မိူဝ်ႈဝၼ်းတီႈ 05/04/2025 ယၢမ်းၵၢင်ၶမ်ႈ 10 မူင်းပၢႆ သိုၵ်းမၢၼ်ႈ ၸႂ်ႉၶိူင်ႈမိၼ်တိုၵ်းသေ ပွႆမၢၵ်ႇသႂ်ႇ တီႈဝၢၼ်ႈၼွင် လႅင် တင်း ဝၢၼ်ႈၼမ်ႉသွင်ႁူး ၼႂ်းၸႄႈဝဵင်းၼွင်ၶဵဝ် ၸိုင်ႈတႆးပွတ်းႁွင်ႇၼႆ ႁွင်ႈၵၢၼ်ပိုၼ်ၽၢဝ်ႇ တပ်ႉသိုၵ်းပူတ်းပွႆႇ ၸိူဝ်ႉၸၢတ်ႈတဢၢင်း ပိုၼ်ၽၢဝ်ႇဝႆႉ ၼင်ႇၼႆ။
“ၾၢႆႇသိုၵ်းမၢၼ်ႈ ၸႂ်ႉၶိူင်ႈမိၼ်တိုၵ်းသေ ဢဝ်မၢၵ်ႇလူင်ႁႅင်း 250 ပွင်ႇ ပွႆႇသႂ်ႇ 3 လုၵ်ႈလႄႈ တိူဝ်ႉၺႃးႁိူၼ်းၵူၼ်းမိူင်း လူႉၵွႆၵႂႃႇ 4 လင်သေတႃႉ ဢမ်ႇမီးၵူၼ်းမိူင်း လူႉမၢတ်ႇၸဵပ်းသင်ၸွမ်း။”
ဝၢႆးလင် ၼႂ်းမိူင်းႁူမ်ႈတုမ် ၵိုင်ႉၵၢင်ႉၵိူတ်ႇၽႅၼ်ႇလိၼ်ဝႆသေ ၵူၼ်းမိူင်းႁူပ်ႉၽေးသၽႃႇဝ တူၵ်းၵိၼ်းယူႇ ပတ်းပိုၼ်ႉၸိုင်ႈ မိူင်းၼၼ်ႉ ၾၢႆႇၸုမ်းသိုၵ်းၸၢဝ်းၶိူဝ်းလၢႆလၢႆၸုမ်း တင်း သိုၵ်းမၢၼ်ႈ ပိုၼ်ၽၢဝ်ႇ ၵိုတ်းပၢင်တိုၵ်းၵၼ်ဝႆႉ ပဵၼ်တၢင်းၵၢၼ် သေတႃႉ ၼႂ်းပိုၼ်ႉတီႈတႄႉ တိုၵ်ႉသိုပ်ႇပိုတ်းယိုဝ်း ၵၼ်ယူႇ ဢမ်ႇယဝ်ႉဢမ်ႇဝၢႆး။
မိူၼ်ၼင်ႇၼႂ်းၸႄႈဝဵင်းၼွင်ၶဵဝ် သိုၵ်းမၢၼ်ႈ တင်း သိုၵ်းတဢၢင်း ယိုဝ်းၵၼ်တေႃႇထိုင်ဝၼ်းမိူဝ်ႈၼႆႉၼႆ ၽူႈၸမ်ၸႂ် ၼႂ်းတပ်ႉသိုၵ်းတဢၢင်းၵေႃႉၼိုင်ႈ လၢတ်ႈၽူႈတွႆႇႁွၵ်ႈၼင်ႇၼႆ။
“တီႈဝၢၼ်ႈတွင်းၶမ်းၼႆႉ ပဵၼ်ပၢင်တိုၵ်းၵၼ်ယူႇ ၶႂ်ႈဝႃႈၵူႈဝၼ်း ။ ၵူၼ်းဝၢၼ်ႈၵေႃႈ ဢွၼ်ၵၼ်ပၢႆႈၵႂႃႇယူႇဝႆႉ ၸွမ်းႁိမ်း ဝဵင်းၼွင်ၶဵဝ်ၸိူဝ်းၼႆႉမူတ်းယဝ်ႉ။ တီႈပဵၼ်ပၢင်တိုၵ်းၵၼ်ၼႆႉ ဢမ်ႇမီးၵူၼ်းဝၢၼ်ႈသင်ယူႇဝႆႉယဝ်ႉ။ ၵမ်ႈၽွင်ႈၵေႃႈ ပၢႆႈၵႂႃႇ ယူႇဝႆႉၸွမ်းႁိူၼ်းပီႈၼွင်ႉ ဢၼ်မီးတၢင်းပၢင်ႇဢူး။ ၵမ်ႈၽွင်ႈပၢႆႈၵႂႃႇတၢင်းမိူင်းတႆးပွတ်းၸၢၼ်း။”
တီႈဝဵင်းၼွင်ၶဵဝ်ၼႆႉ သိုၵ်းမၢၼ်ႈလႄႈသိုၵ်းလွႆတဢၢင်းယိုဝ်းၵၼ်ႁိုင်မႃးၶၢဝ်းတၢင်း 8 လိူၼ်ယဝ်ႉ ။ တေႃႇထိုင်ယၢမ်းလဵဝ်ၵူၼ်းမိူင်းပႆႇၸၢင်ႈပွၵ်ႈၶိုၼ်းႁိူၼ်းယေး။ ၵူၼ်းၸိူဝ်းပၢႆႈၽေးသိုၵ်းၵေႃႈ ဢမ်ႇမီးတီႈယူႇ၊ ဢမ်ႇၸႂ်ႈၵႂႃႇယူႇတီႈပၢင်သဝ်းဢၼ်မီးၸုမ်းၸွႆႈထႅမ်။ လႆႈသွၼ်ႈယူႇသဝ်းဝႆႉႁိူၼ်းပီႈၽႂ်ၼွင်ႉမၼ်းသေ ၵူၼ်းမိူင်းၼင်ႇၵၼ်ၸွႆႈထႅမ်ၵၼ်ၵႂႃႇၸိူင်ႉၼၼ်ၵူၺ်း ။ ၵွပ်ႈၼႆ ဢမ်ႇႁူႉလႆႈႁူဝ်ၼပ်ႉၵူၼ်းပၢႆႈၽေးတႅတ်ႈတေႃး ။
ဝၢႆးလင် ၽႅၼ်ႇလိၼ်ဝႆႁၢဝ်ႈႁႅင်း ၵူၼ်းမိူင်းႁူမ်ႈတုမ်ပတ်းပိုၼ်ႉ ႁူပ်ႉတၢင်းယၢပ်ႇၵိၼ်းယူႇၼၼ်ႉ သိုၵ်းမၢၼ်ႈဢဝ်ၶိူင်ႈမိၼ် ပွႆႇမၢၵ်ႇသႂ်ႇ ၼႂ်းပိုၼ်ႉတီႈၼႃႈလိၼ် ၸုမ်းသိုၵ်းၸၢဝ်းၶိူဝ်းၵုမ်းၵမ်မႃး ၶိူဝ်းၶိူဝ်းယႂ်းယႂ်း။ ၾၢႆႇၼိုင်ႈၵေႃႈ ယင်းၽိူမ်ႉထႅမ်ႁႅင်း သိုၵ်း ႁႅင်းၶိူင်ႈၵွင်ႈၵၢင်ႇသေ ႁၢင်ႈႁႅၼ်းတႃႇလေႃႇတိုၵ်း ယိုတ်းၶိုၼ်းတပ်ႉပၢင်သဝ်း ၸိူဝ်းဢၼ် သိုၵ်းၸၢဝ်းၶိူဝ်းယိုတ်းဝႆႉၸိူဝ်းၼၼ်ႉ ၶိုၼ်းယူႇ ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ