ဢွၼ်ႇယိင်းၼုမ်ႇ ဢႃယု 15 ပီ ၵေႃႉၼိုင်ႈ ၺႃးသိုၵ်းၵဝ်ႈၵၢင်ႉ တီႉၺွပ်းၵႂႃႇ ၵဵဝ်ႇလူၺ်ႈၵူၼ်းသိုၵ်းၶဝ် ၼင်ႇၵၼ် ၽိတ်းမေႃးယိုဝ်းၵၼ်တၢႆၵေႃႉၼိုင်ႈ ယွၼ်ႉၶႅၼ်မၼ်းၼၢင်း ဝႃႈၼႆ။

ပူၼ်ႉမႃး ဝၼ်းတီႈ 07/02/2025 ယၢမ်းဝၢႆးဝၼ်း 2 မူင်း ၼၢင်းယိင်းႁွမ် ဢႃယု 15 ပီ ၺႃးသိုၵ်းၵဝ်ႈၵၢင်ႉ MNDAA တီႉၺွပ်းၵုမ်းတူဝ်မၼ်းၼၢင်းၵႂႃႇ တီႈပွႆးသၢင်ႇလွင်း ဝၢၼ်ႈၼႃးပႅၼ်ႈ ၼႂ်းထုင်ႉမိူင်းယေႃ ၸႄႈ ဝဵင်းလႃႈသဵဝ်ႈ ၸိုင်ႈတႆးပွတ်းႁွင်ႇ ႁၢၼ်ႉတေႃႇထိုင်ယၢမ်းလဵဝ် ၸမ် 20 ဝၼ်းယဝ်ႉ ပႆႇပွႆႇတူဝ်ၶိုၼ်း ဝႃႈၼႆ။

ၵူၼ်းၸမ်ၸႂ် ပေႃႈမႄႈ ၼၢင်းယိင်းႁွမ် လၢတ်ႈၽူႈတွႆႇႁွၵ်ႈဝႃႈ – “လွင်ႈတင်းမၼ်းပဵၼ်ၼႆ ဝၼ်းတီႈ 7 ယၢမ်းၵၢင်ၼႂ် 6 မူင်းၶိုင်ႈ သိုၵ်းၵဝ်ႈၵၢင်ႉ ဢၼ်ပၵ်းဝႆႉၼႂ်းဝၢင်းဝတ်ႉဝၢၼ်ႈလူင်မူၼ်းၼၼ်ႉ ၶဝ်ၼင်ႇၵၼ် ၽိတ်းမေႃးၵၼ်သေ ယိုဝ်းၵၼ်တၢႆ ၵေႃႉၼိုင်ႈ။ ပၼ်ႁႃမၼ်းၼႆႉ ၶဝ်ၼႄးဝႃႈ ယွၼ်ႉၶႅၼ်ၵၼ်ၸွမ်း ဢေးၼွင်ႉၼႆႉၼႆဝႃႇ။ ၵွပ်ႈၼႆလႄႈ သိုၵ်းၶဝ် ၸင်ႇ ၵႂႃႇတီႉၺွပ်းဢဝ် ဢေးၼွင်ႉၼႆႉ တီႈပွႆးသၢင်ႇလွင်း ဝၢၼ်ႈၼႃးပႅၼ်ႈၼၼ်ႉ မႃးၶင်ဝႆႉတီႈၼႂ်းတပ်ႉၶဝ် ႁၢၼ်ႉတေႃႇထိုင်ယၢမ်းလဵဝ် ပႆႇပွႆႇတူဝ်ၶႃႈ”- ဝႃႈၼႆ။

ၼၢင်းယိင်းႁွမ် ဢႃယု 15 ပီၼႆႉ ပဵၼ်ၵူၼ်းဝၢၼ်ႈလူင်မူၼ်း မိူဝ်ႈဝၼ်းၼၼ်ႉ မၼ်းၼၢင်းတင်း ပေႃႈလႄႈ ဢူၺ်းၵေႃႉ ထႅင်ႈၵေႃႉၼိုင်ႈ ၵႂႃႇၶဝ်ႈႁူမ်ႈပွႆးသၢင်ႇလွင်း တီႈဝၢၼ်ႈၼႃးပႅၼ်ႈသေ ယင်းပႆႇတၼ်းပွၵ်ႈႁိူၼ်း ထိုင်မႃးယၢမ်းဝၢႆးဝၼ်း 2 မူင်း သိုၵ်းၵဝ်ႈၵၢင်ႉၼၼ်ႉ ဢဝ်ၵႃးသေ ၵႂႃႇတီႉၺွပ်းဢဝ်တူဝ်မၼ်းၼၢင်း တီႈပွႆး ၼၼ်ႉ ပွၵ်ႈမႃးတီႈတပ်ႉၶဝ် ဝၢၼ်ႈလူင်မူၼ်း။ မိူဝ်ႈၽွင်းၼၼ်ႉ ၵေႃႉပဵၼ်ပေႃႈမၼ်းၼၢင်း ယွၼ်းမႃးၸွမ်း ၵေႃႈ သိုၵ်းၶဝ်ဢမ်ႇပၼ်ၸွမ်း ဝႃႈၼႆ။

“ယၢမ်းလဵဝ် ဢေးၼွင်ႉၼၼ်ႉ ထုၵ်ႇတီႉၺွပ်းဝႆႉ တီႈၼႂ်းတပ်ႉသိုၵ်းၶဝ် ဢၼ်ပၵ်းဝႆႉတီႈ ၼႂ်းဝၢင်းဝတ်ႉလူင် မူၼ်းၼႆႉ။ မိူဝ်ႈဝၼ်းတီႈ 8 ၼၼ်ႉ ယူႇတီႈ ၽူႈယႂ်ႇၵူၼ်းလူင် ၵႂႃႇတုၵ်းယွၼ်းႁႂ်ႈပွႆႇပၼ်ၵေႃႈ ၶဝ်ဢမ်ႇယွၼ်း ပွႆႇပၼ်။ ၵေႃႉပဵၼ်မႄႈမၼ်းၼၢင်းလၢတ်ႈဝႃႈ ဢေးၼွင်ႉၼႆႉ ႁဵတ်းၵၢၼ်ပႂ်ႉသႅင်ႈၾူၼ်း တီႈမိူင်းယေႃၼႆႉ  ဢမ်ႇလႆႈပဵၼ်ၸူႉၵၼ်တင်းၵူၼ်းသိုၵ်းသေၵေႃႉ”- ၵူၼ်းၸမ်ၸႂ် ပေႃႈမႄႈၼၢင်းယိင်းႁွမ် သိုပ်ႇလၢတ်ႈၼႄ ၼင်ႇၼႆ။

ယၢမ်းလဵဝ် ၵေႃႉပဵၼ်ပေႃႈမႄႈပီႈၼွင်ႉၸိူဝ်ႉၶိူဝ်းၼၢင်းယိင်းႁွမ်ၼႆႉ ဢွၼ်ၵၼ်မႆႈၸႂ် ၵဵဝ်ႇလူၺ်ႈလွင်ႈသိုၵ်း ၵဝ်ႈၵၢင်ႉ တီႉၺွပ်းၵုမ်းတူဝ်ဝႆႉၸိူင်ႉၼႆ ယွၼ်ႉမၼ်းၼၢင်း တိုၵ်ႉဢႃယုလဵၵ်ႉၵေႃႈ ပိူင်ၼိုင်ႈ၊ လွင်ႉႁူမ်ႇလူမ်ႈ လွင်ႈပၢႆးယူႇလီ မၼ်းၼၢင်းၵေႃႈပိူင်ၼိုင်ႈ ၵွပ်ႈၼႆလႄႈ တုၵ်းယွၼ်းထိုင် ၶႅၼ်းတေႃႈႁႂ်ႈပွႆႇပၼ် တူဝ်မၼ်း ၼၢင်းသေၵမ်း ဝႃႈၼႆ။

ပူၼ်ႉမႃး မိူဝ်ႈၼႂ်းလိူၼ်ၻီႊသႅမ်ႊပိူဝ်ႊ 2024 ၼၼ်ႉၵေႃႈ ဢွၼ်ႇယိင်း ဢႃယု 3 ၶူပ်ႇ ၵေႃႉၼိုင်ႈ ၺႃးလုၵ်ႈ ၸုမ်း သိုၵ်းၵဝ်ႈၵၢင်ႉ ၵေႃႉၼိုင်ႈ ၵၼ်ႉၸၼ်သေ ထိုင်မႃး ၼႂ်းႁၢင်လိူၼ်ၵျႅၼ်ႊၼိဝ်ႊရီႊ 2025 ၼႆႉ ယူႇတီႈ  သိုၵ်းၵဝ်ႈၵၢင်ႉၶဝ် လႆႈပၼ်တၢမ်ႇၶွၵ်ႈ ၵေႃႉပူၼ်ႉပႅၼ်ၼၼ်ႉၵႂႃႇတေႃႇၸူဝ်ႈ ဝႃႈၼႆ။

ယၢမ်းလဵဝ် ၼႂ်းဢိူင်ႇမိူင်းယေႃၼႆႉ ၼွၵ်ႈလိူဝ် သိုၵ်းၵဝ်ႈၵၢင်ႉ MNDAA တူင်ႉၼိုင်ၵႂႃႇမႃးယဝ်ႉ လိူဝ်ၼၼ်ႉ သိုၵ်းတဢၢင်း TNLA လႄႈ သိုၵ်းဝႃႉ UWSA ၸိူဝ်းၼႆႉၵေႃႈ တူင်ႉၼိုင်ၵႂႃႇမႃးယူႇဝႆႉ။