တႄႇႁၢင်လိူၼ် မတ်ႉၶျ် ၼႆႉမႃးသိုၵ်းမၢၼ်ႈတဵၵ်း  ၸႂ်ႉၵူၼ်းမိူင်းဝဵင်းလွႆၶေႃ ပၢႆႈၽေးသိုၵ်း ၵႂႃႇယူႇဝႆႉ ၼႂ်းၸႄႈဝဵင်းယွင်ႁူၺ်ႈၸိူဝ်းၼၼ်ႉ ပွၵ်ႈၶိုၼ်ႈႁိူၼ်းၽႂ်မၼ်း၊ တီႈၼႂ်းဝၢၼ်ႈၼႂ်းဢိူင်ႇသမ်ႉ သိုၵ်းမၢၼ်ႈ ၶဝ်ႈတဝ်ၵူတ်ႇထတ်းၵူၼ်းဝၢၼ်ႈသေတီႉၺွပ်းၵႂႃႇပႃးထႅင်ႈ ။

ၵူၼ်းပၢႆႈၽေးသိုၵ်း ၸိူဝ်းပွၵ်ႈယူႇၶိုၼ်းႁိူၼ်းယေးၸိူဝ်းၼၼ်ႉ သိုၵ်းမၢၼ်ႈ ၵူတ်ႇထတ်း မၢႆၾၢင်သေ ထဵတ်ႈထၢမ်ႁၢဝ်ႈႁႅင်း။ ပေႃးပဵၼ်ၶႃႈႁၢပ်ႇၵၢၼ်ၶုၼ်ၸိူဝ်းႁဵတ်း CDM ဝႆႉၼႆတီႉၺွပ်းၵႂႃႇပႃးမီးမွၵ်ႈ 10 ၵေႃႉယဝ်ႉ  ဝႃႈၼႆ ။

ၵူၼ်းမိူင်းဝဵင်းလွႆၶေႃ ဢၼ်ပၢႆႈၽေးသိုၵ်းဝႆႉၼၼ်ႉ လၢတ်ႈၽူႈတွႆႇႁွၵ်ႈဝႃႈ -“ၼႂ်းလိူၼ်ၼႆႉ ၵူၼ်းပၢႆႈၽေးသိုၵ်းၵေႃႈ ပွၵ်ႈႁိူၼ်းၶိုၼ်းၼမ်၊  သိုၵ်းမၢၼ်ႈမႃးၵူတ်ႇထတ်းယွၼ်းတူၺ်း မၢႆၾၢင်   Kpay ၸိူဝ်းၼႆႉ  ၊ ပေႃးၶဝ်ထၢင်ႇထိူမ်သေ လွင်ႈလွင်ႈၼႆႉ ၶဝ် တီႉၺွပ်း ၊ ၶဝ်လၢတ်ႈဝႃႈ ၵဵဝ်ၶွင်ႈၵၼ်တင်း ၸုမ်း PDF ၼႆသေ တီႉၵႂႃႇတႆးၵေႃႉၶႃႈ 2 ၵေႃႉယဝ်ႉ လႆႈငိၼ်းၶဝ်ဝႃႈ ၸၢင်ႈပၼ်တူတ်ႈတၢမ်ႇၶွၵ်ႈထိုင် 12 ပီၼႆဝႃႇ။    တလဵဝ်ဢၼ်ၶႃႈ ႁူႉတႄႉၶဝ်တီႉၺွပ်းၼႆႉ  ဢမ်ႇယွမ်း 10 ၵေႃႉယဝ်ႉ”- ဝႃႈၼႆ ။

တီႈဝဵင်းလွႆၶေႃ တင်းမူတ်း မီး 13 ပွၵ်ႉ  ၵူၼ်းမႃးယူႇၶိုၼ်းမွၵ်ႈ  5 ပွၵ်ႉယဝ်ႉ ၊ ပေႃးတေပွၵ်ႈယူႇၶိုၼ်းၼႆႉ လႆႈဢဝ် မၢႆၾၢင် ၊ ႁၢင်ႈၵူၼ်းၼႂ်းႁိူၼ်း လႄႈ ပုင်ႇၸၢမ်ႇ 10 ၸိူဝ်းၼႆႉ ပၼ်ဝႆႉ ၵၢင်ႉၵႄႇၼႂ်းပွၵ်ႉ 1 ၸုမ်ႇ  ၊  ဢဝ်ဝႆႉတီႈႁိူၼ်း 1 ၸုမ်ႇ ဝႃႈၼႆ ။

ယၢမ်းလဵဝ် တီႈဝဵင်းလွႆၶေႃ သိုၵ်းမၢၼ်ႈတင်ႈ ၵဵတ်ႉ ၼိုင်ႈပွၵ်ႉ မီး  3-4 ဢၼ် ၊ပေႃးဢမ်ႇပႃးမၢႆၾၢင် ဢမ်ႇပၼ်ၶဝ်ႈဢွၵ်ႇ ၼႂ်းပွၵ်ႉ- ၵူၼ်းပိုၼ်ႉတီႈလၢတ်ႈ ။

ၼၢင်းယိင်းၵူၼ်းပိုၼ်ႉတီႈလၢတ်ႈၽူႈတွႆႇႁွၵ်ႈဝႃႈ -“ ပေႃးတေၵႂႃႇမႃး ၼႂ်းပွၵ်ႉၼႂ်းယွမ်ႇၵူၺ်းၵေႃႈ  လႆႈပႃးမၢႆၾၢင်ၵႂႃႇ ၊ ပေႃးဢမ်ႇပႃးၵေႃႈ တီႈၵဵတ်ႉဢမ်ႇပၼ်ၵႂႃႇ ၊ ပေႃးၶဝ်ထဵတ်ႈထၢမ်  လႆႈလၢတ်ႈ ပႃးဝႃႈ တေၵႂႃႇလႂ် ၵႂႃႇႁဵတ်းသင် တေပွၵ်ႈမႃးၶိုၼ်းၶၢဝ်းလႂ် ၸိူဝ်းၼႆႉ လႆႈလၢတ်ႈပႃးႁူဝ်ယွႆႈမၼ်း ”- ဝႃႈၼႆ ။

ၼၢင်းယိင်းပိုၼ်ႉတီႈလၢတ်ႈၽူႈတွႆႇႁွၵ်ႈဝႃႈ -“ဢမ်ႇၸၢင်ႈႁဵတ်းႁိုဝ်လႄႈ လႆႈပွၵ်ႈမႃးၵူၺ်း  ၊  လႆႈမႆႈၸႂ်ၵူႈလွင်ႈ ၊ လွင်ႈႁူမ်ႇလူမ်ႈ ၊ ၵူၼ်းလူင်လႄႈလုၵ်ႈဢွၼ်ႇ၊ လွင်ႈၵဵပ်းၵူၼ်းႁၢပ်ႇၵၢၼ်သိုၵ်း ၸိူဝ်းၼႆႉၵေႃႈမႆႈၸႂ်။ လွင်ႈမၢၵ်ႇမႅင်း ၼႂ်းႁႆႈၼႂ်းသူၼ်ၵေႃႈ လႆႈၵူဝ်။  မၢင်ဝၢၼ်ႈမၢင်ပွၵ်ႉၼႆႉ ပႆႇၸၢင်ႈၶဝ်ႈသေဢိတ်း။ၽႂ်ၶဝ်ႈၵႂႃႇၵေႃႈယဵပ်ႇၺႃးမၢၵ်ႇ တိၵ်းတိၵ်း ”- ဝႃႈၼႆ ။

 မိူဝ်ႈ ဝၼ်းတီႈ 27/3 /2025 ၼၼ်ႉၵေႃႈ ၵူဝ်ႇၵျေႃႇတူႇ ဢႃယု 27 ပီ   ႁဵတ်းၵၢၼ် ၵေႃႇသၢင်ႈဝႆႉယူႇတီႈႁိမ်း ၼွင်ၼမ်ႉ တီႈၵၢင်ဝဵင်းလွႆၶေႃၼၼ်ႉ ယဵပ်ႇၺႃးမၢၵ်ႇသေ တိၼ်ပုတ်းမၢတ်ႇၸဵပ်းႁႅင်း လႆႈႁၢမ်သူင်ႇႁူင်းယႃ  ။  

တႄႇဝၼ်းတီႈ 20/3/2025  မႃး သိုၵ်း KNDF ပၼ်ၾၢင်ႉၵူၼ်းပၢႆႈၽေးသိုၵ်း ဢၼ်တေမိူဝ်းၶိုၼ်း တီႈသဵၼ်ႈတၢင်း လွႆၶေႃ လႄႈသီႇသႅင်ႇဝႃႈ – သိုၵ်းမၢၼ်ႈထႅမ်ႁႅင်းသိုၵ်းမႃးၼမ် ၸၢင်ႈပဵၼ်ပၢင်တိုၵ်းလႆႈၵူႈၶၢဝ်းလႄႈ ႁႂ်ႈဢွၼ်ၵၼ်ၾၢင်ႉ ယႃႇၵႂႃႇမႃး ၊ လုၵ်ႉတင်းဝဵင်းသီသႅင် – မႃးဝဵင်းလွႆႇၶေႃ ၼႂ်းၵႄႈတၢင်းၵဵတ်ႉသိုၵ်းမၢၼ်ႈ မီးဢမ်ႇယွမ်း 20 ၵဵတ်ႉ ဝႃႈၼႆ ။

ယွၼ်ႉၽႅၼ်ယၼ်ႇသိုၵ်း 1111 သေ ဝဵင်းလွႆၶေႃ ထိုင်တီႈလူႉလႅဝ်ႁၢမ်းၵႂႃႇသေတႃႉ ယၢမ်းလဵဝ် သိုၵ်းမၢၼ်ႈ ၶဝ်ႈဢဝ်တီႈယူႇဝႆႉၼႂ်းဝဵင်း။ ယၢမ်းလဵဝ် ၾၢႆႇ သိုၵ်းမၢၼ်ႈ ၵႂၢတ်ႇလၢင်ႉၼႃႈတီႈသေ ႁူၺ်းသူၼ်းၵူၼ်းပၢႆႈၽေးသိုၵ်း ပွၵ်ႈမိူဝ်းႁိူၼ်းၶိုၼ်းႁႂ်ႈယဝ်ႉတူဝ်ႈ  ၼႂ်းလိူၼ်မၢတ်ႉၶျ်ၼႆႉ ဝႃႈၼႆ ။