ယၢမ်းလဵဝ် သိုၵ်းၵဝ်ႈၵၢင်ႉ MNDAA ႁွင်ႉဢဝ်ၵူၼ်းမိူင်းၼႂ်းၸႄႈဝဵင်းလႃႈသဵဝ်ႈသေ ႁဵတ်းပၢင်ၵုမ် တႃႇၸတ်းပၢင်ၼႄၵၢင်ၸႂ်သၢၼ်ၶတ်းတေႃႇ လူင်ပွင်ၸိုင်ႈမိူင်းၶႄႇ ယႃႇႁႂ်ႈမႃးသုၵ်ႉယုင်ႈၸွမ်း ၼႂ်းတွၼ်ႈၶၵ်ႉ ၵၢၼ်ဝၢၼ်ႈ ၵၢၼ်မိူင်း ၵၢၼ်သိုၵ်း ၸုမ်းၸၢဝ်းၶိူဝ်းယိပ်းၵွင်ႈၵၢင်ႇ ၼႂ်းမိူင်းမၢၼ်ႈ ၸိူဝ်းၼႆႉ ဝႃႈၼႆ။

ၵူၼ်းမိူင်းပိုၼ်ႉတီႈ ၼႂ်းဝဵင်းလႃႈသဵဝ်ႈ ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ႁဝ်းဢမ်ႇၶႂ်ႈၵႂႃႇႁူမ်ႈၸွမ်း။ တေၸၢင်ႈႁဵတ်းႁိုဝ်လႃႇ ငိူင်ႉဝႄႈဢမ်ႇလႆႈလူး။ ပေႃးသိုၵ်းမၢၼ်ႈၶိုၼ်းၶဝ်ႈမႃးၵေႃႈ ႁဝ်းၵူဝ်ယူႇဢိူဝ်ႈ။ ၾၢႆႇလႂ်ၵေႃႈ မီးၵွင်ႈမီးၵၢင်”- ဝႃႈၼႆ။

ၵဵဝ်ႇလူၺ်ႈ ပၢင်ၼႄၵၢင်ၸႂ် တီႈဝဵင်းလႃႈသဵဝ်ႈ ဢၼ်သိုၵ်းၵဝ်ႈၵၢင်ႉ တဵၵ်းၶၢၼ်းႁႂ်ႈၵူၼ်းမိူင်း ၸတ်းႁဵတ်း ၼႆႉသေ ၽူႈလဵပ်ႈႁဵၼ်းၵၢၼ်မိူင်းၵေႃႉၼိုင်ႈ ထတ်းသၢင်လၢတ်ႈၼႄတီႈၽူႈတွႆႇႁွၵ်ႈဝႆႉၼင်ႇၼႆ။

“ဢၼ်ၼႆႉ ပဵၼ်လွင်ႈတဵၵ်းတဵင် ပဵၼ်လွင်ႈပူၼ်ႉပႅၼ် သုၼ်ႇလႆႈၵူၼ်း၊ ၵူၼ်းမိူင်းလူဝ်ႇၼႆႉ ပဵၼ်လူင်ပွင်ၸိုင်ႈၵူၼ်းမိူင်း လူၺ်ႈဢမ်ႇၸႂ်ႉဢႃႇၼႃႇ ၶေႃႈပူင်လၢႆးသိုၵ်း။ ပေႃးတေၵမ်ႉယၼ်ၸွမ်း လၢႆးၽွင်းငမ်းပိူင် သိုၵ်းၼႆႉၵႂႃႇၸိုင် တႃႇတေပဵၼ်မႃး လွၵ်းပိူင်ၽွင်းငမ်းပိူင်ၵူၼ်းမိူင်း ပဵၼ်ယႂ်ႇၼၼ်ႉ ဢမ်ႇၸၢင်ႈမုင်ႈမွင်းယဝ်ႉ။ မိူၼ်ႁဝ်းယွၼ်းႁႂ်ႈၸုမ်းသိုၵ်းၶဝ် ယူႇၼိူဝ်ၵူၼ်းမိူင်းၵႂႃႇတေႃႇၸူဝ်ႈၼၼ်ႉၵူၺ်း”- ၼႆယဝ်ႉ။

ဢိင်ၼိူဝ် လွင်ႈၶၢဝ်ႇလိုဝ်း လွင်ႈသိုၵ်းၵဝ်ႈၵၢင်ႉ တဵၵ်းႁႂ်ႈၸတ်းပၢင်ၼႄၵၢင်ၸႂ် သၢၼ်ၶတ်းတေႃႇ လူင်ပွင်ၸိုင်ႈမိူင်းၶႄႇၼၼ်ႉသေ ၵူၼ်းမိူင်းဢၼ်ယူႇသဝ်းဝႆႉ ၼႂ်းဝဵင်းလႃႈသဵဝ်ႈတႄႉ ဢွၼ်ၵၼ်မႆႈၸႂ် ၵူဝ်သိုၵ်း မၢၼ်ႈ ဢဝ်ၶိူင်ႈမိၼ်တိုၵ်း မႃးပွႆႇသႂ်ႇ ၼႆယဝ်ႉ။

ၵူၼ်းၼုမ်ႇ တူင်ႉၼိုင်ၼႂ်းၵၢၼ်မိူင်းၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ဢမ်ႇလီပဵၼ် တိူဝ်ႉသုၼ်ႇလႆႈ ၵူၼ်းမိူင်း – လၢႆးႁဵတ်းၶဝ်ၼၼ်ႉ မိူၼ်တင်းဢမ်ႇမီးလွင်ႈၼပ်ႉယမ်ၵူၼ်းမိူင်းၵူၺ်း”- ဝႃႈၼႆ။

ၵဵဝ်ႇၵပ်းလွင်ႈၼႆႉ ယူႇတီႈ ၸုမ်းၶၢဝ်ႇၽူႈတွႆႇႁွၵ်ႈၵပ်းၸူး ၽူႈၶၢၼ်ပၢၵ်ႇ တပ်ႉသိုၵ်းၵဝ်ႈၵၢင်ႉၵေႃႈ ဢမ်ႇလႆႈ။

ပၢင်ၼႄၵၢင်ၸႂ်ၼႆႉ တေတႄႇၸတ်းႁဵတ်း မိူဝ်ႈၽုၵ်ႈ ဝၼ်းတီႈ 15/03/2025 ယၢမ်းၵၢင်ၼႂ် တေႁူမ်ႈၵၼ်ပႆတၢင်း ၼႂ်းၵၢင်ဝဵင်းလႃႈသဵဝ်ႈ ဢိင်ၼိူဝ်ဢဵၼ်ႁႅင်းတင်းၼမ်ၵူၼ်းမိူင်းသေ တေၸတ်းႁဵတ်းၵႂႃႇ ၶၢဝ်းတၢင်းသၢမ်ဝၼ်း ၼႆယဝ်ႉ။

လႆႈႁူႉဝႃႈ ၵွၼ်ႇပႆႇထိုင်ပၢင်ဢုပ်ႇဢူဝ်း လွင်ႈငမ်းယဵၼ် သိုၵ်းမၢၼ်ႈတင်း သိုၵ်းၵဝ်ႈၵၢင်ႉ ၼႂ်းလိူၼ်မၢတ်ႊၶျ်ၼႆႉ ၾၢႆႇလူင်ပွင်ၸိုင်ႈ မိူင်းၶႄႇ ႁွင်ႉဢဝ်ၽူႈၵွၼ်း သိုၵ်းၵဝ်ႈၵၢင်ႉ 4 ၸႄႈတွၼ်ႈ ၵႂႃႇႁူပ်ႉထူပ်းၶိုၵ်ႉၶၵ်ႉ တီႈဝဵင်းၶုၺ်ႊမိင်ႊ ၼႂ်းမိူင်းၶႄႇၼႆ – သိုဝ်ႇၶၢဝ်ႇ Tachileik News Agency’s ဢွၵ်ႇဝႆႉၼင်ႇၼႆ။

တႅမ်ႈ – ၽူၺ်းၼုမ်ႇ