ၸွမ်ၸိုင်ႈဢမေႊရိၵၼ်ႊ ၻူဝ်ႊၼေႃႊ ထရမ်ႉ ၵိုတ်းယင်ႉဝႆႉၶပ်းမၢႆ လွင်ႈတေတိူဝ်းၵဵပ်းၶွၼ်ႇ ၶူဝ်းၵုၼ်ႇ လၢႆလၢႆၸိုင်ႈမိူင်း တႃႇၶၢဝ်းတၢင်း 90 ဝၼ်း တွၼ်ႈတႃႇ ၶူဝ်ႈၵုၼ်ႇမိူင်းၶႄႇတႄႉ တေတိူဝ်းၵဵပ်းၶွၼ်ႇၵႂႃႇယူႇၼႆ – ပိုၼ်ၽၢဝ်ႇဝႆႉၼင်ႇၼႆ။

ၼႂ်းလိူၼ်ဢေႊပရိူဝ်ႊၼႆႉ ၻူဝ်ႊၼေႃႊ ထရမ်ႉ ပိုၼ်ၽၢဝ်ႇဝႆႉဝႃႈ တေတိူဝ်းၵဵပ်းၶွၼ်ႇၼိူဝ် ၶူဝ်းၵုၼ်ႇ ၸိုင်ႈမိူင်း ၸိူဝ်းႁူမ်ႈၽၢၵ်ႈ ၵၢၼ်ၵႃႉၶၢႆ ၸွမ်းၵၼ်တင်းမိူင်းဢမေႊရိၵၼ်ႊ လူၺ်ႈဢမ်ႇမိူၼ်ၵၼ်။ လွင်ႈၼႆႉ ႁဵတ်းႁႂ်ႈႁုၼ်ႈ (shares) ၼႂ်းလွၵ်းၵၢတ်ႇၵူႈမိူင်းမိူင်းတူၵ်းလူင်း ၼႆယဝ်ႉ။  

မိူဝ်ႈၽွင်း လၢႆၸိုင်ႈမိူင်း ဢွၼ်ၵၼ်ၼၵ်းၸႂ်ၸွမ်း ပၵ်းပိူင်မႂ်ႇ ၵဵဝ်ႇလူၺ်ႈၵၢၼ်ၵဵပ်းၶွၼ်ႇ မိူင်းဢမေႊရိၵၼ်ႊယူႇၼၼ်ႉ ၻူဝ်ႊၼေႃႊ ထရမ်ႉ ၶိုၼ်းပိုၼ်ၽၢဝ်ႇၵႂႃႇၼႂ်းဝၼ်းတီႈ 9 ၼႆႉဝႃႈ တေၵဵပ်းၶွၼ်ႇ ၶူဝ်းၵုၼ်ႇၼွၵ်ႈမိူင်းၵႂႃႇ မိူၼ်ၵဝ်ႇ 10% ၵူၺ်း။ လွင်ႈတေၵဵပ်းၶွၼ်ႇလိူဝ်ၼၼ်ႉတႄႉ တေၵိုတ်းယင်ႉဝႆႉၵွၼ်ႇ ဝႃႈၼႆ။

ၻူဝ်ႊၼေႃႊ ထရမ်ႉ လၢတ်ႈတီႈၽူႈသိုဝ်ႇၶၢဝ်ႇ တီႈႁိူၼ်းႁေႃၶၢဝ် ဢမေႊရိၵၼ်ႊၼၼ်ႉဝႃႈ – ၸိုင်ႈမိူင်း ၸိူဝ်းဢမ်ႇတုမ်ႉတွပ်ႇၶိုၼ်း လွင်ႈဢမေႊရိၵၼ်ႊ တေတိူဝ်းၵဵပ်းၶွၼ်ႇၼၼ်ႉ ၸင်ႇလႆႈႁပ်ႉၽွၼ်းလီ လွင်ႈၵိုတ်းယင်ႉ 90 ဝၼ်းၼင်ႇၼႆ။ မိူဝ်ႈဢွၼ်တၢင်းၵေႃႈ ယၢမ်ႈပၼ်ၾၢင်ႉဝႆႉဝႃႈ မိူင်းလႂ်တုမ်ႉတွပ်ႇၶိုၼ်းၵေႃႈ တေတိူဝ်းၵဵပ်းၶွၼ်ႇ ၵႂႃႇ 2 ပုၼ်ႈ – ဝႃႈၼႆ။

မိူင်းၶႄႇ ပိုၼ်ၽၢဝ်ႇဝႃႈ တေတိူဝ်းၵဵပ်းၶွၼ်ႇၼိူဝ် ၶူဝ်းၵုၼ်ႇမိူင်းဢမေႊရိၵၼ်ႊ 84 % ၼႆလႄႈ ဢမေႊရိၵၼ်ႊၵေႃႈ ၸင်ႇပိုၼ်ၽၢဝ်ႇဝႃႈ တေၵဵပ်းၶွၼ်ႇၼိူဝ်ၶူဝ်းၵုၼ်ႇမိူင်းၶႄႇၵႂႃႇ တႃႇ 125 % ။

ၵဵဝ်ႇလူၺ်ႈလွင်ႈၼႆႉသေ ၽူႈၶၢၼ်ပၢၵ်ႇ ႁွင်ႈၵၢၼ်ၽွင်းလူင်ၾၢႆႇၼွၵ်ႈမိူင်း မိူင်းၶႄႇ ထတ်းသၢင်လၢတ်ႈဝႃႈ ဢမေႊရိၵၼ်ႊတိူဝ်းၵဵပ်းၶွၼ်ႇၼိူဝ် ၶူဝ်းၵုၼ်ႇမိူင်းၶႄႇၼႆႉ မိူၼ်ၵၼ်တင်း ပေႉၵိၼ် ၵၼ်ၵူၺ်း။ ယူႇတီႈ မိူင်းၶႄႇ တိုၼ်းတေသၢၼ်ၶတ်း လွင်ႈႁဵတ်းသၢင်ႈ ဢမေႊရိၵၼ်ႊၵႂႃႇ။ သင်ၶႂ်ႈၵႄႈလိတ်ႈလွင်ႈၼႆႉၸိုင် ဢမေႊရိၵၼ်ႊ ထုၵ်ႇလီၸႂ်ႉလွၵ်းလၢႆးၽဵင်ႇပဵင်း၊ ၼပ်ႉယမ်ၵၼ်လႄႈ တူၺ်းႁၼ်တႃႇပုၼ်ႈသွင်ၸိုင်ႈမိူင်း – ဝႃႈၼႆ။

ၸုမ်းၵၢၼ်ၵႃႉၶၢႆလူင် လုမ်ႈၾႃႉ WTO ၶၢတ်ႈလၢမ်းဝႃႈ – သင်ၸိုင်ႈမိူင်း ဢဵၼ်ႁႅင်းပၢႆးမၢၵ်ႈမီးယႂ်ႇလူင် ၼႂ်းလုမ်ႈၾႃႉ သွင်မိူင်း သိုပ်ႇမီးလွင်ႈၶဵင်ႈၶႅင်ၵၼ်ၵႂႃႇယူႇၸိုင် ၵႃႈၶၼ်ၵၢၼ်ၵႃႉ ၶၢႆသွင်ၸိုင်ႈမိူင်း တေယွမ်းလူင်းၵႂႃႇ 80% (ၵိုင်ႇငိုၼ်း ဢမေႊရိၵၼ်ႊတေႃႊလႃႊ 466 ပီႊလီႊယၼ်ႊ) – ဝႃႈၼႆ။

ဝၢႆးၻူဝ်ႊၼေႃႊ ထရမ်ႉလၢတ်ႈ တေၵိုတ်းယင်ႉဝႆႉ လွင်ႈၵဵပ်းၶွၼ်ႇ ၶၢဝ်းတၢင်း 90 ဝၼ်းၼႆႉ လွၵ်းၵၢတ်ႇ သျႄႊယႃႊ တီႈဢေးသျႃးတင်း ပၸိၽဵတ်ႉ ၵိုင်ႉၵၢင်ႉပုင်ႈၶိုၼ်ႈၵႂႃႇ၊ လွၵ်းၵၢတ်ႇ သျႄႊယႃႊ တီႈမိူင်းၵျပၼ်ႊ ပုင်ႈၶိုၼ်ႈ 8 % ၊ တီႈလွၵ်းၵၢတ်ႇ မိူင်းဢမေႊရိၵၼ်ႊၵေႃႈ လႆႈၼမ်ႉမဵတ်ႈၼမ်ႉ တွၼ်းၼမ်ႁႅင်း – သိုဝ်ႇၶၢဝ်ႇ BBC ဢွၵ်ႇဝႆႉၼင်ႇၼႆ။