သိုၵ်းၵဝ်ႈၵၢင်ႉ ၶိုင်ၵႂႃႇၶုတ်းၶမ်း ၸွမ်းသၢပ်ႇၵႄးၼမ်ႉၶူင်း ႁိမ်းဝၢၼ်ႈႁူဝ်လီႈ ၼႂ်းၸႄႈဝဵင်းၵုၼ်လူင် ၸိုင်ႈတႆးပွတ်းႁွင်ႇ ၼႂ်းၼႃႈတီႈ သိုၵ်းၵဝ်ႈၵၢင်ႉ ၵုမ်းၵမ်ဝႆႉၸူဝ်ႈၶၢဝ်းၼၼ်ႉ ၵူၼ်းဝၢၼ်ႈႁူဝ်လီႈ ဢမ်ႇၽွမ်ႉၸွမ်းသေ ႁူမ်ႈၵၼ်သၢၼ်ၶတ်းၵႂႃႇ မိူဝ်ႈၼႂ်းႁၢင်လိူၼ်မၢတ်ႊၶျ် ပီ 2025 ၼႆႉ။

ဢွင်ႈတီႈသိုၵ်းၵဝ်ႈၵၢင်ႉ တေၶုတ်းၶမ်းႁိမ်းသၢပ်ႇၵႄးၼမ်ႉၶူင်းၼႆႉ ပဵၼ်ဢွင်ႈတီႈၵႄႈၼမ်ႉလၢႆၵႄး မႃးၶွႆႈၵၼ်သေ ပဵၼ်ဢွင်ႈတီႈၵူၼ်းမိူင်းလၢႆလၢႆတီႈ သူင်ၵၼ်ၵႂႃႇဢႅဝ်ႇယဵမ်ႈလႄႈ ၵူၼ်းမိူင်းၼႂ်းပိုၼ်ႉတီႈ ၵူဝ်တၢင်းႁၢင်ႈလီသၽႃႇဝ လူႉၵွႆ၊ ၾၢႆႇၼိုင်ႈၵေႃႈ ၵႄးၼမ်ႉၶူင်းသၢႆၼႆႉ လမ်ႇလွင်ႈ တႃႇၵူၼ်းၼႂ်းပိုၼ်ႉတီႈလႄႈ ၵွပ်ႈၼႆ ၸင်ႇႁူမ်ႈၵၼ်သၢၼ်ၶတ်းၼႆ – ၵူၼ်း ၼႂ်းပိုၼ်ႉတီႈ ၵေႃႉၼိုင်ႈ လၢတ်ႈၼႄၽူႈတွႆႇႁွၵ်ႈၼင်ႇၼႆ။

“မိူဝ်ႈတႄႇမၼ်း ၶဝ်ဝႃႈ တေမႃးသေးဢဝ်ၶမ်းၼႂ်းၼမ်ႉၶူင်းၼႆႁႄ လၢၵ်ႈၶိူင်ႈၸၢၵ်ႈလူင် ၶဝ်မႃးတမ်းၼၼ်ႉၼႃႇ။ ၵွပ်ႈၼၼ် ႁဝ်းၵူၼ်းဝၢၼ်ႈတင်း ၵွၼ်းဢိူင်ႇၶဝ် ၸင်ႇႁူမ်ႈၵၼ် လူင်းလၢႆးမိုဝ်း ၼႂ်းၽိုၼ်လိၵ်ႈႁႄ သၢၼ်ၶတ်းၼၼ်ႉၼႃႇ”- ဝႃႈၼႆ။

ယွၼ်ႉၵူၼ်းမိူင်းႁူမ်ႈၵၼ်သၢၼ်ၶတ်းလႄႈ ၾၢႆႇသိုၵ်းၵဝ်ႈၵၢင်ႉၶဝ် လႆႈၵိုတ်းယင်ႉ ၶူင်းၵၢၼ် ၶုတ်းၶမ်းၵႂႃႇ ၼႆယဝ်ႉ။

လႆႈႁူႉဝႃႈ ႁိမ်းၾင်ႇၼမ်ႉၶူင်း တီႈၵႄးၼမ်ႉၶွႆႈ (မြစ်ဆုံ) ၼၼ်ႉ မီးဝၢၼ်ႈၵူၼ်းဝႆႉလၢႆလၢႆဝၢၼ်ႈ။ သင်ၾၢႆႇသိုၵ်းၵဝ်ႈၵၢင်ႉၶဝ် ၵႂႃႇႁဵတ်းၵၢၼ်ၶုတ်းၶမ်းတီႈၼၼ်ႉတႄႉၸိုင် ၼမ်ႉၼၼ်ႉ တေဢမ်ႇမီး လွင်ႈသႅၼ်ႈသႂ်လႄႈ ၵူၼ်းမိူင်းၸိူဝ်းယူႇႁိမ်းၼၼ်ႉ တေယၢပ်ႇၵိၼ်း လွင်ႈၼမ်ႉၵိၼ်ၼမ်ႉၸႂ်ႉ။ လိူဝ်ၼၼ်ႉ ၵႆႉမီးလုၵ်ႈဢွၼ်ႇ ၸွမ်းမူႇဝၢၼ်ႈၼၼ်ႉ ၵႂႃႇလဵၼ်ႈၼမ်ႉလႄႈ ၸၢင်ႈမီးၽေးၶဵၼ် တႃႇလုၵ်ႈဢွၼ်ႇ ၸိူဝ်းယူႇသဝ်း ႁိမ်းႁွမ်းၼၼ်ႉထႅင်ႈ ၼႆယဝ်ႉ။

ၸႄႈဝဵင်းၵုၼ်လူင်ၼႆႉ သိုၵ်းၵဝ်ႈၵၢင်ႉ ယိုတ်းဢဝ်လႆႈ မိူဝ်ႈၽႅၼ်ယၼ်ႇသိုၵ်း 1027 ပွၵ်ႈၵမ်းၼိုင်ႈ ၼၼ်ႉသေ တႄႇၵုမ်းၵမ်မႃး ၶၢဝ်းတၢင်းႁိုင်ပီပၢႆယဝ်ႉ။ 

တႅမ်ႈ – ၽူၺ်းၼုမ်ႇ