မိူဝ်ႈဝၼ်းတီႈ 22/03/2025  လူင်ပွင်ၸိုင်ႈမိူင်းၶႄႇ ယူႇၵၢင်ႁဵတ်းၶဵဝ်ပၼ်သေ သိုၵ်းမၢၼ်ႈတင်း သိုၵ်းၵဝ်ႈၵၢင်ႉ ႁူပ်ႉၵၼ်တီႈၶုၼ်ႊမိင်ႊ ၼႂ်းမိူင်းၶႄႇထႅင်ႈ ဢၢၼ်းၶိုင်ၸတ်းပၢင်ႁူပ်ႉထူပ်း ဢုပ်ႇဢူဝ်းၵၼ် ႁိုင်ၶၢဝ်းတၢင်းသၢမ်ဝၼ်း ၼႆယဝ်ႉ။

ၼႂ်းပၢင်ႁူပ်ႉထူပ်းၼၼ်ႉ ဢုပ်ႇဢူဝ်းႁူဝ်ၶေႃႈ လွင်ႈတႃႇၸႅၵ်ႇၽႄၵုမ်းၵမ်ၼႃႈလိၼ်ၵၼ်သေ တင်းသွင်ၾၢႆႇ ၵၢင်ၸႂ်ဢမ်ႇမိူၼ်ၵၼ်လႄႈ ႁဵတ်းႁႂ်ႈပၢင်ဢုပ်ႇဢူဝ်း ယၢႆႈၵႂႃႇၼႂ်းဝၼ်းလဵဝ်။

လႆႈႁူႉဝႃႈ ၾၢႆႇသိုၵ်းမၢၼ်ႈ တုၵ်းယွၼ်း ႁႂ်ႈသိုၵ်းၵဝ်ႈၵၢင်ႉ ထွႆပၼ်ၶိုၼ်း ၼႂ်းၸႄႈဝဵင်းလႃႈသဵဝ်ႈ ၸိူဝ်းၼႃႈ လိၼ်ၵဝ်ႈၵၢင်ႉၵုမ်းၵမ်ဝႆႉတင်းမူတ်းၼႆလႄႈ ႁဵတ်းႁႂ်ႈသိုၵ်းၵဝ်ႈၵၢင်ႉ ဢမ်ႇပဵင်းပေႃးၸႂ်၊ ၾၢႆႇသိုၵ်းၵဝ်ႈၵၢင်ႉသမ်ႉ ၶႂ်ႈဢဝ်ပၼ်ၶိုၼ်း ပွၵ်ႉၼႂ်းဝဵင်းလႃႈသဵဝ်ႈ ၵမ်ႈၽွင်ႈၵူၺ်းၼႆလႄႈ ဢမ်ႇတၼ်းလႆႈ ၶေႃႈတူၵ်းလူင်း ၵၼ်သင်သေ ဢဝ်ပၢင်ဢုပ်ႇဢူဝ်းယၢႆႈၵႂႃႇ ၼႆယဝ်ႉ။

ၵဵဝ်ႇလူၺ်ႈ ၶေႃႈဢုပ်ႇဢူဝ်း ၼႂ်းပၢင်ႁူပ်ႉထူပ်းၼႆႉသေ ၾၢႆႇသိုၵ်းၵဝ်ႈၵၢင်ႉ တေထွႆပၼ်တႄႉယူႇႁိုဝ်ဢမ်ႇၼၼ် တေယုၵ်ႉဢဝ် ပွၵ်ႉယွမ်ႇၼႂ်းဝဵင်းလႃႈသဵဝ်ႈ ၵမ်ႈၽွင်ႈ ယုၵ်ႉပၼ်သိုၵ်းမၢၼ်ႈ ၵုမ်းၵမ် ၵႂႃႇတႄႉယူႇ ႁိုဝ်ၼႆၼၼ်ႉတႄႉ ယင်းပႆႇလႆႈႁူႉတႅတ်ႈတေႃး ၼႆယဝ်ႉ။

ၼင်ႇႁိုဝ် ၽၵ်းတူ ၵၢၼ်ၵႃႉၶၢႆၸွမ်းလႅၼ်လိၼ် တေပိုတ်ႇလႆႈပဵၼ်တၢင်းၵၢၼ်သေ ႁဵတ်းလႆႈလွင်ႈ ၵႃႉၶၢႆ တေႃႇၵၼ်လႆႈၶိုၼ်းမိူၼ်ၵဝ်ႇဝႆးဝႆးၼၼ်ႉ ၾၢႆႇလူင်ပွင်ၸိုင်ႈမိူင်းၶႄႇ မိပ်ႇငႅၼ်းဢီးသူၼ်း သိုၵ်းမၢၼ်ႈ တင်း သိုၵ်းၵဝ်ႈၵၢင်ႉ တင်းသွင်ၸုမ်း တီႈပၢင်ႁူပ်ႉထူပ်း ၼႂ်းလိူၼ်မၢတ်ႊၶျ် ပီ 2025 ၼႆႉ။

ပေႃးသိုၵ်းမၢၼ်ႈတင်း သိုၵ်းၵဝ်ႈၵၢင်ႉ ဢုပ်ႇဢူဝ်းၵၼ်ၶႅမ်ႉလႅပ်ႈ မီးၶေႃႈတူၵ်းလူင်းၵၼ်လီလီၵွၼ်ႇ ၾၢႆႇလူင်ပွင်ၸိုင်ႈမိူင်းၶႄႇ တေတႄႇပၼ်ၶႂၢင်ႉတေႃႉယႃႈယႃ သူင်ႇၸူးၼႂ်းၼႃႈလိၼ် သိုၵ်းၵဝ်ႈၵၢင်ႉၵုမ်းၵမ်ဝႆႉ။ သင်ဢမ်ႇလႆႈၶေႃႈတူၵ်းလူင်းၵၼ်ၸိုင် ၽၵ်းတူၶၢမ်ႈမိူင်းတီႈလႅၼ်လိၼ် ဢၼ်တိတ်းၸပ်းၵၼ်ဝႆႉၼၼ်ႉၵေႃႈ တေသိုပ်ႇဢိုတ်းဝႆႉထႅင်ႈ ၼႆယဝ်ႉ။

ၵွၼ်ႇပႆႇထိုင်ပၢင်ဢုပ်ႇဢူဝ်း လွင်ႈငမ်းယဵၼ် သိုၵ်းမၢၼ်ႈတင်း သိုၵ်းၵဝ်ႈၵၢင်ႉ ၼႂ်းလိူၼ်မၢတ်ႊၶျ်ၼႆႉ ၾၢႆႇလူင်ပွင်ၸိုင်ႈ မိူင်းၶႄႇ ႁွင်ႉဢဝ်ၽူႈၵွၼ်း သိုၵ်းၵဝ်ႈၵၢင်ႉ 4 ၸႄႈတွၼ်ႈ ၵႂႃႇ ႁူပ်ႉထူပ်း ၶိုၵ်ႉၶၵ်ႉ တီႈဝဵင်းၶုၼ်ႊမိင်ႊ ၼႂ်းမိူင်းၶႄႇ။

ယွၼ်ႉၸုမ်းသိုၵ်းတင်းသွင်ၾၢႆႇ ဢုပ်ႇဢူဝ်းၵၼ် ဢမ်ႇလႆႈၶေႃႈတူၵ်းလူင်းသင်ၵၼ်မႃးတႄႉတႄႉလႄႈ ႁဵတ်းႁႂ်ႈၵူၼ်းမိူင်းၼႂ်းပိုၼ်ႉတီႈ ၸိူဝ်းယူႇသဝ်းၸွမ်းၼႃႈလိၼ်သိုၵ်းၵဝ်ႈၵၢင်ႉ ၵုမ်းၵမ်ဝႆႉၼၼ်ႉ မႆႈၸႂ်ၵူဝ် သိုၵ်းမၢၼ်ႈ ဢဝ်ၶိူင်ႈမိၼ်မႃးပွႆႇမၢၵ်ႇသႂ်ႇၶိုၼ်း ၼႆယဝ်ႉ။

ၼႂ်းၶၢဝ်းတၢင်း သိုၵ်းၵဝ်ႈၵၢင်ႉတင်း သိုၵ်းမၢၼ်ႈ ႁူပ်ႉဢုပ်ႇၵၼ်လၢႆလၢႆၵမ်း ဢမ်ႇပႆႇမီးၶေႃႈတႅပ်းတတ်း ပႆႇလႆႈၶေႃႈတူၵ်းလူင်းၵၼ်လီလီၼၼ်ႉ ၾၢႆႇသိုၵ်းၵဝ်ႈၵၢင်ႉၵေႃႈ ၶတ်းၸႂ်ႁႃတဵၵ်းၶၢတ်ႈဢဝ် ဢွင်ႈတီႈ လိၼ် သူၼ်ႁႆႈၼႃး ၵူၼ်းဝၢၼ်ႈ ၼပ်ႉႁူဝ်ႁဵင်ဢေႊၶိူဝ်ႊ ၼႂ်းၼႃႈတီႈဢၼ်ၵုမ်းၵမ်ဝႆႉ ၸူဝ်ႈၶၢဝ်းၼႆ ၵူၼ်းမိူင်း ၸိူဝ်းယူႇသဝ်းၼႂ်းပိုၼ်ႉတီႈ ၵေႃႉၼိုင်ႈ လၢတ်ႈၼႄၽူႈတွႆႇႁွၵ်ႈၼင်ႇၼႆ။

“ၸူဝ်ႈၶၢဝ်းၼႆႉ ႁၼ်သိုၵ်းၵဝ်ႈၵၢင်ႉၶဝ် လႄႇႁႃၶၢတ်ႈသူၼ်၊ တီႈလိၼ် ၸွမ်းဝၢၼ်ႈယူႇ။ ငိၼ်းဝႃႈ ၶဝ်တေ ၽုၵ်ႇၵူၺ်ႈၼႆ။ ႁဝ်းၶႃႈတႄႉ ႁၼ်ထိုင်ဝႃႈ သိုၵ်းၵဝ်ႈၵၢင်ႉၼႆႉ တေဢမ်ႇထွႆငၢႆႈငၢႆႈ ၸိူင်ႉၼင်ႇၶၢဝ်ႇႁူင်လိုဝ်း ယူဝ်ႉၼႆၵႃႈ။ တွၼ်ႈတႃႇ ၵူၼ်းသိုၵ်းၶဝ် တေမီးဢွင်ႈတီႈယူႇ၊ ဢွင်ႈတီႈ ႁဵတ်းၵၢၼ်ၼၼ်ႉ မိူဝ်ႈလဵဝ် ၶဝ်ပေႃး ၼႅတ်ႈတဵၼ်ႈႁႃတဵၵ်းၶၢတ်ႈသူၼ်ၵူၼ်းဝၢၼ်ႈၼႆႉ ဢေႇသုတ်း မၼ်းၼိုင်ႈပီယဝ်ႉလူး။ ယူဝ်ၶႄးၶဝ်တေ လွၼ်ႈၶူဝ်းသိုၵ်းၶဝ်ႁႄ သႂ်ႇၶူဝ်းၵူၼ်းႁိူၼ်းယူႇဝႆႉႁိုဝ်ၼႆ။ ၼႆႉၵေႃႈ ၸၢင်ႈပဵၼ်လႆႈယူႇ။ ယူဝ်ၶႄး ဢဝ်သူၼ် ၵူၺ်ႈႁဵတ်းၼႃႈတိူဝ်ႈႁႄ ပွႆႇၵူၼ်းၶဝ် ဢဝ်တီႈယူႇဝႆႉႁိုဝ် တမ်ႉဢမ်ႇႁူႉ” – ဝႃႈၼႆ။

ဢိင်ၼိူဝ် လွင်ႈသိုၵ်းၵဝ်ႈၵၢင်ႉ ၸွင်ႇမီးၽႅၼ်ၵၢၼ် တေထွႆဢွၵ်ႇၶိုၼ်း တီႈၼႂ်းၸႄႈဝဵင်းလႃႈသဵဝ်ႈ ယူႇတႄႉႁိုဝ် ဢမ်ႇထွႆၼႆၼၼ်ႉ ႁဝ်းၶႃႈ ၸုမ်းၶၢဝ်ႇၽူႈတွႆႇႁွၵ်ႈ ၶတ်းၸႂ်ၵပ်းသိုပ်ႇဢုပ်ႇဢူဝ်း တွင်ႈထၢမ်တူၺ်း ငဝ်းလၢႆးၵၢၼ်တူင်ႉၼိုင် သိုၵ်းၵဝ်ႈၵၢင်ႉ တီႈၵူၼ်းမိူင်းၸိူဝ်းယူႇသဝ်းဝႆႉ ၼႂ်းၸႄႈဝဵင်းလႃႈသဵဝ်ႈလႄႈ သႅၼ်ဝီ။

ၵူၼ်းမိူင်း ၸိူဝ်းယူႇသဝ်းဝႆႉ ၼႂ်းၸႄႈဝဵင်းလႃႈသဵဝ်ႈလႄႈ သႅၼ်ဝီလၢႆလၢႆၵေႃႉၵေႃႈ လၢတ်ႈၼႄဝႃႈ – “ယၢမ်းလဵဝ်တႄႉ တိုၵ်ႉလႆႈႁၼ်သိုၵ်းၶဝ် မီးဝႆႉမိူၼ်ၵဝ်ႇၵူၺ်း ဢမ်ႇပႆႇႁၼ်ပိူင်ႈသင်”- ဝႃႈၼႆ။

ယႃႇဝႃႈ သိုၵ်းၵဝ်ႈၵၢင်ႉ တေထွႆဢွၵ်ႇလႃႈသဵဝ်ႈ ပေႃးထိုင်မႃး ဝၼ်းတီႈ 16 -17/04/2025 ၼႆႉ သိုၵ်းၵဝ်ႈၵၢင်ႉ MNDAA ပၼ်ႁႅင်းဢီး ႁႂ်ႈၵူၼ်းမိူင်းလႃႈသဵဝ်ႈ ၸတ်းပွႆးသွၼ်းၼမ်ႉ ၶိုၵ်ႉယႂ်ႇထႅင်ႈ လူးၵွၼ်ႇ။ မိူဝ်ႈၼႆႉ ဝၼ်းတီႈ 24/03/2025 ၾၢႆႇၽူႈမီးပုၼ်ႈၽွၼ်း ၼႂ်းသိုၵ်းၵဝ်ႈၵၢင်ႉၶဝ် ပေႃးတႄႇႁဵတ်းၶဵင်ႇတၢင်းၵႃႈ တႃႇပွႆးသွၼ်းၼမ်ႉယူႇယဝ်ႉ ဝႃႈၼႆ။

လိူဝ်ၼၼ်ႉ သိုၵ်းၵဝ်ႈၵၢင်ႉ ၸိူဝ်းၵႂႃႇမႃးတူင်ႉၼိုင်ၸွမ်း ႁူဝ်ယ၊ ၼမ်ႉပွင်ႈ၊ လႃႈသဵဝ်ႈ၊ သႅၼ်ဝီ ၸိူဝ်းၼႆႉ ၵေႃႈ တိုၵ်ႉတင်ႈလၢၼ်ႇ ပႂ်ႉၵဵပ်းငိုၼ်းလႄႈ ၵူတ်ႇထတ်းၵူၼ်းၵႂႃႇမႃးၼိူဝ်သဵၼ်ႈတၢင်း မိူၼ်ၵဝ်ႇၵူၺ်း ၼႆယဝ်ႉ။

ၵူၺ်းမိူဝ်ႈၵၢင်လိူၼ်မၢတ်ႊၶျ်ၼၼ်ႉ သိုၵ်းၵဝ်ႈၵၢင်ႉ ပႃးၶိူင်ႈၵွင်ႈၵၢင်ႇ ၸေးမိုဝ်းသေ ၶီႇၵႃးမွၵ်ႈ 10 လမ်းပၢႆ ဢိၵ်ႇတင်း ရူတ်ႉၶိူင်ႈမွၵ်ႈ 6 လမ်း လုၵ်ႉတၢင်းဝဵင်းလႃႈသဵဝ်ႈ မုင်ႈၼႃႈၸူး တၢင်းဝဵင်းသႅၼ်ဝီ ၸိုင်ႈတႆး ပွတ်းႁွင်ႇၵႂႃႇ။

ၵွၼ်ႇပႆႇထိုင်ဝၼ်း သိုၵ်းမၢၼ်ႈတင်း သိုၵ်းၵဝ်ႈၵၢင်ႉ ႁူပ်ႉထူပ်းဢုပ်ႇဢူဝ်းၵၼ်ၼၼ်ႉ မိူဝ်ႈဝၼ်းတီႈ 11/03/2025 ၸွမ်ၸိၵ်းသိုၵ်းမၢၼ်ႈ မိၼ်းဢွင်ႇလၢႆႇ ႁူပ်ႉထူပ်းၵၼ်တင်း တိူင်ႉသျီႊ ၵျုၼ်ႊ (Deng Xijun) ၽွင်းလူင် ၾၢႆႇၼွၵ်ႈမိူင်း တူဝ်တႅၼ်းလူင်ပွင်ၸိုင်ႈမိူင်းၶႄႇ တီႈဝဵင်းလူင်ၼေႇပျီႇတေႃႇ ဢုပ်ႇဢူဝ်းၵၼ် လွင်ႈပၢင်လိူၵ်ႈတင်ႈ ဢၼ်တေၸတ်းၼႂ်းႁၢင်ပီ 2025။

လိူဝ်ၼၼ်ႉ ဢုပ်ႇဢူဝ်းၵၼ်ၵႂႃႇ လွင်ႈငဝ်းလၢႆးၶၵ်ႉၵၢၼ်ငမ်းယဵၼ် ဢၼ်လူင်ပွင်ၸိုင်ႈမိူင်းၶႄႇ ဢွၼ်ၼမ်းၼႃႈ ၶိုင်ပွင်ယူႇၸိူဝ်းၼႆႉလႄႈ လွင်ႈယႃႈမဝ်းၵမ်တင်း လွင်ႈၽဵဝ်ႈမူၺ်ႉ ၵၢၼ်လွၵ်ႇလႅၼ်ၵိၼ်ငိုၼ်း ၼိူဝ် ဢွၼ်ႊလၢႆႊ ဢိၵ်ႇတင်း လွင်ႈၵဵတ်ႉ/ လၢၼ်ႇ ၸွမ်းလႅၼ်လိၼ် ၵၢၼ်ၵႃႉၶၢႆ မိူင်းတေႃႇမိူင်း ၸဵမ်ၸိူဝ်းၼႆႉ ၼႆယဝ်ႉ။

လႆႈႁူႉဝႃႈ ၾၢႆႇလူင်ပွင်ၸိုင်ႈမိူင်းၶႄႇ ၶပ်းၶိုင်ႁၢင်ႈႁႅၼ်းဝႆႉ ႁႂ်ႈသိုၵ်းမၢၼ်ႈတင်း သိုၵ်းတဢၢင်း ႁူပ်ႉဢုပ်ႇၵၼ်ၶိုၼ်း ၼႂ်းႁၢင်လိူၼ်မၢတ်ႊၶျ် ဢမ်ႇၼၼ် ၼႂ်းႁူဝ်လိူၼ်ဢေႊပရိူဝ်ႊ ပီ 2025 ၼႆႉထႅင်ႈ ၼႆယဝ်ႉ။

ဝၢႆးလင် ၽႅၼ်ယၼ်ႇသိုၵ်း 1027 ၼႆႉ လူင်ပွင်ၸိုင်ႈမိူင်းၶႄႇ ယူႇၵၢင်ႁဵတ်းၶဵဝ်ပၼ်သေ သိုၵ်းမၢၼ်ႈတင်း ၸုမ်းဢူၺ်းလီပွတ်းႁွင်ႇ MNDAA၊ TNLA၊ AA ႁူပ်ႉထူပ်းဢုပ်ႇဢူဝ်းၵၼ် ၵဵဝ်ႇၵပ်း လွင်ႈငမ်းယဵၼ်ၼႆႉ မီး ၵႂႃႇ 9 ပွၵ်ႈ။

တႃႇ 5 ပွၵ်ႈတႄႉ သိုၵ်းမၢၼ်ႈတင်း ၸုမ်းဢူၺ်းလီပွတ်းႁွင်ႇ သၢမ်ၸုမ်း ႁူမ်ႈၵၼ်ၵႂႃႇႁူပ်ႉ ဢုပ်ႇတင်း သိုၵ်းမၢၼ်ႈသေတႃႉ ဢမ်ႇလႆႈၶေႃႈတူၵ်းလူင်းသင်ၵၼ်မႃးတႄႉတႄႉ။ ယွၼ်ႉ ၼၼ် ၾၢႆႇလူင်ပွင်ၸိုင်ႈမိူင်းၶႄႇ ၸင်ႇၶိုင်လႅၵ်ႈလၢႆး ၸတ်းပၢင်ႁူပ်ႉထူပ်းၶိုၼ်းသေ ႁွင်ႉဢဝ်ၵမ်းၸုမ်းၸုမ်း ဢုပ်ႇဢူဝ်းၸွမ်း သိုၵ်းမၢၼ်ႈ မႃးထႅင်ႈပွၵ်ႈၼႆႉ ပဵၼ်ၵမ်းထီႉ 4 ယဝ်ႉ ဝႃႈ ၼႆ။

တႅမ်ႈ – ၽူၺ်းၼုမ်ႇ