ဝၼ်းတီႈ 04/03/2025 ၼႆႉ ယူႇတီႈ တူႊဝႃႇလသျီးလႃႉ ၸွမ်ၸိုင်ႈ မိူင်းႁူမ်ႈတုမ် ၸူဝ်ႈၶၢဝ်း NUG တိုၵ်းသူၼ်းလၢတ်ႈၵႂႃႇ ၼႂ်းပၢင်ၵုမ် NUG ၼၼ်ႉဝႃႈ ၼင်ႇႁိုဝ် ပေႃးတေဢမ်ႇမီးလွင်ႈၸႂ်ႉဢႃႇၼႃႇ ၶီႇၼဵၵ်းတဵၵ်းတဵင်တေႃႇၵၼ်လႄႈ တႅၵ်ႇယၢႆႈၵၼ်ၼၼ်ႉ ၶႅၼ်းတေႃႈႁႂ်ႈၵေႃႇသၢင်ႈလွင်ႈၽွမ်ႉႁူမ်ႈၵၼ် ဝႃႈၼႆ။
တူႊဝႃႇလသျီးလႃႉ ၸွမ်ၸိုင်ႈ မိူင်းႁူမ်ႈတုမ် ၸူဝ်ႈၶၢဝ်း NUG တိုၵ်းသူၼ်းၵႂႃႇ ၼႂ်းပၢင်ၵုမ်ၼၼ်ႉဝႃႈ – “ယၢမ်းလဵဝ် ပဵၼ်ၽွင်းႁဵတ်းၵၢၼ်လုၵ်ႉၽိုၼ်ႉယူႇလႄႈ လူဝ်ႇထိင်းၵၢၼ်ၽွမ်ႉႁူမ်ႈၵၼ်ဝႆႉ ၸွမ်းၼင်ႇပွင်ပဵၼ်လႆႈ။ ပေႃးၼၼ် ၸင်ႇတေတိုၵ်းတေႃး ၽဵဝ်ႈမူၺ်ႉပႅတ်ႈလႆႈ ပိူင်ၵၢၼ်ၸဝ်ႈဢႃႇၼႃႇတႄႉတႄႉ”- ဝႃႈၼႆ။
ၼႂ်းၸူဝ်ႈပၢၼ် ႁဵတ်းၵၢၼ်လုၵ်ႉၽိုၼ်ႉၼႆႉ ယွၼ်ႉမီးၵူၼ်းၸႂ်ႉတိုဝ်းဢႃႇၼႃႇလႄႈ ၸင်ႇမီးၸုမ်းမႂ်ႇမႂ်ႇ ဢွၵ်ႇမႃးၼမ် သင်ၸုမ်းတင်းသဵင်ႈ ႁူမ်ႈၵၼ်ပဵၼ်လႆႈၼမ်ႉၼိုင်ႈၸႂ်လဵဝ်ၵၼ်ၸိုင် ဢဵၼ်ႁႅင်းတႃႇတေႃႇသူႈတိုၵ်းတေႃးၶိုၼ်း ၸဝ်ႈဢႃႇၼႃႇၼၼ်ႉ တေတိူဝ်းၵႅၼ်ႇၶႅင်မႃးလိူဝ်ၵဝ်ႇ ၼႆယဝ်ႉ။
ၽူႈလဵပ်ႈႁဵၼ်း ၵၢၼ်မိူင်း ၵေႃႉၼိုင်ႈ တူၵ်ႇတၵ်ႉလၢတ်ႈဝႃႈ -“ယူႇတီႈ လူင်ပွင်ၸိုင်ႈၽွမ်ႉႁူမ်ႈၸိူဝ်ႉၸၢတ်ႈ NUG သေ ထုၵ်ႇလီႁဵတ်းၵၢၼ်သူၼ်းႁူၺ်း ပိူဝ်ႈတႃႇၵၢၼ်ၽွမ်ႉႁူမ်ႈ ၶိူဝ်း ၵူၼ်းထုင်ႉလိၼ်ပဵင်းတင်း သၼ်လွႆယူႇ”- ဝႃႈၼႆ။
ယၢမ်းလဵဝ် လူင်ပွင်ၸိုင်ႈၽွမ်ႉႁူမ်ႈၸိူဝ်ႉၸၢတ်ႈ ၸူဝ်ႈၶၢဝ်းၼႆႉ ပဵၼ်ဢူၺ်းလီၵၼ်ဝႆႉၸွမ်း ပႃႇတီႇမိူင်း မွၼ်း (ၸုမ်းတိုၵ်းတေႃး ၽဵဝ်ႈမူၺ်ႉၸဝ်ႈဢႃႇၼႃႇ သိုၵ်းမၢၼ်ႈ)၊ K3C ဢၼ်ပဵၼ်တပ်ႉသိုၵ်းၶၢင် လွတ်ႈလႅဝ်း (KIO)၊ တပ်ႉသိုၵ်းၸိူဝ်ႉၸၢတ်ႈ ယၢင်းၽိူၵ်ႇ (KNU)၊ ပႃႇတီႇၶိုၼ်ႈယႂ်ႇၸိူဝ်ႉၸၢတ်ႈယၢင်းလႅင် (KNPP) လႄႈ တပ်ႉသိုၵ်းၸိူဝ်ႉၸၢတ်ႈၶျၢင်း (CNF) ၸိူဝ်းၼႆႉ။
တႅမ်ႈ – ၽူၺ်းၼုမ်ႇ
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ