ဝၼ်းလဵၼ်ႈၼမ်ႉသၢင်းၵျၢၼ်ႇ ဝၼ်းတီႈ 14/04/2025 လုၵ်ႈဢွၼ်ႇလူင်းလဵၼ်ႈၼမ်ႉမၢဝ်းတီႈႁၢတ်ႇႁူဝ်သၢႆးသေ ၸူမ်ၼမ်ႉႁၢႆၵႂႃႇ ၵေႃႉၼိုင်ႈ။

တေႃႇထိုင်ဝၼ်းတီႈ 15/04/2025 ယၢမ်းႁူဝ်ၶမ်ႈတႄႉ ပႆႇႁႃႁၼ်တူဝ်တၢႆ ၼႆ ၽူႈၶဝ်ႈၸုမ်းၸွႆႈထႅမ်ၵေႃႉၼိုင်ႈလၢတ်ႈၽူႈတွႆႇႁွၵ်ႈၼင်ႇၼႆ။  

“လုၵ်ႈဢွၼ်ႇၼႆႉ ဢႃယုတိုၵ်ႉမီးမွၵ်ႈ 15 ၶူပ်ႇ။ ၸူမ်ၵႂႃႇမိူဝ်ႈဝၼ်းတီႈ14 ယၢမ်းဝၢႆးဝၼ်းမွၵ်ႈ 4 မူင်းၶိုင်ႈၼႆႉ။ ပဵၼ်လုၵ်ႈဢွၼ်ႇပလွင်ႈ 2 ၵေႃႉမႃးလဵၼ်ႈၼမ်ႉၸွမ်းၵၼ်။ တင်ႈတႄႇၶၢဝ်းမၼ်းၸူမ်ႁၢႆၵႂႃႇၼၼ်ႉ ၸဝ်ႈႁိူဝ်းၸၢၵ်ႈၶဝ်ၵေႃႈလႄႇႁႃတူဝ်တၢႆယူႇတၢင်းၶမ်ႈၼင်ႇၵဝ်ႇ။ ၵူၺ်းၵႃႈ ဢမ်ႇႁၼ်”- ဝႃႈၼႆ။

ၽွင်းလုၵ်ႈဢွၼ်ႇၸူမ်ၼမ်ႉၼၼ်ႉ ၾႆးသမ်ႉလၢမ်းမႆႈၼႂ်းတူင်ႈၼႃး တီႈဝၢၼ်ႈႁူဝ်သၢႆး။ ၵူၼ်းဝၢၼ်ႈၵေႃႈဢွၼ်ၵၼ်ၵႂႃႇၶႄၾႆး -ၼႆ ၸုမ်းၸွႆႈထႅမ်ၼၼ်ႉလၢတ်ႈၼင်ႇၼႆ။

“  ၽွင်းၼၼ်ႉ ႁိမ်းဝၢၼ်ႈၼႆႉသမ်ႉ ၾႆးမႆႈ။ မၼ်းၵေႃႈတူၵ်းၼမ်ႉတီႈႁိမ်းၾႆးမႆႈၼၼ်ႉၵူၺ်းၼင်ႇၵဝ်ႇ။ ၵူၺ်းၵႃႈ ၽွင်းၼၼ်ႉ ၵူၼ်းဝၢၼ်ႈလႄႈတင်းၵႃးၶႄၾႆးၵေႃႈဢွၼ်ၵၼ်ၵႂႃႇၶႄၾႆး။ ၽိူဝ်ႇႁူႉဝႃႈလုၵ်ႈဢွၼ်ႇတူၵ်းၼမ်ႉၼႆၵေႃႈ တူၵ်းလိုၼ်းၵႂႃႇဢိတ်းၼိုင်ႈ။” – ဝႃႈၼႆ ။

လုၵ်ႈဢွၼ်ႇဢၼ်ၸူမ်ၼမ်ႉၼၼ်ႉပဵၼ် မၢႆးၼၢႆႇထႅတ်ႉ ဢႃယု 15 ပီ ပဵၼ်ၵူၼ်းဝၢၼ်ႈလွႆဢွၼ်ႇ ။

 တီႈႁၢတ်ႇႁူဝ်သၢႆးၼႆႉ ပေႃးထိုင်ၶၢဝ်းမႆႈမႃး ၵူၼ်းၼုမ်ႇၵူၼ်းထဝ်ႈ ဢွၼ်ၵၼ်ၵႂႃႇလဵၼ်ႈၼမ်ႉလိုဝ်ႈၵတ်းလိုဝ်ႈယဵၼ် ၵိုၼ်းၶွၼ်ႈၵူႈပီ။

တႅမ်ႈၾၢႆႇမၢၼ်ႈ-ၸၢႆးႁၢၼ်မၢဝ်း