႃႇတေႉတေႉယဝ်ႉ။

ၵူၺ်းၵႃႈတေႃႇထိုင် ဝၼ်းတီႈ 16/04/2025 ယၢမ်းၵၢင်ၶမ်ႈတႄႉ  ႁူင်းယႃလူင် တိုၵ်ႉပိုတ်ႇယူႇသေ မီးၵူၼ်းပဵၼ် လႄႈ ၵူၼ်းၵႂႃႇမႃး ၼႂ်းဝၢင်း ႁူင်းယႃလူင်ယူႇ။ ၵၢင်ၼႂ် ၾႃႉပၢင်ႇမိူင်းလႅင်းမႃး ၵႂႃႇၵၢတ်ႇၵေႃႈ ႁၼ်ၽၵ်းတူႁူင်းယႃဢိုတ်းဝႆႉယဝ်ႉၼႆ ၸၢႆးၸၢႆး ၵူၼ်းမိူင်းဝဵင်းလႃႈသဵဝ်ႈ လၢတ်ႈၼႄတီႈၽူႈတွႆႇႁွၵ်ႈၼင်ႇၼႆ။

“ႁူင်းယႃၼႆႉ ပိၵ်ႉၽၵ်းတူလူင်ၵႂႃႇ ၸဵမ်မိူဝ်ႈၵၢင်ၼႂ်ၸဝ်ႉၼၼ်ႉယဝ်ႉ။ လၢႆးႁဵတ်းၶဝ်ၼႆႉ လီၸႂ်သဵင်ႈၼႃႇ။ ယၢမ်းလဵဝ် ၸၢတ်ႈပၢၼ်ၵူၼ်းမိူင်းဝဵင်းလႃႈသဵဝ်ႈၼႆႉ မိူၼ်ၵၼ်တင်း မႄႈမၢၼ်းလၢႆပိူၼ်ႈ ႁႃၸဝ်ႈၽူဝ်ဢမ်ႇႁၼ်ၼၼ်ႉၶႃႈၼေႈ။ ဢမ်ႇႁၵ်ႉၵေႃႈ ၵႃႈလႆႈၼူမ်ယဝ်ႉၼေႃႈ။ တေၸၢင်ႈႁဵတ်းႁိုဝ်လႃႇ။ ႁူင်းယႃလူင်ၼႆႉ တေပိုတ်ႇၶိုၼ်းမိူဝ်ႈလႂ်ၼႆၵေႃႈ ဢမ်ႇပိုၼ်ၽၢဝ်ႇဝႆႉ”

မီးၶၢဝ်ႇလိုဝ်းဝႆႉဝႃႈ သိုၵ်းၵဝ်ႈၵၢင်ႉ MNDAA တေလႆႈထွႆဢွၵ်ႇဝဵင်းလႃႈသဵဝ်ႈပၼ် ဝၼ်းတီႈ 21/04/2025 ၼႆႉ ဝႆႉပဵၼ်လိုၼ်းသုတ်း။  ဝၢႆးလင် ဝၼ်းတီႈ 22/04/2025 သိုၵ်းမၢၼ်ႈ တေၶိုၼ်းၶဝ်ႈမႃးတူင်ႉၼိုင်ၵုမ်းၶိုၼ်း ၼႂ်းဝဵင်းလႃႈသဵဝ်ႈ ဝႃႈၼႆသေတႃႉ ၼင်ႇၽူႈတွႆႇႁွၵ်ႈဢွၵ်ႇၶၢဝ်ႇဝႆႉမိူဝ်ႈႁူဝ်လိူၼ် မၢတ်ႉၶျ် ၼၼ်ႉယဝ်ႉ ၼႂ်းဝၼ်းတီႈ 18/4/2025 ၼႂ်ၼႆႉ သိုၵ်းမၢၼ်ႈသမ်ႉပေႃးၶဝ်ႈမႃးၶိုၼ်းဝဵင်းလႃႈသဵဝ်ႈယူႇယဝ်ႉ – ၵူၼ်းလႃႈသဵဝ်ႈယိုၼ်ယၼ်လၢတ်ႈၼင်ႇၼႆ။

 ၼႂ်းဝဵင်းလႃႈသဵဝ်ႈၼႆႉ မီးႁွင်ႈယႃဝႆႉယူႇလၢႆလၢႆတီႈသေတႃႉ ယွၼ်ႉၵႃႈၶၼ်ယူတ်းယႃသုင်ႁႅင်းၵေႃႈ ပိူင် ၼိုင်ႈ၊ ႁွင်ႈယႃၸိူဝ်းမီးဝႆႉၼၼ်ႉ ဢမ်ႇပိုတ်ႇပၼ် 24 ၸူဝ်ႈမူင်း မိူၼ်ႁူင်းယႃလူင်ၵူၼ်းမိူင်းၵေႃႈပိူင်ၼိုင်ႈလႄႈ ႁဵတ်းႁႂ်ႈ ၵူၼ်းမိူင်းၸိူဝ်းလူဝ်ႇႁိပ်ႈၼႅတ်ႈယူတ်းယႃၼၼ်ႉ ၵႂႃႇပိုင်ႈဢိင်ႁူင်းယႃလူင်ၵူၼ်းမိူင်း ဝဵင်းသႅၼ်ဝီ ၸိုင်ႈတႆးပွတ်းႁွင်ႇၼႆ ၸၢႆးၸၢႆး ၵူၼ်းမိူင်းဝဵင်းလႃႈသဵဝ်ႈ သိုပ်ႇလၢတ်ႈၼႄၼင်ႇၼႆ။

“ၵွၼ်ႇၼႃႈၶဝ်တေဢိုတ်းႁူင်းယႃၼႆႉ ၵူၼ်းပဵၼ်ၸိူဝ်းဢမ်ႇပႆႇထိုင်ၶၢဝ်းယၢမ်းတေလႆႈလူင်းႁူင်းယႃ ၵေႃႈ ၸႂ်ႉလူင်းႁူင်း ယႃမိူဝ်း။ ၵူၼ်းၸိူဝ်းဢမ်ႇမီးလူတ်ႉမီးၵႃး ဢမ်ႇမီးငိုၼ်းတွင်း ဢမ်ႇပွင်ပဵၼ်လႆႈၼၼ်ႉတႄႉ ပေႃးပဵၼ်ၵိၼ်းမႃးတေႉတေႉ လူဝ်ႇ တၢႆလၢႆလၢႆၵွႆးဢိူဝ်ႈ။”

မေႃယႃ ၸိူဝ်းသၢၼ်ၶတ်း သိုၵ်းမၢၼ်ႈ ၶဝ်ႈႁဵတ်း CDM သေ သိုၵ်းၵဝ်ႈၵၢင်ႉ ႁွင်ႉမႃးႁဵတ်းၵၢၼ်ၶိုၼ်း တီႈႁူင်းယႃလူင် ၵူၼ်းမိူင်း ဝဵင်းလႃႈသဵဝ်ႈ တင်း ၶႃႈႁၢပ်ႇၵၢၼ်ၶုၼ် ၸိူဝ်းယူႇၾၢႆႇတႂ်ႈၵုမ်းၵမ်သိုၵ်းၵဝ်ႈၵၢင်ႉၼၼ်ႉ သိုၵ်းၵဝ်ႈၵၢင်ႉ ႁႂ်ႈၶၢႆႉ ၵႂႃႇယူႇဝႆႉ တီႈဝဵင်းလၢဝ်ႇၵၢႆး ၶိုၼ်း။ ၵမ်ႈၽွင်ႈၵေႃႈ ၵႂႃႇယူႇဝႆႉၼႂ်းဝဵင်းသႅၼ်ဝီၶိုၼ်းၼႆ- ၵူၼ်းပိုၼ်ႉတီႈ သႅၼ်ဝီ လၢတ်ႈၼႄၼင်ႇၼႆ။

ဝဵင်းလႃႈသဵဝ်ႈၼႆႉ သိုၵ်းၵဝ်ႈၵၢင်ႉ ႁူမ်ႈၵၼ်တင်း သိုၵ်းဢူၺ်းလီ လၢႆလၢႆၸုမ်းသေ တိုၵ်းသိမ်းဢဝ် မိူဝ်ႈပၢင်ယၼ်ႇသိုၵ်း 1027 ပွၵ်ႈၵမ်းသွင် ၼႂ်းလိူၼ်ၵျူႊလၢႆႊ။ သိုၵ်းၵဝ်ႈၵၢင်ႉ လႆႈၵုမ်းၵမ်ဢဝ် ဝဵင်းလႃႈသဵဝ်ႈ မွၵ်ႈၶၢဝ်းတၢင်း 10 လိူၼ်ၵွႆး သမ်ႉပေႃးတေလႆႈ ထွႆၶိုၼ်းသေ မွပ်ႈဢၢပ်ႈပၼ် သိုၵ်းမၢၼ်ႈ ၵုမ်းၵမ်ၵႂႃႇၶိုၼ်းယဝ်ႉ။

တႅမ်ႈ-ၽူၺ်းၼုမ်ႇ