ပျီႇတူႉၸိတ်ႉ ပဢူဝ်း PNO ၵဵပ်းသိုၵ်း ၼႂ်းဝၢၼ်ႈပဢူဝ်း ၊ ၵဵပ်းၶွၼ်ႇ ၼႂ်းဝၢၼ်ႈတႆး ၼႂ်းထုင်ႉၸၢမ်ၵႃး ၸႄႈဝဵင်းယွင်ႁူၺ်ႈ ၸိုင်ႈတႆးပွတ်းၸၢၼ်း ။
ၵူၼ်းသိုၵ်းမႂ်ႇၼႆႉ ၵဵပ်းၼႂ်းဝၢၼ်ႈဢၼ်မီးၸၢဝ်းပဢူဝ်းယူႇသဝ်းၼမ်၊ တွၼ်ႈတႃႇလဵင်ႉလူၵူၼ်းသိုၵ်းမႂ်ႇသမ်ႉၵဵပ်းငိုၼ်းတီႈၵူၼ်းဝၢၼ်ႈတႆး ႁႂ်ႈသႂ်ႇပၼ် ၼိုင်ႈလိူၼ် 3 မိုၼ်ႇပျႃး။ သိုၵ်း PNO လၢတ်ႈဝႃႈ ပေႃးၶဝ်ႈႁၢပ်ႇၵၢၼ်သိုၵ်းၼႆ တေဢမ်ႇလႆႈသႂ်ႇၶွၼ်ႇ ၼႆလႄႈ ၵူၼ်းဝၢၼ်ႈဢွၼ်ၵၼ်သူင်ႇလုၵ်ႈလၢၼ်ၵႂႃႇၾိုၵ်းၵၢၼ်သိုၵ်း ဝႃႈၼႆ။
ၵူၼ်းၸၢႆးယူႇထုင်ႉၸၢမ်ႇၵႃးလၢတ်ႈၽူႈတွႆႇႁွၵ်ႈဝႃႈ -“ပေႃးပဵၼ်ဝၢၼ်ႈပဢူဝ်း လႆႈပၼ်ႇပူတ်ႈၵၼ် ၶဝ်ႈၼႂ်းၸုမ်းပျီႇတူႉၸိတ်ႉပဢူဝ်း ၊ ႁဝ်းၶႃႈတႄႉလႆႈပၼ်ငိုၼ်း ၼိုင်ႈလိူၼ် 3 မိုၼ်ႇပျႃး ။ လႆႈႁႃသႂ်ႇပၼ် ၶွၼ်ႇၵူႈလိူၼ် ၊ ၶဝ်မီးၵွင်ႈ ၶႃႈလူး ဢမ်ႇႁတ်းပူၼ်ႉပႅၼ်ၶေႃႈသင်ႇၶဝ်ၶႃႈ”- ဝႃႈၼႆ ။
တီႈထုင်ႉၸၢမ်ၵႃးၼႆႉ ၵူၼ်းမိူင်းလႆႈၸႂ်ႉႁိူဝ်းၸၢၵ်ႈ ၵႂႃႇမႃးႁႃၵိၼ် ၊ ပျီႇတူႉၸိတ်ႉပဢူဝ်း PNO ၵဵပ်းၶွၼ်ႇ သူၼ်ယႃႈ 1 ဢေႊၶိူဝ်ႊ 3 သႅၼ် ။ ယင်းယွၼ်းပႃး ၶွၼ်ႇႁိူဝ်းၸၢၵ်ႈထႅင်ႈ 1 လိူၼ် 15000 ပျႃး ၊ ၶွၼ်ႇရူတ်ႉၵႃး ပေႃးပဵၼ်ၵႃးဢွၼ်ႇ 5 မိုၼ်ႇပျႃး ၊ ပေႃးပဵၼ်ၵႃးလူင် 10 လေႃႉၶိုၼ်ႈၼိူဝ် 1 သႅၼ်ပျႃး ၊ ငိုၼ်းတႃႇၵမ်ႉၸွႆႈၵူၼ်းၾိုၵ်းၵၢၼ်သိုၵ်းသမ်ႉ 1 ႁိူၼ်း 2 မိုၼ်ႇပျႃး ။
ၵူၼ်းၸၢႆးဢႃယု30 ပီ ယူႇထုင်ႉၸၢမ်ၵႃးလၢတ်ႈၽူႈတွႆႇႁွၵ်ႈဝႃႈ-“ ၵူၼ်းဝၢၼ်ႈၵူၼ်းမိူင်းတႄႉ ယၢပ်ႇၸႂ်တေႉဢေႃႈ ၊ ပေႃးၶဝ်ယွၼ်းမႃး ႁဝ်းဢမ်ႇသႂ်ႇပၼ်ၵေႃႈ ဢမ်ႇလႆႈၶႃႈ ၊ ၶွၼ်ႇၵဝ်ႇၶွၼ်ႇမႂ်ႇ လႆႈပၼ်လူင်ၵႂႃႇၵူႈမဵဝ်း။ ပေႃးၵူၼ်းမိူင်းၵႂႃႇယွၼ်းႁႂ်ႈလူတ်းယွၼ်ႇပၼ်သမ်ႉ လွၵ်ႇငိုတ်ႈၵူၼ်းမိူင်းတေယိုတ်းဢၼ်ၼႆႉဢၼ်ၼၼ်ႉၼႆလူင်ၵႂႃႇ”- ဝႃႈၼႆ ။
လိူဝ်သေ လႆႈသႂ်ႇၶွၼ်ႇ / ပၼ်ၵူၼ်းယဝ်ႉ သမ်ႉလႆႈႁုင်ၶဝ်ႈၽၵ်း သူင်ႇပၼ် ပျီႇတူႉၸိတ်ႉပဢူဝ်း ဢၼ်ပၵ်းတပ်ႉဝႆႉတီႈ ဝၢၼ်ႈထီႇရီး၊ ပေႃးၶဝ်ယွၼ်းငိုၼ်းၸူၵ်းငိုၼ်းၸၢႆႇသမ်ႉ လႆႈပၼ်ထႅင်ႈ ဝႃႈၼႆ ။
လွင်ႈၼႆႉ ၽူႈတွႆႇႁွၵ်ႈၶတ်းၸႂ်တိတ်းတေႃႇၸူး PNO ယူႇၵေႃႈ တိတ်းတေႃႇဢမ်ႇလႆႈ။
ယၢမ်းလဵဝ် ပျီႇတူႉၸိတ်ႉပဢူဝ်း PNO ၼႄၶေႃႈဢၢင်ႈလွင်ႈၼိုင်ႈယဝ်ႉလွင်ႈၼိုင်ႈၵဵပ်းၶွၼ်ႇ ။ၼႂ်းႁူဝ်လိူၼ်ၼႆႉ ပျီႇတူႉၸိတ်ႉပဢူဝ်း PNO ၵေႃႈ ဢွၵ်ႇလိၵ်ႈဝႆႉဝႃႈ ၼႂ်းၼႃႈတီႈ 6 ပျီႇတူႉၸိတ်ႉပဢူဝ်းၵုမ်းၵမ် မိူၼ်ၼင်ႇ ၼႂ်းၸႄႈဝဵင်း ႁူဝ်ပူင်း၊ ပၢင်လွင်း၊ သီႇသႅင်ႇ၊ တူၼ်ႈတီး လႄႈ ၵျွၵ်ႉတလူင်းၸိူဝ်းၼႆႉ တေဢမ်ႇလႆႈၸႂ်ႉ ရူတ်ႉၵႃး ဢၼ်ဢမ်ႇမီးဝႂ် လၢႆႊသိၼ်ႊ၊ သင်ႁူပ်ႉႁၼ် ၸႂ်ႉရူတ်ႉၵႃးဢမ်ႇမီးဝႂ်လၢႆႊသိၼ်ႊ တေတီႉၺွပ်း ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ