တႄႇႁူဝ်လိူၼ်မၢတ်ႊၶျ် ၼႂ်းပီ 2025 ၼႆႉမႃး သိုၵ်းၵဝ်ႈၵၢင်ႉ MNDAA တင်ႈၵဵတ်ႉ/ လၢၼ်ႇ တီႈဢေးသျႃး ဝေႃး တၢင်းဢွၵ်ႇဝဵင်းသႅၼ်ဝီ ၼႂ်းၸိုင်ႈတႆးပွတ်းႁွင်ႇသေ တႄႇၵဵပ်းၶွၼ်ႇ တီႈၸဝ်ႈၵႃးၸိူဝ်းတေႃႉၼမ်ႉ မၼ်းၸိူဝ်ႉၾႆး (ထၢတ်ႈသီႇ/တီႇၸေႇ) တႃႇဢဝ်မိူဝ်းၶၢႆတၢင်းၸႄႈဝဵင်းၵူတ်ႉၶၢႆ ၊ ၼမ်ႉၶမ်း ၊ ၵုၼ်လူင်လႄႈ ႁူဝ်ပၢင်ႇ ၸဵမ်ၸိူဝ်းၼၼ်ႉ။
ၵူၼ်းမိူင်းသႅၼ်ဝီ ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ၸႂ်ႈယဝ်ႉဝႃႈ ၶဝ်ၵဵပ်းၶွၼ်ႇ ၵႃးတၢင်ႇၼမ်ႉမၼ်း ၸွမ်းၵဵတ်ႉဢေးသျႃးဝေႃး တီႈပၢင်ႇလေႃႉလႄႈ ၵဵတ်ႉဢေးသျႃးဝေႃး တၢင်းၵႂႃႇၵူတ်ႉၶၢႆၼၼ်ႉ။ ႁူႉဝႃႈ ၶဝ်ယွၼ်းၼမ်မႃး လိူဝ်ၵဝ်ႇၼႆၵူၺ်း။ လႆႈပၼ်ၶွၼ်ႇၼိုင်ႈလမ်း ႁူဝ်ပၢၵ်ႇသႅၼ်မၼ်းၼႆတႄႉၵေႃႈ ဢမ်ႇလႆႈငိၼ်းၼင်ႇၵဝ်ႇ။ လႆႈငိၼ်းတႄႉ ၼပ်ႉႁူဝ်သႅၼ်မၼ်းၵူၺ်း”- ဝႃႈၼႆ။
ယွၼ်ႉသိုၵ်းၵဝ်ႈၵၢင်ႉ တႄႇတင်ႈလၢၼ်ႇ ၵဵပ်းၶွၼ်ႇတီႈၸဝ်ႈၵႃးတေႃႉတၢင်ႇၼမ်ႉမၼ်းၸိူဝ်ႉၾႆး ဢၼ်သူင်ႇၶၢႆၸိူင်ႉၼႆၼႆႉ လႆႈႁၼ်ၵႃးတေႃႉတၢင်ႇၼမ်ႉမၼ်း ၸိူဝ်းတေၵႂႃႇၶၢႆတၢင်း တၢင်ႇဝဵင်းၼၼ်ႉ လႆႈၵိုတ်းၶမ်ဝႆႉ ၸွမ်းၶၢင်ႈတၢင်းပၢင်ႇၼႃးတူႈ ႁိမ်းၶူဝ်လူင် ဝဵင်းသႅၼ်ဝီ ၼၼ်ႉယူႇ ဝႃႈၼႆ။
ၸဝ်ႈပၢႆးမၢၵ်ႈမီး ၵေႃႉၼိုင်ႈ ၼႂ်းဝဵင်းသႅၼ်ဝီ ဢၼ်ၵႂႃႇတေႃႉဢဝ်ၼမ်ႉမၼ်း ၸိူဝ်ႉၾႆး တၢင်းမိူင်းတႆးပွတ်းၸၢၼ်း မႃးၶၢႆတၢင်းမိူင်းတႆးပွတ်းႁွင်ႇၼၼ်ႉ လၢတ်ႈၼႄဝႃႈ – “သိုၵ်းဢၼ်တူင်ႉၼိုင်ၸွမ်းတၢင်းၼၼ်ႉၵေႃႈ ၼမ်ၼႃႇ။ ၵဵတ်ႉၵေႃႈၼမ်ၼႃႇ။ ၼိုင်ႈတီႈၼႆႉ လႆႈပၼ်ၶဝ်ၼမ်ႉမၼ်းၸၢၵ်ႈ သွင်ပုင်းလိူင်ၼၼ်ႉ”- ဝႃႈၼႆ။
ယွၼ်ႉၸဝ်ႈၵုၼ်ႇၵႃႉၶၢႆၼမ်ႉမၼ်းၶဝ် လႆႈပၼ်ၶွၼ်ႇတီႈ ၸုမ်းယိပ်းၵွင်ႈၵၢင်ႇၼမ်လိူဝ်ႁႅင်းလႄႈ ၶၼ်ၼမ်ႉ မၼ်းၸိူဝ်ႉၾႆး တၢင်းမိူင်းတႆးပွတ်းႁွင်ႇၼႆႉ သုင်ၶိုၼ်ႈၵူႈမိုဝ်ႉၵူႈဝၼ်း။ ႁဵတ်းႁႂ်ႈၵူၼ်းမိူင်း ၸိူဝ်းယူႇၼႂ်း ပိုၼ်ႉတီႈမီးလွင်ႈယၢပ်ႇၽိုတ်ႇ ၵပ်ႉၵိၼ်းၸႂ် ၼႆယဝ်ႉ။
တီႈဝဵင်းသႅၼ်ဝီၼႆႉ သိုၵ်းၵဝ်ႈၵၢင်ႉ MNDAA ယိုတ်းၵုမ်းဝႆႉ တင်ႈတႄႇၽႅၼ်ယၼ်ႇသိုၵ်း 1027 ၼၼ်ႉမႃးႁၢၼ်ႉတေႃႇထိုင်ယၢမ်းလဵဝ်။
တႅမ်ႈ – ၽူၺ်းၼုမ်ႇ
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ