လိူၼ်ဢေႊပရိူဝ်ႊ ဝၼ်းတီႈ 14 ၼႆႉ ပဵၼ်ဝၼ်းသၢင်းၵျၢၼ်ႇတူၵ်း။ ပီၼႆႉ ငဝ်းလၢႆးၵၢၼ်သိုၵ်းပႆႇၼိမ် – ၶႂ်ႈဝႃႈ ပိုတ်းယိုဝ်းၵၼ်ယူႇပတ်းပိုၼ်ႉၸိုင်ႈမိူင်း။ ၵူၺ်းၵႃႈ ဢွင်ႈတီႈ ဢၼ်သိုၵ်းမၢၼ်ႈၵုမ်းဝႆႉၵေႃႈလီ၊ တီႈဢၼ်သိုၵ်းၸၢဝ်းၶိူဝ်း ၵုမ်းလႆႈဝႆႉၵေႃႈယႃႇ၊ ၽႂ်ၵေႃႈၶႂ်ႈၼႄၾၢင်ႁၢင်ႈဝႃႈ ၸဝ်ႈၵဝ်ႇၵုမ်းလႆႈလီ၊ ဝၢၼ်ႈမိူင်းၵတ်းယဵၼ် ဢမ်ႇမီးၶဵၼ်၊ ၵူၼ်းမိူင်းယူႇမူၼ်ႈသိူဝ်းသႃႇ – ၼႆႁင်းၽႂ်မၼ်း။ 

တီႈဝဵင်းလႃႈသဵဝ်ႈ ၸိုင်ႈတႆးပွတ်းႁွင်ႇၼႆႉ ပဵၼ်ဝဵင်းဢၼ်လႅဝ်ၽႅဝ်ႉ ယွၼ်ႉပၢင်တိုၵ်းၼၼ်ႉၵေႃႈ တေႃႇထိုင်ယၢမ်းလဵဝ် ၵူၼ်းမိူင်းပႆႇၸၢင်ႈပွၵ်ႈယူႇၶိုၼ်းႁိူၼ်းယေးၸဝ်ႈၵဝ်ႇတင်းမူတ်းသေတႃႉ သိုၵ်းၵဝ်ႈၵၢင်ႉတႄႉ ၶႂ်ႈၼႄဝႃႈ ဝၢၼ်ႈမိူင်းၵတ်းယဵၼ် ၵူၼ်းမိူင်းၽွမ်ႉယူႇၸွမ်းၶဝ်ယဝ်ႉၼႆသေ ပၼ်ႁႅင်းဢီးႁႂ်ႈ ၵူၼ်းမိူင်းၸတ်းပွႆးသွၼ်းၼမ်ႉၶိုၵ်ႉယႂ်ႇ ဝႃႈၼႆ။

ပူၼ်ႉမႃး မိူဝ်ႈလိူၼ်ၵျႅၼ်ႊၼိဝ်ႊရီႊ ပီ 2025 ၼႆႉ သိုၵ်းၵဝ်ႈၵၢင်ႉတင်း သိုၵ်းမၢၼ်ႈ ႁူပ်ႉဢုပ်ႇဢူဝ်းၵၼ် လွင်ႈငမ်းယဵၼ် တီႈဝဵင်းၶုၼ်ႊမိင်ႊ မိူင်းၶႄႇ။ ဝၢႆးလင်ၼၼ်ႉ ဢမ်ႇႁိုင်မီးၶၢဝ်ႇလိုဝ်းဢွၵ်ႇမႃးဝႃႈ ၾၢႆႇ လူင်ပွင်ၸိုင်ႈၶႄႇ မိပ်ႇဢီး ႁႂ်ႈသိုၵ်းၵဝ်ႈၵၢင်ႉ ထွႆဢွၵ်ႇပၼ်ၶိုၼ်း ဝဵင်းလႃႈသဵဝ်ႈ ၵမ်းၸုပ်ႈၸုပ်ႈ တေႃႇထိုင် လိူၼ်ၵျုၼ်ႊသဵင်ႈ ဝႃႈၼႆ။

လႆႈႁူႉဝႃႈ ၵွၼ်ႇပႆႇထိုင်ပၢင်ဢုပ်ႇဢူဝ်း လွင်ႈငမ်းယဵၼ် သိုၵ်းမၢၼ်ႈတင်း သိုၵ်းၵဝ်ႈၵၢင်ႉ ၼႂ်းလိူၼ်မၢတ်ႊၶျ်ၼႆႉ ၾၢႆႇလူင်ပွင်ၸိုင်ႈ မိူင်းၶႄႇ ႁွင်ႉဢဝ်ၽူႈၵွၼ်း သိုၵ်းၵဝ်ႈၵၢင်ႉ 4 ၸႄႈတွၼ်ႈ ၵႂႃႇႁူပ်ႉထူပ်း ၶိုၵ်ႉၶၵ်ႉ တီႈဝဵင်းၶုၼ်ႊမိင်ႊ ၼႂ်းမိူင်းၶႄႇ ဝႃႈၼႆထႅင်ႈ။

မိူဝ်ႈဝၼ်းတီႈ 10/03/2025 ၼႆႉသမ်ႉ သိုၵ်းၵဝ်ႈၵၢင်ႉ MNDAA ပႃးၶိူင်ႈၵွင်ႈၵၢင်ႇ ၸေးမိုဝ်းသေ ၶီႇၵႃးမွၵ်ႈ 7 လမ်း လုၵ်ႉတၢင်းဝဵင်းလႃႈသဵဝ်ႈ မုင်ႈၼႃႈၸူး တၢင်းဝဵင်းသႅၼ်ဝီ ၸိုင်ႈတႆးပွတ်းႁွင်ႇလႄႈ ၵူၼ်း မိူင်းဢွၼ်ၵၼ် ထၢင်ႇထိူမ် လၢႆလွင်ႈ။ မၢင်ၸိူဝ်းၵေႃႈဝႃႈ သိုၵ်းၵဝ်ႈၵၢင်ႉ ထွႆဢွၵ်ႇလႃႈသဵဝ်ႈ ၊ မၢင်ၸိူဝ်း ၵေႃႈဝႃႈ သိုၵ်းၵဝ်ႈၵၢင်ႉ ၶၢႆႉလၢႆႈတီႈယူႇၵၼ်။

ၵူၼ်းလႃႈသဵဝ်ႈ ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “မၼ်းပႆႇထွႆၼႃ။ ဢၼ်ၶဝ်ၶိုၼ်ႈၵႂႃႇၼၼ်ႉ ၶဝ် လၢႆႈၵူၼ်းၶဝ်ၵူၺ်း။ ၵူၼ်းမိူင်းသမ်ႉ ဢမ်ႇႁူႉတီႈပွင်ႇမၼ်းသေ ပေႃးဝႃႈ ႁၼ်ပိူၼ်ႈၵႂႃႇၵေႃႈဝႃႈ ၶဝ်ထွႆ ၼႆ။ မၼ်းပႆႇထွႆၶႃႈ။ မၼ်းပႆႇပိူင်ႈသေတီႈ။ လူဝ်ႇပႂ်ႉတူၺ်းမွၵ်ႈ လိူၼ်ထူၼ်ႈ 6 ပုၼ်ႉၵွၼ်ႇ ၸင်ႇတေၸၢင်ႈႁူႉလွင်ႈလႅၵ်ႈလၢႆႈၶဝ်။ မိူၼ်ၼင်ႇ ၸိူဝ်းႁူဝ်ယလႄႈသင် ဢၼ်လုၵ်ႉတၢင်းၼမ်ႉလၼ်ႈမႃး ဢမ်ႇၼၼ် တၢင်းၼွင်ဢၢင်ႇပုၼ်ႉၼၼ်ႉ ၶဝ်တိုၵ်ႉၶုတ်းလုၵ်း ၶုတ်းတီႈသိူင်ႇတီႈႁႄႉၶဝ်ယူႇ”- ဝႃႈၼႆ။  

ယႃႇဝႃႈ သိုၵ်းၵဝ်ႈၵၢင်ႉ တေထွႆဢွၵ်ႇလႃႈသဵဝ်ႈ ထိုင်မႃး ဝၼ်းတီႈ 16 -17/03/2025 ၼႆႉ သိုၵ်းၵဝ်ႈၵၢင်ႉ MNDAA တိုၵ်ႉႁွင်ႉ ၵူၼ်းမိူင်းလႃႈသဵဝ်ႈႁူပ်ႉထူပ်းသေ ပၼ်ႁႅင်းဢီးႁႂ်ႈၸတ်းပွႆးသွၼ်းၼမ်ႉၶိုၵ်ႉယႂ်ႇၼႆ ထႅင်ႈလူးၵွၼ်ႇ။

ၼႂ်းပၢင်ဢုပ်ႇဢူဝ်းၼၼ်ႉ ၽူႈမီးၸၼ်ႉ ၼႂ်းသိုၵ်း MNDAA လၢႆၵေႃႉလႄႈ ၸုမ်းတူင်ႇၵူၼ်း သင်ၶၸဝ်ႈ ၼႂ်းလႃႈသဵဝ်ႈလႄႈ တူဝ်တႅၼ်းၸၢဝ်းၶိူဝ်း ဢၼ်မီးၼႂ်းဝဵင်းလႃႈသဵဝ်ႈ ၸိူဝ်းၼႆႉ သိုၵ်းၵဝ်ႈၵၢင်ႉ ႁွင်ႉႁူပ်ႉ ထူပ်း ဢုပ်ႇဢူဝ်းၸွမ်း။

Li Xinhai ၵေႃႉဢၼ် MNDAA မၵ်းမၼ်ႈဝႆႉပဵၼ် ၽူႈၶဝ်ႈၸုမ်း ၶွမ်ႊမတီႊ ၾၢႆႇၽွင်းငမ်းသိုၵ်းဝဵင်းလႃႈ သဵဝ်ႈ လၢတ်ႈၵႂႃႇ ၼႂ်းပၢင်ႁူပ်ႉထူပ်းၼႆႉဝႃႈ – “ပွႆးသွၼ်းၼမ်ႉၼႆႉ ပဵၼ်ၾိင်ႈ ဢၼ်လမ်ႇလွင်ႈတႃႇဝၢၼ်ႈ မိူင်းႁဝ်းပိူင်ၼိုင်ႈ။ ယွၼ်ႉၼၼ်လႄႈ ယူႇတီႈ MNDAA သေ ဝႆႉၼမ်ႉၼၵ်းၼိူဝ်ၾိင်ႈၵူႈၸၢဝ်းၶိူဝ်းယူႇ။ ႁႂ်ႈဢွၼ်ၵၼ် ႁူမ်ႈၸတ်းၶိုၵ်ႉတွၼ်း”- ဝႃႈၼႆဝႆႉ။

သိုၵ်းၵဝ်ႈၵၢင်ႉတႄႉ ၼႄၶေႃႈဢၢင်ႈဝႃႈ ၼႂ်းၶၢဝ်းသၢင်းၵျၢၼ်ႇၼႆႉ ၼင်ႇႁိုဝ် တေၵိုၼ်းၶွၼ်ႈလႄႈ လွတ်ႈၽေးၼၼ်ႉ ၸင်ႇႁွင်ႉၵူၼ်းမိူင်းႁူပ်ႉထူပ်းၼႆယူႇ။

ၸဵမ်မိူဝ်ႈပၢင်တိုၵ်းယဵၼ်သေ ၼႂ်းဝဵင်းလႃႈသဵဝ်ႈၼႆႉ ၸိူဝ်းပွၵ်ႈယူႇသဝ်းၶိုၼ်းၵေႃႈမီး တင်းၼမ်။ ၵူၺ်းၵႃႈ ၼႂ်းၼၼ်ႉ ၸိူဝ်းပဵၼ်ၸၢဝ်းၶႄႇၵူၼ်းမၢၵ်ႈၵူၼ်းမီးၸိူဝ်းၼႆႉတႄႉ ဢမ်ႇႁၼ်ပွၵ်ႈယူႇၶိုၼ်း။ ၼႂ်းဝဵင်း လႃႈသဵဝ်ႈၼႆႉ ၵူၼ်းမိူင်း ဢၼ်ယူႇၸွမ်းၵၼ် မီးဢမ်ႇယွမ်း 10 ၸၢဝ်းၶိူဝ်း။ ၵူၺ်းၵႃႈ ဢၼ်ယၢမ်ႈတူင်ႉ ၼိုင်လိၵ်ႈလၢႆးလႄႈၾိင်ႈငႄႈၼႆႉ ၵမ်ႈၼမ်ပဵၼ်တႆး ၵူၺ်းလႄႈ လူဝ်ႇၸတ်းပွႆးသင်ၵေႃႈ ဢုပ်ႇဢူဝ်း ၵေႃလိၵ်ႈလၢႆးလႃႈသဵဝ်ႈ။

တႃႇၸတ်းပွႆးသွၼ်းၼမ်ႉ ဢၼ်တေထိုင်ၼႆႉၵေႃႈ သိုၵ်းၵဝ်ႈၵၢင်ႉ လႆႈႁူပ်ႉဢုပ်ႇၵၼ်တင်း ၵေႃလိၵ်ႈလၢႆးလႄႈ ၾိင်ႈငႄႈတႆး ၵူၺ်းၼင်ႇၵဝ်ႇ။

ၸဵမ်မိူဝ်ႈ ၸုမ်းဢူၺ်းလီပွတ်းႁွင်ႇ 3 ၸုမ်း တႄႇၽႅၼ်ယၼ်ႇသိုၵ်း 1027 သေ လေႃႇတိုၵ်းသိုၵ်းမၢၼ်ႈ လႃႈသဵဝ်ႈၼႆႉ ၵေႃလိၵ်ႈလၢႆးတႆးၵေႃႈ ဢမ်ႇၸၢင်ႈပၼ်ႇၵၢၼ်သင်မႃး။ ဝၢႆးသေ သိုၵ်းၵဝ်ႈၵၢင်ႉ ပိုၼ် ၽၢဝ်ႇၵုမ်းယဝ်ႉသေ ထိုင်မႃး ဝၼ်းတီႈ 01/03/2025 ၼႆႉ ၸင်ႇပိုတ်ႇႁူင်းၵေႃလိၵ်ႈလၢႆးၶိုၼ်း။ ၵေႃလိၵ်ႈလၢႆးၼႆႉ ယွၼ်ႉဢမ်ႇၸႂ်ႈပႃႇတီႇ ဢမ်ႇၸႂ်ႈတပ်ႉသိုၵ်းသင်လႄႈ ပဵၼ်ႁိုဝ်မႃးၵေႃႈ တၵ်းတေလႆႈတူင်ႉ ၼိုင်ႈတႃႇဝၢၼ်ႈမိူင်းယူႇၼႆ ၵူၼ်းလႃႈသဵဝ်ႈ ၵေႃႉၼိုင်ႈ လၢတ်ႈၼႄဝႆႉၼင်ႇၼႆ –

“ၽႂ်မႃးဢုပ်ႉဢုပ်ႉ ၶႄႇၵေႃႈယဝ်ႉ ဢမေႊရိၵၼ်ႊမႃးဢုပ်ႉၵေႃႈယဝ်ႉ တိုၼ်းလူဝ်ႇလႆႈပိုတ်ႇပၼ်ႇၵၢၼ်ယဝ်ႉ။ ႁဝ်းလူဝ်ႇလႆႈႁဵတ်းတီႈႁဝ်းတွမ်ၵၼ်။ ၸင်ႇၼၼ်လႄႈ ၸင်ႇဢွၼ်ၵၼ်ပိုတ်ႇၶိုၼ်း။ ယွၼ်ႉ ပိူဝ်ႈၸိူင်ႉၼၼ်လႄႈ ၵဝ်ႈၵၢင်ႉၶဝ်ၼႆႉ ပေႃးၶဝ်လူဝ်ႇႁဵတ်းပွႆးသင်ၵေႃႈ ၶဝ်မႃးဢုပ်ႇတီႈၵေႃလိၵ်ႈလၢႆး တႆးယူႇၵူၺ်း။ ဢၼ်တႃႇႁဵတ်းပွႆး သွၼ်းၼမ်ႉၸိူဝ်းၼႆႉ။ ဢၼ်မၵ်းမၼ်ႈပၼ်တီႈမၼ်းၸိူဝ်းၼႆႉၵေႃႈ ယူႇတီႈ ၵေႃႈလိၵ်ႈလၢႆးသေ မၵ်းမၼ်ႈၵႂႃႇၵူၺ်း။ ၶဵင်ႇမူၼ်ႈသိူဝ်း ဢၼ်ယႂ်ႇယႂ်ႇမၼ်း ပီၼႆႉ တေႁဵတ်းတီႈ ႁူင်းႁေႃဝဵင်းလႃႈသဵဝ်ႈၼၼ်ႉ ဢၼ်ဝႃႈၼၼ်ႉၵေႃႈ ပဵၼ်ၵေႃလိၵ်ႈလၢႆးမၵ်းမၼ်ႈပၼ်ၶဝ်ၵူၺ်း”- ဝႃႈၼႆ။

လိူဝ်သေ ဢုပ်ႇဢူဝ်းတႃႇ ၸတ်းပွႆးသွၼ်းၼမ်ႉယဝ်ႉ ဢုပ်ႇဢူဝ်းပႃး တႃႇတေၸတ်းပၢင်တိူင်ႇၵၢဝ်ႇ ယွၼ်းသူးပၼ် ၵူၼ်းမိူင်းလႃႈသဵဝ်ႈ ၸိူဝ်းၺႃးၶိူင်ႈမိၼ် မႃးပွႆႇမၢၵ်ႇသႂ်ႇသေလူႉသဵင်ႈသၢႆၸႂ်ၵႂႃႇၸိူဝ်း ၼၼ်ႉထႅင်ႈ ၼႆယဝ်ႉ။

ဢိင်ၼိူဝ် လွင်ႈသိုၵ်းၵဝ်ႈၵၢင်ႉ တေဢွၼ်ၸတ်းပွႆးသွၼ်းၼမ်ႉၼႆႉသေ မၢင်ၸိူဝ်းၵေႃႈ မႆႈၸႂ်ၵူဝ်သိုၵ်း ၵဝ်ႈၵၢင်ႉ ပိုတ်ႇပႃးပၢင်တေႃႇလွင်း ၵူဝ်ၾိင်ႈယၢမ်ႈၵူၼ်းမိူင်းလူႉၸွမ်း။ ယွၼ်ႉဝႃႈ ပွတ်းတၢင်းသႅၼ်ဝီ ၸိူဝ်းၼႆႉ ပဵၼ်ၶၢဝ်းပွႆး လိူၼ်သီႇလႄႈ သိုၵ်းၵဝ်ႈၵၢင်ႉပၼ်ၶႂၢင်ႉပိုတ်ႇပႃး ပၢင်တေႃႇလွင်း။ တင်းၵူၼ်းသိုၵ်း ၵူၼ်းမိူင်းၶူၼ်းၶဝ်းလေႃး ၵၼ်ဝႆႉလႄႈ ၵူၼ်းမိူင်း ၵူဝ်သိုၵ်းမၢၼ်ႈ တင်ႈၸႂ်မႃးပွႆႇမၢၵ်ႇ ယႃႉၵဝ်း ႁႂ်ႈမိူင်းသုၵ်ႉထႅင်ႈၵူၺ်းယဝ်ႉ ဝႃႈၼႆ။

မိူဝ်ႈပူၼ်ႉမႃး ၼႂ်းဝၼ်းတီႈ 20/02/2025 ၼၼ်ႉၵေႃႈ သိုၵ်းမၢၼ်ႈ ယၢမ်ႈဢဝ် ၶိူင်ႈမိၼ်တိုၵ်း မႃးပွႆႇမၢၵ်ႇ လူင်သႅၼ်း 500 ပွင်ႊ သႂ်ႇတီႈဝၢၼ်ႈဝႄးပွင်း ဝဵင်းမိူင်းမိတ်ႈ ဢွင်ႈတီႈသိုၵ်းတဢၢင်း ၵုမ်းၵမ်ၼၼ်ႉ လႄႈ ၵူၼ်းမိူင်းတၢႆ 3 ၵေႃႉ မၢတ်ႇၸဵပ်း 7 ၵေႃႉ။ ၽွင်းၼၼ်ႉ ၼႂ်းဝဵင်းမိူင်းမိတ်ႈ မီးပွႆးၽြႃးဝႆႉသေ ယွၼ်ႉသဵင်သေႃႇလၢတ်ႈ ၼႂ်းၶိူင်ႈသဵင်လင်ႁႅင်းၼႃႇလႄႈ ၵူၼ်းမိူင်းဢမ်ႇလႆႈငိၼ်းသဵင် ၶိူင်ႈမိၼ်မႃး ဝႃႈၼႆ။