မိူဝ်ႈဝၼ်းတီႈ 27/5/2026 ယၢမ်းၵၢင်ၼႂ် ၸဝ်ႈၼႃႈတီႈပလိၵ်ႈ လႄႈ ၸုမ်းသိုၵ်းမၢၼ်ႈ တီႉၺွပ်းလႆႈ ၶူဝ်းၵုၼ်ႇ မိူင်းၶႄႇ ဢၼ်လုၵ်ႉတၢင်းဝၢၼ်ႈၼမ်ႉမေႃႇၽႃ ၶဝ်ႈမႃးၼႂ်းသဵၼ်ႈတၢင်းပႃႇရမီႇ ပွၵ်ႉ 1 ဝဵင်းလႃႈသဵဝ်ႈ ဝႃႈၼႆ။

ၶူဝ်းၵုၼ်ႇ ဢၼ်ၶႃႈႁၢပ်ႇၵၢၼ် လူင်ပွင်ၸိုင်ႈသိုၵ်းမၢၼ်ႈ ၼႂ်းဝဵင်းလႃႈသဵဝ်ႈ တီႉလႆႈၼၼ်ႉ ၵိုင်ႇငိုၼ်းမၢၼ်ႈ 600 သႅၼ်ပျႃးပၢႆ ပဵၼ်ၶိူင်ႈၶူဝ်း ၵေႃႇသၢင်ႈႁိူၼ်းယေး လႄႈ ၸႂ်ႉတိုဝ်းၼႂ်း ၵၢၼ်ၵေႃႇသၢင်ႈ တေႃႉဢဝ်တၢင်း မိူင်းၶႄႇၶဝ်ႈမႃး ဢမ်ႇသႂၢင်းၶွၼ်ႇသေ ၶဝ်ႈမႃးၼႂ်းဝဵင်း ။

ၵူၼ်းမိူင်းဝဵင်းလႃသဵဝ်ႈ လၢတ်ႈဝႃႈ “ယႄးၶဝ်ၵိုင်ႉၵၢင်ႉၶဝ်ႈၵူတ်ႇထတ်း ၵၢင်ၼႂ်ၸဝ်ႉ ၶၢဝ်း 3 မူင်းပၢႆ။ သမ်ႉႁၼ် ၵႃးလူင်သွင်လမ်း လုၵ်ႉတၢင်းမဵဝ်ႉသျွင်ႇလၢၼ်း (သဵၼ်ႈတၢင်းလဵပ်ႈဝဵင်း) ၶဝ်ႈမႃးၼႂ်းဝဵင်းႁႄ ႁေႉထတ်းၼၼ်ႉၼႃႇ။ ၵႃႈၶၼ်မၼ်းၼႆႉ ၵိုင်ႇငိုၼ်းမၢၼ်ႈယူႇ 65,935,000 ၼႆဢေႃႈ။ မိူဝ်ႈလဵဝ် ၵူၼ်းႁေႃႈရူတ်ႉသွင်ၵေႃႉၼၼ်ႉ ပလိၵ်ႈၶဝ်တီႉၵႂႃႇယဝ်ႉၶႃႈ။ ၸူဝ်ႈ ၶဝ်လႅၵ်ႈၵူၼ်းၵၼ်ၼႆႉ ၶဝ်ၺွပ်းၶူဝ်းမိူင်းၶႄႇမႃးႁႅင်းတေႉတေႉ။ ၸွမ်းတၢင်းၼႆႉ မိူဝ်ႈလဵဝ် ၶဝ်ပႂ်ႉၺွပ်းၺႃးႁႅင်းၼႃႇ” ဝႃႈၼႆ။

ဝၢႆးလင် မိၼ်းဢွင်ႇလၢႆႇ ၸွမ်ၸိုင်ႈယိုတ်းမိူင်းၶိုၼ်ႈမႃး ၶွတ်ႇၽွတ်ႈလူင်ပွင်ၸိုင်ႈမႂ်ႇယဝ်ႉၼႆႉ ၸႂ်ႉတိုဝ်းၸိုဝ်ႈ ၽႅၼ်ၵၢၼ် ၶူင်းၵၢၼ်လူင်ပွင်ၸိုင်ႈမႂ်ႇ ၶၢဝ်းတၢင်း 100 ဝၼ်းၼၼ်ႉသေ ၶႃႈႁၢပ်ႇၵၢၼ် ၼႂ်းႁွင်ႈၵၢၼ်လူင်ပွင်ၸိုင်ႈ မိူၼ်ၼင်ႇ ပလိၵ်ႈ တင်း သိုၵ်းၸိူဝ်းၼႆႉ ပႂ်ႉၸွမ်းၵဵတ်ႉလၢၼ်ႇ ၸွမ်းသဵၼ်ႈတၢင်းသေ တီႉၺွပ်းဢဝ် ရူတ်ႉၵႃးဢမ်ႇမီးဝႂ်လၢႆႇသိၼ်ႇ၊ ၶူဝ်းၵုၼ်ႇ ၼွၵ်ႈမိူင်း ၸိူဝ်းထုၵ်ႇတေႃႉၶဝ်ႈ ၼႂ်းမိူင်းတႆး လူၺ်ႈဢမ်ႇသႂ်ႇၶွၼ်ႇ ဢမ်ႇၶဝ်ႈတၢင်းၵၢၼ်ၼၼ်ႉမႃး ႁၢဝ်ႈႁႅင်း။

ၵူၼ်းမိူင်းတႆးၼႆႉ ၸဵမ်ၶူဝ်းၵိၼ်လႄႈၶူဝ်းၸႂ်ႉသွႆ သိုဝ်ႉၸႂ်ႉၶူဝ်းမိူင်းထႆးဢမ်ႇၼၼ်ၶူဝ်းမိူင်းၶႄႇၵူၺ်း။ ပေႃးပဵၼ်ၶူဝ်းဢၼ်မိူင်းမၢၼ်ႈႁဵတ်းဢွၵ်ႇ ဢမ်ႇၸႂ်ႉႁိုင်လႆႈလႄႈ ၵမ်ႈၼမ်တေဢမ်ႇ ၸႂ်ႉၶူဝ်းမိူင်းမၢၼ်ႈ။ ၵူၺ်းၵႃႈယၢမ်းလဵဝ် သိုၵ်းမၢၼ်ႈသမ်ႉမႃးႁႄႉၶူဝ်းၼွၵ်ႈမိူင်း ႁၢမ်ႈဢဝ်ၶဝ်ႈၶၢႆတေႃႇ ၵူၼ်းမိူင်းၼႆလႄႈၶူဝ်းၶွင်ဢၼ်ၵူၼ်းမိူင်းၸႂ်ႉယူႇၵူႈဝၼ်းၼႆႉ ဢမ်ႇၸၢင်ႈႁႃသိုဝ်ႉလႆႈတီႈလႂ် – ၵူၼ်းလုၵ်ႉလႅၼ်လိၼ်မိူဝ်း ဢဝ်မိူဝ်းတႃႇၸႂ်ႉတီႈႁိူၼ်းၵူၺ်းၵေႃႈတင်းယၢပ်ႇၽိုတ်ႇ ။