မိူဝ်ႈဝၼ်းတီႈ 23 ပူၼ်ႉမႃးၼၼ်ႉ တပ်ႉသိုၵ်းတဢၢင်း TNLA ဢဝ်ႁႅင်းသိုၵ်းသေ တဵၵ်းႁႂ်ႈသိုၵ်းတႆး SSPP ၶၢႆႉတပ်ႉဢွၵ်ႇ ၼႂ်းၸႄႈဝဵင်းမိူင်းမိတ်ႈလႄႈ ထိုင်တီႈ SSPP လႆႈလၼ်ႇၵွင်ႈပၼ်ၾၢင်ႉၶဝ်ၵႂႃႇ ဝႃႈၼႆ။

ဢိင်ၼိူဝ်လွင်ႈၼႆႉ ထိုင်မႃး ဝၼ်းတီႈ 24/03/2025 ၼႆႉ ယူႇတီႈ တပ်ႉသိုၵ်းပူတ်းပွႆႇၸိူဝ်ႉၸၢတ်ႈတဢၢင်း TNLA လႆႈတႅမ်ႈလိၵ်ႈပွင်ႇၸူး တပ်ႉသိုၵ်းၸိုင်ႈတႆး SSPP သေ ႁႂ်ႈမႃးၵႄႇလိတ်ႈပၼ်ႁႃ လွင်ႈလၼ်ႇၵွင်ႈ တေႃႇတပ်ႉသိုၵ်းၶဝ် တီႈဝၢၼ်ႈၽၢႆၵဝ်ႇ ၼႂ်းၸႄႈဝဵင်းမိူင်းမိတ်ႈ ၸိုင်ႈတႆးပွတ်းႁွင်ႇၼၼ်ႉ ဝႃႈၼႆ။

ၼႂ်းလိၵ်ႈ TNLA ပွင်ႇၸူး SSPP ၼၼ်ႉ တႅမ်ႈဝႆႉဝႃႈ – ၵဵဝ်ႇလူၺ်ႈလွင်ႈ လၼ်ႇၵွင်ႈၸူးၵၼ်ၼႆႉ သင်ဝႃႈ ပဵၼ်ၸုမ်းဢူၺ်းလီၵၼ် မီးၵုင်ႇသိၵ်ႉၶႃႇ တႄႉယူႇၸိုင် ႁႂ်ႈမႃးၵႄႈလိတ်ႈပၼ်ႁႃလွင်ႈၼႆႉသေၵမ်း – ဝႃႈၼႆ။

ၽူႈတူင်ႉၼိုင် ၵၢၼ်သိုၵ်း ၼႂ်းပိုၼ်ႉတီႈ ဝဵင်းမိူင်းမိတ်ႈ ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ –  “ၾၢႆႇႁဝ်းၶႃႈ ယိုဝ်းၵွင်ႈလွၵ်ႇသေ ၾၢႆႇၶဝ် ၶိုၼ်းသုတ်ႉထွႆဢွၵ်ႇၵႂႃႇ တေႃႇထိုင်ယၢမ်းလဵဝ်ယဝ်ႉ။ ယူႇတီႈ သိုၵ်းတဢၢင်း ၸၼ်ႉပႃႈတႂ်ႈၶဝ် ယွၼ်းဢုပ်ႇႁဝ်း တီႈၽူႈမီးပုၼ်ႈၽွၼ်း ၼႂ်းၼႃႈတီႈတၢင်းပုၼ်ႉယူႇ ႁဝ်းၶႃႈ ဢမ်ႇပၼ် သုၼ်ႇလႆႈၶႂၢင်ႈဢုပ်ႇသင်။ ယၢမ်းလဵဝ်တႄႉ ၾၢႆႇႁဝ်းၶႃႈ ဢဝ်တီႈယူႇပေႉပုၼ်ႉဝႆႉယူႇ တၢင်းပွတ်းတွၼ်ႈ ပုၼ်ႉ”- ဝႃႈၼႆ။

ယၢမ်းလဵဝ် သိုၵ်းတဢၢင်း TNLA တႄႉ လႆႈထွႆဢွၵ်ႇ ၼႂ်းပိုၼ်ႉတီႈ ဢၼ်ၸမ်သိုၵ်းတႆး SSPP ၼၼ်ႉဝႆႉယူႇ ဝႃႈၼႆ။

ၵဵဝ်ႇလူၺ်ႈလွင်ႈၼႆႉ ယူႇတီႈ ၸုမ်းၶၢဝ်ႇၽူႈတွႆႇႁွၵ်ႈ ၵပ်းသိုပ်ႇၸူး ၽူႈၶၢၼ်ပၢၵ်ႇ SSPP တင်း TNLA ၵေႃႈ ဢမ်ႇလႆႈ။

ၼႂ်းလိၵ်ႈ TNLA ပွင်ႇၸူး SSPP ၼၼ်ႉ ပၼ်ၾၢင်ႉထိုင်ဝႃႈ – ၵဵဝ်ႇလူၺ်ႈလွင်ႈ လၼ်ႇၵွင်ႈၸူးၵၼ်ၼႆႉသေ သင်ဝႃႈ SSPP ဢမ်ႇမႃးၵႄႇလိတ်ႈပၼ်ႁႃၼႆၸိုင် သင်ပဵၼ်မႃးပၼ်ႁႃထႅင်ႈ ယူႇတီႈ SSPP တေလႆႈႁပ်ႉ ပုၼ်ႈၽွၼ်း – ဝႃႈၼႆ။

သိုၵ်းတဢၢင်း TNLA ၼႆႉ ၵႆႉပဵၼ်ပၼ်ႁႃ လွင်ႈႁိမ်ၼႃႈတီႈၵၼ်တင်း ပႃႇတီႇမႂ်ႇသုင်ၸိုင်ႈတႆး/ တပ်ႉသိုၵ်း ၸိုင်ႈတႆး SSPP/SSA ၼႂ်းမိူင်းတႆးပွတ်းႁွင်ႇ လၢႆလၢႆပွၵ်ႈယဝ်ႉ။ မိူဝ်ႈပူၼ်ႉမႃး ဝၼ်းတီႈ 13 လိူၼ်ၵျူႊလၢႆႊ ပီ 2024 ၼၼ်ႉၵေႃႈ သိုၵ်းတဢၢင်း TNLA တင်း ပႃႇတီႇမႂ်ႇသုင်ၸိုင်ႈတႆး SSPP ပဵၼ်ပၼ်ႁႃၵၼ် ႁၢဝ်ႈႁႅင်း သေ ထိုင်တီႈတပ်ႉသိုၵ်းဝႃႉ UWSA ႁူဝ်ပဝ်ႈ ၶွမ်ႊမတီႊၵၢၼ်ဢုပ်ႇဢူဝ်း လွင်ႈငမ်းယဵၼ် ၸၼ်ႉမိူင်းႁူမ်ႈ တုမ် FPNCC ပေႃးလႆႈယူႇၵႄႈၵၢင် ၸတ်းပၼ်ပၢင်ဢုပ်ႇဢူဝ်း ငူပ်ႉငီႉၵၼ်မႃး ၼႆယဝ်ႉ။

ၼႂ်းၶွမ်ႊမတီႊၵၢၼ်ဢုပ်ဢူဝ်း လွင်ႈငမ်းယဵၼ် ၸၼ်ႉမိူင်းႁူမ်ႈတုမ် FPNCC ၼႆႉ ၸိူဝ်းပဵၼ် တပ်ႉသိုၵ်းဝႃႉ UWSA ၊ ပႃႇတီႇမႂ်ႇသုင်ၸိုင်ႈတႆး/ တပ်ႉသိုၵ်းၸိုင်ႈတႆး SSPP/SSA ၊ တပ်ႉသိုၵ်းပူတ်းပွႆႇၸိူဝ်ႉၸၢတ်ႈတ ဢၢင်း TNLA ၊ တပ်ႉသိုၵ်းလွတ်ႈလႅဝ်းသဝ်းၶေႃၶၢင် KIA ၊ တပ်ႉသိုၵ်းမိူင်းလႃး NDAA/ ESS ၊ တပ်ႉသိုၵ်း ၵဝ်ႈၵၢင်ႉ MNDAA တင်း တပ်ႉသိုၵ်းရၶႅင်ႇ AA ၶဝ်ႈႁူမ်ႈပဵၼ်လုၵ်ႈၸုမ်းဝႆႉ ၼႆယဝ်ႉ။

တႅမ်ႈ – ၸၢႆးသႅင်ဢၢႆႈ ပိၼ်ႇၽႃသႃ ၸၢႆးယွတ်ႈၶမ်း