SSPP ၵူတ်ႇထတ်း တီႉၺွပ်းလႆႈ ၸုမ်းၵျႃးၽႅၼ်ႉ ၼႂ်းၸႄႈဝဵင်းမိူင်းသူႈလႄႈ ၵေးသီး ယဝ်ႉၵေႃႈ ၶိူင်ႈၸၢၵ်ႈ ဢၼ်ၸႂ်ႉၸွမ်းၼႂ်းၵၢၼ်ငၢၼ်း ၸိူဝ်းၼႆႉထႅင်ႈ တင်းၼမ်လၢႆ။

ဝၼ်းတီႈ 23/03/2025 ယၢမ်းၵၢင်ၼႂ်ၸဝ်ႉ ယူႇတီႈ ပႃႇတီႇမႂ်ႇသုင်ၸိုင်ႈတႆး/ တပ်ႉသိုၵ်းၸိုင်ႈတႆး SSPP/ SSA တီႉၺွပ်းလႆႈ ၸုမ်းၵျႃးၽႅၼ်ႉ တၢင်းၾၢႆႇႁွင်ႇ – ၾၢႆႇၸၢၼ်း ၼႂ်းၸႄႈဝဵင်းမိူင်းသူႈလႄႈ တၢင်းၸဵင်ႇၸၢၼ်းဝၼ်းဢွၵ်ႇဝဵင်းမိူင်းၼွင် ၼႂ်းၸႄႈဝဵင်းၵေးသီး ၸိုင်ႈတႆးပွတ်းၸၢၼ်းထႅင်ႈ ၼႆယဝ်ႉ။  

ၽူႈတူင်ႉၼိုင် ၵၢၼ်သိုၵ်း ၼႂ်းပိုၼ်ႉတီႈ ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “မိူဝ်ႈဝႃးၼႆႉ SSPP ႁဝ်းၶႃႈ တီႉၺွပ်းလႆႈ ၸုမ်းၵျႃးၽႅၼ်ႉၼႆႉ ၼမ်ဝႃႈၼမ်ၼၼ်ႉၶႃႈယဝ်ႉ။ ဢၼ်တီႉၺွပ်းလႆႈၼႆႉ ပဵၼ်ၾၢႆႇၸၢၼ်းလႄႈ ၾၢႆႇႁွင်ႇမိူင်းသူႈ လိူဝ်ၼၼ်ႉ ၸဵင်ႇၸၢၼ်းဝၼ်းဢွၵ်ႇ ဝဵင်းမိူင်းၼွင် ၸိူဝ်းၼႆႉထႅင်ႈ”- ဝႃႈၼႆ။

ဢိင်ၼိူဝ် လွင်ႈၼႆႉ ယူႇတီႈ ႁွင်ႈၵၢၼ်လူင် ပိုၼ်ၽၢဝ်ႇ ပႃႇတီႇမႂ်ႇသုင်ၸိုင်ႈတႆး (SSPP Info) ဢွၵ်ႇဝႆႉတႄႉ – တီႉၺွပ်းလႆႈ ၸုမ်းၵျႃးၽႅၼ်ႉ ၵမ်ႈၽွင်ႈ ပဵၼ်ၸၢဝ်းၶႄႇ ယဝ်ႉၵေႃႈ ၶိူင်ႈၸၢၵ်ႈ ဢၼ်ၸႂ်ႉၸွမ်းၼႂ်းၵၢၼ်ငၢၼ်း မိူၼ်ၼင်ႇ ၾူၼ်း၊ I Pad လႄႈ ၶွမ်ႊပိဝ်ႊတိူဝ်ႊ ၸိူဝ်းၼႆႉ ထႅင်ႈတင်းၼမ်။ တွၼ်ႈတႃႇ ၵူၼ်းၸၢဝ်းၶႄႇၼၼ်ႉ တေသူင်ႇမွပ်ႈပၼ်တၢင်း ၾင်ႇမိူင်းၶႄႇၵႂႃႇ – ဝႃႈၼႆ။

လိူဝ်ၼၼ်ႉ မိူဝ်ႈဝၼ်းတီႈ 22/03/2025 ယၢမ်းဝၢႆးဝၼ်း 3 မူင်း ၼၼ်ႉၵေႃႈ သိုၵ်းမၢၼ်ႈ ႁူမ်ႈတင်း ပျီႇတူႉၸိတ်ႉသေ တီႉလႆႈၸုမ်းၵျႃးၽႅၼ်ႉ 20 ၵေႃႉ တီႈႁိမ်းၼမ်ႉႁူးၽြႃးထမ်ႈ ဢိူင်ႇၼႃးပွႆး ၸႄႈဝဵင်းၼမ်ႉၸၢင် ၸိုင်ႈတႆးပွတ်းၸၢၼ်း။

ၵူၼ်းပိုၼ်ႉတီႈ ဝဵင်းၼမ်ႉၸၢင် လၢတ်ႈတီႈၽူႈတွႆႇႁွၵ်ႈဝႃႈ – “ၸႂ်ႈဢေႃႈ သိုၵ်းမၢၼ်ႈ ႁူမ်ႈတင်း ပျီႇတူႉၸိတ်ႉ ၼႃးယၢႆး၊ ပၢင်ႇလႅင်းသေ တီႉၺွပ်းလႆႈ 20 ၵေႃႉ တီႈႁိမ်းၼမ်ႉႁူးၽြႃးထမ်ႈ ဢိူင်ႇၼႃးပွႆး။ ၼႂ်း 20 ၵေႃႉ ၼၼ်ႉ ပဵၼ်ၵူၼ်းၼုမ်ႇ ၼႂ်းမိူင်းတႆး ၸိူဝ်းမွၵ်ႇလၢတ်ႈၵႂၢမ်းၶႄႇ ၵမ်ႈၼမ် ပဵၼ်ၸၢဝ်းတႆးလႄႈ ၵဝ်းၵၢင်ႉ”- ဝႃႈၼႆ။

သိုပ်ႇလၢတ်ႈဝႃႈ – “ဢၼ်ၶဝ် တီႉၺွပ်းလႆႈတႄႉ ပဵၼ်ၵူၼ်းၸၼ်ႉဢွၼ်ႇမၼ်းၵူၺ်း။ ၸိူဝ်းပဵၼ်ပေႃႈလဵင်ႉလူင်မၼ်း ၸိူဝ်းၼၼ်ႉတႄႉ ၶဝ်ဢမ်ႇတွၼ်ႉတီႉၺွပ်းလႆႈသေပွၵ်ႈ။ ယွၼ်ႉၸုမ်းၵျႃးၽႅၼ်ႉၼႆႉ ယူႇၼႂ်းပိုၼ်ႉတီႈ ပျီႇတူႉၸိတ်ႉ၊ ၸုမ်းယိပ်းၵွင်ႈၵၢင်ႇၶဝ်ဝႆႉလႄႈ သင်ဝႃႈ သိုၵ်းမၢၼ်ႈ တေမႃးၽဵဝ်ႈၶဝ်ၼႆ ပေႃႈလဵင်ႉလူင် ၸိူဝ်းၼၼ်ႉ ၶဝ်ပေႃးၶၢႆႉတီႈၵႂႃႇပိုတ်ႇတီႈမႂ်ႇထႅင်ႈယဝ်ႉ။ လွင်ႈၽဵဝ်ႈမူၺ်ႉ ႁႂ်ႈၸုမ်းၵျႃးၽႅၼ်ႉႁၢႆၼၼ်ႉ မၼ်းဢမ်ႇငၢႆႈ သင်ဢမ်ႇၽဵဝ်ႈမူၺ်ႉတႄႉတႄႉဝႃႈဝႃႈတႄႉ”- ဝႃႈၼႆ။

တႄႇဢဝ် ႁူဝ်လိူၼ်သႅပ်ႊထႅမ်ႊပိူဝ်ႊ ပီ 2023 ၼၼ်ႉမႃး ယွၼ်ႉသိုၵ်းဝႃႉ ၵူတ်ႇထတ်း တီႉၺွပ်းၸၢဝ်းၶႄႇ ၸိူဝ်းႁဵတ်းၵၢၼ်လႅၼ်ၵိၼ်ငိုၼ်းၼိူဝ်ဢွၼ်ႊလၢႆႊ မႃးႁၢဝ်ႈႁႅင်း ၼႂ်းၼႃႈတီႈၵုမ်းၵမ်ၶဝ်မႃး ၶိူဝ်းယႂ်းသေ သူင်ႇၸူးတၢင်းၾင်ႇမိူင်းၶႄႇ ၸွမ်းၼင်ႇ လူင်ပွင်ၸိုင်ႈၶႄႇ မိပ်ႇဢီး။

ၵွပ်ႈၼႆလႄႈ ၸုမ်းလႅၼ်ၵိၼ်ငိုၼ်းၼိူဝ်ဢွၼ်ႊလၢႆႊၼႆႉ ၸင်ႇလုၵ်ႉတၢင်းၼႂ်းၼႃႈလိၼ်ၽွင်းငမ်းတူဝ်ၵဝ်ႇ တပ်ႉသိုၵ်းၵဝ်ႈၵၢင်ႉ တၢင်းဝဵင်းလၢဝ်ႇၵၢႆး၊ ဝဵင်းၼမ်ႉၽႃႈ (ၶျိၼ်းသူၺ်ႇႁေႃႇ) ၸိူဝ်းၼၼ်ႉလႄႈ ၼႂ်းၼႃႈလိၼ်ၽွင်းငမ်းတူဝ်ၵဝ်ႇ တပ်ႉသိုၵ်းဝႃႉ ၼႂ်းဝဵင်းပၢင်သၢင်း ၸိူဝ်းၼႆႉသေ ပၢႆႈလူင်းမႃးသွၼ်ႈဝႆႉ တၢင်းမိူင်းယႆ – တၢင်ႉယၢၼ်း ၼႂ်းၼႃႈတီႈပျီႇတူႉၸိတ်ႉၵုမ်းၵမ် ယၢမ်းလဵဝ် ၶၢႆႉပၢႆႈမႃးသွၼ်ႈယူႇဝႆႉ ၼႂ်းၸိုင်ႈတႆး ပွတ်းၸၢၼ်း ၸိူဝ်းၼႆႉထႅင်ႈ တင်းၼမ် ၼႆယဝ်ႉ။