ၵူၼ်းမိူင်းသႅၼ်ဝီ ၸိူဝ်းၵႂႃႇႁဵတ်းၵၢၼ် ပိတ်းထူဝ်ႇ လႄႈ ၵိၼ်ၸၢင်ႈၸွမ်းဝၼ်း ႁဵတ်းၵၢၼ်ၵေႃႇသၢင်ႈ တီႈႁူဝ်ပၢင်ႇ လႄႈ ၼမ်ႉတိုၵ်း ၼႂ်းၼႃႈတီႈ သိုၵ်းဝႃႉ UWSA ၵုမ်းၵမ်ၼၼ်ႉ ၺႃးလၢဝ်းပၢၼ်းၶႄႇ လွၵ်ႇလႅၼ် ဢမ်ႇၸၢႆႇပၼ် ၵႃႈႁႅင်း ႁဵတ်းၵၢၼ်လႄႈ ႁဵတ်းႁႂ်ႈၵူၼ်းႁဵတ်းၵၢၼ်ႁူပ်ႉတၢင်းယၢပ်ႇၵိၼ်းၸႂ်။
ၼင်ႇႁိုဝ်တေလႆႈၵႃႈမႃႇၵႃႈႁႅင်း ႁဵတ်းၵၢၼ်ၼၼ်ႉ ၵူၼ်းႁဵတ်းၵၢၼ် ႁူမ်ႈၵၼ်ၵႂႃႇယွၼ်းယူႇသေတႃႉ လၢဝ်းပၢၼ်းၶႄႇ ဢမ်ႇၶႂ်ႈပၼ်လႄႈ ၵုမ်ႇလၢတ်ႈၶၢႆႉဝၼ်းၶၢႆႉၶိုၼ်းယူႇၼႆ ၸၢႆးဢွင်ႇ ၵူၼ်းဝဵင်းသႅၼ်ဝီ ၵေႃႉၵႂႃႇႁဵတ်းၵၢၼ်ယူႇတီႈႁူဝ်ပၢင်ႇ ၼၼ်ႉ လၢတ်ႈၼႄတီႈၽူႈတွႆႇႁွၵ်ႈၼင်ႇၼႆ။
“ မိူဝ်ႈတႄႇမၼ်း ၶဝ်လၢတ်ႈဝႃႈ တေၸၢႆႇပၼ် ၵႃႈဝၼ်းႁဝ်း ၼိုင်ႈဝူင်ႈၼိုင်ႈပွၵ်ႈၼႆဝႃႇ။ ၵၢၼ်ႁမ်ႉၸႂ်ႉႁဝ်းႁဵတ်းယူႇတိၵ်း တိၵ်း။ ပၢႆသေလိူဝ်ႁဝ်းဢမ်ႇမီးဢၼ်ၵိၼ်ယဝ်ႉ။ ငိုၼ်းတၢင်းႁိူၼ်းၵေႃႈလူဝ်ႇသူင်ႇ။ ပေႃးၵႂႃႇယွၼ်းၶဝ်ၼႆ ၵုမ်ႇဝႃႈ လၢဝ်း ပၢၼ်းဢမ်ႇယူႇဝႃႇ။ ၵမ်ႉဝႃႈ ပႆႇတၼ်းဝႃႇၼႆ ႁဵတ်းၼႆယူႇတိၵ်းတိၵ်း မီးမွၵ်ႈ 2 လိူၼ်ပၢႆယဝ်ႉ။ တေဝႃႈ ၵႂႃႇယွၼ်းထိုင်တီႈ လၢဝ်းပၢၼ်းတၢင်းၼမ်ႉတိုၵ်းပုၼ်ႉၼႆၵေႃႈ တင်းၵႃႈၵႃးၵႃႈယႂ်ႇႁေလႄႈ ဢမ်ႇၵိုင်ႇၵၼ် ”
ဝၢႆးလင် ပၢင်ယၼ်ႇသိုၵ်း 1027 မႃး ၵူၼ်းမိူင်းတႆးပွတ်းႁွင်ႇ ႁႃၵိၼ်လဵင်ႉတွင်ႉယၢပ်ႇၵိၼ်းႁႅင်း မီးၵၢၼ်သင် တီႈလႂ်ၵေႃႈ ဢွၼ်ၵၼ်ၵႂႃႇႁႃႁဵတ်း ပိူဝ်ႈတႃႇဢဝ်သၢႆၸႂ်ယူႇလွတ်ႈ။
လႆႈႁူႉဝႃႈ ၵူၼ်းၸိူဝ်းၵႂႃႇႁဵတ်းၵၢၼ်ယူႇတီႈ ၼႂ်းၼႃႈတီႈၵုမ်းၵမ် သိုၵ်းဝႃႉ UWSA ၼႆႉ ၵမ်ႈၼမ် ပဵၼ်ၵူၼ်းမိူင်းထုင်ႉ လိၼ်ပဵင်း ၸၢဝ်းၶိူဝ်းမၢၼ်ႈ လႄႈ ၵူၼ်းမိူင်းလႃႈသဵဝ်ႈ၊ သႅၼ်ဝီ၊ ၵုၼ်လူင် ၸိူဝ်းၼႆႉ ဝႃႈၼႆ။
တႅမ်ႈ- ၽူၺ်းၼုမ်ႇ
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ