သိုၵ်းၵဝ်ႈၵၢင်ႉ MNDAA တေႃႉဢဝ်ထၢၼ်ႇႁိၼ် ဢၼ်ဢွၵ်ႇၼႂ်းမိူင်းတႆးၼႆႉသေ သူင်ႇၵႂႃႇတၢင်းမိူင်းၶႄႇ ၼိုင်ႈဝၼ်းလႂ် ၵႃးလူင် ဢမ်ႇယွမ်း 20 လမ်း ဝႃႈၼႆ။

ဝၢႆးလင် ၽႅၼ်ယၼ်ႇသိုၵ်း 1027 ဢၼ်သိုၵ်းၵဝ်ႈၵၢင်ႉ ၵုမ်းၵမ်ဝႆႉ ဝဵင်းလႃႈသဵဝ်ႈ၊ သႅၼ်ဝီ၊ ၵုၼ်လူင်၊ လဝ်ႉၵႆႇ (လၢဝ်ႇၵၢႆး) ၼႆႉမႃး ၶဝ်ဢဝ်ရူတ်ႉၵႃးလူင် ဢၼ်မီးပႃးပၢႆႉရူတ်ႉမိူင်းၶႄႇ ၼၼ်ႉ လူင်းမႃးတေႃႉဢဝ်ထၢၼ်ႇႁိၼ် တီႈၶွမ်ႊပၼီႊငူၺ်ႇယီႇပလႄး ၶုတ်းဢွၵ်ႇတၢင်း ဢိူင်ႇၼမ်ႉမ ၸႄႈဝဵင်းသီႇပေႃႉၼၼ်ႉ ဝႃႈၼႆ။

ၸဝ်ႈၵႃး ဢၼ်လႅၼ်ႈတၢင်းလႃႈသဵဝ်ႈ – တူၼ်ႈတီး ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ပဵၼ်ၵႃးလူင် မဵဝ်းပိူၼ်ႈတေႃႉသၢႆးၼၼ်ႉၼေႈ။ တၢင်ႇထၢၼ်ႇႁိၼ်ဢွၵ်ႇမႃးတၢင်းၼမ်ႉမ ဢွၵ်ႇမႃးတၢင်းၼမ်ႉပွင်ႈ ၶဝ်ႈ မႃးၶိုၼ်းတၢင်းလႃႈသဵဝ်ႈၼႆႉ တၢင်ႇမႃးထၢၼ်ႇႁိၼ်ၼႆႉ သမ်ႉပေႃးသူတ်ႇလူင်ဝႆႉ။ ၵႃးၼႆႉ ၶဝ်ႁေႃႈဝႆးထူၼ်ႈယဝ်ႉ။ ၶဝ်ဢမ်ႇဝႄႈၽႂ် မိူဝ်ႈလဵဝ် ႁေႃႈၵႃး ၵိၼ်ၼိူဝ်သဵၼ်ႈတၢင်းၼၼ်ႉ လီၵူဝ်ၼႃႇ။ မီးၽေးၼမ်ၼႃႇ။ မွၵ်ႈၶိုင်ႈၸူဝ်ႈမူင်းၵူၺ်း ၵႃးထၢၼ်ႇႁိၼ်ၼႆႉ လတ်းၵႂႃႇၾၢႆႇၼႃႈၵႃးၶႃႈ မီးမွၵ်ႈ 20 လမ်းၸိူဝ်းၼႆႉၼေႈ”- ဝႃႈၼႆ။

တႃႇဢွၵ်ႇၶၢဝ်းတၢင်း လုၵ်ႉလႃႈသဵဝ်ႈ ၵႂႃႇတူၼ်ႈတီးၼႆႉ တေလႆႈလတ်းၵႂႃႇတၢင်းၼမ်ႉပွင်ႈ – မိူင်းယႆ – ဝၢၼ်ႈ ႁႆး – မိူင်းၼွင် – လၢႆးၶႃႈ – ပၢင်လူင် – ၵျွၵ်ႉတၢၼ်း – တူၼ်ႈတီး ၸိူဝ်းၼႆႉ။

ၵႃးလူင် ဢၼ်တေႃႉတၢင်ႇထၢၼ်ႇႁိၼ်ၼႆႉ လုၵ်ႉဝဵင်းလႃႈသဵဝ်ႈသေ မုင်ႈၼႃႈၵႂႃႇတၢင်းဝဵင်းသႅၼ်ဝီ လတ်းၽၢၼ်ႇၵႂႃႇ တၢင်းၼမ်ႉၸလၢပ်ႈ – ဝဵင်းၼမ်ႉၽႃႈ (ၶျိၼ်းသူၺ်ႇႁေႃႇ) ၼၼ်ႉ ၵူၼ်းဝဵင်းသႅၼ်ဝီ ၵေႃႉၼိုင်ႈ ဢၼ်ႁၼ်ၵႃးထၢၼ်ႇႁိၼ် လၢတ်ႈၼႄတီႈၽူႈတွႆႇႁွၵ်ႈၼင်ႇၼႆ။

“ၸူဝ်ႈသိုၵ်းၵဝ်ႈၵၢင်ႉတႄႇ မႃးဢုပ်ႉၼႆႉယဝ်ႉ ၵႃးတၢင်ႇထၢၼ်ႇႁိၼ်ၼႆႉ တေႃႉလေႃႈတင်းၶိုၼ်းတင်းဝၼ်းယဝ်ႉ။ ၸွမ်းၵဵတ်ႉၸိူဝ်းၼႆႉၵေႃႈ ၶဝ်ဢမ်ႇလူဝ်ႇၵိုတ်းပၼ်ၶၢဝ်ႇ ၸိူင်ႉႁဝ်း ၵူၼ်းမိူင်းသင်။ ၶွင်မၢႆၵႃးၶဝ်ၼႆႉ တႅမ်ႈဝႆႉလိၵ်ႈၶႄႇမူတ်းမူတ်းလႄႇ။ တႃႇဝၼ်းၼိုင်ႈၼႆႉ ၶႃႈတင်ႈၸႂ်ၼင်ႈသေ ပႂ်ႉၼပ်ႉတူၺ်းၼႆ ၵမ်ႉၼိုင်ႈၵူၺ်း လတ်းၵႂႃႇၾၢႆႇၼႃႈၶႃႈ 10 လမ်း ၸိူဝ်းၼႆႉၼေႈ။ ၶဝ်ႁေႃႈဝႆးၼႃႇ လၢႆးႁေႃႈၵႃးၶဝ်ၼႆႉ လီၵူဝ်ထူၼ်ႈယဝ်ႉ။ မႃႇတူၺ်းသၢႆႉတူၺ်းၶႂႃသင်။ မိူဝ်ႈဝၼ်းၼၼ်ႉ ၵႃးတၢင်ႇထၢၼ်ႇႁိၼ် ၽႃႇၺႃးသင်ႇၵႄႇ ႁိမ်းၼွင်ၼၼ်ႉ ၵတ်ႉ ၵႃႈ ၵူၼ်းၶီႇသင်ႇၵႄႇဢမ်ႇတၢႆလႃႈ။ ၽိူဝ်ႇၵူၼ်း ႁေႃႈမၼ်းလူင်းမႃးၼႆ ႁဝ်းဢမ်ႇပွင်ႇၵႂၢမ်းၵၼ်လူင်။ ၵႂၢမ်းတႆး၊ ၵႂၢမ်းမၢၼ်ႈ မႃႇႁူႉသေၶေႃႈ။ တေႃႈၼင်ႇ သိုၵ်းၵဝ်ႈၵၢင်ႉ ၸိူဝ်းၼၼ်ႉမႃးလၢတ်ႈတေႃႇၵေႃႈ ၶဝ်သမ်ႉဢမ်ႇပွင်ႇၵႂၢမ်းၵၼ်။ ပဵၼ်ၶႄႇလူင်ၶႄႇလၢင်တႄႉၼၼ်ႉယဝ်ႉ”- ဝႃႈၼႆ။  

ဝၢႆးသိုၵ်းၵဝ်ႈၵၢင်ႉ ၵုမ်းလႆႈဝႆႉၸႄႈဝဵင်း ၼႂ်းမိူင်းတႆးပွတ်းႁွင်ႇၼႆႉမႃး ၵႃးလူင် မႃးတေႃႉထၢၼ်ႇႁိၼ် သူင်ႇၸူးၵႂႃႇတၢင်းမိူင်းၶႄႇၼၼ်ႉ ၼမ်တီႈသုတ်းယဝ်ႉ ဝႃႈၼႆ။

တႅမ်ႈ – ၽူၺ်းၼုမ်ႇ