ယၢမ်းလဵဝ် တီႈတူဝ်းၵဵတ်ႉ တၢင်းၶဝ်ႈဢွၵ်ႇဝဵင်းလွႆလႅမ် ၸိုင်ႈတႆးပွတ်းၸၢၼ်းၼႆႉ ယူႇတီႈ ပလိၵ်ႈမၢၼ်ႈ ၾၢႆႇၽဵဝ်ႈမူၺ်ႉယႃႈမဝ်းၵမ် တႂ်ႈသိုၵ်းမၢၼ်ႈ ၵုမ်းၵမ်ဝႆႉၼၼ်ႉ ၵူတ်ႇထတ်းၸႅတ်ႈထၢမ်ၵူၼ်းၵႂႃႇမႃးႁၢဝ်ႈႁႅင်း သင်ဢမ်ႇပႃးမၢႆၾၢင်ၸိုင် ၺႃးတီႉၺွပ်းၵုမ်းတူဝ်ဝႆႉ။

ၵူၼ်းႁေႃႈၵႃး ဝဵင်းၼမ်ႉၸၢင် – တူၼ်ႈတီး လၢတ်ႈတီႈၽူႈတွႆႇႁွၵ်ႈဝႃႈ – “တီႈတူဝ်းၵဵတ်ႉလွႆလႅမ်ၼႆႉ တေပဵၼ်ပလိၵ်ႈၾၢႆႇၽဵဝ်ႈမူၺ်ႉယႃႈမဝ်းၵမ်ၶဝ် တေႁွင်ႉလူင်းၵႃးသေ ယိုတ်းမၢႆၾၢင်ဝႆႉ ယဝ်ႉၵေႃႈ ဢမ်ႇလၢတ်ႈတေႃႇလီလီ။ ၼိူဝ်ၵႃးၼႆႉ သင်ၵေႃႈဢမ်ႇပႃး ၵႃးၵေႃႈပဵၼ်ၵႃးမီးဝႂ်ၶွၼ်ႇ ၶဝ်တေမႃးႁွင်ႉၵႂႃႇ ၼႂ်းၵဵတ်ႉၶဝ်သေ ၸႅတ်ႈၸိုဝ်ႈ၊ ၸႅတ်ႈၵႃး၊ ၸႅတ်ႈလၢႆႊသိၼ်ႊၵႃး ၶဝ်ယိပ်းၵွင်ႈသေ လွၵ်ႇငိုတ်ႈမဵဝ်းၼိုင်ႈ ယဝ်ႉမဵဝ်ႈၼိုင်ႈႁဵတ်းၼၼ်ႉဢိူဝ်ႈ”- ဝႃႈၼႆ။

ဢၼ်ပလိၵ်ႈမၢၼ်ႈ ၾၢႆႇၽဵဝ်ႈမူၺ်ႉယႃႈမဝ်းၵမ် ၵူတ်ႇထတ်းႁၢဝ်ႈႁႅင်းၼႆႉ တေၸၢင်ႈပဵၼ်ယွၼ်ႉၵျႃးၽႅၼ်ႉၵေႃႈ ပဵၼ်လႆႈ။ သင်ၼႂ်းမၢႆၾၢင်ၼၼ်ႉ ပဵၼ်ၸၢဝ်းၶႄႇၼႆ ယိင်ႈၶႅၼ်းၸႅတ်ႈထၢမ် ႁၢဝ်ႈႁႅင်း ၼႆယဝ်ႉ။

“ပူၼ်ႉမႃးၼၼ်ႉ ၶဝ်ၺွပ်းလႆႈၵူၼ်းၵျႃးၽႅၼ်ႉ တီႈတၢင်းလွႆလႅမ် ဝၢႆးၼၼ်ႉမႃး ၶဝ်ၸႅတ်ႈၵျၢမ်းၼၼ်ႉယဝ်ႉ။ ပေႃးမိူၼ်ၶႄႇၼႆ ၶဝ်ၸႅတ်ႈၵျၢမ်း ပေႃးဢမ်ႇပႃးမၢႆၾၢင် ယိင်ႈၶႅၼ်းၼႃႇယဝ်ႉ။ ၺွပ်းပႃးၸဝ်ႈၵႃး ၵွၼ်ႇဢေႃႈ။ တေလႆႈမီးဝႂ်ႁပ်ႉႁွင်း (ထောက်ခံစာ) ပႃးၵူႈမဵဝ်း။ ပေႃးၵႂႃႇသေ ဢမ်ႇပႃးၼႆ ၶဝ်တေဝႃႈ ပဵၼ်ၵျႃးၽႅၼ်ႉၵမ်းလဵဝ်ယဝ်ႉ။ ဝႂ်ႁပ်ႉႁွင်း (ထောက်ခံစာ) ဢၼ်ဝႃႈၼၼ်ႉ တေမီးမိူၼ်ၼင်ႇ လုၵ်ႉလႂ်မႃး တေၵႂႃႇတီႈလႂ် တေၼွၼ်းတီႈလႂ် ၸဵမ်ၸိူဝ်းၼႆႉ ဝႂ်ၼႆႉသမ်ႉ တေလႆႈၵႂႃႇဢဝ်တီႈယေးၸၶၢၼ်း။ လႆႈမႆႈၸႂ်ၶႃႈဢေႃႈ ပိူင်လူင်မၼ်း ၵူၼ်းဢၼ်ၶီႇၸွမ်းႁဝ်းၼႆႉ ၸွင်ႇၶဝ်ပႃးမၢႆၾၢင်ၼၼ်ႉၵူၺ်း။ သင်ဢမ်ႇပႃးၵေႃႈ ဢမ်ႇလႆႈတၢင်ႇၼၼ်ႉယဝ်ႉ”- ၵူၼ်းႁေႃႈၵႃး ဝဵင်းၼမ်ႉၸၢင် – တူၼ်ႈတီး သိုပ်ႇလၢတ်ႈၼင်ႇၼႆ။

ၵဵဝ်ႇလူၺ်ႈ ပလိၵ်ႈမၢၼ်ႈ ၾၢႆႇၽဵဝ်ႈမူၺ်ႉယႃႈမဝ်းၵမ် ၸႅတ်ႈထၢမ်ၵူၼ်းမိူင်းၵႂႃႇမႃးႁၢဝ်ႈႁႅင်း တီႈတူဝ်း ၵဵတ်ႉဝဵင်းလွႆလႅမ်ၼႆႉ ထၢမ်ပႃးလွင်ႈၼႃႈၵၢၼ်တႃႇငၢၼ်းလႄႈ ႁဵတ်းႁႂ်ႈၵူၼ်း ဢွၵ်ႇတၢင်း မႆႈၸႂ်လွင်ႈႁူမ်ႇလူမ်ႈ ၼႆယဝ်ႉ။

“လႆႈမႆႈၸႂ်ဢေႃႈ တီႈတႄႉ ပလိၵ်ႈၾၢႆႇၽဵဝ်ႈမူၺ်ႈယႃႈမဝ်းၵမ် (မူးယစ်) ၼႆႉၶဝ်လူဝ်ႇၸႅတ်ႈယႃႈၵူၺ်း။ ဢၼ်ၶဝ်ၸႅတ်ႈၼႆႉ မၢႆၾၢင်ၵေႃႈၸႅတ်ႈ လွၵ်ႇငိုတ်ႈပႃးထႅင်ႈ ပၢႆႁိုတ်းထႃႉသႂ်ႇထႅင်ႈ။ ၸိုဝ်ႈပေႃႈၸိုဝ်ႈမႄႈ ၵေႃႈၸႅတ်ႈ ယဝ်ႉၵေႃႈ ပေႃႈမႄႈႁဵတ်းၵၢၼ်သင် ၸိူဝ်းၼႆႉ။ ႁဝ်းတေလၢတ်ႈသင်ၵေႃႈ ၶဝ်ဢမ်ႇပၼ်လၢတ်ႈ ၵုမ်ႇႁိုတ်းထႃႇသႂ်ႇ သဵင်ယႂ်ႇသဵင်လူင်ၼၼ်ႉ ၵူၺ်း”- ၵူၼ်းႁေႃႈၵႃး သိုပ်ႇလၢတ်ႈၼႄၼင်ႇၼႆ။

ဢၼ်ယူႇတီႈ ပလိၵ်ႈမၢၼ်ႈ ၾၢႆႇၽဵဝ်ႈမူၺ်ႉယႃႈမဝ်းၵမ်ၶဝ် ၵူတ်ႇထတ်းႁၢဝ်ႈႁႅင်းၼႆႉ တႄႇမႃးမိူဝ်ႈ လိူၼ်ၾႅပ်ႊပိဝ်ႊရီႊၼၼ်ႉသေ ႁၢၼ်ႉတေႃႇထိုင်ယၢမ်းလဵဝ် ၵူၼ်းမိူင်းတႄႉ ႁၼ်ထိုင်ဝႃႈ သင်တေၵူတ်ႉထတ်းၵႂႃႇမႃးၸိူင်ႉၼႆထႅင်ႈၶၢဝ်းယၢဝ်းၸိုင် သင်ဢမ်ႇတၼ်းႁၢင်ႈႁႅၼ်းဝတ်းဝႂ် ၵႂႃႇမႃး ၽွင်းလူဝ်ႇႁိပ်ႈၼႅတ်ႈ သင်ယူႇဢမ်ႇလီၵိၼ်ဢမ်ႇဝၢၼ်မႃးၸိုင် ၶႅၼ်းတေထူပ်းလွင်ႈယၢပ်ႇထႅင်ႈ ၼႆယဝ်ႉ။