မိူဝ်ႈၼႆႉဝၼ်းတီႈ 31/3/2025 ၶၢဝ်းၵၢင်ၼႂ် 10 မူင်းပၢႆ သိုၵ်းမၢၼ်ႈၸႂ်ႉၶိူင်ႈတရူၼ်း ဢၼ်တေႃႉလႆႈ မၢၵ်ႇ 120 မမ ၼၼ်ႉ ပွႆႇမၢၵ်ႇလူင်းတီႈ ဝၢၼ်ႈၵျွၵ်ႉၵျၢမ်း (ကျောက်ကြမ်းရွာ) ၸႄႈဝဵင်းၼွင်ၶဵဝ် တီႈဢၼ်မီး သိုၵ်းတဢၢင်း TNLA တူင်ႉၼိုင်ယူႇသဝ်း။
ၾၢႆႇတပ်ႉသိုၵ်းပူတ်းပွႆႇၸိူဝ်ႉၸၢတ်ႈတဢၢင်း TNLA ပိုၼ်ၽၢဝ်ႇဢွၵ်ႇဝႆႉဝႃႈ ယွၼ်ႉသိုၵ်းမၢၼ်ႈ ၸႂ်ႉတရူၼ်းပွႆႇမၢၵ်ႇသႂ်ႇ လႄႈ ႁဵတ်းႁႂ်ႈတုမ်ႉတိူဝ်ႉပႃး ႁိူၼ်းၵူၼ်းမိူင်း ၼႂ်းဝၢၼ်ႈလူႉၵွႆၵႂႃႇတင်းၼမ် လွင်ႈလူႉမၢတ်ႇၸဵပ်းတႄႉ ပႆႇလႆႈႁူႉ ႁူဝ်ယွႆႈ ။
ပူၼ်ႉမႃး ဝၼ်းတီႈ 28 /3/2025 ယၢမ်းဝၢႆးဝၼ်း ၽွင်းၵူၼ်းမိူင်းၵိုင်ႉၵၢင်ႉလႆႈႁူပ်ႉၽေးသၽႃႇဝ ၽႅၼ်ႇလိၼ်ဝႆ (ဢိင်ႇသၼ်ႇ) ႁၢဝ်ႈႁႅင်း ပတ်းပိုၼ်ႉမိူင်းယူႇၼၼ်ႉ သိုၵ်းမၢၼ်ႈ ၸႂ်ႉၶိူင်ႈမိၼ်တိုၵ်း ၵျႅတ်ႊၾၢႆႊတိူဝ်ႊသေ ဢဝ်မၢၵ်ႇလူင် သႅၼ်း 250 ပွင်ႇ ပွႆႇလူင်းၼႂ်းဝၢၼ်ႈၼွင်လႅင် 2 လုၵ်ႈ။ ႁဵတ်းႁႂ်ႈႁူင်းႁဵၼ်းလူႉၵွႆ 2 လင်၊ ႁိူၼ်းၵူၼ်းမိူင်း လူႉၵွႆ 3 လင် ။
ၽႅၼ်ႇလိၼ်ဝႆ တီႈတိူင်းၸႄႈၵႅင်း ႁႅင်းဝႆ 7.7 မႅၵ်ႊၼီႊၵျုတ်ႉ ၼၼ်ႉယွၼ်ႈထိုင်မိူင်းတႆးပတ်းပိုတ်ႉလႄႈမိူင်းထႆးပႃး။ ၵူၼ်းတၢႆယွၼ်ႉ ႁိူၼ်းတိုၵ်းၵူၼ်ႇတဵင် မီး 1000 ပၢႆယဝ်ႉ။ ဢၼ်မၢတ်ႇၸဵပ်း မီး 2000 ပၢႆ။
သိုၵ်းမၢၼ်ႈဢမ်ႇသႂ်ႇၸႂ်ၸွႆႈထႅမ်ၼႂ်းလွင်ႈၼႆႉ တဵမ်တီႈသေ သမ်ႉၶိုၼ်းၵူၺ်းပိုၼ်ၽၢဝ်ႇဝႃႈ – တႄႇဝၼ်းတီႈ 31/3/2025 တေႃႇထိုင် 6/4/2025 ၶၢဝ်းတၢင်း 7 ဝၼ်း ၾၢႆႇသိုၵ်းမၢၼ်ႈ တေပူတ်းတုင်း (ၸွမ်ပိဝ်) ၸိုင်ႈမိူင်းလူင်းဝႆႉၼိုင်ႈၶိုင်ႈ။ မၵ်းမၼ်ႈပဵၼ်ဝၼ်းမွင်ၸႂ်ၸွမ်း ၵူၼ်းမိူင်းၸိူဝ်းႁူပ်ႉၺႃး ၽေးၶဵၼ်ၽႅၼ်ႇလိၼ်ဝႆ (ဢိင်ႇသၼ်ႇ) သေ တူၵ်းၵိၼ်းဝႆႉယူႇ ၸိူဝ်းၼၼ်ႉ- ဝႃႈၼႆ။
ၾၢႆႇၼိုင်ႈတၢင်းၼိုင်ႈၵေႃႈ သိုၵ်းမၢၼ်ႈယင်းတိုၵ်ႉဢဝ်ၶိူင်ႈမိၼ်သေ မိူဝ်းပွႆႇမၢၵ်ႇသႂ်ႇၼႂ်းမိူင်းတႆးပွတ်းႁွင်ႇ တင်း ၼႃႈတီႈၽွင်းငမ်း ၸူဝ်ႈၶၢဝ်း ၸုမ်းယိပ်းၵွင်ႈၵၢင်ႇၸၢဝ်းၶိူဝ်း ဢၼ်သိုၵ်းမၢၼ်ႈလႆႈသုမ်းသိုၵ်းသေ ထွႆပၼ်တပ်ႉပၢင်သဝ်း ၸိူဝ်းၼၼ်ႉယူႇ ။
တႅမ်ႈ-ၽူၺ်းၼုမ်ႇ
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ