ၼႂ်းလိူၼ် ၾႅပ်ႊပိဝ်ႊရီႊ ၶၢဝ်းတၢင်းလိူၼ်လဵဝ်ၵူၺ်း သိုၵ်းမၢၼ်ႈပွႆႇမၢၵ်ႇတီႈဝဵင်းၼွင်ၶဵဝ် ၵူၼ်းမိူင်းလူႉတၢႆ 13 ၵေႃႉ ၊ မၢတ်ႇၸဵပ်း 36 ၵေႃႉ ။
ၵူၼ်းၸၢႆးပိုၼ်ႉတီႈလၢတ်ႈၽူႈတွႆႇႁွၵ်ႈဝႃႈ -“ပၢင်တိုၵ်းတင်းဢုမ်ႇတီးၼႆႉတႄႉ ယဵၼ်ဝႆႉ 2-3 ဝၼ်းယဝ်ႉ ၊ သိုၵ်းမၢၼ်ႈၵႆႉမႃးပွႆႇမၢၵ်ႇၼႃႇလႄႈ ၵူၼ်းဝၢၼ်ႈတႄႉဢမ်ႇႁတ်းမိူဝ်းတူၺ်းႁိူၼ်းၶိုၼ်း ၊ တင်းတွင်းၶမ်းၼႆႉ တႄႉ ပၢင်တိုၵ်းဢမ်ႇယဵၼ် ၊ ၾၢႆႇတင်းသိုၵ်းမၢၼ်ႈသမ်ႉ ၵႆႉဢဝ်ၶိူင်ႈမိၼ်မႃးပွႆႇမၢၵ်ႇၸွႆႈ။ ၶဝ်ႁဵတ်းၸိူင်ႉၼႆ တုမ်ႉတိူဝ်ႉၵူၼ်းဝၢၼ်ႈၵူၼ်းသူၼ်ၵူၺ်း”- ဝႃႈၼႆ ။
ဝၼ်းတီႈ 28/2/2025 ယၢမ်းဝၢႆးဝၼ်း 3 မူင်းၶိုင်ႈ သိုၵ်းမၢၼ်ႈပွႆႇမၢၵ်ႇတီႈဝၢၼ်ႈသူၺ်ႇမူၵ်ႉၻေႃး ဝဵင်းၼွင်ၶဵဝ် 3 လုၵ်ႈ။ ၸဝ်ႈၶၢဝ်ပႃးၼိုင်ႈ မၢတ်ႇၸဵပ်း ၊ ႁိူၼ်းၵူၼ်းပိုၼ်ႉတီႈလူႉၵွႆ 5 လင် ဝတ်ႉၵျွင်းမုၼ်ၸဝ်ႈၵေႃႈလူႉၵွႆၵူၼ်ႇပင်း။
ဝၼ်းတီႈ 23/2/2025 သိုၵ်းမၢၼ်ႈ ၸႂ်ႉပႃးၶိူင်ႈမၢၵ်ႇၵွင်ႉငူၼ်ႉထၢတ်ႈ ပိုတ်းယိုဝ်း တီႈဝၢၼ်ႈတွင်ႇၶျေႇ မၢၼ်ႈမေႃႇ လႄႈ လုၵ်ႈၸုမ်း TNLA မၢတ်ႇၸဵပ်း 10 ၵေႃႉ ၊ ၼႂ်းၼၼ်ႉ 4 ၵေႃႉ မၢတ်ႇၸဵပ်းႁၢဝ်ႈႁႅင်း ၼႆ TNLA ပိုၼ်ၽၢဝ်ႇဝႆႉၼင်ၼႆ ။
ဝၼ်းတီႈ 22/2/2025 သိုၵ်းမၢၼ်ႈပွႆႇမၢၵ်ႇသႂ်ႇ ဝၢၼ်ႈသူၺ်ႇမူၵ်ႉၻေႃး လႄႈ ဝၢၼ်ႈတွင်ႇၶျေႇ လႄႈ ၵူၼ်းပိုၼ်ႉတီႈ တၢႆၵေႃႉၼိုင်ႈ ၊ ယွၼ်ႉပဵၼ်ပၢင်တိုၵ်းၸိူင်ႉၼႆ ၶိူဝ်းယႂ်းလႄႈ ၵူၼ်းမိူင်းပိုၼ်ႉတီႈ ယၢပ်ႇၽိုတ်ႇတႃႇ ႁႃၵိၼ်လဵင်ႉတွင်ႉ ဝႃႈၼႆ ။
“ယၢမ်းလဵဝ်ပဵၼ်ၶၢဝ်းတႅပ်းဢွႆႈၵေႃႈ ဢမ်ႇၸၢင်ႈႁဵတ်းႁိုဝ်မိူဝ်းဢဝ်ဢွႆႈ ၊ ပၢင်တိုၵ်းတေပဵၼ်ၶိုၼ်းမိူဝ်ႈလႂ် ၊ သိုၵ်းမၢၼ်ႈတေမႃးပွႆႇမၢၵ်ႇတီႈလႂ်ၵေႃႈ ဢမ်ႇႁူႉ ၊ ဢမ်ႇမီးငိုၼ်းပၢႆႈၵႂႃႇၵႆလႄႈ ပၢႆႈ ယူႇၼႂ်းႁူၺ်ႈ ၼႂ်းလွႆ ၸိူင်ႉၼႆၵူၺ်းယဝ်ႉ ဢမ်ႇၸၢင်ႈဝူၼ်ႉတႃႇ ပၢႆးမၢၵ်ႇမီးသင် ၊ လႆႈပႂ်ႉထွမ်ႇသဵင်မၢၵ်ႇၵူႈဝၼ်း ”- ဝႃႈၼႆ ။
ဝၼ်းတီႈ 20/2/2025 သိုၵ်းမၢၼ်ႈပွႆႇမၢၵ်ႇတီႈ ဝၢၼ်ႈလွၵ်းၽၢၼ်း ဝဵင်းၼွင်ၶဵဝ် ၵူၼ်းတၢႆ 1 ၵေႃႉ ၊ မၢတ်ႇၸဵပ်း 4 ၵေႃႉ လႄႈ ႁိူၼ်းၵွႆ 6 လင် ။ ပွႆႇမၢၵ်ႇတီႈဝၢၼ်ႈဝႄးပွင်း 2 လုၵ်ႈ ၵူၼ်းတၢႆ 3 ၵေႃႉ ၊ မၢတ်ႇၸဵပ်း 7 ၵေႃႉ ႁိူၼ်းၵွႆ 5 လင် ။
ဝၼ်းတီႈ 10/2/2025 သိုၵ်းမၢၼ်ႈပွႆႇမၢၵ်ႇ 20 လုၵ်ႈတီႈဝဵင်းမိူင်းၵုတ်ႈ ၵူၼ်းမိူင်းတၢႆ 5 ၵေႃႉ ၊ မၢတ်ႇၸဵပ်း ႁၢဝ်ႈႁႅင်း 19 ၵေႃႉ ႁိူၼ်းၵွႆ 5 လင် ။
ဝၼ်းတီႈ 6/2/2025 သိုၵ်းမၢၼ်ႈပွႆႇမၢၵ်ႇတီႈ ဝၢၼ်ႈသပ်ႉပေႇ ၸႄႈဝဵင်းၼွင်ၶဵဝ် ၵူၼ်းမိူင်းမၢတ်ႇၸဵပ်း 1ၵေႃႉ ၊ ႁိူၼ်းယေးလူႉၵွႆႇ 5 လင် ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ