ဝၼ်းတီႈ 23/03/2025 ယၢမ်းၵၢင်ဝၼ်း မွၵ်ႈ 12 မူင်းလႄႈ ယၢမ်းၵၢင်ၶမ်ႈမွၵ်ႈ 7 မူင်း တပ်ႉသိုၵ်းပူတ်းပွႆႇ ၸိူဝ်ႉၸၢတ်ႈတဢၢင်း ဢဝ်ႁႅင်းသိုၵ်းသေ ႁႃလၢႆးတၢင်း ႁႂ်ႈပႃႇတီႇမႂ်ႇသုင် ၸိုင်ႈတႆး ၶၢႆႉတပ်ႉဢွၵ်ႇၵႂႃႇ ၼႂ်းၸႄႈဝဵင်းမိူင်းမိတ်ႈ ၼႆယဝ်ႉ။

ယွၼ်ႉသိုၵ်းတဢၢင်း TNLA ႁႂ်ႈပႃႇတီႇမႂ်ႇသုင်ၸိုင်ႈတႆး SSPP ၶၢႆႉပၼ်တပ်ႉပၢင်သဝ်း ဢၼ်ပၵ်းဝႆႉတၢင်း ဝၢၼ်ႈၽၢႆၵဝ်ႇ ၸႄႈဝဵင်းမိူင်းမိတ်ႈၼၼ်ႉသေ ၶၢဝ်းတၢင်းသွင်သၢမ်ဝၼ်း ၼႆႉမႃး တင်းသွင်ၾၢႆႇ ၸင်ႇလႆႈ ၶဵင်ႈၶႅင်ၵၢၼ်သိုၵ်း တေႃႇၵၼ်ဝႆႉၼႆ ၽူႈမီးပုၼ်ႈၽွၼ်း ၵေႃႉဢၼ်တူင်ႉၼိုင် ယူႇသဝ်းဝႆႉ ၼႂ်းၸႄႈဝဵင်းမိူင်း မိတ်ႈၵေႃႉၼိုင်ႈ လၢတ်ႈၼႄၽူႈတွႆႇႁွၵ်ႈ ၼင်ႇၼႆ။

“သိုၵ်းလွႆၶဝ် ပဵၼ်ပၼ်ႁႃၵၼ်တင်း သိုၵ်းမၢၼ်ႈ PDF ၶဝ်ယဝ်ႉႁႄ မႃးလၢတ်ႈႁႂ်ႈၾၢႆႇႁဝ်းၶၢႆႉပၼ်တပ်ႉၼႆဝႃႇ။ ႁဝ်းဝႃႈ ယႃႇသုတ်ႉၶဝ်ႈမႃး ၼႂ်းၼႃႈလိၼ်ႁဝ်း ပေႃးသုတ်ႉၶဝ်ႈမႃးတိၵ်းတိၵ်း ႁဝ်းတေယိုဝ်းၼႆ လၢတ်ႈၶဝ်ယူႇ။ ၶဝ်ဢမ်ႇထွမ်ႇလႄႈ ၾၢႆႇႁဝ်းၵေႃႈ လႆႈလၼ်ႇၵွင်ႈ ပၼ်ၾၢင်ႉၶဝ်ၵႂႃႇယူႇ”- ဝႃႈၼႆ။

ဝၢႆးလင် ၽႅၼ်ယၼ်ႇသိုၵ်း 1027 ပွၵ်ႈၵမ်းသွင်ၼႆႉ ၾၢႆႇသိုၵ်းတဢၢင်း ယိုတ်းလႆႈဝႆႉ ၸႄႈဝဵင်းမိူင်းမိတ်ႈ၊ မိူင်းၵုတ်ႈၼႆသေတႃႉ ၼႂ်းပိုၼ်ႉတီႈၼၼ်ႉ ၼွၵ်ႈလိူဝ် တပ်ႉသိုၵ်းမၢၼ်ႈယဝ်ႉ ယင်းတိုၵ်ႉမီး ၸုမ်းယိပ်းၵွင်ႈ ၵၢင်ႇလၢႆလၢႆၸုမ်း ႁူမ်ႈၵၼ်ၵုမ်းၵမ်ဝႆႉ ၼႃႈတီႈၽႂ်မၼ်းယူႇ ၼႆယဝ်ႉ။

သိုၵ်းတဢၢင်း TNLA ၼႆႉ ၵႆႉပဵၼ်ပၼ်ႁႃ လွင်ႈႁိမ်ၼႃႈတီႈၵၼ်တင်း ပႃႇတီႇမႂ်ႇသုင်ၸိုင်ႈတႆး/ တပ်ႉသိုၵ်း ၸိုင်ႈတႆး SSPP/SSA ၼႂ်းမိူင်းတႆးပွတ်းႁွင်ႇ လၢႆလၢႆပွၵ်ႈယဝ်ႉ။ မိူဝ်ႈပူၼ်ႉမႃး ဝၼ်းတီႈ 13 လိူၼ်ၵျူႊလၢႆႊ ပီ 2024 ၼၼ်ႉၵေႃႈ သိုၵ်းတဢၢင်း TNLA တင်း ပႃႇတီႇမႂ်ႇသုင်ၸိုင်ႈတႆး SSPP/SSA ပဵၼ်ပၼ်ႁႃၵၼ် ႁၢဝ်ႈႁႅင်းသေ ထိုင်တီႈ တပ်ႉသိုၵ်းဝႃႉ UWSA ႁူဝ်ပဝ်ႈ ၶွမ်ႊမတီႊၵၢၼ်ဢုပ်ႇဢူဝ်း လွင်ႈငမ်းယဵၼ် ၸၼ်ႉမိူင်းႁူမ်ႈတုမ် FPNCC ပေႃးလႆႈယူႇၵႄႈၵၢင် ၸတ်းပၼ်ပၢင်ဢုပ်ႇဢူဝ်း ငူပ်ႉငီႉၵၼ်မႃး ၼႆယဝ်ႉ။

ၼႂ်းၶွမ်ႊမတီႊၵၢၼ်ဢုပ်ဢူဝ်း လွင်ႈငမ်းယဵၼ် ၸၼ်ႉမိူင်းႁူမ်ႈတုမ် FPNCC ၼႆႉ ၸိူဝ်းပဵၼ် တပ်ႉသိုၵ်းဝႃႉ UWSA ၊ ပႃႇတီႇမႂ်ႇသုင်ၸိုင်ႈတႆး/ တပ်ႉသိုၵ်းၸိုင်ႈတႆး SSPP/SSA ၊ တပ်ႉသိုၵ်းပူတ်းပွႆႇၸိူဝ်ႉၸၢတ်ႈတဢၢင်း TNLA ၊ တပ်ႉသိုၵ်းလွတ်ႈလႅဝ်းသဝ်းၶေႃၶၢင် KIA ၊ တပ်ႉသိုၵ်းမိူင်းလႃး NDAA/ ESS ၊ တပ်ႉသိုၵ်းၵဝ်ႈၵၢင်ႉ MNDAA တင်း တပ်ႉသိုၵ်းရၶႅင်ႇ AA ၶဝ်ႈႁူမ်ႈပဵၼ်လုၵ်ႈၸုမ်းဝႆႉ ၼႆယဝ်ႉ။

တႅမ်ႈ – ၽူၺ်းၼုမ်ႇ