ၼႂ်းလိူၼ်မၢတ်ႊၶျ် ဝူင်ႈထီႉသွင်ၼႆႉမႃး ၾၢႆႇၸဝ်ႈၼႃႈတီႈ သိုၵ်းၵဝ်ႈၵၢင်ႉ ႁွင်ႉဢဝ်ၵၢင်ႉၵႄႇ ၼႂ်းၸႄႈဝဵင်းသႅၼ်ဝီ ဢုပ်ႇဢူဝ်း ယွၼ်းႁႂ်ႈၵဵပ်းပၼ်ၵူၼ်း တႃႇႁဵတ်းသိုၵ်းမႂ်ႇ ဝႃႈၼႆ။
ၼိုင်ႈဝၢၼ်ႈလႂ် တေလႆႈႁႃၵူၼ်းပၼ် တႃႇသၢမ်ၵေႃႉသေ တေလႆႈပဵၼ်ၵူၼ်းၼုမ်ႇသႅၼ်း ဢႃယု 16 ပီ တေႃႇထိုင် 45 ပီ။ ဢၼ်သိုၵ်းၵဝ်ႈၵၢင်ႉ ႁႂ်ႈၵဵပ်းပၼ်ၵူၼ်းမႂ်ႇ တႃႇၶဝ်ႈႁၢပ်ႇထၢမ်း ၵၢၼ်သိုၵ်းၼၼ်ႉ ပွၵ်ႈၼႆႉ ပဵၼ် ပွၵ်ႈၵမ်းသွင်ယဝ်ႉ – ၵူၼ်းသႅၼ်ဝီ ၵေႃႉၼိုင်ႈ လၢတ်ႈၼႄၽူႈတွႆႇႁွၵ်ႈၼင်ႇၼႆ။
“ပွၵ်ႈပူၼ်ႉၵေႃႈ ၶဝ်ၶႂ်ႈလႆႈၵူၼ်းၼႆသေ ၼိုင်ႈဝၢၼ်ႈၼႆႉ ႁဝ်းလႆႈႁႃပၼ်ၵႂႃႇ ဢေႇသုတ်း ႁႂ်ႈပေႃးလႆႈသွင်ၵေႃႉ။ ဝၢႆးၼၼ်ႉဝႃႈ ၶဝ်တေဢမ်ႇၵဵပ်း ဢမ်ႇယွၼ်းထႅင်ႈယဝ်ႉၼႆ ၵမ်းၼႆႉသမ်ႉ ၶိုၼ်းႁွင်ႉပၢင်ၵုမ်သေ ၸႂ်ႉ ႁႃပၼ်ၵူၼ်းၶဝ်ထႅင်ႈ။ ပေႃးႁဝ်း ဢမ်ႇႁႃပၼ်ၶဝ်သမ်ႉ ၶဝ်တေမႃးႁႃၺွပ်းဢဝ် ၼႂ်းဝၢၼ်ႈႁင်းၵူၺ်းၼႃႇ။ ပေႃးပဵၼ်ၼၼ် ၵူၼ်းဝၢၼ်ႈႁဝ်းယိင်ႈၶႅၼ်း ၵိၼ်း။ ၵွပ်ႈၼၼ် ၵႃႈလႆႈႁႃပၼ်ႁႂ်ႈပေႃးလႆႈဢိူဝ်ႈ”- ဝႃႈၼႆ။
ယွၼ်ႉသိုၵ်းၵဝ်ႈၵၢင်ႉ ၵဵပ်းသိုၵ်း ယွၼ်းႁႂ်ႈၸတ်းၵၢၼ် ႁႃပၼ်ၵူၼ်းၼုမ်ႇတိၵ်းတိၵ်းလႄႈ ၵူၼ်းၼုမ်ႇ ၵမ်ႈၼမ် ၸိူဝ်းယူႇၼႂ်းဝဵင်းသႅၼ်ဝီ လႆႈပၢႆႈဢွၵ်ႇဝဵင်း ၵႂႃႇယူႇတၢင်ႇတီႈလႄႈ ၼႂ်းဝၢၼ်ႈၵိုတ်းၵူၼ်းၶၢဝ်ႉၵူၼ်းၵႄႇ တႃႇယူႇပႂ်ႉႁိူၼ်းၵူၺ်း ၼႆယဝ်ႉ။
လႆႈႁူႉဝႃႈ ၵူၼ်းမိူင်းၸိူဝ်းၺႃး သိုၵ်းၵဝ်ႈၵၢင်ႉ ၶၢၼ်းၵႂႃႇႁဵတ်းသိုၵ်း ပွၵ်ႈၵမ်းဢွၼ်တၢင်းၼႆႉ ဢမ်ႇလႆႈငိုၼ်း လိူၼ်တဵမ်ထူၼ်ႈလႄႈ ယၢပ်ႇၽိုတ်ႇၵၢၼ်ႁႃၵိၼ်လဵင်ႉၼႂ်းၼႃႈႁိူၼ်း ၼႆယဝ်ႉ။
“မိူဝ်ႈတႄႇတႄႉဝႃႈ တေပၼ်ငိုၼ်း ၼိုင်ႈလိူၼ် 500 ငိုၼ်းၶႄႇဝႃႇ။ ၽိူဝ်ႇႁႃၵူၼ်းသူင်ႇပၼ် ၸွမ်းၼင်ႇၶဝ် ယွၼ်းၼၼ်ႉ ၶဝ်သမ်ႉဢမ်ႇပၼ်ငိုၼ်းလိူၼ်တဵမ်လႄႇ။ ပိူၼ်ႈၵေႃႈ မီးၼႃႈ ႁိူၼ်းတႃႇလဵင်ႉလူး။ မိူဝ်ႈလဵဝ် သမ်ႉ လူတ်းငိုၼ်းလိူၼ်လူင်း တိၵ်းတိၵ်း။ တႃႇလဵင်ႉၼႃႈႁိူၼ်းပေႃးဢမ်ႇၵုမ်ႇ။ မၢင်ပွၵ်ႈ ၵူၼ်းတၢင်းႁိူၼ်း ယင်းလႆႈသူင်ႇပၼ်ၶိုၼ်းၵွၼ်ႇ။ ယွၼ်းဢွၵ်ႇ ၵေႃႈ ဢမ်ႇပၼ်ဢွၵ်ႇ”- ၵူၼ်းပိုၼ်ႉတီႈ ဝဵင်းသႅၼ်ဝီ သိုပ်ႇ လၢတ်ႈၼႄၼင်ႇၼႆ။
ၵူၼ်းမိူင်း ၼႂ်းၸႄႈဝဵင်းသႅၼ်ဝီ ၸိူဝ်းၺႃး သိုၵ်းၵဝ်ႈၵၢင်ႉ တီႉၺွပ်းၵႂႃႇႁဵတ်းသိုၵ်းၼၼ်ႉ မၢင်ၸိူဝ်း ၺႃးသိုၵ်းၵဝ်ႈၵၢင်ႉ တဵၵ်းတဵင်မိပ်ႇဢီး ၸႂ်ႉႁဵတ်းၵၢၼ်ႁႅင်းၼႃႇသေ ဢမ်ႇၶၢမ်ႇလႆႈလႄႈ ၸင်ႇပၢႆႈဢွၵ်ႇတပ်ႉ ၸိူဝ်းၼၼ်ႉၵေႃႈမီး ၼႆယဝ်ႉ။
လႆႈႁူႉဝႃႈ ၵူၼ်းၸိူဝ်းပၢႆႈဢွၵ်ႇတပ်ႉမႃးၼၼ်ႉ သိုၵ်းၵဝ်ႈၵၢင်ႉ ၸွမ်းႁႃၺွပ်းဢဝ်ၵႂႃႇၶိုၼ်းသေ ၵႂႃႇပၼ် တၢမ်ႇႁၢဝ်ႈႁႅင်း။ ၸွမ်းၼင်ႇ ပိူင်ၵၢၼ်သိုၵ်းမီးသေ ထိုင်ၸမ်တၢႆယဝ်ႉ ၸင်ႇဢဝ်မႃးသူင်ႇပၼ်တီႈႁိူၼ်း ၶိုၼ်းၼႆ – ၵူၼ်းပိုၼ်ႉတီႈ ၼႂ်းၸႄႈဝဵင်းသႅၼ်ဝီ ႁူႉႁၼ်ၸွမ်းလွင်ႈပိူင်ပဵၼ်တႄႉ လၢတ်ႈၼႄတီႈၸုမ်းၶၢဝ်ႇၽူႈတွႆႇႁွၵ်ႈ ၼင်ႇၼႆ။
“ၵူၼ်းဢၼ်ၶဝ်ၺွပ်းၵႂႃႇ ႁဵတ်းသိုၵ်းၼၼ်ႉ လၵ်ႉပၢႆႈမႃးႁိူၼ်းသေ ၶဝ်ၶိုၼ်းမႃးၺွပ်းၵႂႃႇ ထိုင်တီႈၼၢဝ် ပဵၼ်ၵိၼ်ႁႅင်း။ ၶဝ်ဢဝ်မႃးသူင်ႇတီႈႁိူၼ်း။ ၵူၼ်းတီႈႁိူၼ်း ဢဝ်ၵႂႃႇၶိုၼ်ႈႁူင်းယႃ တမ်ႉဢမ်ႇတၼ်းထိုင်ဝူင်ႈၵေႃႈ သမ်ႉပေႃးတၢႆယဝ်ႉ။ ၽိူဝ်ႇၵႂႃႇလၢတ်ႈၶဝ် တီႈႁူင်းပလိၵ်ႈ (ရဲစခန်း) ၶဝ်တွပ်ႇဝႃႈ ဢမ်ႇၸႂ်ႈၵူၼ်းၶဝ်ၼႆဝႃႇ။ ပွႆႇမၼ်းပႅတ်ႈယဝ်ႉ။ သိုၵ်းၵဝ်ႈၵၢင်ႉၼႆႉ ၵႅၵ်းတႄႉဢိူဝ်ႈ”- ဝႃႈၼႆ။
မိူဝ်ႈသိုၵ်းၵဝ်ႈၵၢင်ႉ တႄႇၵုမ်းၵမ်လႆႈ ဝဵင်းသႅၼ်ဝီၼၼ်ႉ ပိုၼ်ၽၢဝ်ႇဢွၵ်ႇဝႆႉဝႃႈ လိူဝ်သေ ၸၢဝ်းၶိူဝ်းၵဝ်ႈၵၢင်ႉ တေဢမ်ႇၵဵပ်းသိုၵ်းၼႆသေ ႁူၺ်းဢဝ်ၵူၼ်းမိူင်း ပွၵ်ႈမိူဝ်းယူႇႁိူၼ်းၽႂ်မၼ်းၶိုၼ်း။ ဢေႇသုတ်း ႁိူၼ်းၼိုင်ႈလင်ၼႆႉ ႁႂ်ႈမီးၵူၼ်းယူႇဝႆႉ ၼိုင်ႈၵေႃႉ ၼႆယဝ်ႉ။
တႅမ်ႈ – ၽူၺ်းၼုမ်ႇ
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ