တႄႇႁူဝ်လိူၼ်မၢတ်ႊၶျ် ပီ 2025 ၼႆႉမႃး သိုၵ်းၵဝ်ႈၵၢင်ႉ MNDAA ႁွင်ႉပၢင်ၵုမ် ၵူၼ်းဝၢၼ်ႈ ၼႂ်းၸႄႈဝဵင်းသႅၼ်ဝီ ၸိုင်ႈတႆးပွတ်းႁွင်ႇ လၢႆလၢႆဝၢၼ်ႈသေ ဢုပ်ႇဢူဝ်းႁႂ်ႈၶၢတ်ႈဢွင်ႈတီႈသူၼ်ပၼ် တႃႇႁဵတ်းသူၼ်ၵူၺ်ႈ။

ၵူၼ်းၼႂ်းပိုၼ်ႉတီႈ ဝဵင်းသႅၼ်ဝီ ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ၶဝ်တေႁဵတ်းသူၼ်ၵူၺ်ႈ၊ ၽုၵ်ႇၵူၺ်ႈ ၼႆဝႃႇ။ ႁဝ်းတႄႉၵေႃႈ ႁိုဝ်တေၶႂ်ႈၶၢတ်ႈလႃႇ ႁဝ်းလူဝ်ႇႁဵတ်းသူၼ်ႁဝ်းလူး။ ႁဝ်းတႄႉဝႃႈ ဢမ်ႇၶၢတ်ႈပၼ် ၼႆယူႇဢိူဝ်ႈ။ ၵမ်းၼႆႉ ၶဝ်သမ်ႉပေႃးလူင်းတႅၵ်ႈတီႈလိၼ်ယဝ်ႉ။ တီႈၸိူဝ်းဢၼ်ၶဝ် ၶႂ်ႈလႆႈၼၼ်ႉ ဢမ်ႇထၢမ်ၸဝ်ႈမၼ်းသေ ၶဝ်တႅၵ်ႈလူင်ၵႂႃႇမူတ်းယဝ်ႉ”- ဝႃႈၼႆ။

ဝၢႆးလင် ပၢင်တိုၵ်း 1027 ယဝ်ႉသေ သိုၵ်းၵဝ်ႈၵၢင်ႉ တႄႇၵုမ်းၵမ်လႆႈ ဝဵင်းသႅၼ်ဝီၼႆႉမႃး သိုၵ်းၶဝ် မိူဝ်းတဵၵ်းၶၢတ်ႈဢွင်ႈတီႈလိၼ် ၵူၼ်းမိူင်းၼႂ်းထုင်ႉမိူင်းပႃး တႃႇၽုၵ်ႇဢွႆႈ။ ယၢမ်းလဵဝ်သမ်ႉ မႃးတဵၵ်းႁႂ်ႈၶၢတ်ႈပၼ်ထႅင်ႈ တႃႇႁဵတ်းသူၼ်ၵူၺ်ႈ ၼႆယဝ်ႉ။

လႆႈႁူႉဝႃႈ သိုၵ်းၵဝ်ႈၵၢင်ႉ ပၼ်ၵႃႈၶၢတ်ႈ တီႈလိၼ်သူၼ် ၼိုင်ႈဢေႊၶိူဝ်ႊလႂ် 3 သႅၼ်ပျႃး ထိုင် 5 သႅၼ်ပျႃးသေ တေလႆႈၶၢတ်ႈပၼ်သိုၵ်းၶဝ် တႃႇၶၢဝ်းတၢင်း 5 ပီ ၼႆယဝ်ႉ။

ၵူၼ်းမိူင်း ၼႂ်းထုင်ႉမိူင်းပႃး ၸႄႈဝဵင်းသႅၼ်ဝီ ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ –“ၼိုင်ႈဢေႊၶိူဝ်ႊၼႆႉ ၶဝ်ပၼ်ယူႇ ဢေႇသုတ်းမၼ်း 3 သႅၼ်။ မၢင်ၸိူဝ်းၵေႃႈလႆႈယူႇ 5 သႅၼ်။ ငိုၼ်းၵႃႈၶၢတ်ႈသူၼ်ၼႆႉ သွင်ပီၸင်ႇ ၶဝ်တေပၼ်ၼိုင်ႈပွၵ်ႈ။ ႁဝ်းတမ်ႉပႆႇတၼ်းဝႃႈ တေၶၢတ်ႈပၼ်ၶဝ်ၼႆ ၶဝ်ပေႃးၵႂႃႇထုၺ်ပႅတ်ႈသူၼ် ႁဝ်းယဝ်ႉဢိူဝ်ႈ။ ၽိုၼ်းၼႂ်းလဝ်ႇႁဝ်း ၸိူဝ်း ၼၼ်ႉၵေႃႈ ႁဝ်းတမ်ႉပႆႇလႆႈဢဝ်သေဢိတ်း ၶဝ်သမ်ႉပေႃးမႃး ႁဵတ်းၸိူင်ႉၼႆယဝ်ႉ”- ဝႃႈၼႆ။

ၵူၼ်းမိူင်းၸိူဝ်းယူႇသဝ်း ၼႂ်းထုင်ႉမိူင်းပႃး ၸႄႈဝဵင်းသႅၼ်ဝီၼႆႉ ႁဵတ်းၵၢၼ်ၽုၵ်ႇသွမ်ႈ ႁႃၵိၼ်လဵင်ႉၼႃႈႁိူၼ်းမႃး ပၢၼ်သိုပ်ႇပၢၼ်သေဢမ်ႇၵႃး ယွၼ်ႉပဵၼ်တီႈမီးပႃႇထိူၼ်ႇၵႂၢင်ႈယႂ်ႇလႄႈ ၵႂႃႇတႅပ်းဢဝ်ၽိုၼ်းၼႂ်း လဝ်ႇၽႂ်လဝ်ႇမၼ်းသေ မႃးၽဝ်ႁဵတ်းထၢၼ်ႇယဝ်ႉ သူင်ႇၶၢႆၼႂ်းဝဵင်း ၸဵမ်ၸိူဝ်းၼႆႉ။

ထၢၼ်ႇၸိူဝ်းဢွၵ်ႇၼႂ်းထုင်ႉမိူင်းပႃး ၸႄႈဝဵင်းသႅၼ်ဝီၼႆႉ လႆႈသူင်ႇၶၢႆၸွမ်း ၸႄႈဝဵင်းၵူတ်ႉၶၢႆ၊ ၵုၼ်လူင်၊ ႁူဝ်ပၢင်ႇ တေႃႇထိုင် ၸႄႈဝဵင်းလၢဝ်ႇၵၢႆး ၸဵမ်ၸိူဝ်းၼႆႉ။

ဝၢႆးလင် ၽႅၼ်ယၼ်ႇသိုၵ်း 1027 ၼႆႉ တွၼ်ႈတႃႇ ၵၢၼ်ႁုၼ်ႈမုၼ်းၶိုၼ်ႈယႂ်ႇ ပူၵ်းပွင်ၶိုၼ်းဝဵင်းၼႆသေ သိုၵ်းၵဝ်ႈၵၢင်ႉ လႄႇႁႃတဵၵ်းသိုဝ်ႉ၊ ၶၢတ်ႈ၊ သိမ်းဢဝ်တီႈလိၼ်ၵူၼ်းဝၢၼ်ႈ ၼႂ်း ဢိူင်ႇၸေႈဢူမႃး ၼႆယဝ်ႉ။

ၵူၼ်းမိူင်း ၼႂ်းဢိူင်ႇၸေႈဢူ ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ -“မိူဝ်ႈၶဝ်တႄႇမႃးဢုပ်ႉၼႆႉ ၶဝ်ဝႃႈ တေၶၢႆႉၵၢတ်ႇလူင် တီႈၼႂ်းဝဵင်းၼၼ်ႉၼႆသေ မႃးႁႃသိုဝ်ႉတီႈလိၼ်တၢင်းႁဝ်း။ မိူဝ်ႈၼၼ်ႉၶဝ်ဢွၵ်ႇပိူင်ဝႆႉဝႃႈ ၽႂ်ၵေႃႈယဝ်ႉ တေဢမ်ႇလႆႈၶၢႆတီႈလိၼ်သူၼ်ႁႆႈၼႃး ဢွင်ႈႁိူၼ်းၸိူဝ်းၼႆႉၼႆ။ ထိုင်ၵမ်းၼႆႉ ၶဝ်သမ်ႉ ပဵၼ်ၵေႃႉမႃးႁႃ သိုဝ်ႉတီႈလိၼ်ၶိုၼ်း။ ၵႃႈတီႈလိၼ်သမ်ႉ ပၼ်ႁဝ်းဢေႇဝႃႈဢေႇ။ ၽႂ်တေၶႂ်ႈၶၢႆလႃႇ။ ၽိူဝ်ႇတႃႉႁဝ်းၶၢႆ တႃႉႁဝ်းဝႆႉၽုၵ်ႇၵိၼ်၊ ႁဵတ်းသူၼ်ႁဝ်းၼၼ်ႉၼႃႇ။ ၶဝ်တႄႉ ဢမ်ႇဝူၼ်ႉသင် ဢမ်ႇထၢမ်ၽႂ် ပေႃးၶဝ် ၶႂ်ႈလႆႈတီႈၼၼ်ႈၼႆၵေႃႈ ၶဝ်ၵႂႃႇတႅၵ်ႈသေ ဢဝ်ၼၼ်ႉယဝ်ႉ။ ပေႃးႁဝ်းဢမ်ႇၶၢႆၵေႃႈ သမ်ႉၵူဝ်ၶဝ်သိမ်းဢဝ် ၵႂႃႇလၢႆလၢႆၼၼ်ႉၼႃႇ”- ဝႃႈၼႆ။

ဢိင်ၼိူဝ်လွင်ႈၼႆႉ ယူႇတီႈ ၸုမ်းၶၢဝ်ႇၽူႈတွႆႇႁွၵ်ႈ ၵပ်းသိုပ်ႇတိတ်းတေႃႇ ၽူႈၶၢၼ်ပၢၵ်ႇ တပ်ႉသိုၵ်းၵဝ်ႈၵၢင်ႉၵေႃႈ ဢမ်ႇလႆႈ။

ယၢမ်းလဵဝ် ထၢင်ႁိၼ်၊ ထၢင်သၢႆး ဢၼ်မီးယူႇၼႂ်းဝဵင်းသႅၼ်ဝီၼၼ်ႉၵေႃႈ ၺႃးသိုၵ်းၵဝ်ႈၵၢင်ႉ ယိုတ်းဢဝ်ဝႆႉ မူတ်းသေ သင်ၵူၼ်းမိူင်းၶႂ်ႈလႆႈၸိုင် တေလႆႈၵႂႃႇသိုဝ်ႉဢဝ်ၶိုၼ်း။ လႆႈႁူႉဝႃႈ သၢႆးလႄႈ မၢၵ်ႇႁိၼ် ၸိူဝ်းၼႆႉ ထေႃႈၼိုင်ႈလမ်းလႂ် လႆႈပၼ်ယူႇ 5 မိုၼ်ႇပျႃးတေႃႇ 1 သႅၼ်ပျႃး ၼႆယဝ်ႉ။

ၼႂ်းၶၢဝ်းတၢင်း သိုၵ်းၵဝ်ႈၵၢင်ႉ ၵုမ်းၵမ်ဝဵင်းသႅၼ်ဝီမႃး ၶၢဝ်းတၢင်းပီပၢႆၼႆႉ ပၢင်တေႃႇလွင်း၊ ႁၢၼ်ႉပျေႃႇ မူၼ်ႈ KTV ၊ ႁူင်းမႄႈမွၵ်ႇယႃႈ ၸိူဝ်းၼႆႉ လိူင်ႇၼမ်မႃးတႄႉတႄႉ ၼႆယဝ်ႉ။

တႅမ်ႈ – ၽူၺ်းၼုမ်ႇ