ဝၢႆးၸွမ်ၸိုင်ႈ မိူင်းၵူဝ်ႊရီႊယိူဝ်ႊၸၢၼ်း Yoon Suk Yeol ၺႃးပုတ်းတၼ်းႁဵင်း ၸွမ်ၸိုင်ႈပႅတ်ႈယဝ်ႉ မီးလွင်ႈပိုၼ်ၽၢဝ်ႇဢွၵ်ႇမႃးဝႃႈ တေၸတ်းႁဵတ်းပၢင်လိူၵ်ႈတင်ႈသွမ်ႈ ၼႂ်းဝၼ်းတီႈ 03/06/2025 တႃႇတီႈယူႇၸွမ်ၸိုင်ႈမႂ်ႇ။
ဝၢႆးသေ ဢုပ်ႇၵုမ်ၵၼ်တင်း ၶွမ်ႊမသျိၼ်ႊၵၢၼ်လိူၵ်ႈတင်ႈ ၵဵဝ်ႇလူၺ်ႈၵၢၼ်ငၢၼ်း တႃႇပၢင်လိူၵ်ႈတင်ႈယဝ်ႉ ၸုမ်းလူင်ပွင်ၸိုင်ႈ ၸင်ႇလႆႈမၵ်းမၼ်ႈၵႂႃႇ ၼႂ်းဝၼ်းတီႈ 08/04/2025 ၼႆႉ။
ၸွမ်ၸိုင်ႈ မိူင်းၵူဝ်ႊရီႊယိူဝ်ႊၸၢၼ်း Yoon Suk Yeol ၼႆႉ ၺႃးသၽႃးၵၢဝ်ႇၼႄး လူၺ်ႈပိုၼ်ၽၢဝ်ႇ ပိူင်ၽွင်းငမ်းသိုၵ်း ၼႂ်းဝၼ်းတီႈ 03/12/2024 လူၺ်ႈၸႂ်ႉတိုဝ်းဢႃႇၼႃႇ ဢမ်ႇမႅၼ်ႈတီႈမႅၼ်ႈတၢင်း၊ ပူၼ်ႉပႅၼ် ၼႃႈတီႈပုၼ်ႈၽွၼ်းၼႆသေ လုမ်းတႅပ်းတတ်းတြႃး ပိူင်ငဝ်ႈပိုင်းမိူင်း (ဖွဲ့စည်းပုံအခြေခံဥပဒေခုံရုံး) ၸင်ႇယိုၼ်ယၼ်ပူတ်းတၼ်းႁဵင်းပႅတ်ႈ။
မိူဝ်ႈၽွင်း ၸွမ်ၸိုင်ႈ Yoon Suk Yeol ၺႃးၵၢဝ်ႇၼႄးဝႆႉယူႇၼၼ်ႉ ၵႅမ်ၸွမ်ၽွင်းလူင် ၶိုၼ်ႈမႃးႁပ်ႉပဵၼ် ၸွမ်ၸိုင်ႈၸူဝ်းၶၢဝ်းဝႆႉ။
ၸွမ်းၼင်ႇ မၢႆမီႈပၵ်းပိူင် မိူင်းၵူဝ်ႊရီႊယိူဝ်ႊသေ ၽွင်းတီႈယူႇတၼ်းႁဵင်း ၸွမ်ၸိုင်ႈ ႁၢမ်းပဝ်ႇဝႆႉၼၼ်ႉ တေလႆႈၸတ်းႁဵတ်းပၢင်လိူၵ်ႈတင်ႈၶိုၼ်း ၼႂ်းၶၢဝ်းတၢင်း 2 လိူၼ် (60 ဝၼ်း)။
ၾၢႆႇၼိုင်ႈၵေႃႈ ၼႂ်းပၢၼ်ၸွမ်ၸိုင်ႈမႂ်ႇ မိူင်းဢမေႊရိၵၼ်ႊၼႆႉ လၢႆၸိုင်ႈမိူင်း လႆႈၶတ်းၸႂ်တႃႇၵၢၼ်ၶဝ်ႈဢွၵ်ႇ ၵပ်းသိုပ်ႇပဵၼ်ဢူၺ်းလီ ဢိၵ်ႇတင်း ၵၢၼ်ၵႃႉၶၢႆပၢႆးမၢၵ်ႈမီး ၸိူဝ်းၼႆႉ။
မိူင်းၵူဝ်ႊရီႊယိူဝ်ႊၸၢၼ်းၼႆႉ ပဵၼ်မိူင်းပၢႆးမၢၵ်ႈမီးယႂ်ႇလိူဝ်ပိူၼ်ႈ ထီႉသီႇ ၼႂ်းၵုၼ်ၶဵဝ်ဢေးသျႃး၊ ၽွင်းတေၸတ်းႁဵတ်းပၢင်လိူၵ်ႈတင်ႈသွမ်ႈၼႆႉ သမ်ႉပဵၼ် ၽွင်းၵၢၼ်ပၢႆးမၢၵ်ႈမီးၸိုင်ႈမိူင်းတူၵ်းဝႆႉ – သိုဝ်ႇၶၢဝ်ႇ Voice of Myanmar ဢွၵ်ႇဝႆႉၼင်ႇၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ