တႄႇႁူဝ်လိူၼ်ဢေႊပရိူဝ်ႊမႃး သိုၵ်းၵဝ်ႈၵၢင်ႉ MNDAA ပၼ်ႁႅင်းဢီး တဵၵ်းႁႂ်ႈၵူၼ်းမိူင်း ၼႂ်းဝဵင်းလၢဝ်ႇၵၢႆး(လဝ်ႉၵႆႇ) ပိုတ်ႇႁၢၼ်ႉတၢင်းၶၢႆၵုၼ်ႇ ၵူႈၸိူဝ်းၸိူဝ်းၶိုၼ်း၊ ႁၢၼ်ႉတၢင်းၶၢႆ ၸိူဝ်းဢမ်ႇပိုတ်ႇၼၼ်ႉ တေၺႃးဢိုတ်း ဢမ်ႇၼၼ် ၾၢႆႇသိုၵ်းၶဝ် တေၶိုၼ်းသိုပ်ႇၶၢတ်ႈပၼ်တၢင်ႇၵေႃႉပႅတ်ႈၼႆ – ၵူၼ်းမိူင်းၼႂ်းပိုၼ်ႉတီႈ လၢတ်ႈၼႄၼင်ႇၼႆ။
“မိူဝ်ႈလဵဝ် ၼႂ်းဝဵင်းတမ်ႉပႆႇပေႃးမီးၵူၼ်းသင်လႄႇ။ ဢမ်ႇမီးၵူၼ်းၸႂ်ႉငိုၼ်းၼမ်မိူၼ်မိူဝ်ႈဢွၼ်တၢင်းလူး။ ပေႃးပိုတ်ႇလၢၼ်ႉၵေႃႈ တမ်ႉဢမ်ႇၶၢႆလီ။ ပၢႆသေလိူဝ် လႆႈလူင်းဢလၢင်း (တိုၼ်းလၢင်း) ၵႃႈၵမ်ႉသုမ်းႁႄ ယဝ်ႉဢိူဝ်ႈ။ မိူဝ်ႈလဵဝ်တႄႉ ၶဝ်လၢတ်ႈဝႃႈ ၶၢႆဢမ်ႇၶၢႆၵေႃႈ တီႈလၢၼ်ႉၼႆႉ လူဝ်ႇမီးၵူၼ်းပႂ်ႉဝႆႉ ၼိုင်ႈၵေႃႉ” – ဝႃႈၼႆ။
ယၢမ်းလဵဝ် ၸဝ်ႈႁၢၼ်ႉၶၢႆၵုၼ်ႇမၢင်ၸိူဝ်း ဢမ်ႇၶၢမ်ႇသုမ်းႁွင်ႈၶၢႆၵုၼ်ႇ (ဆိုင်ခန်း) ပၼ် သိုၵ်းၵဝ်ႈၵၢင်ႉ MNDAA ယိုတ်းဢဝ်ၵႂႃႇလၢႆလၢႆလႄႈ ၸင်ႇလႆႈၸၢင်ႈၵူၼ်း ၼင်ႈပႂ်ႉဝႆႉတီႈႁွင်ႈ ၽႂ်မၼ်း။
ႁွင်ႈၶၢႆၵုၼ်ႇ တီႈၼႂ်းဝဵင်းလၢဝ်ႇၵၢႆးၼႆႉ ၽူႈမၢၵ်ႈမီးၼႂ်းမိူင်းၶႄႇလူင် ၵမ်ႈၽွင်ႈ ပေႃးပၼ်ငိုၼ်းသိုဝ်ႉဝႆႉ ၸဵမ်မိူဝ်ႈပႆႇပဵၼ်ၽႅၼ်ယၼ်ႇသိုၵ်း 1027 ၼၼ်ႉ ၼိုင်ႈႁွင်ႈလႂ် ငိုၼ်းၶႄႇ ႁူဝ်သႅၼ်၊ ႁူဝ်မိုၼ်ႇယႂၼ်ႊယဝ်ႉ။
ယၢမ်းလဵဝ်သမ်ႉ သိုၵ်းၵဝ်ႈၵၢင်ႉ ႁႂ်ႈၵူၼ်းမိူင်း ၶၢတ်ႈဢဝ်ႁွင်ႈၶၢႆၵုၼ်ႇ တီႈၶဝ်သေ ၵူၼ်းမိူင်းလႆႈသႂၢင်းၶွၼ်ႇၶိုၼ်းယဝ်ႉ ၸင်ႇမီးသုၼ်ႇပိုတ်ႇႁွင်ႈၶၢႆၵုၼ်ႇလႆႈၼႆ ၼၢင်းလႅင်း ၸဝ်ႈႁၢၼ်ႉၶၢႆၵုၼ်ႇ ၵေႃႉၼိုင်ႈ ၼႂ်းဝဵင်းလၢဝ်ႇၵၢႆး လၢတ်ႈၼႄတီႈၸုမ်းၶၢဝ်ႇၽူႈတွႆႇႁွၵ်ႈ ၼင်ႇၼႆ။
“ဢမ်ႇမီးၵူၼ်းသိုဝ်ႉမၼ်းၵေႃႈ ၵႃႈလႆႈပိုတ်ႇၼႄဝႆႉလၢႆလၢႆၸိူင်ႉၼၼ်ယဝ်ႉဝႃႈ။ ၶဝ်ၶႂ်ႈၼႄၾၢင်ႁၢင်ႈဝႃႈ ဝဵင်းၵိုၼ်းမႃး ၶိုၼ်းယဝ်ႉၼႆၼၼ်ႉၼႃႇ။ ၶဝ်ယွၼ်းဢဝ်ၶွၼ်ႇၵႃႈႁွင်ႈႁဝ်းႁႄ လဵင်ႉၶိုၼ်း ၵူၼ်းသိုၵ်းၶဝ်ၵူၺ်းလူး”- ဝႃႈၼႆ။
လႆႈႁူႉဝႃႈ ၼင်ႇႁိုဝ် ဝဵင်းလၢဝ်ႇၵၢႆး တေၶိုၼ်းၵိုၼ်းမႃး မိူၼ်ဢွၼ်တၢင်းၼၼ်ႉ ၾၢႆႇသိုၵ်းၵဝ်ႈၵၢင်ႉၶဝ် ပၼ်ၶႂၢင်ႉပိုတ်ႇၶိုၼ်းႁၢၼ်ႉတၢင်းၵိၼ်လႄႈ ႁူင်းပျေႃႇမူၼ်ႈတင်း ႁၢၼ်ႉၶၢႆလဝ်ႈၵူႈၸိူဝ်းၸိူဝ်း (Bar) ၶဝ်သေ ပိုၼ်ၽၢဝ်ႇ ႁွင်ႉၵူၼ်းႁဵတ်းၵၢၼ်ၶိုၼ်း။
ယၢမ်းလဵဝ် ႁွင်ႈၶၢႆၵုၼ်ႇ ၸိူဝ်းမီးႁိမ်းႁွမ်းတူင်ႇၶျဵင်ႇ (တုံချိန်)လႄႈ ၵျိၼ်ႇၵျၢၼ်း (ကျင်ကျန်း) ၼၼ်ႉ ပိုတ်ႇဝႆႉၵမ်ႈၼမ်ယဝ်ႉလႄႈ ၾၢႆႇသိုၵ်းၵဝ်ႈၵၢင်ႉၶဝ်ၵေႃႈ ယင်းတိုၵ်ႉသိုပ်ႇႁဵတ်း ၵၢၼ်ႁုၼ်ႈမုၼ်းၼႂ်း ဝဵင်းဝႆႉယူႇ ဝႃႈၼႆ။
ဝဵင်းလၢဝ်ႇၵၢႆးၼႆႉ သိုၵ်းၵဝ်ႈၵၢင်ႉ MNDAA တင်း ၸုမ်းၵႅတ်ႇၶႄၵူၼ်းမိူင်း PDF လႄႈ တပ်ႉသိုၵ်းပူတ်းပွႆႇၸိူဝ်ႉၸၢတ်ႈတဢၢင်း TNLA ၊ သိုၵ်းရၶႅင်ႇ AA ၶဝ်ႁူမ်ႈၵၼ် တိုၵ်းသိမ်းဢဝ်ဝႆႉ မိူဝ်ႈၽႅၼ်ယၼ်ႇသိုၵ်း 1027 ပွၵ်ႈၵမ်းၼိုင်ႈၼၼ်ႉ။
တႅမ်ႈ – ၽူၺ်းၼုမ်ႇ
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ