ၸိယိူင်းထတ်းသၢင်လွင်ႈ MTA ဝၢင်းၶိူင်ႈၼွမ်းၵၢၼ်ႉပၼ်မၢၼ်ႈ

တႃႇတေဢဝ်ၶိုၼ်းမိူင်းတႆး ႁႂ်ႈပေႃးလႆႈၼၼ်ႉ ႁဝ်းတႃႉၵၼ်ႉၸႂ်ယႂ်ႇမုင်ႈမွင်းဝႃႈမီး MTA ၸုမ်းၸဝ်ႈၶုၼ်သႃႇၵူၺ်းယဝ်ႉ ဝႃႈၼႆမႃးၸဵမ်လႂ်။ ဢမ်ႇထၢင်ႇထိူမ်ၼွၼ်းၾၼ်သေ ၵွပ်ႈသင်သမ်ႉလႆႈႁဵတ်းၼႆၵႂႃႇ?။ ဝႃႈလႃးၵေႃႈ ၶဝ်မီးလွင်ႈလမ်ၼမ်ႉယၵ်းမိုဝ်းၵၼ်တင်းမၢၼ်ႈယဝ်ႉႁိုဝ်?၊ ဢၼ်ဝႃႈၼႆၵေႃႈ မီးတင်းၼမ်။

ႁဵတ်းၼႆၵႂႃႇၵေႃႈလီပိူင် ႞ ။ ပေႃးႁဵတ်းၼႆ ၸင်ႇၼွၵ်းမိူင်းၵမ်ႇၽႃႇၵေႃႈ တေၸၢင်ႈႁၼ်လီၵမ်ႉထႅမ်မႃးဝႃႈ ဢၼ်ၸိုဝ်ႈလုၸိုဝ်ႈၼဝ်ႈ ယွၼ်ႉယႃႈမဝ်းၵမ်ၼၼ်ႉ ဢမ်ႇမီးယဝ်ႉၼႆသေ ၸင်ႇတေၸၢင်ႈတႄႇတင်ႈပူၵ်းပွင်ၶိုၼ်း ၵၢၼ်မိူင်းတႆးၵႂႃႇလႆႈလီငၢမ်း။ ၽူႈမီးပၢႆးဝူၼ်ႉပၢႆးႁၼ် ၵမ်ႈၽွင်ႈ ဢၼ်ၶႂ်ႈႁႂ်ႈၸိုဝ်ႈသဵင်ဢမ်ႇလီ လႆႈႁၢႆၶဝ်ၵေႃႈ ဝႃႈမႃးၼင်ႇၼႆ။

ၵမ်ႈၽွင်ႈၵေႃႈဝႃႈ – ၸဝ်ႈၶုၼ်သႃႇ ၵၼ်ႉၶတ်းၸႂ်ယၢပ်ႇႁဵတ်းႁႃသေ ႁွမ်ႁႅင်းမႃး တင်ႈတႄႇၸဵမ်မိူဝ်ႈ ဢၢၼ်ႇႁူဝ်ပၢၵ်ႇမၼ်း ပဵၼ်မႃးႁူဝ်ႁဵင်ႁူဝ်မိုၼ်ႇ ၼႂ်းၶၢဝ်းတၢင်းသၢဝ်းသၢမ်သိပ်းပီ။ ၵွပ်ႈသင်လႄႈမၼ်း လႆႈပူင်းဝၢင်းၶၢမ်ႇၸုၼ်ႉပိုၼ်ႉပွႆႇပႅတ်ႈလႆႈၸိူင်ႉၼႆ?။ တေမီးလွင်ႈတၢင်းမၼ်းဢၼ်ၶိုၵ်ႉလိုၵ်ႉယူႇယူဝ်း၊ ႁူႉတေမီးၽႅၼ်ၵၢၼ်ဢဵၼ်းဢၢၼ်း သေသမ်ႇသေပိူင်ယူႇ ဢမ်ႇႁၢင်ႉၵူၺ်းၵႃႈ – ၼႆၵေႃႈမီးယဝ်ႉ။ ၽိူဝ်ႇသေ ၵုမ်ႇထတ်းသၢင်ႁၼ်ထိုင်တႂ်ႈတႂ်ႈၼိူဝ်ၼိူဝ်၊ သူၶဝ်ႁဝ်းႁႃး ထုၵ်ႇႁဵတ်းသင်မိူဝ်ႈလဵဝ် တီႈၼႆႈၵမ်းလဵဝ်?။

သဵင်ၵူၼ်းမိူင်းၵဵင်းတုင်ယိူင်းမႃး (18/01/1996)

ၶၢဝ်ႇဝၢင်းၶိူင်ႈ၊ ၸႂ်ပိူင်ႈမိူၼ်ၸပ်း AIDS

ဢႃးလူဝ်း! – လႆႈငိၼ်းၶၢဝ်ႇတူၺ်းၼႂ်း TV ဢၼ် MTA ဝၢင်းၶိူင်ႈၵႂႃႇၼၼ်ႉ ၼႂ်းၸႂ်ၼႆႉ ယိၼ်းမိူၼ်ၼင်ႇ ၵူၼ်းၸပ်းတၢင်းပဵၼ် AIDS ၵႂႃႇၵမ်းလဵဝ်ယဝ်ႉ။ မိူၼ်ၼင်ႇ ဢမ်ႇမီးတီႈမုင်ႈမွင်းသင်ထႅင်ႈယဝ်ႉသေ လူဝ်ႇလႆႈပႂ်ႉဝၼ်းတၢႆၼၼ်ႉၵူၺ်းယဝ်ႉ။

ပီႈၵႅဝ်တႃငၢၼ် (မႄႈသၢႆ)

ၸႂ်ႉၵမ်တႅမ်ႈတႅမ်ႈၶိုၵ်ႉၶိုၵ်ႉ

တင်ႈဢဝ်ၼႆႉၵႂႃႇ ၵမ်တႅမ်ႈ ဢၼ်သူတေၸႂ်ႉတႅမ်ႈလိၵ်ႈလၢႆး သႂ်ႇလူင်းၼႂ်း “ၵွၼ်းၶေႃ“ သူၼႆႉ လူဝ်ႇၵႂႃႇသင်ႇ သိုဝ်ႉႁႃဢဝ်ၵမ်တႅမ်ႈတီႈမိူင်းၵွၼ်းၶေႃ ဢၼ်ပိူၼ်ႈၶိုၼ်ႈယႂ်ႇၶိုတ်းၵၢပ်ႈ ဢမ်ႇတွၼ်ႉယၢမ်ႈပဵၼ်ၶီႈၶႃႈ ပိူၼ်ႈ မႃးသေပွၵ်ႈၼၼ်ႉ ဝူၼ်ႉလိုၵ်ႉလိုၵ်ႉယဝ်ႉ တႅမ်ႈၶိုၵ်ႉၶိုၵ်ႉတိၵ်းတိၵ်းယဝ်ႉ။ တိုၼ်းယႃႇပေလႄႇႁႃၵဵပ်း ဢဝ်ၵမ်တႅမ်ႈ ဢၼ်တူၵ်းတႅမ်ႇၸွမ်းၸွၵ်ႉ ၸွမ်းၸဵင်ႇ၊ ဢၼ်ၵႃႈထုၵ်ႇၵႃႈပေႃး ဢၼ်လႆႈတီႈမႄႈမွၵ်ႇယႃႈ ၵူၼ်း ၶီႈၶႃႈ ၸိူဝ်းၼၼ်ႉ မႃးတႅမ်ႈထႅင်ႈလႃးလႃးယဝ်ႉ။

ပီႈလူင်း KTG (19/01/1996)

ပုၼ်ႈၽွၼ်းသင်ႇၶႃႇ

သင်ႇၶႃႇၸဝ်ႈတင်းလၢႆၼႆႉ လူဝ်ႇလႆႈၸွႆႈထႅမ်၊ လူဝ်ႇလႆႈဢွၼ်ႁူဝ်ၼမ်းၼႃႈၵူၼ်းႁဵတ်းၵၢၼ်မိူင်း၊ သမ်ႉလူဝ်ႇလႆႈမီးဢေႃးၸႃႇထတ်းသၢင် တူင်ႉတၵ်ႉၸိၸမ်ႈမူၼ်ႉမႄးပၼ်ၵူၼ်းပၢႆးမိူင်းၶဝ်၊ တိုၼ်းဢမ်ႇလူဝ်ႇ လႆႈပဵၼ်ၽူႈၵႂင်မဝ်းဝင်ႇဝိူဝ်ႈၸွမ်း၊ ဢမ်ႇလူဝ်ႇလႆႈပဵၼ်ၽူႈၵႅဝ်ယုင်ႈၸိမ်ၵဝ်းၸွမ်း ၵူၼ်းႁဵတ်းၵၢၼ်မိူင်း။ ပိူင်ၶိုၵ်ႉမၼ်းတိုၼ်းဢမ်ႇလူဝ်ႇလႆႈပဵၼ် “ၶိူင်ႈမိုဝ်း” ၵူၼ်းႁဵတ်းၵၢၼ်မိူင်းလႃးလႃး။ ဢဝ်တြႃးထမ်း ၼမ်ႉၵႂၢမ်း သင်ႇသွၼ်ပုတ်ႉထၸဝ်ႈ ပဵၼ်ငဝ်ႈငႃႇၼမ်းၼႃႈသေ ယိပ်းမၼ်ႈတိုဝ်းၵမ်ၸွမ်းသဵၼ်ႈ တၢင်းပုတ်ႉထၸဝ်ႈ ႁဵတ်းၸဝ်ႈၼႄတႃႇၽူႈႁဵတ်းၵၢၼ် ၸိူဝ်ႉၸၢတ်ႈၶဝ်ၵႂႃႇၵူၺ်းတႃႉ။

လုင်းၸႂ်ယဵၼ်

ၸႅၵ်ႇလူမ်းဢမ်ႇၽဵင်ႇ၊ တဵင်ႇႁူဝ်ၵၼ်

ၵၢၼ်တႆးၼႆႉ မိူၼ်ၸုမ်းၸူၼ်ငိူဝ်ႈငႃႉ တဝ်ယႃႉၵဝ်းယုင်ႈၵၼ်ၵူၺ်းယဝ်ႉ။ ယိူင်ႈငၢႆးၸိူင်ႉၼင်ႇၸုမ်း ၸူၼ် တေၸူဝ်းၵၼ်ၵႂႃႇၸူၼ်ပိူၼ်ႈၼၼ်ႉ၊ ယင်းပႆႇတၼ်းလႆႈၵႂႃႇ၊ ပေႃးလႆႈမႃးႁဝ်းလူဝ်ႇမႅင်ႇၵၼ်ၽႄပၼ်ၵၼ် ၸိူင်ႉၼၼ်ၸိူင်ႉၼႆ – ၼႆသေ ဢဝ်လူမ်းၸႅၵ်ႇၽႄၵၼ် ဢမ်ႇၽဵင်ႇဢမ်ႇၽွမ်ႉၵၼ်လႄႈ လႆႈၽိတ်းႁူဝ်ၵၼ်ယူႇၼၼ်ႉၵူၺ်းယဝ်ႉ။

ပီႈလူမ်း (TKG) 19/01/1996

ၵူၼ်းၸွမ်ႇၽၢႆႉၸႂ်တူၵ်း

လွင်ႈဢၼ် MTA ဝၢင်းၶိူင်ႈယိပ်းၵွင်ႈၵၢင်ႇ ပၼ်ၸုမ်းသိုၵ်းမၢၼ်ႈ ၼသတ ၵႂႃႇၼၼ်ႉ ပုၼ်ႈတႃႇၵူၼ်းမိူင်း ပဵၼ်ၸိူင်ႉႁိုဝ်?။ ဢၼ်ယွင်ႇမဝ်းၵၢၼ်မိူင်း၊ ဢၼ်မီးၸႂ်ႁၵ်ႉၸိူဝ်ႉၸၢတ်ႈ တီႈသူပ်းတူဝ်ႁူဝ်ၸႂ်ၶဝ်ၵမ်ႈၼမ် ၼႆႉ မိူၼ်ၼင်ႇ “ၵူၼ်းၸွမ်ႇၽၢႆႉ” ၼၼ်ႉယဝ်ႉ။ ယိုၼ်းလႅင်ႈၶႅင်ႈၶၢမ်ႇတိၼ်ၵူၼ်ႉၸုၵ်းၸၼ်းၼွၵ်ႈပၢင်ၽၢႆႉသေ ၸွမ်ႇၸွမ်းသႂ်ႇၸွမ်းၵူၼ်းၼင်ႈတေႃႇမၼ်းယူႇသေတႃႉ ပေႃးသုမ်းမႃးၵေႃႈ သမ်ႉၸႂ်တူၵ်းလိူဝ်ၵူၼ်း ၼင်ႈယိပ်းၽၢႆႉၵွၼ်ႇယဝ်ႉ။ ၵူၼ်းၼင်ႈတေႃႇမၼ်းသမ်ႉ သုမ်းယူႇၵေႃႈလႅပ်ႈဢမ်ႇပေႃးၵႃႈႁိုဝ်သေတႃႉ “ၵူၼ်းၸွမ်ႇ ၽၢႆႉ” တႄႉ ႁူႉတေၶၢင်းဝႃႈပွင်ႉၼႄၸႂ်တူၵ်းၸႂ်သဵင်ႈလိူဝ်သေ ၵူၼ်းယိပ်းၽၢႆႉလူးၵွၼ်ႇ။

ပီႈလူမ်း (TKG) 19/01/1996

ၵႂၢႆးဝၢႆးၼႃးဢိုပ်းၽိူင်း

ႁဝ်းၼႆႉ သင်ပဵၼ်ၵႂၢႆးၵေႃႈ ႁဵတ်းၼႃးယဝ်ႉ ယင်းဢမ်ႇလႆႈၵိၼ်ၽိူင်းလူင်ၼႆႉ။ ႁၼ်ပုမ်ႇၶဝ်ႈၵွင်ၽိူင်းယူႇၵေႃႈ ဢၼ်ပိူၼ်ႈမႃႁၢႆႉမႃးပႂ်ႉမႃးႁဝ်ႇပႂ်ႉၶူပ်းၵေႃႈမီး၊ ဢၼ်ပိူၼ်ႈဢဝ်ၽဝ်ၾႆး ၸုတ်ႇပႅတ်ႈၵေႃႈမီး၊ ဢၼ်ပိူၼ်ႈဢဝ်ၽဝ်ၾႆးၸုတ်ႇပႅတ်ႈၵေႃႈမီး။ မိူဝ်ႈတိုၵ်ႉထႆၼႃးယူႇၼၼ်ႉၵေႃႈ ပိူၼ်ႈပၢႆဢဝ်ယိူဝ်ႈႁႅင်ႈလဵင်ႉဢွႆႇ မႃးၵူၺ်းလူးၵွၼ်ႇ။ ၵမ်းၼႆႉသမ်ႉ တေလႆႈၵႂႃႇသိုပ်ႇထႆၼႃးပၼ်ၽႂ်ထႅင်ႈ?။

ၵလႃးတေႇၸၵၢင်းယုမ်း (08/01/1996)

(ၶေႃႈမုလ်း ပပ်ႉၵွၼ်းၶေႃ မၢႆ – 139 ပီ 1996)