ၵူၼ်းမိူင်းဝဵင်းၼမ်ႉလၼ်ႈ ၸိုင်ႈတႆးပွတ်းႁွင်ႇ ဢၼ်ပၢႆႈၽေးသိုၵ်းမႃးယူႇဝႆႉ တီႈဝဵင်းမိူင်းၼၢႆး ၸိုင်ႈတႆးပွတ်းၸၢၼ်းၼၼ်ႉ ယၢမ်းလဵဝ်တွပ်ႇလိၵ်ႈယဝ်ႉလီငၢမ်း ၊ တၢင်းဝၢၼ်ႈၵိူတ်ႇ မိူင်းၼွၼ်းၵေႃႈ ငဝ်းလၢႆးပၢင်တိုၵ်းယဵၼ်ဝႆႉလႄႈ ဢွၼ်ၵၼ်ပွၵ်ႈၶိုၼ်း ႁိူၼ်းယေးၽႂ်မၼ်း။
ဢိင်ၼိူဝ်ပၢင်တိုၵ်း ၽႅၼ်ယၼ်ႇသိုၵ်း 1027 သေ ႁၢင်ပီ ပီၵၢႆ 2024 ၼႆႉ ပၢင်တိုၵ်းၼႂ်းၵႄႈ သိုၵ်းၶႄႇၵဝ်ႈၵၢင်ႉ MNDAA လႄႈ သိုၵ်းမၢၼ်ႈ လၢမ်းထိုင်ၸႄႈဝဵင်းသီႇပေႃႉ ၊ ထိုင်ဝဵင်း ၼမ်ႉလၼ်ႈ ။ ၵူၼ်းမိူင်းဝဵင်းၼမ်ႉလၼ်ႈ ဢွၼ်ဢဝ်လုၵ်ႈလၢင်းလုၵ်ႈဢွၼ်ႇၸဝ်ႈၵဝ်ႇ ပၢႆႇဢွၵ်ႇပိုၼ်ႉတီႈ ႁွတ်ႈထိုင်တီႈဝဵင်းမိူင်းၼၢႆး ၸိုင်ႈတႆးပွတ်းၸၢၼ်း။
ယၢမ်းလဵဝ် လုၵ်ႈလၢင်းၵၢင်တဝ်ႈ တွပ်ႇလိၵ်ႈယဝ်ႉယႃႇလီငၢမ်း၊ တၢင်းဝဵင်းၼမ်ႉလၼ်ႈၵေႃႈ သဵင်ၵွင်ႈယဵၼ်ဝႆႉယဝ်ႉလႄႈ ၸဵမ်လုၵ်ႈႁဵၼ်းလႄႈမေႃသွၼ် ဢၼ်မီးတီႈဝဵင်းမိူင်းၼၢႆး 400 ပၢႆဢွၼ်ၵၼ်ပွၵ်ႈၶိုၼ်းႁိူၼ်းယေးယဝ်ႉၼႆ – ၵူၼ်းၼုမ်ႇ ၽူႈၸွႆႈထႅမ် ၵူၼ်းပၢႆႈၽေးသိုၵ်း တီႈဝဵင်းမိူင်းၼၢႆးၵေႃႉၼိုင်ႈလၢတ်ႈၼင်ႇၼႆ။
“ပီႈၼွင်ႉၼမ်ႉလၼ်ႈ ပၢႆႈၽေးသိုၵ်းႁွတ်ႈထိုင်မႃးမိူင်းၼၢႆး မိူဝ်ႈဝၼ်းတီႈ 8/12/2024။ ၸိူဝ်းၶဝ်မီး လုၵ်ႈဢွၼ်ႇႁဵၼ်းလႄႈမေႃသွၼ်တင်းမူတ်း 432 ၵေႃႉ။ ၸၼ်ႉငဝ်ႈထိုင် ၸၼ်ႉသုင် ၵူႈသႅၼ်းပၢၼ်ယဝ်ႉ။ လႆႈၸွႆႈၸတ်းပၼ်တႃႇႁဵၼ်းသွၼ်လိၵ်ႈလၢႆး 4 တီႈ။ ၼႂ်းဝူင်ႈလိုၼ်းသုတ်း လိူၼ်ၾႅပ်ႉပိဝ်ႊရီႊၼႆႉ ၶဝ်တွပ်ႇလိၵ်ႈယဝ်ႉယဝ်ႉလႄႈ ပွၵ်ႈၶိုၼ်းႁိူၼ်း ယဝ်ႉ။ ၵိုတ်းယူႇ လုၵ်ႈႁဵၼ်းၸၼ်ႉသုင် 160 ပၢႆ။ ပႆႇလႆႈတွပ်ႇလိၵ်ႈလႄႈပႆႇၸၢင်ႈမိူဝ်း”
လုၵ်ႈႁဵၼ်းလႄႈမေႃသွၼ်ၸိူဝ်းၼႆႉ ၵူၼ်းမိူင်းၼၢႆး ၸွႆႈၸတ်းတီႈယူႇ ႁွင်ႈႁဵၼ်းပၼ် တီႈၵျွင်းမုၼ်ၸဝ်ႈ ၼႂ်းဝဵင်းမိူင်းၼၢႆး 4 တီႈ။ တီႈဝတ်ႉၵမ်ႇမထၢၼ်း ၼႃးၶၢၼ် မီးမေႃသွၼ် 9 ၵေႃႉ လုၵ်ႈႁဵၼ်း 97 ၵေႃႉ။ တီႈႁူင်းႁဵၼ်း ဝိၸ်ႉၸႃႇရိယ(ၽႄ)တုမ်ႇမူဝ်ၼႃးလိၼ်း မီးမေႃသွၼ် 11 ၵေႃႉလႄႈ လုၵ်ႈႁဵၼ်း 154 ၵေႃႉ။ တီႈဝတ်ႉမူၺ်ႇတေႃႇ သူၼ်မၢၵ်ႇယၢၼ်း သမ်ႉမီးမေႃသွၼ် 3 ၵေႃႉ လုၵ်ႈႁဵၼ်း 71 ၵေႃႉ။ တီႈဝတ်ႉ ဝိၸ်ႉၸႃႇရိယ ပွၵ်ႉလွႆဝႄႈ မီးမေႃသွၼ် 7 ၵေႃႉလႄႈလုၵ်ႈႁဵၼ်း 80 ။
ယၢမ်းလဵဝ် ပွၵ်ႈမိူဝ်းၶိုၼ်းယဝ်ႉ 270 ပၢႆ ပဵၼ်လုၵ်ႈႁဵၼ်းၸၼ်ႉငဝ်ႈလႄႈၸၼ်ႉၵၢင်။ လုၵ်ႈႁဵၼ်းၸၼ်ႉသုင် ဢၼ်ပႆႇလႆႈတွပ်ႇလိၵ်ႈတႄႉ တိုၵ်ႉၵိုတ်းဝႆႉ 160 ပၢႆ။ ပေႃးတွပ်ႇလိၵ်ႈယဝ်ႉၸင်ႇၸၢင်ႈပွၵ်ႈႁိူၼ်းၶိုၼ်း – ၵူၼ်းၼုမ်ႇဢၼ်တူင်ႉၼိုင်ၸွႆႈထႅမ်ၵူၼ်းပၢႆႈၽေးသိုၵ်းၼၼ်ႉလၢတ်ႈၼင်ႇၼႆ။
“ပီႈၼွင်ႉပၢႆႈၽေးသိုၵ်းမႃး သမ်ႉပႃးလုၵ်ႈဢွၼ်ႇႁဵၼ်းမႃးၸွမ်းလႄႈ ႁဝ်းၶႃႈၼႅတ်ႈဢွၼ်ၵၼ် ဢုပ်ႇၵၼ်သေၸတ်းပၼ်တီႈယူႇ တီႈႁဵၼ်း တီႈၼွၼ်း ႁွင်ႈၽၢႆႈ ၸိူဝ်းၼႆႉဢေႃႈ ။ တႃႇယူႇ ၵိၼ် သွၼ်ႁဵၼ်းတႄႉၵေႃႈ ၼႂ်းၶၢဝ်းတၢင်း 3-4 လိူၼ်ၼႆႉ ၼွၵ်ႈလိူဝ်ပီႈၼွင်ႉမိူင်းၼၢႆးယဝ်ႉ မီး ပီႈၼွင်ႉတႆးႁဝ်း၊ ၸုမ်းတူင်ႇဝူင်းၵူၼ်းတႆးႁဝ်း တီႈၸမ်တီႈၵႆ မိူၼ်ၼင်ႇ TYO, ၸုမ်းလုၵ်ႈ ႁဵၼ်းတႆး,ၸုမ်းၼမ်ႉၶူင်းပရႁိတ လႄႈ ႁႅင်းၵၢၼ်ယၢၼ်မိူင်း ၸိူဝ်းၵႂႃႇမီးတီႈ မိူင်းၶူဝ်ႊရီႊယႃႊၸၢၼ်း၊ မိူင်းထႆး ၸိူဝ်းၼႆႉၵေႃႈ ၵမ်ႉထႅမ်လူႇတၢၼ်းၸွႆႈမႃးၵမ်ႈၽွင်ႈလႄႈ ဢမ်ႇမီးလွင်ႈတၢင်းၶွင်ႉၶမ်သင် ၼင်ႇၵဝ်ႇၶႃႈ။ လွင်ႈယူႇလွင်ႈၵိၼ် ၸဵမ်ပၢႆးယူႇလီ ၵၢၼ်ႁဵၼ်းၵၢၼ်သွၼ် ငၢႆႈလူမ်ၸႂ်ယူႇ။”- ဝႃႈၼႆ။
ၽွင်းလိူၼ် ၼူဝ်ႊဝႅမ်ႊပိူဝ်ႊ ပီ 2024 သိုၵ်းၵဝ်ႈၵၢင်ႉ MNDAA လႄႈသိုၵ်းမၢၼ်ႈပိုတ်းယိုဝ်း ၵၼ်ၼႂ်းၸႄႈဝဵင်းသီႇပေႃႉ။ သိုၵ်းၵဝ်ႈၵၢင်ႉယိုတ်းလႆႈတပ်ႉပၢင်သဝ်း သိုၵ်းမၢၼ်ႈလၢႆလၢႆဢၼ် ၼႂ်းထုင်ႉ ၼႃးမၢၵ်ႇၶေႃ၊ သိုၵ်းမၢၼ်ႈ ယိုဝ်းမၢၵ်ႇလူင်တူၵ်းသႂ်ႇၼႂ်း ပွၵ်ႉပၢင်ႁႆႈ၊ ၵွင်းလၢင်း၊ ပွၵ်ႉၸၢၼ်းၸိူဝ်းၼႆႉ။ သိုၵ်း MNDAA သမ်ႉယူႇၾၢႆႇႁွင်ႇဝဵင်း ယိုဝ်းမၢၵ်ႇလူင် ၸူးသိုၵ်းမၢၼ်ႈ ဢၼ်ပႂ်ႉၵဵတ်ႉ/ လၢၼ်ႇ တီႈၼိူဝ်သဵၼ်ႈတၢင်းလူင် ၼမ်ႉလၼ်ႈ – မိူင်းလိူၼ်း တၢင်းၸဵင်ႇ ႁွင်ႇဝၼ်းဢွၵ်ႇဝဵင်းၼမ်ႉလၼ်ႈ ၸိူဝ်းၼႆႉ။ ႁဵတ်းႁႂ်ႈမၢၵ်ႇတူၵ်းသႂ်ႇႁိူၼ်းယေးၵူၼ်းမိူင်း မၢတ်ႇၸဵပ်းလူႉတၢႆၼမ်။ ၵူၼ်းမိူင်းၼမ်ႉလၼ်ႈဢွၼ်ၵၼ်ပၢႆႈဢွၵ်ႇဝဵင်း လူင်းမႃးယူႇ သဝ်းၸွမ်း ၵေးသီး၊ မိူင်းၵိုင်၊ လၢႆးၶႃႈ ၊ ပၢင်လူင် ထိုင်မႃး မိူင်းၼၢႆး ၸိူဝ်းၼႆႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ