ၼၢင်းယိင်း 2 ၵေႃႉ သွၼ်ႉရူတ်ႉၶိူင်ႈၸွမ်းၵၼ်မႃး ၺႃးၵူၼ်းၸၢႆး 2 ၵေႃႉ သွၼ်ႉရူတ်ႉၶိူင်ႈၸွမ်းလင်သေ ၸၵ်ႉၶုတ်ႈႁိမ်ဢဝ်ထူင်ငိုၼ်းပၢႆႈ တီႈၼႂ်းၵၢင်ဝဵင်းမူႇၸေႊ ဝႃႈၼႆ။

ဝၼ်းတီႈ 25/02/2025 ယၢမ်းႁူဝ်ၶမ်ႈ တီႈၼိူဝ်သဵၼ်ႈတၢင်းလူင်မူႇၸေႊ ၼႂ်းပွၵ်ႉၵၢတ်ႇ ၾၢႆႇၼႃႈႁူင်းႁႅမ်း သူၺ်ႇယႃႇၸု (ရွှေရာစု) ၼႂ်းၵၢင်ဝဵင်းမူႇၸေႊ ၸိုင်ႈတႆးပွတ်းႁွင်ႇ လႅၼ်လိၼ်တႆး – ၶႄႇ မိူဝ်ႈၽွင်းၼၼ်ႉ မီးၼၢင်းယိင်း 2 ၵေႃႉ သွၼ်ႉရူတ်ႉၶိူင်ႈမႃးၸွမ်းၵၼ်သေ ၺႃးၵူၼ်းၸၢႆး 2 ၵေႃႉ ၶီႇရူတ်ႉၶိူင်ႈ ၸွမ်းလင်မႃး ၸၵ်ႉႁိမ်ဢဝ်ထူင်ငိုၼ်းၵႂႃႇ ထိုင်တီႈရူတ်ႉၶိူင်ႈၶႃ ပိၼ်ႈၵႂႃႇၵၢင်တၢင်း ထူင်ငိုၼ်းၵေႃႈ သုမ်းပႃးၸွမ်း။

ၼႂ်းၵွင်ႈထၢႆႇ CCTV တႄႉ ပိုၼ်ၽႄႈဢွၵ်ႇဝႆႉ – ႁၼ်ၵူၼ်းၸၢႆး 2 ၵေႃႉ သွၼ်ႉရူတ်ႉၶိူင်ႈၸွမ်းလင် ၼၢင်းယိင်း 2 ၵေႃႉၼၼ်ႉ ၵူၼ်းၸၢႆးၵေႃႉသွၼ်ႉတင်းလင်ၼၼ်ႉ ၸၵ်ႉၶုတ်ႈႁိမ်ဢဝ်ထူင်ငိုၼ်း တီႈၼၢင်းယိင်းၵေႃႉသွၼ်ႉတင်းလင်ရူတ်ႉၶိူင်ႈၼၼ်ႉသေ ႁေႃႈပၢႆႈ။ ၼၢင်းယိင်း 2 ၵေႃႉၼၼ်ႉ ထိုင်တီႈလူမ်ႉရူတ်ႉၶိူင်ႈၵႂႃႇ ၼႂ်းၵၢင်တၢင်း – ၼႆယဝ်ႉ။

ဢိင်ၼိူဝ်လွင်ႈၼႆႉ ၵူၼ်းပိုၼ်ႉတီႈလၢတ်ႈဝႃႈ – လွင်ႈၸၵ်ႉႁိမ်ဢဝ်ၸိူင်ႉၼႆၼႆႉ ၼႂ်းဝဵင်းမူႇၸေႊ ၵႆႉပဵၼ်ၼႃႇ။ ဢၼ်ႁၢႆႉႁႅင်းသုတ်းသမ်ႉ ပဵၼ်လွင်ႈ ယိပ်းၵွင်ႈယိပ်းလႅဝ်း ၶဝ်ႈၸူၼ်ထိုင် ၼႂ်းႁိူၼ်းယေး၊ ယူႇတီႈ ပလိၵ်ႈၽူႈမီးပုၼ်ႈၽွၼ်းၵေႃႈ ဢမ်ႇတီႉၺွပ်းပၼ်တၢမ်ႇလႆႈ။ ၵူၼ်းမိူင်းၵူၺ်းလႆႈၾၢင်ႉၵၼ် ယူႇသဝ်းၵႂႃႇမႃး – တီႈသိုဝ်ႇၶၢဝ်ႇသူၺ်ႇပျီႇမျေႇတႄႉ တႅမ်ႈတၢင်ႇဝႆႉၼင်ႇၼႆ။  

ပူၼ်ႉမႃး ဝၼ်းတီႈ 07/02/2025 ယၢမ်းၵၢင်ၶမ်ႈ 9:05 မူင်း မီးၵူၼ်းၸၢႆး 4 ၵေႃႉ သႂ်ႇၶူဝ်းမိူၼ်ၸုမ်းပျီႇတူႉၸိတ်ႉသေ ယိပ်းၵွင်ႈၸေးမိုဝ်း ၶဝ်ႈၸူၼ်ၼႂ်းႁၢၼ်ႉၶၢႆၾူၼ်း ႁၢၼ်ႉၼိုင်ႈ တီႈပွၵ်ႉၸွၼ်ႊၸူဝ်ႇ ဝဵင်းမူႇၸေႊ။

ဝဵင်းမူႇၸေႊၼႆႉ ပဵၼ်ဝဵင်းလႅၼ်လိၼ် တိတ်းၸပ်းၶႄႇ ဝဵင်းၼိုင်ႈ ယဝ်ႉၵေႃႈ ပဵၼ်ဝဵင်းၵႃႉၶၢႆၵေႃႈၸႂ်ႈလႄႈ ၼွၵ်ႈလိူဝ်သိုၵ်းမၢၼ်ႈ ပလိၵ်ႈမၢၼ်ႈယဝ်ႉ ၸုမ်းပျီႇတူႉၸိတ်ႉလႄႈ ၸုမ်းယိပ်းၵွင်ႈၵၢင်ႇတူင်ႉ ၸိူဝ်းၼႆႉ ၵေႃႈ တူင်ႉၼိုင်ၵႂႃႇမႃးၼမ်။ ၾၢႆႇၼိုင်ႈၵေႃႈ ယႃႈမဝ်းၵမ်လႄႈ ပၢင်တေႃႇလွင်း လိူင်ႇၼမ်၊ ဢမ်ႇမီးၸုမ်းလႂ် ဢဝ်ပုၼ်ႈၽွၼ်းၽဵဝ်ႈယိုတ်းပႅတ်ႈ၊ ႁဵတ်းႁႂ်ႈ ၵူၼ်းပိုၼ်ႉတီႈ လႆႈမႆႈၸႂ် ဢမ်ႇမီးလွင်ႈႁူမ်ႇလူမ်ႈ။