ၵူၼ်းသိုၵ်း PDF လုၵ်ႉထုင်ႉပဵင်း မႃးသိုဝ်ႉမၢၵ်ႇမိုဝ်ႉၸိုၼ်းယၢမ်း ၼႂ်းမိူင်းတႆးပွတ်းႁွင်ႇသေ ၺႃးသိုၵ်းတဢၢင်း တီႉၺွပ်းလႆႈၶိူင်ႈၵွင်ႈၵၢင်ႇလႄႈ ငိုၼ်းၼိုင်ႈႁဵင်သႅၼ်ပျႃးပၢႆ။

ပူၼ်ႉမႃး ဝၼ်းတီႈ 16/03/2025 ယၢမ်းဝၢႆးဝၼ်း 3 မူင်းၶိုင်ႈ သိုၵ်းတဢၢင်း TNLA တီႉၺွပ်းၶိူင်ႈၵွင်ႈၵၢင်ႇ မၢၵ်ႇမိုဝ်ႉၸိုၼ်းယၢမ်း တီႈၵူၼ်းသိုၵ်း PDF ဢၼ်လုၵ်ႉတၢင်းထုင်ႉပဵင်း ၼႂ်းမိူင်းၸႄႈၵႅင်းမႃးသိုဝ်ႉ ၶိူင်ႈၵွင်ႈၵၢင်ႇၼၼ်ႉ တီႉၺွပ်းလႆႈႁိမ်းႁၢၼ်ႉၶၢႆၶဝ်ႈၽၵ်း ဢၼ်မီးတၢင်းၼွၵ်ႈဝဵင်း ၼႂ်းဝဵင်းၵူတ်ႉၶၢႆ ၸႄႈတွၼ်ႈမူႇၸေႊ ၸိုင်ႈတႆးပွတ်းႁွင်ႇ ၼႆယဝ်ႉ။

ၶိူင်ႈၵွင်ႈၵၢင်ႇလႄႈ တင်းၼမ်ငိုၼ်း ဢၼ်ၺႃးသိုၵ်းတဢၢင်း တီႉၺွပ်းဢဝ်ၵႂႃႇၼၼ်ႉ ပႃးၵူၼ်းသိုၵ်း PDF တႃႇ 10 ၵေႃႉ၊ ငိုၼ်းၼိုင်ႈႁဵင်ပၢႆ ပႅတ်ႇသိပ်းသႅၼ်၊ ၶိူင်ႈၸၢၵ်ႈ StarLink ၼိုင်ႈလုၵ်ႈ၊ ၾူၼ်း Mipad ၼိုင်ႈလုၵ်ႈလႄႈ ၶိူင်ႈၵွင်ႈၵၢင်ႇ တင်းၼမ်ၼႆ – ၵူၼ်းၼႂ်းပိုၼ်ႉတီႈ ၸႄႈဝဵင်းၵူတ်ႉၶၢႆ ၵေႃႉၼိုင်ႈ လၢတ်ႈၼႄၽူႈတွႆႇႁွၵ်ႈၼင်ႇၼႆ။  

“ႁၼ်သိုၵ်းလွႆၶဝ် လုမ်ႈလုမ်ႈလၢႆးလၢႆးၵၼ်သေ ၶႃႈၸူးၵႂႃႇယူႇဢမ်ႇၸမ်ဢမ်ႇၵႆ တူၺ်းၼၼ်ႉၼႃႇ။ ငိၼ်းဝႃႈ ပဵၼ်သိုၵ်း PDF ဢၼ်လုၵ်ႉတၢင်းမိူင်းမၢၼ်ႈမႃးသိုဝ်ႉ ၵွင်ႈဝႃႇ မၢၵ်ႇဝႃႇ ၼႆ။ လၢတ်ႈႁဝ်းၵူၼ်းမိူင်းတႄႉ ဝႃႈဢမ်ႇပၼ်ၵႃႉၶၢႆ လၢၵ်ႈၼၢၵ်ႈၼႆဝႃႇ။ ပဵၼ်သိုၵ်းလွႆ ၸိူဝ်းၼႆႉၵူၺ်းၼင်ႇၵဝ်ႇ ၶိုၼ်းသိုဝ်ႉသိုဝ်ႉၶၢႆၶၢႆတေႃႇၵၼ်ယူႇ။ သိုၵ်းလွႆၼႆႉ ယင်းယူႇဝႆႉတီႈႁူင်းပလိၵ်ႈသေ ႁပ်ႉသိုဝ်ႉဢဝ်ၵွၼ်ႇ”- ဝႃႈၼႆ။

လႆႈႁူႉဝႃႈ တီႈၼႂ်းၸႄႈဝဵင်းၵူတ်ႉၶၢႆၼႆႉ သိုဝ်ႉၶိူင်ႈၵွင်ႈၵၢင်ႇလႄႈ မၢၵ်ႇမိုဝ်ႉၸိုၼ်းယၢမ်းလႆႈတီႈ သိုၵ်းၶၢင်၊ သိုၵ်းလွႆ၊ သိုၵ်းၵဝ်ႈၵၢင်ႉ ၸဵမ်ၸိူဝ်းၼႆႉသေ ၾၢႆႇသိုၵ်းတဢၢင်း ပွႆႇပၼ်ၶိုၼ်း ၵူၼ်းသိုၵ်းဢၼ်တီႉၺွပ်းဝႆႉ 10 ၵေႃႉၼၼ်ႉသေတႃႉ ၶိူင်ႈၵွင်ႈၵၢင်ႇတင်း ငိုၼ်းၼပ်ႉႁူဝ်ႁဵင်သႅၼ်တႄႉ ယိုတ်းဢဝ်ဝႆႉမူတ်း ၼႆယဝ်ႉ။  

ဝၢႆးသိုၵ်းတဢၢင်း ပွႆႇပၼ်ၵူၼ်းသိုၵ်း PDF တႃႇ 10 ၵေႃႉ တီႈၸႄႈဝဵင်းၵူတ်ႉၶၢႆၼႆႉယဝ်ႉ ၽွင်းပွၵ်ႈမိူဝ်း ၶိုၼ်းတၢင်းထုင်ႉပဵင်း မိူင်းမၢၼ်ႈၼၼ်ႉ သိုၵ်း PDF 10 ၵေႃႉၼၼ်ႉ ၺႃးသိုၵ်းတဢၢင်း ၸိူဝ်းၵုမ်းၵမ်ဝႆႉ ၼႂ်းၼႃႈတီႈဝဵင်းမၢၼ်ႈတူင်ႈၼၼ်ႉ တီႉၺွပ်းၵႂႃႇထႅင်ႈ မိူဝ်ႈဝၼ်းတီႈ 18/03/2025 ယၢမ်းဝၢႆးဝၼ်းမွၵ်ႈ 3 မူင်း ၼႆယဝ်ႉ။

တႅမ်ႈ – ၽူၺ်းၼုမ်ႇ