မိူဝ်ႈဝၼ်းတီႈ 06/04/2025 ယၢမ်းၵၢင်ၼႂ် မွၵ်ႈ 10 မူင်း သိုၵ်းၵဝ်ႈၵၢင်ႉ တင်ႈလၢၼ်ႇ တီႈသဵၼ်ႈတၢင်းလူင် တီႈႁိမ်းပၢမ်ႉၼမ်ႉမၼ်းႁူဝ်ဝဵင်းသေ  ၵူတ်ႇထတ်း ရူတ်ႉၵႃး လႄႈ ၵူၼ်း ၶဝ်ႈဢွၵ်ႇ  ဝဵင်းသႅၼ်ဝီ ။  

 သိုၵ်းၵဝ်ႈၵၢင်ႉ ဢမ်ႇပိုၼ်ၽၢဝ်ႇ ဢမ်ႇၸႅင်ႈၶၢဝ်ႇဝႆႉဢွၼ်တၢင်းသေ ၵိုင်ႉၵၢင်ႉမႃးတင်ႈလၢၼ်ႇ ၵူတ်ႇထတ်းၵူၼ်း ၵႂႃႇမႃး ၸိူင်ႉၼႆ ႁဵတ်းႁႂ်ႈ ၸဝ်ႈရူတ်ႉၵႃး တၢင်ႇၵုၼ်ႇတၢင်ႇၵူၼ်း ဢိၵ်ႇၵူၼ်းမိူင်းပိုၼ်ႉတီႈ ယၢပ်ႇၽိုတ်ႇတႃႇၵႂႃႇမႃး ႁႃၵိၼ် လဵင်ႉတွင်ႉၼႆ   ပီႈယိင်း  ၵူၼ်းပိုၼ်ႉတီႈ လၢတ်ႈ ၽူႈတွႆႇႁွၵ်ႈၼင်ႇၼႆ။

“သိုၵ်းၶႄႇ (ၵဝ်ႈၵၢင်ႉ) ၸိူဝ်းၼႆႉ လႆႈၶၢဝ်ႇႁင်ဢမ်ႇႁူႉၼႃႇ။  ၵႃး ရူတ်ႉၶိူင်ႈ ၸိူဝ်းၼႆႉ  တိတ်းၶမ်ၼိူဝ်သဵၼ်ႈတၢင်းလူင် ၼမ်ထူၼ်ႈယဝ်ႉဝႃႈ။  ၶဝ်ထူၵ်းၶူဝ်းဢွၵ်ႇသေထတ်းမူတ်း။  ၸူၵ်းပႃး ၼႂ်းထူင် ၼႂ်းထွင်းၸိူဝ်း ၼႆႉၵွၼ်ႇ။ ၶႃႈၵေႃႈ ၺႃးထတ်း ။ ရူတ်ႉၶိူင်ႈၵေႃႈ ၶဝ်ႁႂ်ႈပိုတ်ႇတူးပွၵ်ႉ (တင်ႇၼင်ႈလူတ်ႉၶိုင်ႈ) ႁႄ ထတ်း။ ၼႂ်း ထူင်ပႃးၸိူဝ်းၼႆႉၵေႃႈ ၶဝ်ၸူၵ်းမူတ်း”

ဢွၼ်တၢင်း ႁိမ်းတၢင်းၶဝ်ႈဝဵင်းသႅၼ်ဝီ တီႈႁူဝ်ၶူဝ် ၸွမ်းပၢင်ႇတူင်ႈၼႃး ႁိမ်းၶၢင်ႈၵေးၼမ်ႉတူႈ လႄႈ ႁိမ်းၼွင်မူဝ် ၸိူဝ်းၼၼ်ႉ သိုၵ်းၵဝ်ႈၵၢင်ႉၶဝ် ၵႆႉတင်ႈလၢၼ်ႇ ၵူတ်ႇထတ်း ရူတ်ႉၵႃးၼႆသေတႃႉ ဢမ်ႇႁၢဝ်ႈႁႅင်း မိူၼ်ပွၵ်ႈၵမ်းၼႆႉ။

ဝၢႆးလင် ပၢင်ယၼ်ႇသိုၵ်း 1027 သိုၵ်းၵဝ်ႈၵၢင်ႉ ၵုမ်းၵမ်လႆႈ ဝဵင်းသႅၼ်ဝီမႃး ၶၢဝ်းတၢင်း ပီပၢႆၼႆႉ   ဢမ်ႇပၼ်ၾၢင်ႉတီႈ ၵူၼ်းမိူင်းၼႂ်းပိုၼ်ႉတီႈသေ ၵႆႉၵႆႉတင်ႈလၢၼ်ႇၵူတ်ႇထတ်းၸိူင်ႉၼႆ  လၢႆပွၵ်ႈလၢႆၵမ်း ယဝ်ႉ – ၵူၼ်းမိူင်းသႅၼ်ဝီလၢတ်ႈၼင်ႇၼႆ။ 

တႅမ်ႈ-ၽူၺ်းၼုမ်ႇ