မိူဝ်ႈၼႆႉ ဝၼ်းတီႈ 07/03/2025 ယၢမ်းဝၢႆးဝၼ်း 3:30 သိုၵ်းၵဝ်ႈၵၢင်ႉ MNDAA ပွႆႇပၼ်ၶိုၼ်း ၼၢင်းယိင်းႁွမ် ဢႃယု 15 ပီယဝ်ႉ ယၢမ်းလဵဝ် မၼ်းၼၢင်း ႁွတ်ႈထိုင်ၶိုၼ်းတီႈႁိူၼ်းယေး ဝၢၼ်ႈလူင်မူၼ်း ဢိူင်ႇမိူင်းယေႃ ၸႄႈဝဵင်းလႃႈသဵဝ်ႈ ၸိုင်ႈတႆးပွတ်းႁွင်ႇ လီငၢမ်းယဝ်ႉ။

ၼင်ႇႁိုဝ် ၼၢင်းယိင်းႁွမ် တေလွတ်ႈဢွၵ်ႇမႃးၶိုၼ်းၼႆႉ မုၵ်ႉၸုမ်းတူင်ႇဝူင်းၵူၼ်းလၢႆလၢႆၸုမ်းလႄႈ သိုဝ်ႇ ၶၢဝ်ႇၵူႈၸုမ်းၸုမ်း ႁူမ်ႈၵၼ်ဢွၵ်ႇၶေႃႈပိုၼ်ၽၢဝ်ႇသၢၼ်ၶတ်း တိုၵ်းယွၼ်းလႄႈ တႅမ်ႈလိၵ်ႈသူင်ႇယိုၼ်ႈ ထိုင်ပႃး လုမ်းၽွင်းတၢင် လၢႆလၢႆမိူင်း ၸဵမ်ၸိူဝ်းၼႆႉ။

ၽူႈတူင်ႉၼိုင်ၸွႆႈထႅမ်ပၼ် ၼၢင်းယိင်းႁွမ် လၢတ်ႈတီႈၽူႈတွႆႇႁွၵ်ႈဝႃႈ –“ၸႂ်ႈယဝ်ႉၶႃႈ။ ၼၢင်းယိင်းႁွမ်ၼႆႉ ၾၢႆႇသိုၵ်းၵူဝ်းၵၢင်ႉၶဝ် ပွႆႇဢွၵ်ႇမႃးၶိုၼ်းယဝ်ႉ။ မိူဝ်ႈလဵဝ် ၼၢင်းယိင်းႁွမ် မႃးၽႅဝ်ၶိုၼ်း တီႈႁိူၼ်းပေႃႈမႄႈ မၼ်းၼၢင်း တီႈမိူင်းယေႃယဝ်ႉ။ လွင်ႈပၢႆးယူႇလီမၼ်းၼၢင်းၵေႃႈ ၶႅမ်ႉလႅပ်ႈလီယူႇ။ ဢမ်ႇပဵၼ်သင်”- ဝႃႈၼႆ။  

လႆႈႁူႉဝႃႈ မိူဝ်ႈၽုၵ်ႈၼႆႉ ပေႃႈမႄႈၼၢင်းယိင်းႁွမ်လႄႈ တင်းတူဝ်မၼ်းၼၢင်း တေလူင်းမႃးလႃႈသဵဝ်ႈသေ  ပိူဝ်ႈတႃႇထၢႆႇငဝ်းႁၢင်ႈသဵင် ယိၼ်းၸူမ်းၶွပ်ႈၸႂ်ထိုင် ၵူႈမူႇၵူႈၸုမ်း လွင်ႈဢၼ်ၶတ်းၸႂ်တူင်ႉတိုၼ်ႇ ႁဵတ်း သၢင်ႈပၼ် တႃႇႁႂ်ႈလွတ်ႈဢွၵ်ႇမႃးၼၼ်ႉ ၼႆယဝ်ႉ။

“သိုဝ်ႇၶၢဝ်ႇၼႆႉ မၼ်းလမ်ႇလွင်ႈ တႃႇၵူၼ်းမိူင်းႁဝ်းၵူႈၵေႃႉ၊ ၵူႈတီႈ၊ ၵူႈဝၢၼ်ႈ၊ ၵူႈမိူင်း တႄႉတႄႉယဝ်ႉ။ ႁဝ်း ၶႃႈ တေလႆႈမေႃၸႂ်ႉတိုဝ်းသိုဝ်ႇၶၢဝ်ႇ၊ တေလႆႈမေႃၸႂ်ယႂ်ႇသိုဝ်ႇၶၢဝ်ႇ၊ တေလႆႈႁူႉပၵ်းပိူင်သိုဝ်ႇၶၢဝ်ႇ။ ပေႃးႁဝ်း ၶႃႈ ပဵၼ်သင်မႃးၼႆ ႁဝ်းတေလႆႈမေႃၵွင်ႉႁႃၶဝ်ႈၸူးၵၼ်၊ သိုဝ်ႇသၢၼ်ထၢမ်ႁႃၵၼ်၊ ၵွင်ႉသၢၼ်ယွၼ်း တၢင်း ၸွႆႈထႅမ်ၵၼ်”- ၽူႈတူင်ႉၼိုင် ၸွႆႈထႅမ်ၼၢင်းယိင်းႁွမ် သိုပ်ႇလၢတ်ႈၼႄၼင်ႇၼႆ။

ၼၢင်းယိင်းႁွမ်ၼႆႉ ၺႃးသိုၵ်းၵဝ်ႈၵၢင်ႉ တီႉၺွပ်းၵႂႃႇ ၵဵဝ်ႇလူၺ်ႈၵူၼ်းသိုၵ်းၶဝ်ၼင်ႇၵၼ် ၽိတ်းမေႃးၵၼ် သေ ယိုဝ်းၵၼ်တၢႆၵေႃႉၼိုင်ႈ ယွၼ်ႉၶႅၼ်မၼ်းၼၢင်း မိူဝ်ႈဝၼ်းတီႈ 07/02/2025 ယၢမ်းဝၢႆးဝၼ်း 2 မူင်း။

ၼၢင်းယိင်းႁွမ်ၼႆႉ ထုၵ်ႇတီႉၺွပ်းၵုမ်းၶင်ဝႆႉတီႈ တပ်ႉပၢင်သဝ်းသိုၵ်းၵဝ်ႈၵၢင်ႉၶဝ် တီႈၼႂ်းဝၢင်းဝတ်ႉလူင် မူၼ်း။ မၼ်းၼၢင်းၺႃးတီႉၺွပ်း တီႈပွႆးသၢင်ႇလွင်း ဝၢၼ်ႈၼႃးပႅၼ်ႈ ႁိုင် 30 ဝၼ်း တဵမ်ၼိုင်ႈလိူၼ်ယဝ်ႉ ၸင်ႇလႆႈ ဢွၵ်ႇမႃးၶိုၼ်း ၼႆယဝ်ႉ။

တႅမ်ႈ – ၽူၺ်းၼုမ်ႇ