မိူဝ်ႈၼႆႉ ဝၼ်းတီႈ 17/04/2025 ယၢမ်းၵၢင်ၼႂ် 10 မူင်း ဝၼ်းပီမႂ်ႇသွၼ်းၼမ်ႉ သိုၵ်းမၢၼ်ႈၸႂ်ႉၶိူင်ႈမိၼ်တိုၵ်း ပွႆႇမၢၵ်ႇသႂ်ႇ ၼႂ်းၼႃႈလိၼ်ၵုမ်းၵမ် တပ်ႉသိုၵ်းပူတ်းပွႆႇၸိူဝ်ႉၸၢတ်ႈတဢၢင်း TNLA တီႈဝၢၼ်ႈၵသူၵ်ႉ (ကဆုတ်ကျေးရွာ) ဝၼ်းဢွၵ်ႇ မိူင်းၵုတ်ႈ (မိုးကုတ်အရှေ့ပိုင်း) လႄႈ ဝၢၼ်ႈတိတ်ႉသဵင်ႉၵူင်း (သစ်စိမ့်ကုန်းရွာ) ၾၢႆႇတူၵ်းမိူင်းၵုတ်ႈ  လႄႈ  ဝဵင်း ပၢင်ႇဢူႈ ( ပြင်ဦးလွင်) တိူင်းတႃႈလိူဝ်ႇ။

ၵူၼ်းၸမ်ၸႂ် ၼႂ်းတပ်ႉသိုၵ်းတဢၢင်း TNLA ၵေႃႉၼိုင်ႈ လၢတ်ႈ ၽူႈတွႆႇႁွၵ်ႈဝႃႈ “ငိၼ်းဝႃႈတိူဝ်ႉၺႃးႁိူၼ်းၵူၼ်း မိူင်းၵႂႃႇလႄႈ ၵူၼ်းမိူင်းမၢတ်ႇၸဵပ်းၺႃး 2 ၵေႃႉၼႆဢိူဝ်ႈ။ ႁူဝ်ယွႆႈမၼ်းတႄႉ ပႆႇလႆႈႁူႉၸွမ်း။” ဝႃႈၼႆ။

ၾၢႆႇႁွင်ႈၵၢၼ်ပိုၼ်ၽၢဝ်ႇ တပ်ႉသိုၵ်းပူတ်းပွႆႇၸိူဝ်ႉၸၢတ်ႈတဢၢင်းတႄႉ ပိုၼ်ၽၢဝ်ႇဝႃႈ သိုၵ်းမၢၼ်ႈဢၼ်ပိုၼ်ၽၢဝ်ႇ ၵိုတ်း တိုၵ်းပဵၼ်တၢင်းၵၢၼ်ဝႆႉ တေႃႇထိုင်ဝၼ်းတီႈ  22 /4/2025 ၼႆႉ ၸႂ်ႉၶိူင်ႈမိၼ်တိုၵ်း ပွႆႇမၢၵ်ႇသႂ်ႇ ၼႂ်းၼႃႈတီႈ ၵုမ်းၵမ် သိုၵ်းတဢၢင်း TNLA တီႈဢမ်ႇပဵၼ်ပၢင်တိုၵ်းၵၼ်ၵွႆးဢမ်ႇၵႃး ယင်းၽိူမ်ႉႁႅင်းၶိူင်ႈၵွင်ႈၵၢင်ႇ လႄႈ ႁႅင်းၵူၼ်း ႁႅၼ်း သိုၵ်း လေႃႇတိုၵ်း တပ်ႉသိုၵ်းတဢၢင်းယူႇ ၼႆယဝ်ႉ။ 

ၵဵဝ်ႇလူၺ်ႈ မိူင်းၵုတ်ႈ ၺႃးမၢၵ်ႇလူင် ၶိူင်ႈမိၼ်တိုၵ်းၼႆႉသေ ၾၢႆႇသိုၵ်းမၢၼ်ႈတႄႉ ယင်းပႆႇဢွၵ်ႇမႃး ပိုၼ်ၽၢဝ်ႇၵၢဝ်ႇ လၢတ်ႈသင် ပဵၼ်တၢင်းၵၢၼ်တေႉတေႉ။

မိူၼ်ၼၼ်ၼင်ႇၵဝ်ႇ သိုဝ်ႇၶၢဝ်ႇ BBC ၵေႃႈ ပိုၼ်ၽၢဝ်ႇဢွၵ်ႇဝႆႉဝႃႈ ၽွင်းၶၢဝ်းသွၼ်းၼမ်ႉၼႆႉၵွႆး သိုၵ်းမၢၼ်ႈ ၸႂ်ႉၶိူင်ႈမိၼ် တိုၵ်းသေ ပွႆႇမၢၵ်ႇသႂ်ႇ ၼႂ်းၼႃႈလိၼ်သိုၵ်းၸၢဝ်းၶိူဝ်းၵုမ်းၵမ် ဢမ်ႇယွမ်း 7 ၸႄႈဝဵင်း ဝႃႈၼႆ။

တႅမ်ႈ- ၽူၺ်းၼုမ်ႇ