မိူဝ်ႈဝၼ်းတီႈ 16/04/2025 မုၵ်ႉၸုမ်းၼၢင်းယိင်းမိူင်းႁူမ်ႈတုမ် (Burmese Women’s Union) ဢွၵ်ႇၽိုၼ် ႁၢႆးငၢၼ်း ဝႃႈ ၼႂ်းလိူၼ်မၢတ်ႉၶျ် ၶၢဝ်းတၢင်းလိူၼ်လဵဝ်ၵွႆး သိုၵ်းမၢၼ်ႈ ပူၼ်ႉပႅၼ်သုၼ်ႇလႆႈၵူၼ်း ၶႃႈႁႅမ် ၼၢင်းယိင်းတၢႆ 66 ၵေႃႉ မၢတ်ႇၸဵပ်း 88 ၵေႃႉ ဝႃႈၼႆ။
ၼႂ်းၽိုၼ်လိၵ်ႈႁၢႆးငၢၼ်းၼၼ်ႉ ပိူင်းၼႄပႃးဝႆႉဝႃႈ “ၼႂ်းလိူၼ်မၢတ်ႉၶျ် ပီ 2025 ၼႆႉ ၵူၼ်းမိူင်းလႆႈႁူပ်ႉၽေး ၽႅၼ်ႇလိၼ် ဝႆႁၢဝ်ႈႁႅင်း ၾၢႆႇၼိုင်ႈၵေႃႈ သိုၵ်းမၢၼ်ႈ ဢမ်ႇႁၼ်ထိုင်ၵၢင်ၸႂ်ၵူၼ်းမိူင်းသေ ယင်းသိုပ်ႇႁဵတ်းပူၼ်ႉပႅၼ်သုၼ်ႇ လႆႈသုၼ်ႇ ပဵၼ်ၵူၼ်း ၼမ်ႁႅင်းမႃးလိူဝ်ၵဝ်ႇလႄႈ ႁဵတ်းႁႂ်ႈ ၼၢင်းယိင်း ဢိၵ်ႇ ၼုမ်ႇယိင်းဢွၼ်ႇၸိူဝ်းဢႃႇယုပႆႇထိုင် 18 ပီ လူႉတၢႆ မၢတ်ႇၸဵပ်းၸွမ်းထႅင်ႈ ၼမ်မႃးၵူႈမိုဝ်ႉၵူႈဝၼ်း” ဝႃႈၼႆ။
ၸွမ်းၼင်ႇ မုၵ်ႉၸုမ်းၼၢင်းယိင်းမိူင်းႁူမ်ႈတုမ် ၵဵပ်းဝႆႉသဵၼ်ႈမၢႆတႄႉ ၼၢင်းယိင်းဢၼ် တၢႆယွၼ်ႉၼမ်ႉမိုဝ်းသိုၵ်းမၢၼ်ႈ ၼႂ်းလိူၼ်မၢတ်ႉၶျ်ၼႆႉ ပႃးၼၢင်းယိင်းၸိူဝ်းယူႇသဝ်းၼႂ်းမိူင်းတႆး 12 ၵေႃႉ၊ မိူင်းၶၢင် 2 ၵေႃႉ၊ မိူင်းယၢင်းလႅင် 2 ၵေႃႉ၊ မိူင်းရၶႅင်ႇ 2 ၵေႃႉ၊ မိူင်းယၢင်းၽိူၵ်ႇ 2 ၵေႃႉ၊ တိူင်းမၵူၺ်း 15 ၵေႃႉ ၊ တိူင်းမၼ်းတလေး (ဝဵင်းလိူဝ်ႇ) 12 ၵေႃႉ၊ တိူင်းၸႄႈၵႅင်း 9 ၵေႃႉ၊ တိူင်းပႃႇၵိူဝ် 7 ၵေႃႉ လႄႈ တိူင်းဢေႇယႃႇဝတီႇ 1 ၵေႃႉ။
ၼၢင်းယိင်းၼႂ်းမိူင်းႁူမ်ႈတုမ် ၸိူဝ်းလူႉတၢႆၵႂႃႇယွၼ်ႉသိုၵ်းမၢၼ်ႈ ဢဝ်ၶိူင်ႈမိၼ်ပွႆႇမၢၵ်ႇသႂ်ႇ မီး 50 ၵေႃႉ၊ ဢဝ်ၶိူင်ႈၵွင်ႈလူင် ယိုဝ်းသႂ်ႇ ၼႂ်းမူႇဝၢၼ်ႈၵူၼ်းမိူင်းလႄႈ ၼၢင်းယိင်းလႆႈတၢႆၵႂႃႇ 5 ၵေႃႉ၊ ယဵပ်ႇၺႃးမၢၵ်ႇၾင်လိၼ်သေတၢႆၵႂႃႇ 2 ၵေႃႉ၊ ၺႃး သိုၵ်းမၢၼ်ႈ ၶႃႈႁ်မ်တၢႆ 7 ၵေႃႉ၊ သိုၵ်းမၢၼ်ႈဢဝ်ၾႆးၽဝ်တၢႆပႅတ်ႈ 1 ၵေႃႉ လႄႈ ၺႃးသိုၵ်းမၢၼ်ႈၵၼ်ႉၸၼ်လူလၢႆသေ တၢႆ ၵႂႃႇ 1 ၵေႃႉ။ ၼႂ်းၼၼ်ႉ ပႃးၼုမ်ႇယိင်းဢွၼ်ႇ ဢႃယု ပႆႇတဵမ် 18 ပီ တႃႇ 24 ၵေႃႉ။ ၸိူဝ်းမၢတ်ႇၸဵပ်းဝႆႉ ယွၼ်ႉလွင်ႈႁုၵ်း ႁၢႆႉ သိုၵ်းမၢၼ်ႈ မီး 88 ၵေႃႉ။
တႄႇႁူဝ်ပီ 2025 ၶၢဝ်းတၢင်း သၢမ်လိူၼ် သိုၵ်းမၢၼ်ႈႁဵတ်းလွင်ႈပူၼ်ႉပႅၼ် ၵူႈလွင်ႈလွင်ႈသေ ၼၢင်းယိင်းၸိူဝ်းလႆႈတၢႆၵႂႃႇ ၼႂ်းလိူၼ်ၵျႅၼ်ႊၼိဝ်ႊရီႊ မီး 86 ၵေႃႉ၊ လိူၼ်ၾႅပ်ႊပိဝ်ႊရီႊ မီး 66 ၵေႃႉ၊ လိူၼ်မၢတ်ႉၶျ် 66 ၵေႃႉ။
ၶေႃႈမုၼ်းၸိူဝ်းၼႆႉ ၾၢႆႇၸုမ်းၼၢင်းယိင်း မိူင်းႁူမ်ႈတုမ် (BWU) လႆႈၵဵပ်းႁွမ်မႃး ၸွမ်းၼင်ႇယိုၼ်းထိုင်လႆႈၼၼ်ႉၵွႆး။ လွင်ႈလူႉတၢႆမၢတ်ႇၸဵပ်း ၼႂ်းပိုၼ်ႉတီႈ ၸၢင်ႈမီးၼမ်လိူဝ်ၼႆႉထႅင်ႈယူႇ ဝႃႈၼႆ။
တႅမ်ႈ-ၽူၺ်းၼုမ်ႇ
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ