မိူဝ်ႈဝႃး ဝၼ်းတီႈ 19/03/2025 ၼႆႉ ႁူဝ်ပဝ်ႈလူင် ၶွင်ႇသီႇဢဝ်ၶိုၼ်းၸိုင်ႈတႆး/ တပ်ႉသိုၵ်းၸိုင်ႈတႆး RCSS/SSA ၸွမ်သိုၵ်းလူင် ယွတ်ႈသိုၵ်းလႄႈ ၸွမ်ႁၢၼ် ၶိူဝ်းငိုၼ်း ၵႅမ်ႁူဝ်ပဝ်ႈ(2) ႁူမ်ႈပႃး လုၵ်ႈၼွင်ႉပွင်ႈပၢႆ ဢိၵ်ႇတင်းသင်ၶၸဝ်ႈလႄႈ ၵူၼ်းမိူင်းပိုၼ်ႉတီႈ ႁူမ်ႈၵၼ်လူႇတၢၼ်းယၢတ်ႇၼမ်ႉ တီႈႁူင်းထမ်းမႂ်ႇ ၵွင်းမူးမူၺ်ႇတေႃႇတိုဝ်ႉလူင် ဢိူင်ႇဝၢၼ်ႈၼွင် ၸႄႈဝဵင်း ၼမ်ႉၸၢင် ၸိုင်ႈတႆးပွတ်းၸၢၼ်း ၼႆယဝ်ႉ။

ထိုင်မႃး ယၢမ်းဝၢႆးဝၼ်း 2 မူင်းပၢႆ ႁူဝ်ပဝ်ႈလူင် ၶွင်ႇသီႇဢဝ်ၶိုၼ်းၸိုင်ႈတႆး/ တပ်ႉသိုၵ်းၸိုင်ႈတႆး RCSS/SSA ၸွမ်သိုၵ်းလူင် ယွတ်ႈသိုၵ်း ႁူပ်ႉထူပ်းသင်ၶၸဝ်ႈလႄႈ ၵူၼ်းမိူင်း ယဝ်ႉ ၵေႃႈ ၸတ်းပႃးပၢင် ပၼ်တၢင်းႁူႉၵူၼ်းမိူင်းထႅင်ႈ ဝႃႈၼႆ။

တီႈၼႂ်းပၢင်ႁူပ်ႉထူပ်းၼၼ်ႉ ၸဝ်ႈသြႃႇဢႃႇလေႃးၵ လႆႈပၼ်ၶေႃႈဢေႃးဝႃႇတၵႂႃႇသေ ၸွမ်သိုၵ်းလူင် ယွတ်ႈသိုၵ်း ပၼ်ၵႂၢမ်းႁူႉ ၵဵဝ်ႇလူၺ်ႈ ထွတ်ႈမျၢတ်ႈသီႇယိူင်ႈလႄႈ ၸွမ်ႁၢၼ် ၶိူဝ်းငိုၼ်း ၵႅမ်ႁူဝ်ပဝ်ႈ လႆႈပၼ်ၵႂၢမ်းႁူႉၵႂႃႇ ၵဵဝ်ႇလူၺ်ႈ ပေႃႇလသီႇ 6 ၶေႃႈ၊ ဢိၵ်ႇတင်း ပၵ်းပိူင်လၵ်းမၢႆတပ်ႉသိုၵ်း၊ ၶူးၸၢႆးၸၢႆးငိုၼ်းသမ်ႉ လႆႈပၼ်ပိုၼ်ႉႁူႉ ၵဵဝ်ႇလူၺ်ႈလွင်ႈၵၢၼ်ဢုပ်ႉပိူင်ႇပိုၼ်ႉတီႈ ၸဵမ်ၸိူဝ်းၼႆႉၵူၺ်းဢမ်ႇၵႃး လုင်းၺူဝ်ႇ ႁူဝ်ပဝ်ႈၶႅၵ်ႇလီပၢင်ၸႃႉ ပရႁိတၼမ်ႉၶူင်း/ ၽူႈၶဝ်ႈၸုမ်းပႃႇတီႇသိူဝ်ၽိူၵ်ႇ/ ၽွင်းၶဵဝ်ၵၢၼ် ငမ်းယဵၼ် 2 တပ်ႉသိုၵ်း လႆႈသပ်းလႅင်းၼႄ လွင်ႈႁဵတ်းၵၢၼ် ၸုမ်းၶႅၵ်ႇလီပၢင် ၸႃႉ ပရႁိတၼမ်ႉၶူင်း လွင်ႈပႃႇတီႇသိူဝ်ၽိူၵ်ႇ ႁၢင်ႈႁႅၼ်းဝႆႉ တႃႇလိူၵ်ႈတင်ႈ ၸဵမ်ၸိူဝ်းၼႆႉ – ႁွင်ႈၵၢၼ်လူင် ပိုၼ်ၽၢဝ်ႇ တႆးလွတ်ႈလႅဝ်း (RCSS/SSA) တႅမ်ႈတၢင်ႇဝႆႉၼင်ႇၼႆ။

တႄႇဢဝ် ႁူဝ်လိူၼ်မၢတ်ႊၶျ် ပီ 2025 ၼႆႉမႃး ၸွမ်သိုၵ်းလူင် ယွတ်ႈသိုၵ်း ႁပ်ႉႁဵတ်းပဵၼ် ၸဝ်ႈတႃႇၼလူင် ပွႆးယၢတ်ႇၼမ်ႉၵျွင်းသွမ်းလႄႈ ပွႆးသၢင်ႇလွင်း ဢၼ်မီးၸၢဝ်းတႆး၊ ၸၢဝ်းပဢူဝ်း ယူႇသဝ်းၸွမ်းၵၼ် ၼႂ်းဝၢၼ်ႈပၢင်တဝိ သၼ်လွႆၵုင်းမၢဝ်း ဢိူင်ႇလွႆလူင် ၸႄႈဝဵင်းလၢင်းၶိူဝ်း။ ၵႂႃႇၶဝ်ႈႁူမ်ႈတီႈပွႆးတၢင်ႇ ထီးၵွင်းမူး တီႈဝၢၼ်ႈတႃႈသၢႆး ဢိူင်ႇဝၢၼ်ႈၽၢႆႇ ဝဵင်းၵႃလီႉ၊ ၵႂႃႇႁူမ်ႈလူႇတၢၼ်းယၢတ်ႇၼမ်ႉ ႁုၼ်ႇႁၢင်ႈၽြႃးၵေႃႇမိူင်း တီႈဝတ်ႉႁူမ်ႈယဵၼ် လွႆၸၢၵ်ႈတေႃႇ ၼွင်ၽႃ ဝဵင်းၶူဝ်လမ် ၸိူဝ်းၼႆႉပႃး ၼႆယဝ်ႉ။