ဝၼ်းတီႈ 15/4/2025 ယၢမ်းၵၢင်ၼႂ် ပလိၵ်ႈသိုၵ်းၵဝ်ႈၵၢင်ႉ MNDAA မႃးလိုပ်ႈၵူၼ်းၶၢႆၶူဝ်း ၶၢႆၽၵ်းၶဵဝ် ႁိမ်းၶၢင်ႈတၢင်း ၵၢတ်ႇၵဝ်ႇ ဝဵင်းသႅၼ်ဝီ သေ ႁႂ်ႈၶၢႆႉၵႂႃႇၶၢႆတီႈၵၢတ်ႇမႂ်ႇ ဝၢၼ်ႈပၢင်ႇလေႃႉပုၼ်ႉ – ၵူၼ်းမိူင်းဢမ်ႇၶႂ်ႈၵႂႃႇ- ဝႃႈၼႆ ။
ၵူၼ်းၶၢႆၶူဝ်းႁိမ်းၶၢင်ႈတၢင်း ၵၢတ်ႇၵဝ်ႇ ဝဵင်းသႅၼ်ဝီလၢတ်ႈၽူႈတွႆႇႁွၵ်ႈဝႃႈ -“ ၵူၼ်းမိူင်းဢၼ်မႃးၶၢႆၼႂ်းၵၢတ်ႇၼႆႉ တိုၵ်ႉမီး 3 -4 ဝၼ်းၵူၺ်း ၊ မိူဝ်ႈဝႃး ပလိၵ်ႈသိုၵ်းၵဝ်ႈၵၢင်ႉ MNDAA 4 ၵေႃႉ မႃးလိုပ်ႈၶဝ် ၸႂ်ႉၵူၼ်းမိူင်းၵႂႃႇၶၢႆ တီႈၵၢတ်ႇဢၼ်ၶဝ်ပိုတ်ႇဝႆႉပၼ် တီႈဝၢၼ်ႈပၢင်ႇလေႃႉၼၼ်ႉ ။ ၵူၼ်းမိူင်း ဢမ်ႇပေႃးၸႂ် ဢမ်ႇၶႂ်ႈၵႂႃႇ။ သိုၵ်းၵဝ်ႈၵၢင်ႉၶဝ်ၼႆႉၶဝ်ၶႂ်ႈယိုတ်းဢဝ်တီႈၵၢတ်ႇၵဝ်ႇၼၼ်ႉ။ ငိၼ်းဝႃႈၶဝ်တေႁဵတ်းႁိူၼ်းတေႃႇလွင်း Casino ၼႆဝႃႇ”- ဝႃႈၼႆ ။
ၼႂ်းဝၼ်းတီႈ18 /7/2024 ၼၼ်ႉ သိုၵ်းမၢၼ်ႈဢဝ်ၶိူင်ႈမိၼ်မႃးပွႆႇမၢၵ်ႇသႂ်ႇတီႈၵၢတ်ႇၵၢင်ဝဵင်းသႅၼ်ဝီ၊ ႁဵတ်းႁႂ်ႈၵၢတ်ႇၼၼ်ႉလူႉၵွႆၵႂႃႇတင်းၼမ်။ ၵူၼ်းၵေႃႈတၢႆၼမ်။ဝၢႆးၼၼ်ႉမႃးတေႃႇထိုင်ယၢမ်းလဵဝ် ၵူၼ်းမိူင်း ၸဝ်ႈႁၢၼ်ႉၶၢႆၶူဝ်းၼႂ်းၵၢတ်ႇၸိူဝ်းၼၼ်ႉ လႆႈဢွၼ်ၵၼ် ၽႄႇၶၢႆၶူဝ်းႁိမ်းၶၢင်ႈတၢင်း မႃး ။
တႄႇလိူၼ် April မႃးၼႆႉ သိုၵ်းၵဝ်ႈၵၢင်ႉ MNDAA ပိုၼ်ၽၢဝ်ႇ ဝႃႈ ၵူၼ်းၶၢႆၶူဝ်း ၸိူဝ်းၶၢႆယူႇဝႆႉတီႈႁိမ်းၶၢင်ႈတၢင်း တင်းသဵင်ႈတေလႆႈၵႂႃႇၶၢႆ တီႈၵၢတ်ႇမႂ်ႇ ဢၼ်သိုၵ်းၵဝ်ႈၵၢင်ႉၶဝ် ႁဵတ်းဝႆႉၼၼ်ႉ ။
“ ၸဵမ်မိူဝ်ႈ ၶဝ်ပႆႇမႃးၽွင်းငမ်းၼၼ်ႉ ၵူၼ်းမိူင်း ၶၢတ်ႈႁၢၼ်ႉၶၢတ်ႇႁွင်ႈသေ ၶၢႆမႃး ။ ၵၢတ်ႇၼႆႉၵေႃႈ မီးၸဵမ်မိူဝ်ႈ ပၢၼ်ၸဝ်ႈၾႃႉ ပုၼ်ႉယဝ်ႉ ၊ မိူဝ်ႈဝႃး ၵူၼ်းၶၢႆၵၢတ်ႇလႄႈ ၵူၼ်းမိူင်းႁူမ်ႈၵၢၼ် ၼႄၵၢင်ၸႂ် ။ ၾၢႆႇတင်း MNDAA ၶဝ်တႄႉ လၢတ်ႈဝႃႈ ၵူၼ်းလူင်ၶဝ်ဢမ်ႇမီး ၸွင်ၵွႆႈမႃးၶိုၼ်းလႄႈၼႆ ၊ ၵူၺ်းၵႃႈ ထႅင်ႈဝၼ်းၼိုင်ႈမႃးၵေႃႈ တိုၵ်ႉမႃးလိုပ်ႈၵူၼ်းၶၢႆၶူဝ်းၸွမ်းၶၢင်ႈတၢင်းၼၼ်ႉထႅင်ႈယူႇ ”- ဝႃႈၼႆ ။
ၵၢတ်ႇဢၼ်သိုၵ်းၵဝ်ႈၵၢင်ႉ ၸႂ်ႉပိုတ်ႇတီႈဝၢၼ်ႈပၢင်ႇလေႃႉၼၼ်ႉ ၼိုင်ႈလိူၼ် လႆႈပၼ်ငိုၼ်းတီႈသိုၵ်းၵဝ်ႈၵၢင်ႉ 5 သႅၼ်ပျႃး။ ၵႃႈၶွၼ်ႇယုၵ်းယၵ်း သမ်ႉ ၼိုင်ႈလိူၼ် 15000 ပျႃး ထႅင်ႈ ဝႃႈၼႆ ။
“ၶဝ်ဢမ်ႇထၢမ်ၵၢင်ၸႂ်ၵူၼ်းမိူင်းသေဢိတ်း ၊ ပေႃးၶဝ်ၶႆႈႁဵတ်းၵေႃႈ ဢွၵ်ႇလိၵ်ႈပိုၼ်ၽၢဝ်ႇသေ ႁဵတ်းၵႂႃႇၸိူင်ႉၼၼ် ၊ ယဝ်ႉၶွၼ်ႇၵႃႈႁၢၼ်ႉၸိူဝ်းၼႆႉၵေႃႈမႃးယွၼ်းၵူႈတီႈ ၊ တၢင်းၵႂၢင်ႈမီးလၢႆပေႇ ၼိုင်ႈပေႇတေလႆႈပၼ်ၵႃႈႁိုဝ် ၼႆၼပ်ႉသွၼ်ႇမႃးၵမ်းလဵဝ်။ မၢင်ႁၢၼ်ႉတူၵ်းၵႃႈယႂ်ႇၼႃႇလႄႈ ၵူၼ်းမိူင်း ဢမ်ႇ ႁတ်းၽႄႇၶၢႆၶူဝ်းယဝ်ႉ ”- ဝႃႈၼႆ ။
လိူဝ်သေ ၵူၼ်းၶၢႆၵၢတ်ႇၼႂ်းၵၢတ်ႇလႆႈပၼ်ၶွၼ်ႇယဝ်ႉ ၵူၼ်းၶီႇရူတ်ႉၶိူင်ႈ ဢႅဝ်ႇႁႃၶၢႆ ၼႂ်းပွၵ်ႉ ၼႂ်းၾၢႆႇ ၸိူဝ်းၼၼ်ႉၵေႃႈ လႆႈၵႂႃႇယွၼ်းတၢင်ႇဝႂ်ၶႂၢင်ႉ ၶၢႆ တီႈသိုၵ်းၵဝ်ႈၵၢင်ႉ – ၵူၼ်းပိုၼ်ႉတီႈလၢတ်ႈ ။
ယၢမ်းလဵဝ် ယွၼ်ႉၵၢၼ်ႁႃၵိၼ်လဵင်ႉတွင်ႉယၢပ်ႇၽိုတ်ႇႁႅင်းလႄႈ ၵူၼ်းၶၢႆၵၢတ်ႇၸိူဝ်းၼၼ်ႉ တုၵ်းယွၼ်း ႁႂ်ႈၵိုတ်းလိုဝ်ႈၵၢၼ်ၵဵပ်းၶွၼ်ႇ ဢမ်ႇၼၼ် လူတ်းယွမ်းပၼ်ၶွၼ်ႇ- ၵူၼ်းပိုၼ်ႉတီႈလၢတ်ႈ ။
တႅမ်ႈ – ၸၢႆးၶႂၼ်မိူင်း ၊ ပိၼ်ႇ- ယိင်းသဵဝ်ႈၶၢဝ်
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ