မိူဝ်ႈၼႆႉ ဝၼ်းတီႈ 20/03/2025 ၸွမ်းၼင်ႇၾိင်ႈပိူင်ပၵ်းပီယဵမ်ႈဝၼ်း ၾၢႆႇတႆးၶိုၼ် (တႆးယူၼ်း) မႅၼ်ႈဝၼ်းလိူၼ် 5 လွင်ႈ 7 ၶမ်ႈၼႆသေ တႄႇဢဝ်ယၢမ်းၵၢင်ၼႂ် ထိုင်ဝၢႆးဝၼ်း ပဵၼ်ဝၼ်းၵၢတ်ႇၸဝ်ႈၾႃႉ(ႁိုဝ်) ဝၼ်းၵၢတ်ႇၵဝ်ႇ ၸွမ်းၼင်ႇထုင်းၸဝ်ႈၾႃႉ ဢွၼ်ႁဵတ်းမႃး ၶွပ်ႈၶူပ်ႇပီလႂ် ၼိုင်ႈပွၵ်ႈၼၼ်ႉ ပီၼႆႉ ၶွပ်ႈထိုင် 638 ပီသေ ၸတ်းႁဵတ်းတီႈပွၵ်ႉႁူဝ်ၵၢတ်ႇ ဝဵင်းၵဵင်းတုင် ၸိုင်ႈတႆးပွတ်းဢွၵ်ႇၶူင်း မီးၵူၼ်းမႃးသိုဝ်ႉၶၢႆၵိုၼ်းၶွၼ်ႈသတ်ႉၼႅၼ်ႈ ဝႃႈၼႆ။

ၵူၼ်းၵဵင်းတုင် လၢတ်ႈတီႈၽူႈတွႆႇႁွၵ်ႈဝႃႈ – “တႄႇၸဵမ်ၶမ်ႈဝႃး ဝၼ်းတီႈ 19 ၼႆႉမႃး ၵူၼ်းၼႂ်းဝၢၼ်ႈၼႂ်းၶူင်ႇ ဢွၼ်ၵၼ်မႃးႁၢင်ႈႁႅၼ်းၽိူၼ်တၢင်ႇသုမ်ႉသွင်း ႁဵတ်းပဵၼ်ႁၢၼ်ႉတၢင်း ၶၢႆၽႂ်မၼ်းဝႆႉ ပီၼႆႉၵေႃႈ လႆႈဝႃႈႁၢၼ်ႉတၢင်းၶၢႆၼမ်တႄႉတႄႉ။ ဝၼ်းတီႈ 20 မိူဝ်ႈၼႆႉ ယၢမ်းၵၢင်ၼႂ် ၽူႈယႂ်ႇၵူၼ်းလူင်လႄႈ သင်ၶၸဝ်ႈတင်းလၢႆ ယိူင်းၸူးထိုင် ၶႆႇသႅင်ၾၼ်းၶမ်းငိူၼ်ႈၶိူဝ်းၸဝ်ႈၾႃႉ ၸိူဝ်းဢၼ်လႆႈလူႉသဵင်ႈၼွၼ်းၽႄးၵႂႃႇၼၼ်ႉသေ မီးပၢင်ႁႅၼ်းတၢၼ်း ၵၢပ်ႈသွမ်းသင်ၶၸဝ်ႈယဝ်ႉ မီးပႃးၵၢၼ်တွႆႇတိုင်ႈသဵင်တိင်ႇမွင်းဝႅင်း ၵူၼ်းၵႂႃႇမႃးသိုဝ်ႉ ၶၢႆၼႂ်းၵၢတ်ႇလႄႈ ၵူၼ်းမႃးႁူမ်ႈတၢၼ်း ဢဝ်ၵုသူလ်ၵေႃႈ ၵိုၼ်းၶွၼ်ႈတႄႉတႄႉ”- ဝႃႈၼႆ။

ၼင်ႇႁိုဝ် ၾိင်ႈႁိတ်ႈႁွႆးထုင်းတႆး ၼႂ်းပိုၼ်ႉတီႈ တေဢမ်ႇႁၢႆၼႆသေ တႄႇၸဵမ်မိူဝ်ႈဝႃး ဝၼ်းတီႈ 19 ယၢမ်းၵၢင်ၶမ်ႈၼႆႉမႃး ၾၢႆႇႁၢင်ႈၶိူင်ႈပၢင်ပွႆး ၸုမ်းၸၢႆးလူင်ၶဝ်လႄႈ သၢႆသိုပ်ႇမုင်ႉ ႁေႃႁိူၼ်း ၸဝ်ႈၾႃႉၶဝ် ယင်းလႆႈတႆႈတဵၼ်းႁဵင် ႁႅၼ်းတၢၼ်းၸွမ်းၼင်ႇၾိင်ႈထုင်း ၼႂ်းပိုၼ်ႉတီႈ ဝႃႈၼႆ။  

ၸွမ်းၼင်ႇ တၢင်းယုမ်ႇယမ် ၵူၼ်းပိုၼ်ႉတီႈမီးတႄႉ သင်ဝႃႈ လႆႈမႃးၶဝ်ႈၵၢတ်ႇၵဝ်ႇ ၵၢတ်ႇၸဝ်ႈၾႃႉၸိုင် တေယူႇလီၵိၼ်ဝၢၼ်လႄႈ ၵၢၼ်ပၢႆးမၢၵ်ႈမီးၵေႃႈ တေၶႅမ်ႉလႅပ်ႈတိူဝ်းတွၼ်းလိူဝ်ၵဝ်ႇသေ တေၵတ်းယဵၼ်သိူဝ်းသႃႇၵႂႃႇတင်းပီ။

ငိုၼ်းဢၼ်ၵႃႉၶၢႆလႆႈ ၼႂ်းဝၼ်းၵၢတ်ႇၵဝ်ႇသမ်ႉ ဢွၼ်ၵဵပ်းဝႆႉပဵၼ်ငိုၼ်း ပႂ်ႉႁိူၼ်း တႃႇပဵၼ်သုၼ်ႇ မၢၼ်ၵၢၼ်မၢၵ်ႈမီး ၵူၼ်းၶဝ်ႈၵၢတ်ႇသမ်ႉ ဢွၼ်သိုဝ်ႉၵိၼ်ၽၵ်းၵုမ်ႇ ၼႆႉၵေႃႈ ယုမ်ႇယမ်ဝႆႉ ပဵၼ်တႃႇမၢၵ်ႈမီးၵုမ်ႇထူၼ်ႈတင်းပီသေ သင်လႆႈၵိၼ်ၼေႃႇသမ်ႉ လွင်ႈၶိုၼ်ႈယႂ်ႇ တေႁုၼ်ႈမုၼ်း ဝႃႈၼႆ။

ဝၼ်းၵၢတ်ႇၵဝ်ႇ ဝဵင်းၵဵင်းတုင်ၼႆႉ မိူဝ်ႈပီၶရိတ်ႉ 1930 ၸဝ်ႈၵွၼ်ႈၵႅဝ်ႈ ဢိၼ်းထလႅင် ပူင်ဝႃႈ ၵၢတ်ႇၵဝ်ႇၼႆႉ မၼ်းၵႅပ်ႈၼႆသေ ၸင်ႇၶၢႆႉၵႂႃႇႁဵတ်းၵၢတ်ႇထႅင်ႈ တီႈၼိုင်ႈ ဢၼ်ပဵၼ်ၵၢတ်ႇလူင် ဝဵင်းၵဵင်းတုင် ယၢမ်းလဵဝ်ၼႆႉသေ တႄႇၶၢႆႉၵၢတ်ႇတီႈၵဵင်းတုင် မိူဝ်ႈပီ 1936 ။ ဝၢႆးၼႆႉမႃး ၼင်ႇႁိုဝ် ထုင်းတေဢမ်ႇႁၢႆၼၼ်ႉ ၶိုၼ်းမႃးၶၢႆတီႈၵၢတ်ႇၵဝ်ႇၶိုၼ်း ၼိုင်ႈပီၼိုင်ႈပွၵ်ႈသေ ႁိၵ်ႈၸိုဝ်ႈဝႃႈ ဝၼ်းၵၢတ်ႇၵဝ်ႇ ၵၢတ်ႇၸဝ်ႈၾႃႉမႃး တေႃႇထိုင်ဝၼ်းမိူဝ်ႈၼႆႉ။